-На 22.03.2026 во 14:45 часот на ул.„Бидимаж“ во Прилеп, полициски службеници од ОВР Прилеп ги лишија од слобода А.М.(32) и И.Л.(30), двајцата од Прилеп, затоа што при преглед кај нив, кај А.М. била пронајдена и одземена марихуана.

По целосно документирање на случајот ќе следува соодветен поднесок – информираат од СВР Битола.

РКЕ денеска донесе одлука со која бензинот останува по иста цена, додека нафтата поскапува за 3,5 денари.

Највисоките малопродажни цени на нафтените деривати и горива за транспорт, изнесуваат: –

Моторен бензин – ЕУРОСУПЕР БС – 95 – 86,50 (денари/литар) – Моторен бензин – ЕУРОСУПЕР БС – 98 – 88,50 (денари/литар) – Дизел гориво – ЕУРОДИЗЕЛ БС (Д-Е V) – 95,50 (денари/литар) – Масло за горење – Екстра лесно 1 (ЕЛ-1) – 92,00 (денари/литар) – Мазут М-1 НС – 47,610 (денари/килограм

Владата донесе одлука за постоење на кризна состоjба во рок од 30 дена, поради „судир на интереси за користeње на изворите и патиштата на стратегиските енергенси како и попречување и блокирање на нивниот увоз во Републиката“, како што се наведува во актот.

Со оваа одлука се утврдува постоење на кризна состоjба на целата територија. бјавено е дека со денот на влегувањето во сила на оваа одлука се активира Главниот Штаб при Центарот за управување со кризи, кој ќе биде во постојано заседавање заради следење на мерките и активностите и координирано дејствување.

– Со одлуката на владата се задолжуваат органите на државна управа да преземат мерки и активности за справување со состојбата и надминување на последицата од судир на интереси за користење на изворите и патиштата на стратегиските енергенси како и попречување и блокирање на нивниот увоз во Македонија, стои во одлуката.

Просечната месечна исплатена нето-плата по вработен во јануари годинава изнесувала 46 617 денари, што е повисока за 8,3% во однос на јануари 2025 година, објави Државниот завод за статистика.

Ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите: Административни и помошни услужни дејности за 12.9 %, Трговија на големо и мало; поправка на моторни возила и мотоцикли за 11.1 % и Преработувачка индустрија за 10.5 %.

Намалување на просечната месечна исплатена нето-плата по вработен, во однос на претходниот месец, е забележано во секторите: Транспорт и складирање за 7.4 %, Градежништво за 5.3 % и Финансиски дејности и дејности на осигурување за 3.8 %.

Просечната месечна исплатена бруто-плата по вработен во јануари годинава изнесувала 70 066 денари.

Oпштина Битола известува дека во тек се градежни активности, односно реконструкција на дел од коловозот на улицата „Леринска“ и на дел од улицата „Христо Узунов“.

-Во моментов јавното претпријатие „Нискоградба“ ја изведува мештовитата ( фекална и атмосферска) канализација, а ќе се изведуваат и приклучоци за куќите. По ова ќе следи и фазата на асфалтирање на улиците, стои во соопштението.

Сумата за реконструкција на коловозот изнесува 4.004.100 денари, а за изведбата на канализацијата 2.872.960 денари. Средствата се целосно обезбедени од буџетот на Општина Битола.

На 25 март 2026 г./ среда/ од 19.00 часот во киното “Мис Стон” ќе се прикаже филмот „Франц“, посветен на животот на писателот Франц Кафка, од неговото раѓање до неговата смрт.

Влезниците за филмот се продаваат секој работен ден од 11.00 до 13.00 ч. на билетарницата од киното и еден час пред почетокот на проекцијата!

Податоци за филмот:

режија: Agnieszka Holland
улоги: Peter Kurth, Katharina Stark, Emma Smetana, Ivan Trojan, Carol Schuler,
Andrew Van Wilpe,
Sebastian Schwarz, Jenovefa Bokova, Josef Trojan
земја: Чешка, Германија
жанр: драма, биографија
Категоризација: Трета категорија

Пиварa Скопје е добитник на Andrew David Cup 2025, најголемата и најпрестижната награда што Coca–Cola HBC групацијата ја доделува на земјата со најдобри севкупни резултати. Наградата беше врачена на годинешната Лидерска конференција на Coca–Cola HBC во Белград, каде Пиварa Скопје се истакна како најуспешна компанија меѓу 29 земји членки на групацијата.

Andrew David Cup се доделува од 2005 година и претставува највисоко признание во рамки на системот, кое го добива само една земја – онаа што покажала доследно остварување на врвни резултати во повеќе стратешки категории, меѓу кои задоволството на потрошувачите и вработените, оперативната ефикасност, иновациите и развојот на таленти, како и застапеноста на жените на лидерски позиции.

Со освојувањето на ова признание, Пиварa Скопје го потврдува континуитетот на високи перформанси и силната корпоративна култура што ја позиционира компанијата меѓу најуспешните во системот на Coca-Cola HBC и на македонскиот пазар. Особено значајно е што оваа награда традиционално ја освојуваат бизнис-единици кои работат на големи и силни пазари како Нигерија, Бугарија и Србија, што дополнително ја нагласува вредноста на овој извонреден успех на Пивара Скопје и воедно претставува силна потврда за квалитетот на работата на компанијата.

Ова високо меѓународно признание е резултат на заедничката посветеност, професионалност и тимски дух на сите вработени во Пивара Скопје. Тоа претставува потврда за силата на тимот на Пиварa Скопје, кој со својата енергија, знаење и истрајност ја води компанијата напред и ја зацврстува нејзината позиција како еден од водечките бизнис енетитети на македонскиот пазар. Истовремено, ова признание e мотив да се продолжи со уште поголема посветеност кон иновации, континуиран одржлив раст и развој и создавање вредност за потрошувачите, партнерите и заедницата, велат од Пивара Скопје.

За Coca-Cola HBC Групацијата

Coca-Cola HBC е водечка мултинационална групација за производство и дистрибуција на безалкохолни пијалаци и стратешки партнер на The Coca-Cola Company. Групацијата е присутна на 29 пазари и опслужува над 750 милиони потрошувачи. Со едно од најшироките портфолија во индустријата, кое ги вклучува брендови како Coca-Cola, Fanta, Sprite, Schweppes, Cappy, FuzeTea, Powerade, Vergnano Coffee и многу други, групацијата создава вредност за своите потрошувачи, партнери и заедниците во кои делува. Coca-Cola HBC е препознаена и како глобален лидер во одржливост и ESG практики, со силна посветеност на одговорно работење и долгорочен раст.

Изградбата на браната на реката Отиња кај Штип влегува во завршна фаза, со што источниот дел на државата наскоро ќе добие прво рекреативно вештачко езеро. Станува збор за капитален проект кој, покрај туристичката функција, ќе има значајна улога и во наводнувањето и водоснабдувањето во регионот, истакна на извршениот увид во работите, заменик претседателот на Владата и министер за транспорт, Александар Николоски.

Според вицепремиерот, овој проект има потенцијал да стане главна туристичка атракција во источниот регион.

-Ова ќе биде прво рекреативно вештачко езеро во источниот дел на државата, ова ќе биде езеро кое што треба да го развие туризмот во целиот овој регион, да претставува главна туристичка атракција во текот на летото за жителите од источниот дел на државата, но исто така во текот на годината да се користи за рекреација, тука да доаѓаат луѓе, и секако да се отвараат нови работни места, рече Николоски.

Покрај туристичката димензија, се разгледуваат и идеи за уредување на просторот околу езерото, со дополнителни содржини за посетителите.

-Секако, езерото ќе служи и за наводнување, ќе служи и доколку е потребно во одредени критични периоди и за решавање на проблемот со водоснабдување, а разговаравме и за уредување на просторот околу езерото, веќе размислуваме и на таа фаза. Би се искористил трупот на браната, како патека која што ќе оди од едниот до другиот крај на езерото и да се поврзува со Штип, додаде заменик претседателот на Владата.

Изградбата на браната е во напредна фаза, а Николоски не ја исклучува можноста за завршување на проектот пред предидениот краен рок.

-Драго ми е дека до денес имаме 70% реализација на овој проект, крајниот рок е април 2027 година, но доколку не’ послужат временските услови, можеби уште оваа година ќе го завршиме езерото, а потоа е потребно една година да се наполни, што би значело дека некаде пролетта 2028 година овдека да видиме езеро, што навистина ќе биде атракција, посочи Николоски.

Станува збор за втор ваков проект кој го гради оваа Владата, заедно со изградбата на вештачкото езеро во Конско кај Гевгелија.

-Вкупниот буџет за изградба на овој проект е 448 милиони денари, обезбедени од страна на Владата преку Министерството за транспорт, а до денес се реализирани 311 милиони денари, имаме доволно средства во буџетот за да целосно го завршиме овој проект, заврши Николоски, кој упати благодарност до локалната и централната власт за соработката и постојаната координација околу изградбата на овој исклучително значаен за Истокот на земјата проект.

Премиерот Христијан Мицкоски одржа прес коференција по одржаната вонредната Владина седница којa се одржа вчера на пладне.

– Се соочуваме со предизвик што навистина е голем. Не сме ние исклучок од кризата што се случува која е наметната поради настаните и воените конфликти на Блискиот Исток, изјави Мицкоски.

Како што истакна Мицкоски дека врз основа на движењата на светските берзи, се очекува бензините од 95 и 98 октани да поскапат за околу 6,5 денари по литар, додека дизелот би можел да достигне зголемување од 10,5 денари по литар.

„Очекуваме цената на бензините од 86,5 и 88,5 денари да се зголеми на 93 и 95 денари, а дизелот од 92 на 102,5 денари по литар“, посочи Мицкоски.

Како одговор на ова, Владата донела одлука за намалување на данокот на додадена вредност за бензините и дизелот од 18 на 10 проценти, со цел да се ублажи ударот врз граѓаните.

„Со оваа мерка очекуваме цената на бензините да остане речиси непроменета, додека дизелот да поскапи за околу 3 до 3,5 денари по литар, наместо за повеќе од 10 денари“, истакна премиерот.

Дополнително, Владата води разговори со компанијата ОКТА за зголемување на попустот кој го дава кон трговците, што би можело да влијае на дополнително намалување на цените.

„Доколку се постигне договор, очекуваме цените да бидат и до 3 денари пониски од максималните утврдени од Регулаторната комисија“, рече Мицкоски.

Тој нагласи дека со овие мерки граѓаните би заштедиле околу 200.000 евра дневно, односно приближно 1,5 милиони евра неделно, имајќи ја предвид просечната потрошувачка на гориво во земјата.

„Ова е одлука со која директно го штитиме стандардот на граѓаните во услови на глобална енергетска криза“, додаде премиерот.

Според него, Македонија има најниски цени на горивата во регионот.