Сестрите од Прилеп Маријана и Мишела Димоски, заедно со Кирјана Камческа го освоија сребрениот медал на Светското карате првентство за кадети, јуниори и јуниори до 21 година, во Џакарта, Индонезија. Ова е најголемиот успех за Македонија на вакво натпреварување и огромен успех за македонскиот спорт воопшто. Предводени од тренерот на репрезентацијата Златко Димоски, ката тимот на Македонската репрезентација ја донесе најголемата радост и испиша историски момент за карате спортот во Македонија.
До финалето нашиот тим стигна преку победите над силната репрезентација на Шпанија со резултат 3-2, потоа го совлада Иран со 5-0, а во полуфиналето ја победија фаворизираната екипа на Германија со резултат 3-2. Во финалето нашите репрезентативки загубија од Франција со 4-1.
Им посакуваме уште поголеми успеси во иднина, овие девојки се гордост како на нашиот град така и на целата спортска сцена во Македонија.