Претседателот на СДСМ и премиер на државата, Зоран Заев, денеска на прес конференција изјави дека сите 78 претседатели на општински организации на партијата се разрешени, а ги охрабри сите оние претседатели каде СДСМ победи на изборите повторно да се пријават на конкурсот за избор.
“Дозволете ми да ја искористам можноста да објавам почеток на промените коишто граѓаните ги очекуваат. Синоќа донесов одлуки, денеска е ред да ги споделам, ќе бидат изработени решенијата од страна на администрацијата во Социјалдемократскиот сојуз и во текот на денот ќе ги потпишам решенијата. Одлуката е, се разрешуваат сите претседатели на општински ограноци на Социјалдемократскиот сојуз. Сакам да им се заблагодарам на сите за активноста, работата, служењето на граѓаните како претставници на локално ниво на најголемата владејачка партија. На сите оние претседатели на општински организации каде што се победи на изборите, апелирам да бидат повторно кандидати, нека се кандидираат на следниот конкурс што веќе уште идната седница ќе биде објавен во постапка”, истакна Заев.
“Следуваат следните чекори во делот на промените, како ќе се носат така ќе ги објавуваме до граѓаните и до јавноста, токму преку вас медиумите.Како што реков, почетокот на јуни или првата половина на јуни ќе се случуваат промените во општествениот сектор, а тоа се јавните претпријатија, министерствата, владата и сите владини институции, а во политичкиот дел во мојата политичка партија, таму каде што јас сум директно надлежен, а тоа во изборот на претседателите на општинските организации, одлуката ја донесов, синоќа ја соопштив на координација на колегите од раководството, затоа тоа што тоа е мое право. Конечната одлука е токму таа, сите претседатели на општински организации, вкупно 78 претседатели на општински организации од 80 општини се разрешени и органите и телата на партијата веднаш ќе донесат одлука за отпочнување на постапка за избор на ново раководство. Со разрешувањето на претседателите на општинските организации паѓаат извршните одбори на локално ниво заради тоа што тие се формирани на предлог на претседателите на општинските организации. Верувам дека сето ова ќе предизвика едно возобновување на севкупниот амбиент на луѓе кои што се доста експонирани постојат за да бидат добра алка на премостување и решавање на проблемите на граѓаните, се со конечна цел сите да учиме од своите слабости и да бидеме уште подобри во периодот кој што претстои пред нас”, додаде претседателот на СДСМ.
Помеѓу овие претседатели на општински организации е и Миле Талески од Прилеп, кој воедно е и претседател на Советот на Општина Прилеп.
Маркукуле пред извесно време, дознавајќи од извори блиски на СДСМ, дозна за промената на Талески, па сега се поставува прашањето кој ќе биде негов заменик и ќе работи на консолидација на партијата на локално ниво.
Потсетуваме дека СДСМ на претседателските избори во Прилеп доживеа висок пораз од околу 1.600 гласови, или резултат кој беше за над 5.000 гласови послаб од оној на локалните избори во 2017 година.
