Валентина Терјошкова е првата жена која сама полетала во вселената, а малку недостигало никогаш да не се врати од тоа патување. Кога на крај мисијата успешно завршила, Валентина добила светска слава. Сепак, некои детали од ова вселенско патување останаа непознати до ден денес.
Терјошкова била избрана за мисијата поради нејзиното големо искуство во скокање со падобран, што на крајот од мисијата било потребно за да се врати назад.
До моментот кога отпатувала во вселената на 16 јуни 1963 година во бродот Восток 6, таа имала 126 скокови, што било многу важно поради фактот дека руските космонаути се приземјувале со помош на падобран, пишува “Бизнис Инсајдер”.
Терјошкова и уште четири други жени 18 месеци напорно се подготувале, но само таа ги поминала тестовите. Во само 70 часа таа ја заобиколила Земјата дури 48 пати.
Во целата приказна постои и еден кобен пропуст. Пред крајот на патувањето таа забележала дека бродот се оддалечува од Земјата, наместо да се приближува.
Во Советскиот Сојуз вакви грешки не биле дозволени, особено поради тоа што постоел “натпревар” меѓу Русите и Американците.
Дизајнерот на бродот Сергеј Королејв побарал од Терјошкова да не зборува за овој пропуст.
– Јас потоа од него побарав да не биде казнета личноста која ја направила грешката, бидејќи знаев какви беа казните во тоа време. Овој настан беше тајна која ја чував 30 години – вели Валентина.
