Снајперските тимови на Специјалната антитерористичка единица „Тигар“ остварија одличен резултат на меѓународниот натпревар во снајперско гаѓање „БОРАН 8“, кој се одржа во Турција, освојувајќи го деветтото место во силна конкуренција од 48 тимови од 22 држави.

Македонските специјалци се пласираа пред 39 екипи, потврдувајќи ја својата подготвеност и способност за рамноправно натпреварување со специјалните единици од целиот свет. Првите седум места им припаднаа на тимови од Турција, додека осмото место го освои екипа од Азербејџан.

Посебно забележителен резултат припадниците на „Тигар“ постигнаа во дисциплината пиштолско гаѓање, каде што освоија 2.098 поени, значително над просекот на натпреварувањето, кој изнесувал 1.173 поени.

Покрај спортскиот успех, македонските специјалци добија признание и за своето однесување, професионалност и спортски дух. Тие беа избрани меѓу трите најдобри тимови во категоријата „фер-плеј“, со што уште еднаш покажаа дека успехот се гради не само со знаење и вештини, туку и со почитување на противниците и спортските принципи.

Настапот на „Тигар“ на овој меѓународен натпревар претставува уште една потврда за квалитетот, обученоста и професионалноста на македонските специјалци на меѓународната сцена.

Во ООУ „Св. Климент Охридски“ – Битола успешно е завршена реконструкцијата на дел од кровната конструкција, реализирана со финансиска поддршка од Амбасадата на Јапонија, во вредност од 80.314 евра.

Со оваа донација се придонесе за подобрување на условите во училиштето, зголемување на безбедноста и создавање поквалитетна средина за одвивање на воспитно-образовниот процес.

Од училиштето велат дека поддршката и инвестициите од Општина Битола и оваа поддршка претставуваат значаен придонес во унапредувањето на училишната инфраструктура и грижата за подобри услови за учениците и вработените.

На свеченоста по овој повод присуствуваше заменик градоначалничката на Битола Марина Крстиќ.

Месец октомври веќе трета година е месец на разврска во одбојкарската лига на ветерани во машка конкуренција. И оваа година токму во овој период се одиграа последните натпревари со кои се дефинира комплетниот распоред и пласман на екипите пред завршниот турнир, каде учествуваат најдобрите четири екипи.

По пауза од една година екипата од Прилеп “11 Октомври” се враќа меѓу најдобрите четири екипи, со обезбеден пласман на final 4 турнирот, кој ќе се одигра на 1 ноември 2026 во Тетово.

Ако направиме мала рекапитулација на оваа сезона, вредно е да ги споменеме резултатите, односно да ги потенцираме трите победи против: Гевгелија, Струмица и онаа клучната против Тетово, како и трите порази од екипите на Шкендија, Борец од Велес и Скопје.

Токму последните три екипи, заедно со прилепскиот тим, го сочинуваат финалниот турнир, каде што за борба во финале ќе се борат Шкендија Тетово – 11 Октомври Прилеп и Борец Велес – Скопје. Победниците играат за прво место, поразените за трето.

Исто така, вредно е да се спомене тимот кој го донесе овој, а се надеваме и на понатамошни успеси.

Тимот на 11 Октомври за оваа сезона го сочинуваат: Жарко Илиески, Димитар Стрезоски, Гоце Бурнески, Теодор Ангелески, Зоран Пилоски, Мартин Наумоски, Атанас Николоски, Мики Крстев, Александар Савиноски, Орде Цветаноски, Васил Гајтаноски, Славчо Кузманоски, Илија Милошевски, Петар Толески и Кирил Котески.

Им посакуваме среќа и нови успеси на нашите одбојкари на завршниот турнир!

Овој викенд започнува зимското сметање на времето.

Преминот кон зимското сметање на времето е на 25 октомври 2026 година, кога часовниците ќе се вратат еден час назад.

Во ноќта меѓу сабота и недела, во 03:00 часот, стрелките ќе се поместат наназад и времето ќе стане 02:00 часот.

Со тоа официјално започнува зимското сметање на времето.

Во 2027 година, летното сметање на времето треба да започне на 28 март, а да заврши на 31 октомври.

Дете од четири години остварило 3,1 милион денари од дивиденда, а 97-годишен пензионер 1,089 милиони денари, од кои 59 отсто од пензија, а останатото од дивиденда, покажуваат податоците од Управата за јавни приходи (УЈП) за 2025 година.

Како што информира директорката на УЈП, Елена Петрова, минатата година се поднесени над 863.100 даночни пријави од граѓани или 10,6 отсто повеќе од 2024 година. Најголем дел од пријавите се поднесени во Скопје, по што следуваат Штип, Прилеп, Битола, Тетово и Струмица.

– Интересни се податоците за највисоките поединечни доходи. Највисоката годишна бруто плата изнесува 139,1 милиони денари, додека највисоката дивиденда е 252,6 милиони денари, а највисоката капитална добивка е 164,2 милиони денари. Највисокиот доход од самостојна дејност е 157,9 милиони денари. Кога станува збор за вкупен доход од сите извори, највисокиот доход во 2025 изнесува 257,5 милиони денари и го остварил граѓанин од Гевгелија преку плата, дивиденда и друг доход исплатен од една компанија. Следува граѓанин од Охрид со 254,4 милиони денари. Овие приходи покажуваат зошто е важно различните извори на доход да се разгледуваат заедно, а не изолирано, рече Петрова на брифинг со новинарите.

Уметноста има моќ да ги надмине границите на времето, да разбуди емоции и да ги поврзе луѓето преку универзалните приказни за љубовта, жртвата и човечката судбина. Токму таква приказна носи балетската претстава „Дамата со камелии“, која вечерва, со почеток во 20 часот, ќе биде изведена на сцената на Националната опера и балет, во рамки на партнерството со Видеолотарија Касинос Австрија.

Инспирирана од познатата приказна за Маргарита и Арман, претставата ја пренесува нивната љубовна судбина преку моќниот спој на балетот, музиката и сценскиот израз. Музиката на Џузепе Верди, препознатлива по својата мелодиска убавина и силниот емоционален набој, ја продлабочува драматургијата и ја доловува борбата меѓу личните чувства, жртвата и општествените ограничувања.

Зад оваа сценска приказна стои меѓународен уметнички тим. Диригент е Едуард Амбарцумјан од Ерменија, додека кореографијата е на Василиј Медведев, истакнат руски кореограф со соработки со водечки балетски театри, меѓу кои Бољшој во Москва и Марински во Санкт Петербург. Сценографијата и костимографијата се дело на Павол Јураш од Словачка, а концерт-мајстор е Верица Ламбевска.

Во главните улоги на Маргарита и Арман настапуваат Марија Кичевска-Шокаровска и Франциско Хименес Руиз од Шпанија, заедно со солистите, балетскиот ансамбл и оркестарот на Националната опера и балет.

Поддршката на културата е инвестиција во општеството, во креативноста и во генерациите што доаѓаат. За Видеолотарија Касинос Австрија, партнерството со националните културни институции претставува значаен дел од општествената одговорност и посветеноста кон создавање вредности што го надминуваат секојдневието.

„Веруваме дека културата има моќ да инспирира, да отвора нови перспективи и да ги поврзува луѓето. Затоа, поддршката на културните институции и уметничките проекти ја гледаме како придонес кон општество во кое уметноста е достапна, препознаена и вреднувана. Особено е важно да ги приближуваме ваквите содржини до младите и да создаваме можности новите генерации да ја откриваат убавината и моќта на уметноста“, порачуваат од Видеолотарија Касинос Австрија.

Со поддршката на културните содржини и партнерството со институциите што го чуваат и развиваат уметничкото творештво, Видеолотарија Касинос Австрија го потврдува својот придонес кон побогат културен живот и создавање вредности што остануваат трајно во заедницата.

Факултетот за биотехнички науки – Битола на 21 октомври 2026 година беше домаќин на „Отворен ден УКЛО и пријателите“. Настанот собра претставници од академската заедница, компаниите, институциите и граѓанскиот сектор, со цел размена на искуства и воспоставување нови партнерства.

Ректорот, проф. д-р Игор Неделковски, ја нагласи важноста на примената на научните истражувања и ги претстави можностите за продолжување на образованието преку магистерски, специјалистички и докторски студии.

Заменик-министерот за финансии, Николче Јанкуловски, се осврна на вложувањата во високото образование и студентскиот стандард. Деканката, проф. д-р Елена Јошевска, го истакна значењето на средбите што отвораат простор за заеднички иницијативи.

Посебно внимание привлече презентацијата на проектот COW-TECH, финансиран од Министерството за образование и наука, со резултати поврзани со млечното производство и квалитетот на храната.

Програмата вклучи изложбени штандови, дискусија за соработката меѓу универзитетот и компаниите, како и претставување студентски иновации. Настанот заврши со вмрежување и разговори за идни заеднички активности.

Модерен и елегантен гастрономски простор во центарот на Прилеп, каде што врвната храна, префинетиот амбиент и живата музика создаваат посебно доживување. Cipriani Fine Dining & Lounge Bar плени со својот раскошен ентериер, господски стил и внимателно одбрани детали, кои му даваат посебен печат на просторот. Со доаѓањето на постудените денови, музичките вечери се преселуваат во топлиот и елегантен внатрешен амбиент, каде што секој детал придонесува за чувство на удобност, стил и вистинско уживање.

И оваа недела, Cipriani подготвува две музички вечери со различен карактер, но со заедничка цел, да ви понуди уживање за сите сетила, во срцето на градот под Марковите Кули!

ЧЕТВРТОК, 22 ОКТОМВРИ заедно со GORAN SLIDE

Со својата гитара и препознатлив музички израз, Goran Slide секогаш знае како да создаде атмосфера за вистинско уживање. Вечер исполнета со добра музика, пријатен амбиент и моменти во кои едноставно сакате да се опуштите, да наздравите и да уживате во секој миг.

ПЕТОК, 23 ОКТОМВРИ со ТРИО МАЊИФИКО

Веќе добро познатите и одомаќинети кавадарчани од составот Трио Мањифико повторно носат музичка приказна што ги буди најубавите емоции! Со маестрални изведби на староградски песни и препознатлив музички шарм, тие ветуваат вечер исполнета со безвременски мелодии, одлична атмосфера и песни што се пеат од срце.

Две вечери, две музички приказни и едно место каде што гастрономијата, елеганцијата и добрата музика се спојуваат во совршена комбинација.

Резервирајте ја вашата маса навреме на 078 534 334 и дозволете си уште едно прекрасно музичко доживување во Cipriani Fine Dining & Lounge Bar.

-На 20.10.2026 во 10:30 часот во ОВР Прилеп е пријавено дека на крстосница од бул„Гоце Делчев“ со ул„Прилепски бранители“ во Прилеп, 35-годишниот М.И. од Прилеп, управувајќи мопед со прилепски регистарски ознаки удрил во 10-годишно дете од Битола. Во несреќата со тешки телесни повреди се здобило детето, констатирани во Градска општа болница Прилеп. Извршен е увид од увидна екипа на ОВР Прилеп, информираат од МВР.

Уште еден голем успех за македонскиот танц на меѓународната сцена! Македонската танчерка Анастасија Палчевска освои бронзен медал на Светското првенство во хип-хоп и попинг, кое се одржа во Киелце, Полска, запишувајќи значаен резултат за Македонија.

Палчевска го освои третото место во категоријата „All Styles Battles Junior 1“, со што се вброи меѓу најдобрите натпреварувачи во својата категорија на светско ниво.

Со својот талент, посветеност и танцови вештини, Анастасија успеа да се искачи на светскиот подиум и гордо да го развее македонското знаме, остварувајќи резултат што претставува успех не само за неа, туку и за македонската танцова сцена.

Овој медал е уште една потврда дека Македонија има млади таленти кои со својата работа, упорност и љубов кон танцот можат рамноправно да се натпреваруваат со најдобрите во светот.

Бронзениот медал на Анастасија Палчевска претставува повод за гордост и инспирација за новите генерации млади танчери во Македонија.

Со овој успех, македонскиот танц добива уште едно значајно меѓународно признание, а Анастасија Палчевска уште еднаш покажува дека талентот, трудот и посветеноста се вистинскиот пат до светскиот врв.