Гинис го потврди историскиот подвиг на Сашко Кедев: Македонецот е најстариот алпинист кој ги искачил сите 14 врвови над 8.000 метри!

Историскиот подвиг на македонскиот кардиолог и алпинист д-р Сашко Кедев доби официјално признание од Гинисовата книга на рекорди. Кедев е впишан како најстар алпинист кој ги искачил сите 14 планински врвови во светот повисоки од 8.000 метри, со вистински искачувања до нивните највисоки точки.

Овој извонреден успех го комплетираше на 20 јули 2025 година, кога го освои Гашербрум I, висок 8.080 метри. Тогаш имаше 63 години и 14 дена, со што постави рекорд кој сега е официјално потврден од Гинис.

Во продолжение, пренесуваме што објави Гинисовата книга на рекорди на својата официјална веб-страница:

Најстар алпинист кој ги искачил сите 14 планини повисоки од 8.000 метри
Најстариот алпинист кој ги искачил сите 14 планини повисоки од 8.000 метри, достигнувајќи ги нивните вистински највисоки точки, е Сашко Кедев (Северна Македонија, роден на 6 јули 1962 година).

Тој го комплетирал овој предизвик на 20 јули 2025 година, на возраст од 63 години и 14 дена, кога го достигнал врвот на Гашербрум I.

Д-р Кедев е исто така најстарата личност која ги искачила сите 14 осумилјадници и највисоките врвови на седумте континенти, познати како „Seven Summits“.

Највисоките точки на сите седум континенти ги освоил во периодот од 14 јануари 2008 година, кога го искачил Аконкагва во Јужна Америка, до 6 ноември 2011 година, кога го освоил Пункак Џаја (познат и како Карстензова пирамида) во Океанија.

Четиринаесетте осумилјадници и датумите на нивното искачување:

-Еверест – 19 мај 2009 година

-Гашербрум I – 20 јули 2025 година

Рекордот е потврден од консултантот на Гинисовата книга на рекорди за алпинизам, Еберхард Јургалски.

Со ова признание, името на Сашко Кедев добива свое место во светската историја на алпинизмот, а Македонија уште еднаш добива причина да се гордее со достигнување од светски размери.