Во современиот деловен свет, квалитетната и визуелно привлечна етикета игра клучна улога во препознатливоста на секој производ. Токму затоа, компанијата LabelPro се позиционира како доверлив партнер во областа на печатењето на етикети во ролна, нудејќи врвни решенија прилагодени на потребите на различни индустрии.

LabelPro е специјализирана печатница која изработува висококвалитетни етикети за широк спектар на дејности, меѓу кои:

• Прехранбена индустрија
• Козметика
• Хемиска индустрија
• Фармација
• Винарија и пијалоци
• Логистика и малопродажба

Широка палета на производи

Компанијата нуди изработка на:

• Самолепливи етикети во ролна изработени од различни материјали како PP, PE и хартија
• Мат и сјајна завршница, со можност за дополнителни заштитни ефекти
• Етикети отпорни на влага и надворешни услови, идеални за производи што се складираат или користат во специфични средини

Покрај тоа, LabelPro произведува и термални етикети во ролна, и тоа:

• Директ термал
• Термо трансфер

Овие етикети се достапни во сите димензии, со можност за целосно прилагодување според потребите на клиентот, вклучувајќи ја ширината на ролната, дијаметарот, јадрото и начинот на навивање.

Современа технологија и врвен квалитет

Работејќи со современа опрема и напредни производствени процеси, LabelPro обезбедува:

• Висока прецизност при печатењето
• Конзистентен и врвен квалитет
• Брза и навремена испорака
• Флексибилност за производство на мали и големи серии

Партнерство засновано на доверба

Без разлика дали станува збор за нов производ или за унапредување на постоечко пакување, тимот на LabelPro нуди професионална поддршка и решенија кои придонесуваат за подобра презентација и препознатливост на брендот.

Компанијата ги охрабрува сите заинтересирани клиенти да испратат димензии, количини и технички спецификации, по што ќе добијат најповолна понуда во најкраток можен рок.

За понуда, кликнете на линкот во продолжение: https://labelpro.mk/

Бројот на работници на автопатските делници кои ги гради конзорциумот “Бехтел и Енка” не само што не е намален, туку е и зголемен, имаме раст на градежните активности за 40% на автопатските делници, а реализацијата на капитални инвестиции на Министерството за транспорт е над 70%, што претставува рекорд во историјата на државата и на ниво на Влада, истакна во гостувањето во “Само Интервју”, заменик претседателот на Владата и министер за транспорт, Александар Николоски.

-Во однос на активноста, изградбата на вакви проекти не е прашање на визуелизација, туку е прашање на факти и бројки. Споредбено, декември 2024 година биле завршени работи во вредност од 10,7 милиони евра, декември 2025 година, работи во вредност од 19,1 милион евра, скоро 9 милиони евра повеќе. Понатаму, јануари 2025 година 9,7 милиони евра, јануари 2026 година 12,2 милиони евра, февруари 2025 година 8,5 милиони евра, февруари 2026 година 13 милиони евра, што е сериозен скок. Тоа го покажува и Заводот за статистика, третиот квартал лани градежништвото имаше раст од 21%, а четвртиот квартал имаше 16,7%, потенцира Николоски и додаде:

-Реализацијата на капиталните инвестиции на Министерството за транспорт, на што сум особено горд е преку 70%. Се надевам дека со ребалансот ќе имаме и дополнителни средства, затоа што овие средства до ребаланс ние ќе ги потрошиме, што е добро за државата, затоа што нашите средства се најискористени во смисла на раст, потенцираше заменик претседателот на Владата.

Македонија ја зацврсти својата позиција на светската технолошка мапа. Тројца истакнати Microsoft сертифицирани тренери (MCT) од тимот на Семос Едукација, се закитија со титулата „Top 100 Quality Award winners“, признание кое Microsoft го доделува на само 100-те најдобри едукатори во светски рамки.

Елена Димовска, Дејан Вакански и прилепчанецот Дејан Кумпаниоски се имињата кои стојат зад овој успех. Покрај тоа што овие признанија се нивен личен триумф, воедно се и потврда за врвниот квалитет на македонскиот едукативен кадар кој се натпреварува со милиони професионалци ширум светот.

Наградата се доделува врз основа на ригорозните MTM (Metrics That Matter) анкети, каде самите студенти и професионалци од целиот свет ги оценуваат вештините, знаењето и методологијата на предавање на тренерите. Да се биде во „Топ 100“ во конкуренција на илјадници MCT тренери на светско ниво е доказ за:

-Исклучителна посветеност на едукативниот процес.
-Врвна експертиза во имплементација на Microsoft технологиите.
-Највисоки оценки за квалитет на обука директно од крајните корисници.

„Денес македонското знаење го добива својот највисок меѓународен печат. Горди сме што Елена, Дејан и Дејан се дел од нашиот тим и што секојдневно инспирираат нови генерации ИТ професионалци,“ изјави Ирена Ивановска, сениор директор од Семос Едукација.

Microsoft официјално ќе ги објави победниците во престижниот MCT Lounge, со што македонските тренери стануваат амбасадори на знаењето и квалитетот во глобалната Microsoft заедница.

Овој успех е уште еден доказ дека Семос Едукација останува лидер во ИТ едукацијата во регионот, поставувајќи стандарди кои сега се препознаени и наградени од самиот технолошки гигант Microsoft.

„…Не плашете се; знам дека Го барате Исуса распнатиот, не е овде, воскресна, како што беше рекол…“  (Мат. 28, 5-6).

Христос воскресе – и смртта е поразена!                                                                                                                                      Христос воскресе – и гробот остана празен!

Христос воскресе – и животот царува!

Возљубени чеда на Христовата Светлина!

Денес каменот е оттурнат не само од Гробот Господов, туку и од срцата човечки. Денес тишината на смртта е разбиена од громогласниот повик на Животот. Денес, во оваа света ноќ, кога смртта и Животот се среќаваат во Новиот Ерусалимски Гроб, кога Рајот се отвора и ја прима Божјата светлина, ние стоиме пред тајната на Вечниот Живот.

Христос веќе не е во гробот! Он воскресна! Зар не гледаш дека, таму каде што мирисаше на распаѓање, сега мириса на нетление? Зар не слушаш дека таму каде што плачеа мироносиците, сега се разлева радосниот глас: „Не е овде, воскресна!“ И кој може сега да очајува кога Гробот е празен?! Кој може да не се радува кога смртта е победена?! Кој може да не се насладува  на овој Господов дар, дарот на воскресение и живот вечен?!

Најголем е овој ден, браќа и сестри, Велик е овој ден, Велигден è! Зашто Бог не го остави човекот во власта на темнината и безнадежноста, туку му даде вечна светлина, вечно живо Евангелие, коешто не може да се изгасне.

Возљубени наследници на Христовиот мир!

Воскресението Христово не е само спомен, ниту само настан од минатото; тоа е оган што гори во сегашноста и светилник што го осветлува патот кон вечноста. Христос не воскресна за Себе, туку за нас; не за да нè восхити со чудо, туку за да нè ослободи од гревот, смртта и адот. Гревот, тој невидлив оков, беше скршен; смртта, тој древен тиранин, беше симната од престолот; адот, таа мрачна бездна, беше исполнета од Христа Светлината.

Воскреснатиот Господ им се јави на Своите ученици со зборовите: „Мир вам!“ Тој мир не е мир на овој свет, туку мир што извира од победата над смртта, од надежта во слаткиот Рај, од дарот на Животот Вечен. Тоа е мир што не можат да го срушат никакви војни, ниту е мир што можат да го донесат разни светски организации. Тоа е мир што доаѓа од длабочината на богољубивото човечко срце и од живата и непоколеблива вера во Христа Воскреснатиот.

Заради таквиот мир, денес Црквата ликува како невеста украсена за својот Жених. Денес, секој храм е сведоштво дека гробот не е последната станица; секоја запалена свеќа е симбол дека темнината нема власт над светлината. Заради дарот на тој мир, денес секое човечко срце е опсипано со надземска радост.

Возљубени во Победителот на смртта и Воскреснатиот!

Првиот човек, следејќи ја својата слободна волја – згреши; и со гревот ја отвори вратата на смртта. Во рајот не падна само еден човек, туку падна целото човештво во него. Адам не згреши како поединец, туку како корен; и кога коренот се отру, отровот потече низ сите гранки.

Гревот не беше само престап на Божјата заповед, туку прекин на заедницата со Бога. Човекот се отргна од Изворот на животот, и затоа животот во него почна да се суши. Така, смртта не дојде како казна за непослушноста, туку како природна последица на одвоеноста од Оној Кој е Живот по природа.

И немаше спас за човекот од самиот човек. Пророците пророкуваа, Законот поучуваше, жртви се принесуваа… но, раната остануваше. Човечката природа беше неповратно падната. И Кој ќе ја подигне таквата падната природа? Кој ќе ја победи смртта, кога сите беа под нејзина власт?

Затоа дојде Вториот Адам – Христос. Он го прими нашето тело за да ја исцели нашата природа. Влезе во истата борба во која падна првиот Адам – но остана  послушен до смрт. Пострада, за да го земе врз Себе бремето на гревот. Умре, за да влезе таму каде што човекот беше заробен. Но смртта, која ги држеше сите, не можеше да Го задржи Животодавецот. Како што темнината не може да ја проголта светлината, така ни распадливоста не можеше да Го задржи Нетлениот. Таа Го прими како човек и беше поразена од Него како Бог.

Христос Воскресна за да ја победи смртта одвнатре. Он не ја уништи како одмаздољубив, лут непријател, туку влезе во неа како Лекар во болница. Слезе во адот не како заробеник, туку како Цар. Со Својата душа ја осветли темнината, а со Своето тело ја разруши распадливоста. Смртта Го проголта како човек, но таа беше проголтана од Него како Бог.

Христос Воскресна  за да покаже дека гревот е победен, смртта е разоружана, и човекот повторно е повикан во заедница со Бога. Го врати човекот таму од каде што падна, но не само во изгубениот рај, туку во слава поголема – во живот вечен. Воскресението е одговорот на љубовта Божја кон трагедијата човечка. На Крстот најпрво се покажа таа љубов, а со Воскресението – конечно се запечати.

Возљубени чеда во Христа Животодавецот!

„Јас сум Воскресението и Животот; кој верува во Мене, и да умре, ќе живее“ (Јован 11, 25). Со овие зборови Господ наш Исус Христос ја открива крајната вистина на човечкото постоење – дека животот не завршува со смртта, дека гробот не е последната станица, и дека ниту една темнина не е посилна од Неговата светлина.

Но, возљубени, токму во деновите кога се подготвуваме да ја примиме оваа радост, сведоци сме на страшна трагедија што го потресе нашето општество – трагедија во која мајка, притисната од тежината на животот, го одзеде својот и животот на своето дете. Да се посегне по својот живот, на своето дете, или по било чиј, е трагичен писок на душата која ја изгубила надежта. Овој болен настан, самоубиство и убиство на сопствено дете, кој современиот јазик го именува како суицид и филицид, не смее да остане само вест што ќе ја заборавиме, туку треба да стане повик на будење за сите нас.

Оваа трагедија сведочи дека многу луѓе живеат во тишина на болка, во страв, во срам, во безизлезност, често оставени сами на себе. Таа нè потсетува дека семејното насилство, психичкиот товар и очајот не се само лични проблеми, туку рани на целото општество.

Покрај случајот со Ивана и ќерка ѝ Катја, се случија уште четири убиства во  четири последователни дена: на Климе Митрески, потоа, убиството на мајката од раката на синот во Росоман, исто така, убиството на таткото од страна на синот во Гостивар, и убиството на ловочуварот кај Виница.

Секој човек претставува икона Божја. Секој човечки живот е свет, бесценет и неповторлив. Тој е Божји дар, и никој нема право да го уништи и одземе,  но исто така, никој не смее да биде оттурнат до таа бездна на очај каде што животот ќе изгледа како товар.

„Дојдете при Мене сите изморени и обременети, и Јас ќе ве успокојам“ (Матеј 11, 28). Сведочејќи ги овие зборови на Воскреснатиот наш Господ, ние, Црквата Негова, на сите што страдаат, сите што трпат, но и на оние што се склони кон насилство, сите што се во очај, страв и срам, што мислат дека нема излез – ви велиме: не се затворајте во својата болка, другите – во својот гнев; не сте сами. Црквата е ваш дом. Христос Воскреснатиот е ваш Спасител. Вратата е отворена. Во молитвата има сила, во исповедта има ослободување и опростување, во заедницата има љубов што лекува.

Истовремено, ова е особено сериозен повик до надлежните институции, но и до секој член на општеството. Не смееме да дозволиме човечкиот живот да стане бројка во извештај, случај во архива или тема за краткотрајна расправа. Да не ги игнорираме знаците на страдање, да не ги премолчуваме случаите на насилство, да не дозволиме човек да биде оттурнат до работ на бездната.  Ова е повик за одговорност – сериозна, будна и навремена.

Да бидеме народ и Црква што прегрнува, што утешува, што љуби, што спасува.

Воскреснатиот Христос нека им даде сила и надеж на страдалниците и безнадежните, покајание и преумување на насилниците; и нека ги просветли умовите и срцата на сите нас, за да го чуваме и цениме дарот на животот.

Возљубени браќа и сестри во Христа Воскреснатиот!

Христос воскресе – и човекот повторно се роди за бесмртност! Во светот што често го заборава Бога, да бидеме живи сведоци дека гробот го нема последниот збор, дека гревот и смртта ја немаат веќе власта, и дека Љубовта – распната, но воскресната – царува во вековите.

Мирот на Воскреснатиот Христос, оној тивок поздрав: „Мир вам“, слезе врз нашите домови, врз нашите души и срца, и врз нашите немири.

Светлината на Празниот Гроб нека ја разбуди нашата заспана совест и нека ги осветли темните агли на нашите срца, нека ја растера секоја темнина во нашите души и во нашето општество.

Радоста на Воскресението да не згасне со оваа ноќ, туку да стане оган што постојано ќе гори во нашите срца, во сите денови од нашиот живот; и се пренесе во Вечноста, во Царството на Христа нашиот Бог и Спасител! Амин!Top of Form

Христос Воскресна! Навистина Воскресна!

Ваш постојанен молитвеник пред Христа Воскреснатиот,

Митрополит Преспанско-пелагониски

  † Петар

На 9 април 2026 година, Прилеп, почина проф. д-р Виолета Пановска Бошкоска, една од најистакнатите фигури во македонското високото образование, која остави неизбришлив белег врз развојот на универзитетската наука и образование во земјата.

Родена во 1953 година во Прилеп, проф. Пановска Бошкоска својата академска кариера ја започна по завршувањето на Економскиот факултет во Прилеп, каде што во 1977 година се вработува како помлад асистент. На истиот факултет работеше како редовен професор до 2007 година, воспитувајќи генерации студенти и обликувајќи академски професионалци.

Носеше значајни менаџерски функции – од 1997 до 1999 и од 1999 до 2003 година беше проректор на Универзитетот „Св. Климент Охридски“ во Битола, а во 2003 година Сенатот на Универзитетот ја избра за ректор со четиригодишен мандат. Потоа, од 2007 до 2015 година беше редовен професор на Факултетот за администрација и менаџмент на информациски системи (ФАМИС) во Битола, а во 2010 година беше избрана за декан на ФАМИС со четиригодишен мандат.

Нејзината посветеност за унапредување на високото образование ја поттикна да се заложи за усогласување на македонските универзитети со европските стандарди. Паралелно со професорската работа и менаџерските функции, активно учествуваше во национални и меѓународни комисии, одбори и тела, иницирајќи и реализирајќи бројни проекти финансирани од Tempus Phare програмата на Европската Унија.

Проф. Пановска Бошкоска беше редовен учесник на меѓународни конференции, студиски престои во САД и Европа, како и во проекти за проценка на општествениот капитал и трансформација на општествени претпријатија во Македонија.

Нејзиното знаење, упорност и посветеност кон развојот на академската заедница оставија траен белег, а нејзиното дело ќе продолжи да инспирира идни генерации.

Велики петок освен Велипеток уште се вика и Распет петок зашто на овој ден е распнат Исус Христос. Поради тоа овој ден се смета за најтежок празник во годината, тогаш не се работи дури и не се готви храна. Се вели дека на овој ден не треба да се јаде, а камоли да се работи.

Како на строг пост, како што се вика „пост на вода“ тој ден во црквата луѓето се честат со леб, пипер, и сол. Некои луѓе јадат стоејќи, а други ништо не јадат цел ден сочувствувајќи со распнатиот Исус. Тогаш се оди во црквата каде што оставаат дарови на Распетието Христово, а цвеќето на „плаштеникот-оплакувањето Христово“.

Секој што тука остава цвеќе зема друго и го носи дома за здравје. На Велики петок во црквите се изведува и обредот симболично погребување на Исус Христос. Тоа се прави на тој начин што платното наречено „Плаштеница“ се положува врз посебно подготвен симбол на Христовиот гроб.

Поминувајќи под Плаштеницата верниците сочувствуваат со распнатиот Исус. Исто така, се поставува и “„Распетието Христово“ (крстот на кој е насликан распнатиот Исус) пред кое верниците се поклонуваат и Исуса го бакнуваат во раните на нозете.

-На 08.04.2026 во 14:50 часот во Прилеп, полициски службеници од ОВР Прилеп го лишија од слобода Д.К.(49) од Прилеп затоа што во 14:30 часот во семејниот дом физички ја нападнал неговата 72-годишна мајка – информираат од МВР.

Собранието на Македонија ги изгласа измените во Законот за безбедност на сообраќајот на патиштата, со што се воведува долгоочекуваната новина за возачите. Со оваа законска измена, секој што поседува возачка дозвола од „Б“ категорија ќе може легално да управува мотоцикл со зафатнина до 125 см³, без потреба од целосно полагање за „А“ категорија.

Сепак, за да го искористат ова право, возачите ќе мора да исполнат неколку клучни критериуми:

– Да имаат наполнети 23 години возраст;

– Да поседуваат возачка дозвола од „Б“ категорија најмалку 5 години;

– Да поминат дополнителна теоретска обука од 4 часа во автошкола.

Оваа мерка се очекува значително да го намали сообраќајниот метеж во градовите и да го поттикне користењето на поекономични превозни средства.

-На 09.04.2026 во 03:40 часот во Кичево, полициски службеници од ОВР Кичево ги лишија од слобода Д.А.(20) од Прилеп, С.Џ.(27) од Прилеп, С.Џ.(19) од Прилеп, Д.Р.(31) од Прилеп, Д.М.(18) од Битола, Е.М.(26) од Битола, М.Х.(22) од Битола, Ј.Х.(19) од Битола и Р.Х.(34) од Кичево. Тие се сомничат дека во 01:30 часот на Осломешка крстосница го нарушиле јавниот ред и мир со меѓусебна физичка пресметка, при што биле употребени дрвени предмети и ножеви и притоа со расекотини и повреди се здобиле две лица. По целосно расчистување и документирање на случајот, против лицата ќе бидат поднесени соодветни пријави – информираат од МВР.

Поглаварот на Македонската православна црква – Охридска архиепископија, архиепископот Охридски и Македонски г.г. Стефан и членовите на Светиот архиерески синод упатија Пасхално послание по повод Велигденските празнувања:

Возљубени празникољупци,

Еве, и оваа година милостивиот Бог нè удостои да го дочекаме Празникот над празниците – Велигден! Исполнети со веселие, коешто извира од серадосниот восклик „Христос воскресе!“, ја исповедаме целата суштина и смислата на нашата вера, која, како што вели апостолот, ќе беше празна ако Христос не воскреснеше.[2] По тагата од Неговите страдања на Голгота, еве, ја примаме спасителната благодат од Неговото воскресение и од љубовта со којашто нè исполнува Неговата порака: Радувајте се![3]

Оваа победа на Животот над смртта, овој разгорен оган кој го проголта гревот и оваа светлина која темнината на адот не може да ја опфати, не ни се дарувани само нам, кои сме крстени во името на воскреснатиот Господ – Koj e коренот на нашата вера, туку за целото човештво и за сиот свет.[4] Во оваа свештена велигденска радост, ние христијаните имаме голема одговорност бидејќи сме должни да ја сведочиме победоносната вест за Воскресението, за и другитe да ја чујат, видат и познаат, па да поверуваат и да влезат во радоста на Христа воскреснатиот. Па така и тие, заедно со нас и со сите созданија, да ги прослават радоста и правдата на Царството Божјо, кое, во воскреснатиот Спасител, не ќе има крај.

Возљубени чеда во Христа воскреснатиот,

Одново и одново се поздравуваме, воскликнувајќи: Христос воскресна! – Навистина воскресна! Ова е поздрав на животот кој Бог ни го подари, не само преку тајната на Неговото воскресение и преку победата над гревот и смртта, туку и преку радоста на овој настан, којашто ни ја дарува со неизмерливото смирение, со примерот на Своето снисходење, простување и пожртвуваност за секој човек и за секое создание. Со Неговото доброволно вкусување на смртта, пак, ни ја покажа Неговата неизмерна љубов, со која чинот на скончанието во овој свет стана врата низ која сите минуваме, за да преминеме и да влеземе во бесконечната радост на воскресението и животот во идниот век.

Возљубени во Господа,

Дојдете и видете ја оваа живоносна велигденска радост во Христа Богочовекот, Кој доаѓа и ни се дава во Неговото славно и победоносно присуство. Тој доаѓа и ни се дарува во светите тајни и во молитвите, за и ние, растејќи во Него, да достигнеме воскресенска вера, та, пазејќи ги Неговите заповеди, да се удостоиме да влеземе во Неговата радост. Живеејќи таков живот, пак, можеме да го посведочиме она коешто повеќе од два милениума се потврдува: дека Христос е жив и дека и ние сме живи во Него. Затоа, Велигден е серадосно сретение со Оној во Кого нашето срце се успокојува.

Возљубени црквољупци и родољупци,

Нашиот богољубив народ отсекогаш живеел со воскресенската надеж. Маките и неправдите од овој свет секогаш ги поднесувал утешувајќи се со споменот за Велигден, а во победата Христова ја гледал Божјата правда на Царството небесно, кое ќе дојде во слава. Како христоносен народ, по сета македонска земја, секогаш сме ја љубеле воскресенската убава вера, која го прославува Велигден не само еднаш годишно, туку постојано – секоја недела. Повикот на псалмопејачот: Ова е денот што го создаде Господ; да се зарадуваме и да се развеселиме во него,[6] бил повик и за нашиот верен народ да се црквува и, во секојнеделното Воскресение, да празнува, примајќи Го Христа и поучувајќи се да живее богољубиво и човекољубиво.

И не само оние наши црквољубиви и родољубиви предци, за коишто имаме жив спомен од фреските, иконите и житијата, туку и оние за коишто дознаваме од песните и преданијата на нашиот македонски народ, ни се доказ дека нашите претходници од воскресенската вера не се откажувале ни по цена на страдања, бидејќи биле утврдени во вистината за Воскресението Христово. Нивниот крстоносен начин на живеење, исполнет со воскресенска радост во живиот Бог – нам, на нивното потомство – ни остана светол пример како се исповеда и како се брани темелот на православната вера – Христовото воскресение.

Возљубени чеда на Македонската Црква,

Ова лето Господово, во кое повторно преку благодатта Божја ни е даден вечноживиот дар за прославување на Велигден, ќе одбележиме и годишнини од нашето минато, кои, како во Татковината, така и насекаде до каде што нè има како народ, ќе ни овозможат повторно да го оживееме споменот за тие светли настани од нашата црковна и национална историја. Така, во оваа година се навршуваат 1140 години од враќањето во Македонија на светите Климент и Наум од Моравската мисија, со што се организирал црковно-литургискиот живот на Охридската Црква и се поставиле темелите на Охридската книжевна школа. Годинава се навршуваат и 1110 години од блаженото упокојување на свети Климент Охридски, патронот на нашата Света Црква, кој, во радоста на вечниот живот, е наш постојан молитвеник и закрилник. Се навршуваат и 150 години од Разловечкото востание, како и 80 години од донесувањето на првиот Устав на НР Македонија, со кој се потврди возобновената македонска државност. Еве, овие незаборавни настани, врежани во нашата црковно-национална самосвест, нека ни бидат поттик за да го чуваме споменот за нашите достојни претшественици, кои се вградиле во основата и во обновата на нашата Татковина Македонија и на нашата Македонска Црква. Но тие нека ни бидат и порака да ги сочуваме придобивките коишто ни ги оставиле, а потоа и да ги надградуваме, давајќи нови плодови.

Светлината на Христа воскреснатиот нека нè просвети, та, со нашата вера и со богоугодни дела, да го озариме светот со велигденска радост, па во братољубие, оттука, па до сите краишта на светот, до каде што нè има како народ и како Црква, да објавиме на нашиот мајчин македонски јазик:

ХРИСТОС ВОСКРЕСНА!

† СТЕФАН,
АРХИЕПИСКОП
ОХРИДСКИ И МАКЕДОНСКИ

заедно со членовите на Светиот архијерејски синод
на Македонската Православна Црква
– Охридска Архиепископија

† ПЕТАР, Митрополит Преспанско-пелагониски
† НАУМ, Митрополит Струмички
† АГАТАНГЕЛ, Митрополит Повардарски
† ЈОВАН, Митрополит Крушевско-демирхисарски
† МЕТОДИЈ, Митрополит Американско-канадски
† ПИМЕН, Митрополит Европски
† ИЛАРИОН, Митрополит Брегалнички
† ЈОСИФ, Митрополит Тетовско-гостиварски
† ГРИГОРИЈ, Митрополит Кумановско-осоговски
† ГЕОРГИЈ, Митрополит Дебарско-кичевски
† НИКОЛА, Митрополит Австралиско-новозеландски
† ЈОАКИМ, Епископ Дељадровско-илинденски
† МАРКО, Епископ Делчевско-каменички

Велигден, 2026.