Министерката за одбрана Славјанка Петровска од утрово се наоѓа во посета на Украина во знак, како што е наведено во соопштението, на поддршка на украинското лидерство и на украинските граѓани во борбата за одбрана на својата земја и зачувување на својот суверенитет.
Петровска на средбите со претставници на официјален Киев ќе го пренесе ставот кој Македонија го имаше од самиот почеток на руската агресија, а тој став, како што нагласува Министерството за одбрана преку соопштението, е дека целосно го поддржува украинскиот суверенитет во своите меѓународно признати граници и дава поддршка на правото на Украина за самоодбрана.
„Воените дејствија, уништувањата и страдањата на украинскиот народ мора веднаш да запрат“. Министерката Петровска во Украина лично ќе се запознае со последиците од уништување и разорување предизвикани од руската агресија, а од претставниците на официјален Киев одблиску ќе се информира за состојбата на теренот“, пишува во соопштението за посетата на Киев.