РК Прилеп го освои третото место на 54. издание на Струшкиот турнир, откако во драматичен натпревар пред полни трибини на игралиштето „Горан Попоски – Бабец“ ја совлада Струга со 30:29.
Прилепчани одлично го отворија натпреварот и уште од самиот почеток ја презедоа контролата над резултатот. На полувреме заминаа со предност од 16:14, а во вториот дел продолжија во ист ритам.
Особено се истакна голманот Трајкоски, кој со одличните интервенции го одржуваше својот тим во предност. Прилеп во еден момент стигна и до убедливи плус осум, 24:16, но Струга не се предаде и во финишот успеа да се доближи на само еден гол разлика.
Сепак, прилепските ракометари покажаа карактер и смиреност во клучните моменти, ја сочуваа предноста и заслужено стигнаа до победата. Трајкоски натпреварот го заврши со вкупно 14 одбрани.
Со освоеното трето место, РК Прилеп испрати одличен сигнал на стартот на сезоната 2026/2027. Екипата покажа борбеност, заедништво и карактер, а добриот настап во Струга носи дополнителна самодоверба пред предизвиците кои следуваат.
Следен предизвик за прилепскиот состав е Меморијалниот турнир „Миле Нешкоски“ во Прилеп, каде што ракометарите ќе имаат можност да настапат пред својата публика.
Пред РК Прилеп е уште една тешка и предизвикувачка сезона, но бронзата од Струга е одлична најава дека екипата е подготвена да се бори за подобри резултати.