Под слоганот „Европската диплома започнува од дома“, на 05.06. во Битола се одржа тркалезна маса во организација на УКЛО КОЛОРС.
Настанот беше фокусиран на развојот на заеднички студиски програми кои во иднина би овозможиле поцврсто поврзување на високообразовните институции ширум Европа.
На средбата се собраа бројни домашни и странски експерти, вклучително и претставници од Европската комисија, Делегацијата на ЕУ во земјава, како и професори од партнерските универзитети од Латвија и Италија.
Главната цел на присутната работна група, која веќе две години работи на оваа проблематика, е да креира стратешки документ што ќе послужи како основа за идни законски и институционални измени во земјите од алијансата КОЛОРС.
За време на дебатата, учесниците се осврнаа на искуствата од досегашните програми за мобилност, како Еразмус плус. Беше потенцирано дека покрај правните бариери, голем проблем е и недоволната информираност на младите за предностите на заедничките дипломи.
Реализацијата на овие реформи кај нас во голема мера ќе зависи од соработката со Агенцијата за квалитет во високото образование.
Оваа иницијатива практично ги продолжува минатогодишните активности на УКЛО КОЛОРС, кога Економскиот факултет во Прилеп ја покрена конвенцијата за првата заедничка мастер програма во рамки на алијансата – „Мастер МИНД“.
Очекувањата се дека новите заклучоци ќе го забрзаат процесот на усогласување со европските образовни стандарди и ќе овозможат подобра интеграција на целиот регион на Западен Балкан.