Харизматичниот секирџија од Прилеп, Зоран Михајлоски

DSC02116

Мајстор Зоран Михајлоски е еден од ретките занаетчии и еден од два-тројцата останати секирџии во Прилеп и прилепската чаршија. 16 години се занимава со занаетот кој го наследил од таткото на неговата сопруга. Во дуќанот кој се наоѓа во улицата на бочварите, во старата прилепска чаршија, секојдневно се слуша звукот на чеканот и одекнувањето на наковалната од неговиот дуќан. Жешкиот челик го обликува со големо задоволство и прави одличен продукт кој е потребен во секое семејство.

DSC02120

DSC02117

DSC02118

DSC02119

Не пречека расположен за разговор и ни ги откри тајните на овој занает. Вели дека е четврта генерација, што го превзема занаетот и се надева дека ќе пробуди интерес кај некого и понатаму.

Си ја сака работата и она што го има, или како што вели 99,9% е задоволен од својата работа и од тоа што во едно вакво модерно време постои како занаетчија.

Мајстор Зоран не се пожали ни од заработката. Скромно одговори дека за еден среден, солиден живот се заработува. Никогаш не бил насочен кон големо имање, туку кон она што го прави среќен.

DSC02123

DSC02122

Секирите се изработуваат главно од челик, кој е најважниот, број еден материјал, и во мала доза железо, а временската рамка за изработка на една секира е од 5 до 6 саати активна работа, но пред се зависи од големината на истата.

Ги разгледавме и алатите за изработка, каде чеканот и наковалната се на средишно место поставени и ја играат главната улога при обликувањето на металот. Напоредно како пропратни алати се користат: брусалици, менгеме, точило, дупчалка, камен. Тука не смеат да се заборават огнот за ложење на металот и водата за негово ладење после обликувањето.

Насочен е единствено кон изработка на секири, но вели дека прави и ситни поправки на други алати.

DSC02126

DSC02124

DSC02125

За Прилепчани вели дека имаат мукает да купат секира, бидејќи сме град во кој огревното дрво е главен ресурс за затоплување во зимата. Сепак негови најредовни потрошувачи се граѓани од постарата популација.

DSC02132

DSC02129

За него ниту државата, па ниту општината не се криви поради немањето интерес кај младите за занает. Смета дека нема што многу да се направи на ова поле и да се привлече интерес. Едноставно младите тоа не ги интересира. Вели дека ниту едно дете до сега не дошло и не побарало да го научи занаетот. Ни раскажа за една случка што се случила пред неколку години, кога кај неговиот дедо дошло едно дете со желба да учи, но истото напуштило после два нецели дена, низ смеа говореше мајстор Зоран.

 

DSC02134

DSC02135

DSC02136

Се надеваме дека на најсоодветен начин ви ја пренесовме енергијата и еланот за работа што ги има овој човек. Ние сме среќни што имавме прилика да разговараме и што запознавме еден исполнет со харизма и расположение човек.

 

Подготви: Александар Георгиоски




Markukule.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.