Две девојчиња исчезнаа во центарот на Скопје.

На 08.05 во 15 часот и 50 минути две девојчиња, Антонија Јанкова – 12 години и Радмила Иванова – 14 години се упатиле од ВЕРО Џамбо кон Центар по што им се губи трагата, објави на Фејсбук Александра Јанкова.

Се замолуваат сите кои ќе ги забележат девојчињата да го контактираат Министерството за внатрешни работи.

Денеска на Економскиот факултет во Прилеп се одржа натпревар од областа на циркуларната економија за учениците од средните општински училишта од Пелагонискиот регион.

На натпреварот учествуваа 22 тимови, односно 88 ученици од средните училишта. На победничкиот тим, учениците од СОУ “Ѓорче Петров” – Прилеп под менторство на проф. Христина Петковска Димеска, им беше доделена награда во износ од 10.000 денари.

Покрај наградата од Економскиот факултет-Прилеп, на учесниците од победничкиот тим им беа врачени и ваучери од Пакомак во вредност од по 2000 денари за секој учесник, односно вкупната награда за тимот е во вредност од 10.000 денари.

Борачките од “7-ми Мај – Златна рака”, Ангела Трајкоска и Елена Дејкоска, по којзнае кој пат не’ направија горди како прилепчани и Македонци, а причина за тоа овојпат се успесите кои девојките ги забележаа на Балканското првенство за кадети и јуниори, кое изминатите денови се одржа во соседна Грција.

Ангела освои бронза и злато, а Елена се закити со бронза. Настап на Балканското првенство имаше и Тамара Цветкоска која за жал загуби во борбата за трето место.

Вечерва девојките се вратија во Прилеп, а од клубот беа дочекани со шампионски шпалир и бакљи.

Регулаторната комисија за енергетика и водни услуги на Република Македонија донесе Одлука со која се врши намалување на малопродажните цени на нафтените деривати во просек за 0,92% во однос на одлуката од 5.5.2023 година.

Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 1,392%, кај дизелот за 0,874%, кај екстра лесното масло за 0,827% и кај мазутот намалувањето е за 1,482%.

Курсот на денарот во однос на доларот во изминатиот период по кој беа формирани цените со претходната пресметка е понизок за 0,05%

Малопродажната цена на бензинот ЕУРОСУПЕР БС-95 се намалува за 1,00 ден/лит, додека малопродажните цени на бензинот ЕУРОСУПЕР БС-98, како и на ЕУРОДИЗЕЛ (Д-Е V) и на Екстра лесното масло за домаќинство на (ЕЛ-1) се намалуваат за 0,50 ден/лит.

Малопродажната цена на Мазутот М-1 НС се намалува за 0,465 ден/кг и сега ќе изнесува 39,155 ден/кг.

Од 9.5.2023 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС – 95 77,00 (денари/литар)
Моторен бензин ЕУРОСУПЕР БС – 98 79,50 (денари/литар)
Дизел гориво ЕУРОДИЗЕЛ БС (Д-Е V) 66,50 (денари/литар)
Масло за горење Екстра лесно 1 (ЕЛ-1) 65,50 (денари/литар)
Мазут М-1 НС 39,155 (денари/килограм)

-Напоменуваме дека ова се максималните цени на нафтените деривати од 00:01 часот на 9.5.2023 година. Трговците на големо и трговците на мало со нафтени деривати и горива за транспорт можат да ги формираат цените на одделни нафтени деривати и горива за транспорт и пониско од највисоките утврдени цени, велат од Регулаторна.

СВР Битола поднесе кривична пријава против М.А.(24)од Битола поради постоење основи на сомнение дека во периодот од септември 2022 година до почетокот на мај оваа година неовластено следел и настојувал да оствари контакт со битолчанка – информираат од МВР.

Задолжителен тест на дрога кај средношколците и кај учениците од деветто одделение, контрола на оружјето што го имаат граѓаните, анализа на казните за извршителите на насилство и контрола на интернет-провајдерите се меѓу мерките што денес ги претстави професорот Марјан Ѓуровски како дел од предлозите за зголемување на безбедноста во училиштата. Тој заедно со тим професори од Филозофскиот факултет го спроведува научноистражувачкиот проект „Безбедноста во училиштата – градење механизми на превенција од ризици и рано предупредување“, со кој, како што нагласи, Универзитетот „Кирил и Методиј“ ја става во прилог на праксата за градење механизми за рано предупредување за насилство, особено по убиствата во Србија.

„Предлагаме да се размисли за воведување задолжителен тест кај учениците од средно образование и кај учениците од деветто одделение на дрога и наркотични средства, и тоа еднаш-двапати во текот на училишната година. Сакаме да им предложиме на институциите серија мерки не само за Министерството за образование и наука туку и, за пример, од Министерството за внатрешни работи. Дополнително, треба да се ангажира Министерството за внатрешни работи да направи контрола на лесното и мало оружје што го поседуваат граѓаните. Сега е моментот кога се врши пререгистрација на дозволите на граѓаните и мора да се зајакнат контролата на начинот на чување на оружјето и почитувањето на регулативата кај стрелиштата. Потребна е и посебна регулатива за тоа кој може да поседува лесно и мало оружје, но и начинот како тие ќе се користат. Предлагаме Министерството за правда да направи анализа на казнената регулатива во делот на политиката за извршителите на насилство, но и во делот на казнената регулатива на оние што не постапуваат во однос на одговорностите што ги имаат за справување со безбедноста“, рече Ѓуровски.

Тој најави дека со интердисциплинарниот пристап на проблемот ќе бидат направени прирачници, но и механизми, а еден од предлозите е и да се дојде до национална платформа за безбедносна култура, превенција и рано предупредување за сите видови насилство кај децата и младите.

Ѓуровски вели во соработка со Бирото за развој на образованието има предлог да се разгледа можноста за развој на предметна програма од областа на безбедносната култура во основното, средното и во високото образование, каде што би било и справувањето со природните катастрофи, со сајбер-безбедноста, но и со насилството.

Министерот за образование, пак, Јетон Шаќири, рече дека во фаза на изработка се правилници, протоколи и платформа, но првите препораки до сите училишта ќе бидат доставени до крајот на неделава за превенирање и постапување во случај на насилство, а ќе се разгледа можноста за начинот на ограничување на социјалните мрежи.

Македонскиот филм „Најсреќниот човек на светот“, во режија на Теона Стругар – Митевска во кино “Мис Стон” – денеска (8 мај 2023) со почеток од 20.00 ч.

Филмот имаше премиера лани и беше избран за македонски кандидат за Оскар во категоријата најдобар меѓународен филм. Филмот е копродукција помеѓу Македонија, Словенија, Хрватска, Белгија, БиХ и Данска.

режија: Теона Стругар Митевска

улоги: Ирма Алимановиќ, Изудин Бајровиќ, Ведрана Божиновиќ, Јелена Кодриќ, Ана Костовска, Николина Кујача, Лабина Митевска, Ксенија Маринковиќ, Мона Муратовиќ, Аднан Омеровиќ, Кемал Ризвановиќ, Синиша Видовиќ

времетраење: 100′

земја: Македонија, Данска, Белгија, Словенија, Хрватска, Босна и Херцеговина

жанр: Драма

продукција: Сестри и браќа Митевски

Возрасна категорија: 12+

Кратка содржина

Асја е 40 годишна самостојна жена која живее во Сараево. Таа го запознава Зоран, 43 годишен банкар на настан за состаноци. Но Зоран не е таму за да ја пронајде љубовта на неговиот живот, туку прошка. За време на војната во 1993 Зоран пукал врз градот од спротивната страна и сака да ја запознае неговата прва жртва. Сега, двајцата ќе треба повторно да ја преживуваат болката во нивната потрага по прошка.

Ракометарите на Прилеп и Јуниор Кисела Вода ги поделија бодовите во натпреварот од „плеј-аутот“ на македонската Суперлига. Мечот заврши со резултат 24-24 (11-11 на полувремето), резултат кој се чини дека е најреален, иако прилепчани очекуваа сигурни три бода од овој натпревар и обезбедување на сигурен опстанок во ракометната Супер лига.

Иако Прилеп имаше водство во првото полувреме и со три гола разлика во еден момент, гостите од Кисела Вода заиграа поцврсто во финишот на полувремето, па на пауза се замина со нерешен резултат.

Во вториот дел Јуниор играше уште подобро, па во еден момент имаа и водство од 22:24, но за среќа Прилеп возврати со два гола во последните минути, а голот за изедначување го постигна Христи Бикоски, буквално во последните секунди од натпреварот.

На две кола до крајот прилепчани имаат 21 бод на петтото место на табелата. До крајот избраниците на Реваз Чантурија играат со Куманово на гости и Голден Арт на домашен терен.

Општина Битола е подготвена за реализација на уште еден голем инфраструктурен проект, предвиден за оваа градежна сезона. Согласно подготвената проектна документација и склучениот договор наскоро ќе започнат работните активности со кои Битола ќе добие нов кружен тек на улица „Прилепска“ со улица „Баталјон Стив Наумов“ (место викано кај Ветеринарната станица) – информираат од општина Битола.

-Предвидените средства за оваа намена се во износ од 11.790.640 денари, во кои е вклучена канализациона мрежа, коловоз и улично осветлување. Со завршувањето на овој проект, ќе се промени и режимот на сообраќај во овој дел на градот од крстосница со сигнализација во крстосница со кружен тек на која ќе биде поставен и споменикот на Александар Турунџев – стои во соопштението од општина Битола.

Извидничкиот одред „Феникс” од Прилеп по петти пат го организираше настанот „Фениксија”, кој се одржа во с.Штавица.

На настанот присуствуваа 150 извидници од цела Македонија. Истиот траеше 3 дена, а извидниците имаа можност да учествуваат во активности од натпреварувачки и едукативен карактер.

Во време на подем на извидништвото во Македонија, Извидничкиот одред „Феникс” претставува еден од најактивните извиднички одреди во Македонија, кој редовно организира настани и активности за младите.