За прв пат во Прилеп, а втор пат во Македонија, денеска на одделението за ортопедија и трауматологија при прилепската болница “Борка Талески”, се направи артропластика на главата на радиусот кај 37-годишен пациент, кај кој после скршеницата во предел на лактот имаше нефункционалност на зглобот, со ограничени движења и потешкотии во движењето на раката.

Операцијата која беше извршена под водство на д-р Кире Јоноски и д-р Игор Мерџаноски, како и помошниот медицински персонал, отвара ново поле за работа во болницата во Прилеп, со цел воведување на нови современи техники во третман на пациентите.

-Oперативниот тек помина уредно, пациентот се чувствува добро, функцијата на ракате е вратена по поставената протеза на радиусот. Тимот од ортопедско-трауматолошкото одделение се надева дека со континуирана едукација и воведување на вакви нови методи на лекување, во иднина ќе придонесеме за што поголем број задоволни пациенти, кои ќе можат да бидат третирани тука на нашиот оддел, а со цел да се избегнат дополнителните трошоци за пациентите, кои досега за ваква проблематика беа упатувани во клиниките во Скопје и во странски центи, истакна Д-р Кире Јоноски.

Од болницата информираат дека веќе наредната недела, во Прилеп за прв пат ќе се изврши операција на рбетен столб.

Едно од најпрепознатливите места во Прилеп, Брос, овој викенд го одбележува својот 4-ти роденден со дводневна роденденска прослава која ветува незаборавна атмосфера, жива музика и вистински ноќен хаос.

Во изминатите четири години, „Брос“ се изгради како култно место за младите (и оние што се чувствуваат така), каде добрата храна, креативниот амбиент и енергичните викенд журки се рецепт за успешна приказна. Од street food мени до тематските забави и викенд настани – Брос стана повеќе од бар, тој стана симбол на новиот урбан дух во Прилеп.

🎉 Програмата за роденденот ќе биде со нашите најпознати прилепски артисти:

● Петок (13 јуни): На сцената ќе настапат The Hounds, бенд познат по својот моќен рок звук и неверојатна енергија во живо.

● Сабота (14 јуни): Ќе настапи електронското дуо Cyrillic, ветувајќи ноќ со моќен сет и незапирлива енергија.

View this post on Instagram

A post shared by Bros’ (@brosburgers.mk)

„Не сакаме само да славиме роденден – сакаме да создадеме ноќ за паметење. Секој што некогаш влегол во Брос знае дека тука се живее моментот. Овој викенд е токму тоа – заеднички момент со сите наши луѓе,“ велат од тимот на Брос.

Почетокот е закажан во 21:00 часот и важи едно правило – сите се добредојдени, но местата се пополнуваат брзо.

Четири години, безброј приказни – Брос ве повикува на роденденска забава каде ќе се пее, ќе се пие и ќе се слави онаму каде што животот пулсира најсилно – во срцето на Прилеп.

На 14 јуни 2025/ сабота/ од 20.00 ч. во големата сала од ЦК „Марко Цепенков“ целовечерен концерт ќе одржи групата „Чалгија саунд систем“. Влезот за концертот е слободен.

Бендот Чалгија саунд систем постои од 2008 година со една цел: да истражува низ оставнината на македонската музика, да ги открие нејзините скриени тајни и звуци и да се вложи одржувајќи ја во добра форма македонската чалгија без да се изневери традицијата. Во таквото музицирање и растење, Чалгија саунд систем како да ја откри најважаната тајна која ја носи во себе чалгијата – а таа е одлепувањето од индивидуализмот и залепувањето за заедничкото убаво и добро.

Бендот првиот албум го објави во 2010 година со истоимен албум во кој беа без никакво двоумење отсвирени и отпеaни некои од најубавите македонски чалгиски песни.

Созревајќи, во 2019 год, бендот го издаде својот втор албум именувајќи го „Тихувај“ како провокација за авторски поглед на нова чалгија во која беа вметнати современи звуци.

Летото 2023 Чалгија саунд систем направи омаж на еден од последните охридски трубадури – Климе Садило изведувајќи ги неговите незаборавни виолински делници без никакви додавки или преаранжирања положувајќи го тестот на строгата охридска публика.

Чалгија саунд систем е бенд кој уште од почетокот наиде на одличен прием во Македонија остварувајќи со тоа огромен број концертни настапи насекаде.

Но Чалгија саунд систем ги пренесува звуците на чалгијата и низ светот одржувајќи концерти во Турција, Грција, Србија, како и на еден од најголемите фестивали на музика на светот во Рудлштад, Германија каде во 2022 година ја делеше сцената со најголемите ѕвезди на балканските и светските простори, што од жанрот ворлд музика, што од рокенрол фелата.

Понеделник е – време е да си ја резервираш средата.

Само 2 дена до after-work на кој парите, финтекот и вистинските одговори ќе се сретнат на исто место.

„Во што да вложиш кога животот ти е инфлација?“
📍 Qworkingo – Coworking Space Bitola
🕔 11 јуни, 17:00 часот

Парите не остануваат долго ако не се вложат паметно.

Прашањето не е дали ќе заминат – туку каде прво одат.

А, која е технологијата зад тоа вложување? Што е финтек и како P2P го трасира патот за финтек-индустријата во Македонија?

Ако барем едно од овие прашања ти е нерешена енигма, сврати на after-work што не зборува со spreadsheets, туку со вистина и хумор.

Теодор Тодоровски од P2P ќе објасни каде и како да инвестираш – ако не сакаш само да штедиш за лекови во староста.

А потоа?

Краток курс за инвестирање. Долг after-taste.

Дегустација на одбрани вина и разговори што вредат.

Нема крај на изненадувањата во Bonatti. Во пресрет на летните одмори подновете се со нешто уникатно и  удобно. До 16.06. имаат попусти и до -40% на одредени производи!

Посетете го продажниот салон на Bonatti во Прилеп на бул. “Гоце Делчев” бр. 6-3, наспроти “Ла Страда” и изберете нешто убаво и квалитетно за себе или за вашите најблиски.

Во продолжение погледнете само дел од широкиот асортиман на производи, кој вклучува долна облека, пижами, аксесоари и други модни детали.

Синоќа, Платото пред Офицерскиот дом, каде што се одржа големата прослава по повод освојувањето на шампионската титула од страна на РК Еурофарм Пелистер, беше центарот на радоста и спортскиот дух на Битола. Голем број битолчани, верни навивачи, припадници на навивачката група Чкембари, како и бројни љубители на ракометот, се собраа заедно да го одбележат овој историски успех.

Настанот помина во извонредна атмосфера, исполнета со навивачки песни и голема позитивна енергија. Специјален придонес во забавниот дел на програмата дадоа музичките настапи на „Brass Brothers“ и популарниот пејач Димитар Андоновски, кои со своите изведби ја зголемија еуфоријата и донесоа дополнителна магија на вечерта.

Градоначалникот на општина Битола, Тони Коњановски, им се обрати на присутните, изразувајќи искрени честитки до ракометарите, стручниот штаб и управата на клубот. Тој се заблагодари за нивната посветеност и професионализам, истакнувајќи дека со овој успех Битола уште еднаш докажа дека е вистински спортски град со огромен потенцијал и традиција во ракометот.

-Оваа вечер беше многу повеќе од прослава – таа беше симбол на заедништвото, страста кон спортот и гордоста на градот што стои зад своите шампиони – велат од општина Битола.

Во организација на Извидничкиот одред „Димитар Влахов“ од Велес, годинава по 25-ти пат ќе се оддржи уникатната Вардарска регата – шестдневно авантуристичко патување по реката Вардар, кое ги спојува природната убавина, историјата и пријателствата низ границите.

Минатата 2025-та година, учесниците запловија на 19-ти јуни од Македонија, а на 24-ти јуни пристигнаа во Солун, преминувајќи вкупно 280 километри од кои 80 километри низ територијата на Грција.

Оваа регата не е само спортски настан – тоа е жив споменик на велешката традиција, на гемиџиите кои со своите пловила столетја наназад тргувале по течението на Вардар. Од времето кога турската патарина ги принудила трговците да ја бараат реката како слободен пат, па сè до денешната еко-авантура – Вардар останува сведок на истрајноста и духот на велешани.

“Ќе запловиме десет пловила се надеваме дека нема да пловиме, веславме по високи температури и по 50 степени на сонце и жега, но сепак треба да се весла, благодарност за централите на ЕСМ кои ни се ветер во грб и ни овозможуваат добар водостој на Вардар. Тоа што за нас беше несфалтиво и што не можевме да веруваме, дека реката Вардар е една низ Македонија, друга низ Грција. Во Евозни се сретнуваме со река Вардар, која е непозната за нас. Таму не среќаваме ниту пластично чише, ниту отпад како што во Македонија по големите дождовите. Реката низ Грција е максимално еколошки заштитена, немаше отпадна, индустриска вода насочена во неа. Сепарации какви што гледаме тука не постојат, таму е друга технологија, која не го менува текот на реката, не ја уништува“, кажа Ангелче Гушев, организатор и капетан на Вардарската регата, 25-та годинава по ред.

“Од клучно значење за оваа мисија се и грчките извидници од Солун, кои веќе пет месеци претходно со велешките извидници го координираа секој чекор од регатата. Тие обезбедија сместување, храна, вода, логистика – но и нешто уште поважно: пријателска рака, соработка и почит.„Голема чест е да ја завршиме регатата во нивната база во Солун“, додава Гушев.

Во завршницата, регатата поминува низ делтата на Вардар – заштитен птичји резерват каде што во јуни се одвива размножувањето. Тука учесниците со посебна грижа го почитуваа природниот баланс, покажувајќи дека вистинската авантура не се мери само во километри, туку и во односот кон природата.

Регатата не е само патување по вода – туку враќање кон корените. Велешките гемиџии, трговци од 18-ти и 19-ти век, ги полнеле гемиите со уникатни продукти како шарлаган (масло од афион), катран (фармацевтски изцедок) и сахтијан (козја кожа за луксузна облека). Гемијата, водена од четворица гемиџии, пловела кон Солун, каде што во близина на црквата Св. Ѓорѓија се вршел претовар за натамошен пат кон Мала Азија и Европа. „Мангалот“ на носот на гемијата бил симбол на живот и отпор – светло во ноќта и топлина во студот. Гемиџиите биле не само трговци, туку и чувари, храбри луѓе кои го бранеле својот товар и пат од грабежи и препреки.

Во време кога луѓето забораваат на реките, Вардарската регата нè потсетува дека водата не е само природен ресурс, туку жива врска помеѓу култури, генерации и народи. Таа е мост – од Велес до Солун, од традиција до современост, од борба до заедништво. И следната година, повторно по патот на гемиите.

Александар Нацев осомничен за трагедијата во „Пулс“ – обвинителството го смета за „реален сопственик“ на фирмата за обезбедување
По претреси во Скопје и Пробиштип одземена е обемна документација.

“Лицето е лишено од слобода и со оглед на сите околности и законски основи, јавниот обвинител денеска до судијата на претходна постапка од Основниот кривичен суд Кочани ќе достави предлог за определување мерка притвор”, соопштија од Обвинителството.

Тие ќе произнесоа деталите.

“Без да имаат договор со клубот ‘Кабаре ПУЛС’ Кочани, во текот на 2025 година незаконски вршеле обезбедување на објектот. Новоосомничениот активно раководел со ова обезбедување, спротивно на Законот за приватно обезбедување – без безбедносна проценка, план, проверка за противпожарна заштита и услови за евакуација. Во ноќта на пожарот, не го контролирале влезот, дозволиле присуство на малолетни лица, преполнетост на објектот и внес на пиротехника од музичката група, што довело до пожар во кој загинаа 62 лица, 157 беа тешко повредени, а 54 со полесни повреди”, информираат од Обвинителството.

Претходно, Александар Нацев негираше вина и поврзаност со случајот.

“Сочувство до фамилиите на сите 59 трагично згаснати животи во Кочани, меѓу кои има и мои блиски лица. Сакам да нагласам дека информациите за моја поврзаност со овој настан се дезинформација и шпекулација. Тоа се само обиди за блатантна политичка игра и добивање морбидни поени”, порача Нацев на 16 март, пред да биде осомничен.

Погледнете што објави Нацев по трагедијата.

Александар Нацев, кој потекнува од Пробиштип, во минатото бил директор на Дирекцијата за класифицирани информации од 2015 до 2017 година, во време кога премиер беше Никола Груевски и ВМРО-ДПМНЕ ја водеше Владата. Често се појавуваше како портпарол на оваа партија, а денес е извршен директор на Центарот за безбедносни истражувања (ЦБИ) и професор на Факултетот за државна безбедност.

Вие младите не сте само иднината на оваа држава-вие сте нејзиното најсилно сегашно срце. Вие сте генерацијата што ќе ја движи Македонија напред. Не со страв, туку со идеи. Не со поделби, туку со заедништво. И затоа сакам денес да ви порачам: останете тука. Борете се тука. Градете тука. Македонија има потреба од вашиот ум, од вашата креативност, од вашиот немир што го менува светот. Јас им подавам рака на младите и го немаме повеќе луксузот да не успееме. Вашата генерација мора да успее. Ова е последната шанса за успех – порача премиерот и лидер на ВМРО-ДПМНЕ, Христијан Мицкоски на Конференцијата на Унијата на млади сили на партијата што вчера се одржа во Велес.

Денес, додаде тој, имаме битки кои мораме сами да ги водиме, и победи кои мора заеднички да ги издвојуваме.

-Еве го нашиот предизвик: да не дозволиме Македонија да остане заглавена во стари приказни. Да создадеме нова приказна – ваша приказна. Приказна на успех, знаење, правда и слобода. Младите на Македонија – вие сте тие што можат да ја променат оваа земја. Вие сте тие што ќе ја направат подобра. Не постои сила што може да ве запре кога верувате во себе и кога дејствувате заедно. Македонија мора да успее. И ќе успее – порача премиерот Мицкоски.

Според него, триесет години политичарите во Македонија никогаш отворено и вистински не говореле за младите, за тоа што е потребно да се направи за да тие вистински бидат среќни.

-Но и никогаш не ги слушаа што тие ни кажуваат, и тогаш кога многу работи укажуваа. Најголемиот неуспех на една држава се случува кога ќе згаснува жарот на младоста, кога младите ќе се уморат долго чекајќи да бидат слушнати и никогаш нема да дојде нивното време – рече Мицкоски.

Тоа што младите си одат од Македонија, според него, не е затоа што нашле подобро место од својот дом, туку затоа што не биле слушнати кога гласно говореле.

-Денес мотивот за иселување од Македонија не е само побогат живот во странство, туку и желбата за подобар систем кој не го наоѓаат тука. Затоа си одат професори, доктори и луѓе на кои не им е најважна платата, туку иднината која не ја гледаат тука, системот кој ги изневерил многу пати порано. Затоа што нивните сонови беа уништувани системски и многу долго. Да погледнеме на вистината во очи. Имаме загубени генерации. Моето срце се распарчува кога ќе ги видам празните клупи по факултетите, празните улици по градовите и полните автобуси и авиони со млади луѓе кои си заминуваат – порача Мицкоски.

Ова, смета тој, не е неуспех на еден човек, или само една генерација која водела политика во Македонија, туку заедничко потфрлање на сите до сега, кои не обрнале внимание на младите, кои систематски со неспособност, криминал и корупција го уништувале системот, кои не дозволиле сонот да стане реалност, кои секоја желба и мотив ја разградувале со колективните грабежи, со рушење на системот, со некадарност и грубо префрлање на вината.

-Загубените генерации не потетуваат на времето и не-делата што ги направија, и затоа кога зборувам за тоа што наследивме, тие кои не доведоа до тука не им се слуша. Но во исто време знам дека народот е уморен од изговори, од меѓусебно префрлање на вината и одбегнување на одговорност за работите кои се заеднички важни – истакна Мицкоски.

Лидерот на ВМРО-ДПМНЕ и премиер е дециден дека работите може да се променат само доколку отворено се пристапува и се разговара, и ако заеднички се води борбата.

-Затоа денес секој чекор кој го преземаме е да ја вратиме надежта и создадеме систем на ред и одговорност. За тоа ни е потребна мобилизација и шанса за секој еден човек кој сака искрено да работи и покажуваме дека може поинаку. Никогаш не ветував чуда, невозможни работи, но затоа беспоштедно и максимално ќе се борам за секој еден човек и за заедничката иднина. И мора да го смениме системот и да ја вратиме надежта – рече Мицкоски.

Но, како што потенцира, тој не ги повикува младите само да се надеваат туку да се вклучат, да се борат, да се исправат, затоа што, „никој нема да ни ја даде иднината на тацна, ќе мора сами да си ја изградиме, тула по тула, борба по борба, ден по ден“.

Човечките приказни не треба да се оддалечуваат од луѓето и од непосредноста. Посебно актерските човечки приказни имајќи ја предвид ситуацијата со сите предизвици на театарските сцени во Прилеп важно ми беше да го покажам она што сите ние го знаеме: Прилеп имал, има и ќе има театарски уметници. Театарот за разлика од другите медиуми не може да биде зачуван на ниту еден адекватен начин освен преку пишаните, снимените, фотографираните и раскажаните податоци. Затоа одлучив приказната за театарскиот Прилеп да ја раскажам низ чаршијата надвор од стерилните услови на сите институции, рече Ана Стојаноска, уметнички директор на МТФ „Војдан Чернодрински“ синоќа на отворањето на Музејот во движење, посветен на тројцата легендарни прилепски театарски уметници – Кирил Ристоски, Благоја Спиркоски – Џумерко и Благоја Ристоски – Платнар.

На невообичаен начин, преку изложба на фотографии, лични предмети, артефакти, на неколку локации низ градот, во места пријатели на фестивалот, авторите на изложбата Звонко Димоски и Ана Стојаноска го доловија животот на овие уметници и приватно и професионално. Емотивна средба беше ова и за членовите на нивните семејства.

-Прилеп е во тесна врска со својот театар, поточно, не може да се замисли животот во Прилеп без театарот, навиките за одење во театар, прераскажувањето на театарските претстави, поздравувањето на актерите низ чаршијата, гордоста од нивните успеси по фестивалите и гостувањата во и надвор од нашата земја. Театарот за разлика од другите медиуми не може да биде зачуван на ниту еден адекватен начин освен преку пишаните, снимените, фотографираните и раскажаните податоци – рече Стојаноска.

Програмата „Прилеп во фокус“ ви овозможува да зачекорите во животот од едни од најзаслужните прилепски уметници, и со тоа секој посетител да го искуси сценско-изведувачки и аудиовизуелениот начин на значењето на Прилеп во однос на македонскиот театар. Изложбите ќе бидат достапни за посетителите до крајот на фестивалот.

На третиот фестивалски ден гостуваше екипата на Штипскиот театар со претставата „Сите најубави нешта“ во режија на Нела Витошевиќ. Топлата и трогателна претстава која во фокус го става менталното здравје ја одушеви публиката.

Се одржа и тркалезна маса за претставата „Црно семе“ на Битолскиот театар. Секоја генерација има свое време. Оваа наша генерација има своја порака која нема допирни точки со онаа од филмот. Битолскиот театар има силни индивидуалци, а во претставата беа ставени во колективна игра, рече Васко Мавровски, актер и директор на театарот.

Режисерот Андреј Цветановски му ја посвети претставата на неговиот татко Владо Цветановски, а изведбата во Прилеп беше токму на денот на неговиот роденден.

За режисерот Цветановски најважно е да се дојде до вистината, а не дали начинот е класичен или современ.

-Иако дејството се случува 1947 година има доволно современ контекст. Тој колективен прогон на индивидуалните судбини за мене беше клучен во претставата. И иако играта е колективна, има индивидуални улоги, судбини кои, сепак, целосно не отскокнуваат, рече Цветановски.

Актерот Мартин Мирчевски кој го толкува ликот на Андон нагласи дека не се осмелил да прави споредба со култниот филм „Црно семе“. А театарот или го доживуваш или не, рече тој.

-Филмот е антологија. Кај нас, во претставата, целиот процес стана многу спонтан, се роди енергија. Не ги сфаќам потребите за класификација. Сакам театарот да ме возбудува во работата. Театарот или го доживуваш, или не, рече Мирчевски.

Присутните на разговорите го нагласија еден од навпечатливите сценски изрази во претставата – појавата на Ангелина, жената на Андон.

Вечерва во 19 часот од официјалната програма ќе биде изведена „Сите прекрасни нешта“ во режија на Нела Витошевиќ, продукција на Народниот театар од Штип. Улогите ги толкуваат: Ефтим Ѓаурски, Милорад Ангелов, Марија Минчева Андонова, Стефанија Митовска, Ава Хусеини и др.

Денеска во 11 часот ќе биде промовирани нови драми од наградите на „Еуродрам“, а на пладне ќе следува тркалезна маса за претставата „Сите најубави нешта“ на Штипскиот театар, од официјалната програма.

Вечерва во 19 часот, на големата сцена на Центарот за култура ќе игра ансамблот на Албанскиот театар со претставата „Ричард Трети“ во режија на Куштрим Бектеши. Улогите ги толкуваат: Адем Карага, Шкумбин Истрефи, Теута Ајдини Јегени, Вјолца Бектеши Хамити, Амернис Нокшиќи, Абедин Алими, Осман Ахмети, Музбајдин Ќамили, Дритеро Аме, Фисник Зеќири, Ментор Курти, Генци Мирзо, Рахим Рамадани, Сара Бајрами, Гентиана Рамадани, Хетем Етеми, Сабина Мемиши Асланај и Дениз Рустеми.

Покровители на фестивалот се Министерството за култура и туризам и Општина Прилеп. И оваа година фестивалот има предзнак екофестивал и има соработка со „Пакомак“. Спонзори се: Витаминка, Прилепска пивара и Diners Club International.