Три лица се повредени во сообраќајната несреќа при судир на две товарни возила што денеска околу 13:25 часот се случи кај превојот Плетвар, во близина на Каменоломот. Повредените се пренесени на лекување во прилепската градска болница „Борка Талески“.
Според Сања Стаматова, портпарол на СВР Битола товарните возила се со кавадаречка и скопска регистрација.
“Во кавадаречкото товарно возило марка „Волво“ при несреќата бил само возачот, а во товарното возило „Марцедес“ со скопски регистерски таблички биле двајца патници, жители на Арачиново. Префрлени се на лекување во прилепската болница и се уште не се знае колкави се повредите, ниту се познати причините за несреќата”, рече Сања Стаматова портшарпч на СВР Битола.
Увид на местото на несреќата направи полицијата.
Поради сообраќајната несреќа сообраќајот беше блокиран, а подоцна се одвиваше наизменично.
