Победа попладнево загуби во претпоследното коло од прволигашката сезона, и тоа од директниот конкурент за опстанок Скопје.
Црвено-белите беа совладани со 1:0, а голот на Алексовски од пенал во 17-та минута беше доволен за три бода за скопјани и изедначување со бројот на бодови на Победа.
Ова беше клучен дуел за прилепчани, за сигурно обезбедување на 8-та позиција на табелата и изборување на плеј-аут натпревар.
Сега, победашите ќе мораат да атакуваат на триумф во последното коло против Ренова како домаќини, а да се надеваат дека Скопје нема да изненади против Работнички на гостински терен.
Во игра е и Пелистер кој има само бод помалку на последната позиција. Битолчани играат против Шкендија во последното коло, па неуспех на Победа и Скопје, а нивни триумф во мечот против тетовчани, на кои не им зависи баш исходот од овој натпревар, може да ги донесе токму нив на 8-то место.