Граѓанското здружение „Блаже Конески“ денеска повторно протестираше пред Министерството за надворешни работи против договорот за добрососедство Владата на Зоран Заев треба да го потпише со Бугарија.
-Наместо да потпишувате договор, одведете го вашиот пријател Борисов на гробовите на хероите, да им се извини, со што би започнал процесот на спријателување. Се друго е силување и понижување на македонскиот народ, му порача Љубомир Сенковски од Здружението на Заев.
Тие пред МНР оставија три неотворени канти со боја, бела, зелена и црвена.
-Неотворени – не затоа што се плашиме од вашата казна од 400 евра. Казната што ни ја изрекувате нас е незначителна во однос на казната што и ја наметнувате на Република Македонија и македонскиот народ. Неотворени – за да можете самиот да ги отворите кога ќе го потпишете договорот, ако го потпишете, и да го обоите своето лице со боите на саканата ви држава, му порача Сенковски на Заев.
Вели дека човек некогаш лесно или под влијание на други, а можеби и несвесно станува предавник на својот народ, но како што рече, предавството никогаш не застарува.
-Сакаме да ве прашаме дали Христијан Тодоровски-Карпош, Раде Јовчевски-Корчагин, Мирче Ацев, Вано Гунев, Благоја Давков, Орце Николов, Боро Петрушевски, Борка Талевска, Вера Циривири-Трена, Страшо Пинџур, Васил Антевски-Дрен, Невена Георгиева-Дуња, Диме Поп Атанасов, Фруса Чедомирова, Владо Тасевски, Никола Парапунов, Перо Наков, Цветан Димов, Блажо Димитровски, Дане Крапчев, Коле Неделковски, Ѓорѓи Наумов, Стив Наумов и Кузман Јосифовски-Питу се дел од заедничката историја на Македонците и Бугарите, прашува Сенковски.
Додаде дека е срамно да се изедначуваат жртвите и џелатите.
Од Здружението велат дека и понатаму ќе продолжат со своите активности и оти ќе продолжат да го искажуваат револтот поради договорот за добрососедство. Посочија дека и за време на попишувањето тие ќе протестираат, но и по потпишувањето на договорот.
Извор: Курир
