Заменик претседателот на Владата, Александар Николоски е во работна посета на Подгорица, Црна Гора, каде оствари средби со премиерот Милојко Спајиќ, вицепремиерот за европски и надоврешни работи, Филип Ивановиќ, како и со министерот за транспорт, Радош Зечевиќ.

Во продолжение интегралната изјава на заменик претседателот на Владата, Александар Николоски:

“Денеска сме во официјална посета во Подгорица, на Црна Гора, каде што имаме богата и продуктивна агенда. Остваривме средби со премиерот Милојко Спајиќ, со вицепремиерот Филип Ивановиќ, како и со министерот за сообраќај, Зечевиќ.

Разговаравме за блиската соработка којашто ја имаат Македонија и Црна Гора. Македонија и Црна Гора се две пријателски држави коишто имаат добра, одлична соработка.

Разговаравме за поврзувањето. Веќе почнавме да го градиме автопатот Скопје – Блаце, кој што значи отворање на Македонија кон трето пристаниште – тоа е отворање кон пристаништето Бар, покрај пристаништето Солун кон кое што имаме и автопатска и железничка конекција и покрај пристаништето Драч, каде што во моментот градиме и автопатска и железничка конекција. Исто така, со изградбата на автопатот од Скопје до Блаце зборуваме и за поврзување со пристаништето Бар.

Исто така, зборувавме и за авионското поврзување и очекувам во многу кратко време да се потпише договор којшто ќе значи директен лет помеѓу Скопје и Подгорица, со што ќе имаме уште еден главен град со којшто сме поврзани. Тоа многу ќе помогне за развојот на туризмот, но исто така и за развојот на бизнисот и конекцијата помеѓу двете држави. Аеродромите и во Скопје и во Подгорица растат и ова е добар начин да продолжиме да соработуваме и да продолжат да растат двата аеродроми.

Исто така, зборувавме за заеднички настап пред европските фондови и пред европските банки во делот на финансирањето, пред сè во делот на интелигентни транспортни системи и поврзување на коридорите, а зборувавме и за соработката помеѓу двете држави во делот на политиката и економијата.

Сè на сè, една плодна средба од којашто се враќаме дома со нова авиолинија, како и со убава вест дека автопатот којшто го градиме Скопје – Блаце ќе значи поврзување и со пристаништето Бар” – изјави Николоски.

По спектакуларното издание во Нови Пазар, регионалниот боксерски караван пристигнува во Македонија! Неготино ќе биде домаќин на „Balkan Boxing 13“, вечер посветена на професионалниот бокс, со амбиција да ги собере најдобрите боксери од регионот и да ѝ донесе на домашната публика вистински боксерски спектакл.

Настанот се организира под промоцијата „Balkan Boxing“, во партнерство со Здружението „Про Бокс Македонија“ (ПБМ) и градоначалничката на Општина Неготино, Марија Нацева.

На 31 октомври 2026 година, со почеток во 18:00 часот, спортската сала „Младост“ во Неготино ќе биде центарот на регионалниот професионален бокс. За првпат, најпрепознатливата промотерска куќа во регионот – „Balkan Boxing“ – ќе организира своја промоција во Македонија, отворајќи ново поглавје во развојот и промоцијата на професионалниот бокс во земјава.

По настаните во Белград, Сараево, Нови Пазар, Тутин и други градови од регионот, „Balkan Boxing“ продолжува да ја шири својата мрежа, а следната дестинација е токму Неготино!

Едно од имињата што веќе се најавени за „Balkan Boxing 13“ е македонскиот професионален боксер Матеј Чатлески, кој ќе има можност да настапи пред домашната публика и да го покаже својот квалитет во рингот.

Чатлески досега има три настапи во професионалниот бокс и три победи. На претходното издание на „Balkan Boxing 7“ во Бор славеше против Милош Јањанин, а пред тоа беше поуспешен и од Срѓан Зариќ и Стефан Марич.

Неговиот настап во Неготино е од особено значење за домашните љубители на професионалниот бокс, кои ќе имаат можност да поддржат македонски боксер на голем регионален настан.

Меѓу боксерите што ќе настапат е и Санел Хасановиќ, кој веќе настапи на „Balkan Boxing 10“ во Тутин, каде што го совлада Зоран Пауновиќ.

Со професионален биланс од десет победи, еден пораз и едно реми, Хасановиќ има значајно искуство, а дури осум од неговите победи се остварени со нокаут. Неговото враќање во рингот на „Balkan Boxing“ дополнително го зголемува интересот за претстојната боксерска вечер.

Најавата на првите боксери е само почеток! Во наредниот период се очекуваат и нови имиња на професионални боксери, меѓу кои се очекуваат и некои од најдобрите и најинтересните боксери од регионот.

Публиката во Неготино допрва ќе ги дознава имињата што ќе го комплетираат fight card-от, а дополнителните најави треба да го зголемат интересот за настанот. Се подготвува вечер во која професионалниот бокс ќе биде во преден план, со атрактивни дуели што ќе го привлечат вниманието на љубителите на овој спорт од Македонија и од соседните земји.

Со организацијата на „Balkan Boxing 13“, Неготино добива можност да се позиционира како нова дестинација на регионалната мапа на професионалниот бокс и да биде домаќин на голем настан што ги поврзува боксерите, публиката и професионалната боксерска сцена од Балканот.

Настанот е закажан за 31 октомври, од 18:00 часот, во спортската сала „Младост“ во Неготино.

Љубителите на професионалниот бокс ќе можат да го следат настанот преку Arena Fight, во соработка со Arena Channels Group, како и преку платформата Rutube.

Неготино е подготвено за професионален бокс! „Balkan Boxing 13“ доаѓа во Македонија – на 31 октомври, рингот ќе биде во центарот на вниманието!

По високата победа во воведното прво коло минатата недела во Гостивар, младинската екипа на Мега Баскет Прилеп, се подготвува за утрешното регионално дерби против Тиквеш.

Натпреварот се игра со почеток од 16:30 часот во спортската сала на ООУ “Добре Јованоски”, а дечките заслужуваат огромна поддршка на трибините.

Организирајте го друштвото и ајде на кошарка, да ги бодриме младите прилепски надежи и да уживаме заедно во нивните кошаркарски мајстории.

Катерина Јорданоски, членка на Карате клуб Бонсаи од Прилеп, ќе ја претставува Македонија на Светското првенство во карате, кое ќе се одржи од 14 до 18 октомври во Бјелско-Бјала, Полска.

Јорданоски ќе настапи во јуниорска категорија до 48 килограми, каде ќе ги одмери силите со најдобрите каратистки од целиот свет.

За Катерина ова претставува голем успех и признание за нејзината посветеност, труд и напорната работа, како и за КК Бонсаи, кој со гордост ја поддржува на овој голем спортски настан.

Од Карате клуб Бонсаи ѝ посакуваат успешен настап, многу среќа и одличен резултат на Светското првенство!

Претседателот на Владата Христијан Мицкоски при гостување на телевизијата Алсат М, прашан дали ќе има предвремени избори, уште еднаш повтори дека владата е избрана за мандат од четири години, но е подготвен за избори. Опозицијата, посочи во секое време може да поднесе барање за избори.

„Мојот став е јасен, ние сме влада избрани за мандат од 4 години и тука немаме никаква дилема и исто така неколку пати сум го повторил во јавноста дека здружената опозиција Левица, ДУИ, СДСМ можат секое време да поднесат барање. Политичар без разлика дали е во власт или во опозиција, без разлика, треба секогаш да ја подготвен за избори затоа што не се знае кога може да се да се случат“, посочи Мицкоски којшто го образложи со актуелниот овој момент.

„Еве сега имаме избори поради, за жал, трагично завршен живот на градоначалникот на Брвеница, во Брвеница. Не се знае што се може да се случи. Во политиката никогаш немојте да кажете никогаш. Но она коешто во моментот е моја порака е дека работиме за мандат од 4 години како коалициона влада во којашто се политичките партии ЗНАМ и ВЛЕН.“, одговори Мицкоски на гостувањето на телевизијата Алсат М.

Традиционално и оваа година, на 10 октомври 2026г. од 18.30 часот во Ликовната галерија ќе биде отворена изложбата на дела од ликовните уметници, членови на Друштвото за ликовни уметници од Прилеп – ДЛУП.

Со дела ќе се претстават уметниците: Филип Јовески, Марта Макеска, Методи Исков, Елена Димоска Николоска, Лепа Милошевска, Верче Николоска, Бојана Артиновска, Ангелка Башеска, Марјан Стојаноски, Кирил Гегоски, Емил Солески и Дарко Талески.

Изградбата на автопатот Прилеп–Битола се одвива со добра динамика, а првите 12 километри од вкупно 40 километри се очекува да бидат ставени во функција следната година. Ова го истакна заменик-претседателот на Владата и министер за транспорт, Александар Николоски, во поткастот „Каде се парите? со Горан Теменугов“, каде зборуваше и за преостанатото поврзување од Фариш до Прилеп.

Николоски посочи дека на оваа делница се применува поинаков пристап при изградбата што треба да придонесе за поголема стабилност.

„Прв пат во Македонија се работи автопат без земјена подлога, односно се поставува подлога од дробен камен, што значително ќе ја зголеми стабилноста на возењето. Истото ќе биде и на Кичево–Букојчани и на Скопје–Блаце“, изјави министерот.

Според Николоски, следната година треба да биде пуштен во употреба првиот сегмент од автопатот.

„Првите 12 километри од вкупно 40, на автопатот Прилеп–Битола ќе бидат ставени во функција следната година. Она што сега останува е делот од Фариш до Прилеп, затоа што автопатот почнува некаде на 9 километри над Прилеп и ќе останат 25 километри кои што не се решени. Тие 25 километри во моментов разговараме да изнајдеме решение да се градат како автопат или експресен пат“, посочи Николоски.

Прилеп–Битола е дел од поширокото инфраструктурно поврзување на регионот, а во изминатиот период беа пуштени во употреба и двете фази од експресниот пат Прилеп–Градско, односно делниците Градско–Дреново и Дреново–Фариш.

Директорот на КПД Прилеп, Емил Јанески, во рамки на институционалниот отчет на Движењето ЗНАМ – За наша Македонија ги презентираше мерките и активностите реализирани во прилепскиот казнено-поправен дом во изминатите две години.

Според Јанески и ЗНАМ, во овој период во установата биле преземени низа мерки насочени кон подобрување на безбедноста, условите за престој, здравствената заштита, работниот ангажман на осудените лица и условите за работа на вработените.

Како еден од клучните проблеми со кои установата се соочувала пред две години се посочува нарушената безбедносна состојба, поради која во април 2024 година вработените протестираа. Од ЗНАМ денес оценуваат дека по преземените мерки КПД Прилеп е меѓу побезбедните казнено-поправни установи во државата.

Покрај безбедноста, во отчетот се наведуваат и инвестиции и активности за подобрување на условите за престој. Реновирани биле санитарни јазли, обезбедена била топла вода преку соларни панели, а воведен бил и систем за ладење кој, според Јанески, користи природен ресурс од затворскиот бунар без дополнителен финансиски трошок за установата.

Во делот на здравствената заштита, од ЗНАМ посочуваат дека бил ангажиран лекар и биле вработени медицински сестри, додека со поставувањето телефонски говорници бил олеснет контактот на осудените лица со нивните семејства.

Посебен акцент во отчетот е ставен на работниот ангажман и ресоцијализацијата.

Според презентираните податоци, во КПД Прилеп функционираат фарми, се обработуваат околу 19 хектари земјоделски површини и работилници, а преку договори со компании и институции се овозможува дел од осудените лица да бидат работно ангажирани и надвор од установата.

Од ЗНАМ велат дека ваквиот пристап има за цел осудените лица да стекнуваат работни навики и вештини, што би им помогнало при нивната ресоцијализација и враќање во општеството.

Во отчетот е наведено и дека трошокот за исхрана на едно осудено лице изнесува околу 50 денари дневно.

Паралелно со активностите во установата, според Јанески, биле подобрени и условите за работа на затворската полиција, со обезбедување нови униформи и противпожарна опрема.

Емил Јанески беше именуван за в.д. директор на КПД Прилеп во јули 2024 година, а во март 2025 година Владата донесе решение со кое е именуван за директор на Казнено-поправниот дом Прилеп.

Од ЗНАМ порачуваат дека примерот со КПД Прилеп го гледаат како показател за нивниот пристап кон управувањето со институциите – преку подобрување на безбедноста, условите за престој и работа, рационално користење на ресурсите и создавање услови за ресоцијализација.

„Две години работа. Две години резултати“, е пораката со која ЗНАМ го заокружува отчетот на директорот Емил Јанески.

Министерот за внатрешни работи Панче Тошковски и претседателот на Републичкиот совет за безбедност на сообраќајот на патиштата (РСБСП), Горан Ангеловски, денеска присуствуваа на официјалното предавање на 33 нови полициски мотоцикли и комплетна заштитна опрема, обезбедени од РСБСП за потребите на Министерството за внатрешни работи.

Станува збор за 33 мотоцикли од марката „Piaggio Beverly 310 HPE“, во полициска изведба, и исто толку комплети мотоциклистичка опрема, кои вклучуваат заштитни кациги, јакни, панталони, чизми и летни и зимски ракавици. Вкупната вредност на набавката изнесува 16.845.561 денари, а новата опрема ќе придонесе за поголема мобилност, поефикасно регулирање на сообраќајот и подобри услови за работа на полициските службеници.

Министерот Тошковски истакна дека оваа набавка е уште еден конкретен резултат од успешната соработка меѓу МВР и РСБСП, институции кои имаат заедничка цел – континуирано унапредување на безбедноста во сообраќајот и намалување на бројот на сообраќајни незгоди и жртви на патиштата.

„Денеска не зборуваме само за 33 нови мотоцикли и опрема, туку за дополнително зајакнување на капацитетите на сообраќајната полиција и за уште еден чекор кон побезбедни патишта. Ова е пример како треба да функционира меѓу институционалната соработка – со конкретни проекти и резултати што граѓаните ќе ги почувствуваат. Заедно со Републичкиот совет за безбедност на сообраќајот на патиштата продолжуваме да вложуваме во опрема, технологии и превенција, затоа што безбедноста на секој учесник во сообраќајот е наша заедничка одговорност“, истакна министерот Тошковски.

Тој нагласи дека модернизацијата на сообраќајната полиција е дел од поширокиот пристап на Министерството за унапредување на сообраќајната безбедност, во кој значајно место има и системот „Безбеден град“.

„Со проектот ‘Безбеден град’ веќе покажавме дека современите технологии, доследното спроведување на законите и одговорното однесување на граѓаните можат да донесат вистински промени во сообраќајната култура. Резултатите што ги бележиме во намалувањето на бројот на сообраќајни незгоди, повредени и загинати лица ни даваат дополнителен мотив да продолжиме со уште поголем интензитет. Но, сакам да потенцирам нешто што е многу поважно од секоја статистика – зад секоја бројка стои човечки живот, нечие семејство, нечие дете, родител или пријател. Ако со сите овие мерки, со новата опрема, со ‘Безбеден град’ и со нашата секојдневна работа успееме да спасиме макар и еден човечки живот, тогаш секој вложен денар и секој вложен напор вределе. Тоа е суштината на нашата работа и најголемата мотивација да продолжиме“, порача Тошковски.

Претседателот на РСБСП, Горан Ангеловски, истакна дека Советот и оваа година, во рамки на своите законски надлежности, издвојува средства за модернизација и опремување на организациските единици на МВР задолжени за контрола и регулирање на сообраќајот.

„Во рамките на редовните активности за модернизација, со цел зголемување на безбедноста на сообраќајот на патиштата, Републичкиот совет и оваа година наменува дел од средствата за опремување на организациските единици на МВР задолжени за сообраќајна контрола. Со набавката на 33 полициски мотоцикли и комплетна мотоциклистичка опрема, во вкупна вредност од 16.845.561 денари, значително се зајакнуваат капацитетите за регулирање на сообраќајот и унапредување на безбедноста на патиштата. Овој пример уште еднаш ја потврдува вредноста на меѓу институционалната соработка“, истакна Ангеловски.

На крајот, министерот Тошковски и претседателот Ангеловски ја потврдија заедничката определба за продолжување и продлабочување на соработката меѓу МВР и РСБСП, преку нови инвестиции, превентивни активности и проекти насочени кон подигнување на сообраќајната култура.

Заедничката порака е дека безбедноста во сообраќајот не се постигнува со една мерка или една кампања, туку со постојана работа, современа опрема, ефикасна контрола и одговорност од сите учесници во сообраќајот. Крајната цел е јасна – помалку сообраќајни незгоди, помалку повредени и загинати и повеќе спасени човечки животи.

Од утре до средина на следната седмица под влијание на циклонска активност ќе има врнежи од дожд, локално пообилно.

Според УХМР, вкупно се очекува на повеќе места да наврнат над 20 л/м2 особено во недела.

Локално процесите ќе бидат во форма на невреме проследени со пороен дожд, засилен ветер и појава на грмежи. Во вторник под влијание на постуден бран врнежите на некои од повисоките планини ќе преминат во врнежи од снег.

Во Скопје, од утре до средината на следната седмица времето ќе биде променливо облачно со повремени врнежи од дожд. Во делови од котлината врнежите ќе бидат пообилни, проследени со појава на ретки грмежи.

Од понеделник ќе дува умерен до засилен северен ветер, а температурата ќе опадне.