Левица Прилеп побара вонреден инспекциски надзор во “Гентерм”: Добиле дојави за кршeње на работничките права

По анонимни дојави од неколку вработени во фабриката Гентерм, пред неколку дена ЛО Левица Прилеп испрати последно предупредување за прекин на незаконитото сменско работење со кое се предизвикува директна штета по здравјето на вработените а воедно се кршат и нивните работнички права – пишуваат од општинската организација на политичката партија Левица од Прилеп.

Соопштението од партијата го пренесуваме во целост во продолжение:

До нас беше пријавено дека од страна на раководството, вработените биле условувани со наводно задолжително одење на работа во сабота, примале закани со казни, биле присилувани да одат од трета смена во петок па во сабота втора смена која траела 10 часа и слично.

Според анонимната пријава, дополнително била креирана и друга смена во недела од 01:00 часот по полноќ до 06:00 часот и било барано веднаш да се вратат во понеделник на редовна смена. Следната пријава гласеше дека наводно во фирмата се откажале од праксата работниците да одат од 3-та па 2-ра смена но саботната смена од десет часа сѐ уште ќе се работела.

Инаку фабриката Гентерм Македонија ДООЕЛ е на листата компании на кои во минатото властите им одобрија државна помош, меѓутоа сумата не беше позната. Своевремено, според решението објавено од Комисијата за заштита на конкуренцијата, оваа компанија добила „грант во готовина во висина од XXX евра за покривање на трошоците за изградба на објектот и за креирање на XXX нови работни места“.

Освен паричната помош, Гентерм ги имаше добиено и сите други даночни и царински ослободувања што им ги даваше државата на странските компании во технолошко индустриските развојни зони.

ЛО Левица Прилеп како партија на народот и работниците ги повикува сите надлежни инспекции да ги констатираат евентуалните прекршувања на законот и истите да бидат казнети.
Секогаш во полза на граѓаните!




Markukule.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.