Убави вести од Зоолошката градина во Битола. Благодарение на успешната соработка и пријателството со Зоолошката градина во Белград, зоо-семејството во Битола е побогато со неколку нови и интересни животински видови.
Во нивните нови живеалишта пристигнаа сервал, був, свет ибис, берберска овца и американски ракун, кои отсега ќе бидат дел од животинскиот свет што посетителите можат да го запознаат во битолската зоолошка градина.
Новите жители успешно го поминале транспортот, веќе се сместени во своите живеалишта и се под постојан надзор на ветеринарниот тим.
Од Зоолошката градина посочуваат дека меѓуинституционалната соработка и размената со други зоолошки градини се особено важни за збогатување на животинскиот фонд, подобрување на условите за животните и унапредување на едукативната улога на установата.
Воедно, упатија благодарност до тимот на Зоолошката градина во Белград за успешната соработка и поддршката.
Новите жители се и одличен повод за посета, па од Зоолошката градина во Битола ги покануваат граѓаните и најмладите овој викенд да прошетаат низ нивниот простор и лично да им посакаат добредојде на новите животински жители.