По пауза од десет години, во Мелбурн, Австралија, повторно се одржа прилепска вечер, која собра повеќе од 300 прилепчани што живеат и работат во Австралија. Настанот беше организиран на иницијатива на младите прилепчани, обединети околу новоформираното друштво PRILEP SOCIAL CLUB.
Зад оваа иницијатива стојат Методи Тошески, Игор Даркоски – Трипс, Наташа Даркоска, Благица Србиноска, Теодора Јовеска и Иле Неделкоски, кои со својата идеја успеаја повторно да ги соберат прилепчаните во духот на заедништвото, пријателството и љубовта кон родниот град.
За добрата атмосфера и забавата се погрижија Сања Ристеска со својот бенд, како и диџеј-сетот на Игор Трипс, создавајќи вечер исполнета со музика, дружење и емоции.
Но, оваа средба имаше и многу поважна цел. Прилепската вечер беше организирана со хуманитарен карактер, а средствата собрани на настанот ќе бидат донирани за лекувањето на Виктор и Дејан.
Со оваа иницијатива, младите прилепчани во Австралија покажаа дека и далеку од родниот крај, солидарноста и желбата да се помогне се посилни од далечината. Прилепската вечер во Мелбурн не беше само можност за дружење и зачувување на врските со родниот град, туку и доказ дека прилепскиот дух живее и на другата страна од светот.