Втората фестивалска вечер на “Пиво Фест 2016” ќе ја краси настапот на македонското девојче Каролина Гочева.
На пресконференцијата Каролина истакна дека после неколку години конечно се усогласил нејзиниот распоред и дека се чувствува премногу мило што ќе настапи на фестивалот на скарата и пивото во Прилеп.
Поради временските неприлики Каролина патувала повеќе од два часа, но не го криеше задоволството што се наоѓа тука.
Градоначалникот Марјан Ристески најпрвин упати жалење и сочувство за загинатите во терористичкиот напад што синоќа ја потресе Франција, а потоа упати благодарност до комуналните претпријатија во градот, кои за кратко време експресно ги совладаа последиците од страшното невреме што го зафати Прилеп попладнево.
Локалната самоуправа приреди и изненадување за македонското девојче, на Каролина градоначалникот и подари икона со ликот на Св. Никола.
Втората фестивалска вечер ќе ја одбележат и настапите на Самостални Референти, балканскиот шармер Хари Мата Хари и лудото диџеј дуо oд Грција Bang La Decks.
