ВМРО-ДПМНЕ ОК Прилеп: “Неспособноста на локалната власт и градоначалникот да го одржува градот се прикрива со лажни кривични пријави”

На денешната одржана прес конференција од претседателот на ОО СДСМ Прилеп околу новата кривична пријава која полицијата ја поднесе до претходниот градоначалник Марјан Ристески, своја реакција упатија од ОК ВМРО-ДПМНЕ Прилеп. “Неспособноста на градоначалникот и новите локални власти да го одржуваат градот, како и да ги реализираат ветените проекти пред граѓаните, се прикрива со беспредметни кривични пријави. Како што умеете да го правите тоа, наскоро ќе следуваат серија издржани кривични пријави со куп недоследности кои ги прави градоначалникот и другите локални функционери во јавните институции, за рок од неполна година”, се вели меѓудругото во одговорот на ОК ВМРО-ДПМНЕ Прилеп.

Во продолжение интегрално ви ја пренесуваме целата реакција:

“Во услови кога градот и државата ги води една неспособна власт, безидејна без никакви проекти градот кој важеше за еден од водечките градови во Р.М по инвестиции, инфраструктура зеленило, чистота, средени училишта, спортски терени и објекти, препознатливи манифестации, сега е препуштен на милост и немилост од неспособен градоначалник и локална власт.

Помина период од 6 месеци без никаква видлива трага од работењето и подобрување на квалитетот на живеење на прилепчани. Како што ветуваа и ги излагаа: Нема инвестиции, нема нови работни места, нема покачување на платите и пензиите, нема инфраструктурни проекти во градот и селата, се е оставено на забот на времето и она што беше изградено претходно. Не можат да го одржуваат градот, а камоли да изградат нешто друго.

Градот тони во ѓубре и неред со уништени улици, паркови, детски и спортски игралишта. Прилепчани се вратени назад во времето како пред 20 години и единствено што добија овие месеци со новата локална власт се повисоките сметки за изршување на комуналните услуги.

На сето ова се надоврзува и погубната политика на владата, со секојдневно понижување на македонскиот народ и распродавање на македонските национални интереси.

Со цел да се прикрие ова погубно делување на централната и локалната власт и немајќи теми со што да ги занимаваат прилепчани, сведоци сме на секојдневно поднесување во градот и Р.М на бесмислени кривични пријави пред надлежните институции за поранешни функционери од ВМРО-ДПМНЕ од градот и Р.М со цел да го одвлечат вниманието на јавноста од својата неспособност.

Почитувани сограѓани, така и овие смешни кривични пријави против претходниот градоначалник на Прилеп кој ја претвори Општина Прилеп во едно попристојно место за живеење и гордост на сите нас, наидуваат на потсмев и револт кај граѓаните кои очекуваа резултати, а не политички хајки од оваа власт. За жал тоа не го добијаа но добијаа политички реваншизам кој досега не е запаметен во поновата историја на Р.М.

Извртувајќи ги вистините и реалноста во друга насока спротивна на вистината и интересот на народот, да ве потсетиме дека уште 100 бесмислени кривични пријави да поднесите, нема да се исперите за целото зло што го нанесувате на Прилеп и Р.М.

Нема да заборават граѓаните на ветените проекти: Нови фабрики, затворен базен, обиколници, гасификација, пат до Велес и грчка граница преку Бабуна, подземна сообраќаница и затворен пазар, нови спортски сали, нови градинки и куп други лаги кои му ги должите на граѓаните.

Како што умеете да го правите тоа, наскоро ќе следуваат серија издржани кривични пријави со куп недоследности кои ги прави градоначалникот и другите локални функционери во јавните институции, за рок од неполна година.

Кривичната пријава е неоснована. Наводите во неа се невистинити, а пријавата е поднесена само со една единствена цел, претходниот градоначалник да биде дискредитиран пред јавноста и да се оттргни вниманието на истата од актуелните случувања.

Почитувани, зад оваа политичка хајка стојат луѓе со имиња и презимиња кои добро ни се познати затоа што еден ден ќе сносат одговорност за политичкиот терор што го прават за да ја прикријат својата неспособност”.