ВМРО-ДПМНЕ денеска прославува 29 години од основањето

ВМРО-ДПМНЕ е основана на 17 јуни 1990 година во Скопје, како наследник на историското ВМРО, кое се залагаше за независна и самостојна Македонија.

Ова е период кога уште формално правно, но и фактички постои СФРЈ, период во кој како што велат тогашните активисти на партијата било тешко да си ВМРО, тешко да бидеш демократ, да се бориш за владеење на правото и вредностите на цивилизираниот свет.

Новосоздадената партија ВМРО-ДПМНЕ во тоа време се залагала за одделување на Македонија од југословенската федерација, воскреснувајќи ја идејата за самостојна и суверена македонска држава, за заокружување на македонската државност и за меѓународно признавање.

Пред 28 години на 6 и 7 април 1991 година во Прилеп, беше одржан првиот Конгрес на политичката партија ВМРО-ДПМНЕ.

На овој Конгрес е воспоставена партиската инфраструктура, ИО преминува во ИК, а секциите во општински комитети, за претседател е реизбран Љубчо Георгиевски.

Мотото на Конгресот било „Самостојна и независна Македонија – Воскреснување на идејата за самостојност“.

На 6 и 7 мај 1995 година во Кичево пак се одржал вториот Конгрес на ВМРО-ДПМНЕ, каде партијата ја доби својата идеолошка определба – демохристијанска партија што дејствува десно од центарот.

Партијата од тогаш до ден денеска беше 14 години на власт, а победи и на последите парламентарни избори одржани во декември 2016 година, но поради определбата и понатаму да ги брани државните интереси не успеа да формира Влада.

Денеска со почеток во 19:00 часот, во Македонска Филхармонија, ќе се одржи прославата по повод 29 годишнината од основањето на ВМРО-ДПМНЕ.

На настанот свое обраќање ќе има Претседателот на ВМРО-ДПМНЕ Христијан Мицкоски.


Markukule.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.