Еди Рама: Не очекувам датум за преговори со ЕУ

Албанскиот премиер Еди Рама не очекува Албанија следната недела да добие датум за почеток на преговорите за пристапување во ЕУ.

Рама изјави дека не е оптимист во врска со започнувањето на преговорите на Албанија и Македонија со ЕУ, за што Европскиот совет треба да одлучи следната недела.

„Дали сум оптимист? Не“, изјави Рама за весникот „Ајриш Тајмс“, а пренесе агенцијата „Танјуг“.

Тој додаде дека не може да биде оптимист доколку реално се согледаат случувањата во ЕУ.

„Јас сум оптимист за иднината на земјава, но не и за тоа што ќе се случи следната недела. Ние сме колатерална штета. Тоа е како кога паѓаат бомби и ќе погодат градина. Ние сме таа градина“, изјави Рама.

Тој додава дека неговата земја не очекувала да стане членка на ЕУ следната недела и знае дека тоа не е можно, туку да бара почеток на преговорите кои би помогнале Албанија да стане членка во следните десетина години.




Markukule.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.