“Професорите изневерени од СОНК, ништо од барањата за плата и К-15?”

СОНК и Министерството за образование се договорија од 1 јануари просветните работници да добијат покачување на платите од 10 отсто, иако СОНК претходно бараше покачувањето да биде за 25%.

Претседателот на СОНК, Јаким Неделков рече дека на состанокот биле отворени и други прашања, како што се регрес за годишен одмор, трошоци за превоз до работните места и друго. Тој нагласи дека тука не запираат преговорите и за остварување на другите барања.

„Оваа средба создаде историски момент. Одлучивме да ги покачиме платите за 10 отсто од 1 јануари, 2020 година. Ова важи за сите вработени во основно, средно и високо образование. Со оваа одлука се враќа дигнитетот на наставничката професија. Јас сум горд. Интензивно се преговараше, се консултиравме и во следниот период ќе продолжиме со подобрување на статусот на сите вработени во образованието“, истакна Адеми по денешната средба со претставниците од СОНК.

Барањето за регрес за годишен одмор, како и почитување на колективните договори и исплата на прекувремените работни часови на наставниците беа дел од барањата на СОНК и претходно кои сега засега остануваат неисполнети.

Единствено нешто што добија просветарите од вака договореното е тоа што покачувањето за 10% нема да биде од април идната година, туку од јануари.


Markukule.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.