На 1 август, “Ракометното” во Битола беше претворено во сцена за едно навистина спектакуларно музичко доживување – браќата Стефан и Мартин од “Некст Тајм” уште еднаш ја потврдија својата титула на амбасадори на македонската песна.

Стотици обожаватели, со срце и душа, заедно со нив ги испеаја најубавите народни и современи македонски композиции, создавајќи атмосфера што ретко се гледа. И покрај тоа што дел од медиумите фокусот го насочија кон други концерти и настани во земјава, она што се случуваше во Битола зборуваше самo за себе – македонската публика знае кого сака и кого следи.

Со огромна енергија, емоции и препознатливиот патриотски набој во нивните интерпретации, Некст Тајм уште еднаш покажаа дека умеат да ги обединат сите генерации на едно место – во име на песната и татковината.

Гостин на концертот беше и Слаткаристика, што дополнително ја подгреа атмосферата:

View this post on Instagram

A post shared by Next Time (@nexttimeband)

-На 04.08.2025 во 11:35 часот, полициски службеници од ОВР Македонски Брод го лишиле од слобода В.С.(54) од Македонски Брод.

При контрола на патниот сообраќај, полициските службеници запреле возило „југо” со прилепски регистарски ознаки, кое го управувал В.С., и по преземени мерки било констатирано дека е под дејство на алкохол, односно му биле измерени 2,39 промили алкохол во крвта.

Тој е задржан во полициска станица и по целосно документирање на случајот, против него ќе биде поднесена соодветна пријава по член 297-а од Кривичниот законик – „безобѕирно управување со моторно возило”.

По повод Светскиот ден за борба против хепатитис, во Битола се реализираше бесплатен скрининг за хепатитис Б, Ц и ХИВ, како и еластографија, спроведени со мобилната медицинска единица од Скопје.

Настанот беше дел од националната кампања, организиран во партнерство со: Хепар Центар Битола, Министерството за здравство, Клиниката за гастроентерохепатологија, Клиниката за инфективни болести – Скопје, Официјалната комисија за хепатоцелуларен карцином, Општина Битола, Центарот за јавно здравје – Битола и Клиничката болница Битола.

Граѓаните покажаа исклучителен интерес за скринингот, кој поради зголемената посетеност продолжи еден час подолго од планираното – сè до 13:15 часот – со цел да им се овозможи на сите заинтересирани да се тестираат.

Особено значајна беше поддршката од страна на градоначалникот Тони Коњановски, кој лично ја посети мобилната единица и ја поздрави оваа важна здравствена иницијатива.

Националната кампања за бесплатен и анонимен скрининг за навремено детектирање на болести на црн дроб се реализира во 10 градови во државата. Целта е подигнување на свесноста за црнодробните болести, како што се црнодробен карцином, замастување на црниот дроб од алкохолна и неалкохолна природа, цироза и ретки болести на црн дроб.

Вечерва, со почеток во 20:30 часот, во рамките на Програмата на Битолското културно лето „БИТ ФЕСТ“, ќе биде отворена првата самостојна изложба на младиот уметник Константин Солак.

Изложбата, под наслов „Декларација на вредност“, опфаќа повеќе дела – слики, цртежи и фотографии – преку кои авторот пренесува свој автентичен израз.

Константин Солак, 19-годишен битолчанец, е првенец на генерацијата во Државното средно училиште за ликовна уметност и дизајн „Лазар Личеноски“ во Скопје. И покрај младите години, веќе се истакнува со активноста и креативноста на повеќе уметнички полиња. Има учествувано на бројни конкурси и е добитник на награди за авторски фотографии, слики и кратки филмови.

Работел на повеќе проекти во соработка со здруженија и амбасади, меѓу кои и оние поддржани од амбасадите на Италија и Холандија.

Изложбата ќе биде поставена во Културниот центар „Магаза“ и ќе биде отворена за посетители до 15 август, секој ден од 18:00 до 21:00 часот.

Во врска со видео записот што беше споделен на социјалните мрежи, Министерството за внатрешни работи ја известува јавноста дека веднаш се преземени мерки и активности и лицата се пронајдени, извршен е службен разговор и против нив ќе бидат поднесени соодветни поднесоци согласно Законот за безбедност на сообраќајот на патиштата и Законот за возила.

Против возачот С.З. (20) од Скопје по член 167 став 2 (поради превезување лице на надворешните делови од возилото) и член 225 став 9 (возење без возачка дозвола) од ЗБСП и член 26 став 10 од Законот за возила (управување возило без регистарски таблици), како и против лицето што стои на хауба Р.Ѓ. (19) од Скопје по член 317 став 14 (му дал да управува возило на лице без возачка дозвола) и член 165 став 2 (прави дејствија со кои ја загрозува својата безбедност) од ЗБСП.

СВР Скопје презема и дополнителни мерки и активности за целосно расчистување на случајот.

Непознати сторители ја обиле и ја ограбиле касата од манастирот во изградба во прилепско Чумово, кој го носи името на Св. Василиј Острошки.

Од манастирот, кој се гради со многу љубов и огромна помош од верниците и стопанственици, објавија фотографии на социјалните мрежи и напишаа:

-Свети Василиј Острошки ти суди му за касата

Срамно и жално! Како срце имаат поединци да го прават ова?!

Соопштение до верниците од црковниот храм Св. Петка во населбата “Точила” во Прилеп, по повод храмовата слава:

-Драги верници, браќа и сестри во Христа,

И ова 2025-то лето Господово, на 8 август (петок), ќе ја празнуваме славата на нашиот свет храм. По тој повод, Ве покануваме заеднички да го почувствуваме духот на вековната православна традиција и со молитвена радост да го прославиме празникот посветен на нашата заштитничка и молитвена застапничка пред Христа – светата преподобна маченичка Параскева (Петка) Римјанка, чиј живот претставува силна поука и пример за живеење според Евангелието.

Молитвеното чествување ќе започне во четврток, 7 август 2025, со празнична вечерна богослужба, која ќе започне во 17:30 часот.
Чествувањето ќе продолжи во петок, 8 август 2025, со Архиерејска Божествена Литургија, со која ќе чиноначалствува Неговото Високопреосвештенство, Митрополитот Преспанско-пелагониски и администратор Австралиско-новозеландски, г. Петар.

По завршувањето на Литургијата ќе се отслужи панихида во молитвен спомен за бранителите што ги положија своите животи кај Карпалак.
Со љубов во Христа,

в.д. старешина, протоереј Љупче Петрески
со свештенството и настојателството
при храмот „Св. преп. мчца. Параскева (Петка) Римјанка“ – Точила

На 2. август, во организација на боречкиот клуб “Црвена Ѕвезда”, во Белград се одржа Mеѓународен турнир, на кој учество зедоа и борачките од клубот „7 Ми Мај“ од Прилеп.

Во категоријата до 50 кг., Викторија Стојаноска го освои третото место, додека во категоријата до 53 кг., Ангела Трајкоска се закити со сребрен медал и го освои второто место.

Тамара Цветкоска, која се натпреваруваше во категоријата до 62 кг., го освои петтото место во многу силна конкуренција.

Иако Ангела и Тамара имаат само 17 години, тие се натпреваруваа во посилната категорија до 23 години (U23), покажувајќи зрелост, храброст и исклучителна борбеност.

Настапот на овие млади борачки претставува уште еден успех за клубот „7 Ми Мај“ и потврда за континуираната работа и посветеност во женското борење.

Карпалак – Сеќавање што не згаснува: 24 години од загинувањето на десеттемина прилепски херои

На 8 август 2025 година, Прилеп и цела Македонија ќе се навратат на еден од најтрагичните настани од поновата историја – 24 години од заседата кај месноста Карпалак, во која трагично загинаа десет прилепски бранители, бранејќи ја татковината во конфликтот од 2001 година.

Во спомен и чест на нивната жртва, во 2011 година, во центарот на Прилеп беше изграден спомен-комплексот „Карпалак“, инициран и реализиран од тогашниот градоначалник Марјан Ристески, кој и самиот беше еден од преживеаните учесници во немилиот настан.

Спомен комплексот “Карпалак” се наоѓа на раскрсницата помеѓу булеварот “Гоце Делчев” и улиците “Јоска Јорданоски” и “Васко Карангелески”.

Комплексот е длабоко симболичен – десет краци, што го сочинуваат централниот дел, ги претставуваат десеттемина херои, а на нивниот крај се издигнува светлечка кружна форма – топка која симболизира вечен живот, постојано пулсирајќи во ритамот на срцето, како што вечно ќе чука споменот на нивната храброст.

Со изградбата на овој спомен-обележје, Прилеп не доби само место за поклонение и почит, туку и современо сообраќајно решение, преку изградба на кружен тек во самиот центар на градот, кое своевремено беше целосно хортикултурно уредено, со функционални и чисти фонтани, како и модерно осветлување. 

Во срцето на комплексот се наоѓа и спомен-плоча со врежани имиња на загинатите бранители – за никогаш да не бидат заборавени:

🕯 Сашо Китаноски
🕯 Нане Наумоски
🕯 Бранко Секулоски
🕯 Марко Деспотоски
🕯 Ердован Шабаноски
🕯 Љубе Грујоски
🕯 Дарко Вељаноски
🕯 Веби Рушидоски
🕯 Горан Миноски
🕯 Пеце Секулоски

Ова спомен-обележје не е само камен, туку сведоштво. Сведоштво за пожртвуваноста, за болката, за честа. И најмногу од сè – опомена до младите генерации дека слободата и мирот се вредности кои мора да се чуваат со љубов, но и со сеќавање.

Вечна слава на хероите од Карпалак! Прилеп не заборава! Македонија се сеќава!

Во продолжение и потесетување на еден трогателен говор на Ристески за време на одбележувањето на 16-годишнината од овој немил настан: