Најдобриот ресторан во Прилеп – ресторан “ПОРТА”, ве кани на саботно попладневно уживање со звуците на маестралниот бенд од Битола, “БИТОЛСКИ ТАМБУРАШИ”.

Секој кој ги слушнал знае дека староградските звуци добиваат една поинаква безвременска димензија во нивна изведба, а така ќе биде и денеска со почеток од 14 часот.

Токму навреме, веднаш штом ги завршите семејните обврски, време е за гурманско уживање во викендот, со одлична храна и амбиент каков што само “ПОРТА” може да пружи.

Дојдете и уживајте и овој викенд во срцето на Старата прилепска чаршија, во ресторанот кој создава една поинаква гастрономска приказна во која секој има своја улога и остава свој белег.

Православните верници денеска го одбележуваат Крстовден – празник на Чесниот Господов крст.

Именден празнуваат: Крсте, Крстинка, Крстана, Кристина, Кристијан…

Празникот Воздвижение на чесниот крст, во народот познат како Крстовден, се празнува во чест на наоѓањето на крстот врз кој бил распнат Исус Христос и во чест на неговото враќање од Персија во Ерусалим. Поради неговата чудотворна моќ крстот е наречен и животворен крст.

За подостоинствено празнување на празникот, но и за оддавање признание на светиот крст, како и за сочувствување со страдањата на Спасителот Исус Христос, Светата црква го одредила овој ден како тежок празник и како строг пост.

Празникот „Крстовден“, еден од најголемите празници на Православната Црква, со векови ги собира архиереите, сиот свештенички и свештено-монашки клир на средината од храмот, каде се издигнува најважното знамение за христијанскиот род – Крстот.

Овој настан, Воздвижение на Чесниот и Животворен Крст, е празник на победата на христијанството над сите царства, култури и цивилизации, празник на христијанското општество кое опстојува низ вековите благодарение на непобедливата сила на Крстот, празник чија благодатна утеха ги поткрепува сите христијани, кои и денес поднесуваат прогони и страданија.

Овој празник е директно поврзан со два историски настани. Првиот се случил во IV век и зборува за чудесното пронаоѓање на Чесниот Крст на Господ Исус Христос од страна на светата царица Елена, мајката на светиот и благоверен цар Константин Велики. Вториот настан, пак, зборува за победата на византискиот цар Ираклиј над персискиот цар Хозрој во VII век. Во таа прилика Крстот бил вратен во Цариград, зашто претходно тој бил земен како плен од Ерусалим, тогаш кога градот бил освоен од Персијците.

Царицата Елена при обиколката на светите места се интересирала и за крстот врз кој бил распнат Исус. По совет на патријархот Макариј биле прашани најстарите луѓе, но само еден по име Јуда, знаел дека крстот е во темелите на подоцна подигнатиот идолски храм на божицата Венера. При копањето нашле три крста, зашто на тоа место биле и крстовите од двајцата разбојници што биле распнати со Исус. Тогаш се појавил проблем зашто не можеле да дознаат кој од трите е Исусовиот крст. Пак, по совет на патријархот Макариј, со трите крстови допреле една болна жена и таа од допирот со едниот од нив оздравела. Во тоа време минувала и погребна поворка, а царицата Елена наредила врз мртовецот да ги ставаат крстовите еден по еден. И се случило чудо. Во допир со истиот оној крст од кој оздравела болната жена сега и мртовецот воскреснал. Тоа било знак дека тој е бараниот крст врз кој бил распнат Исус Христос.

Веднаш после пронаоѓањето на Чесниот Крст многу цркви и манастири посакале да имаат делче од него, па така негови делови биле распространети ширум православниот свет. Во нашата земја и Бигорскиот и Раичкиот манастир чуваат честица од оваа најскапоцена христијанска светиња, пред која доаѓа да се поклони големо мноштво народ, просејќи благослов и поткрепа за своите семејства, ближни, како и за својата татковина.

Во пресрет на локалните избори, кои патем се чини ќе бидат најинтересни за јавноста, пред се поради големата бројка на независни кандидати во повеќето општини, ги анализираме кандидатурите во пелагониските општини.

Покрај големите центри како Прилеп и Битола, интересни партиски и кандидатски изборни битки ќе се водат и во околните општини, а тука ја издвојуваме општина Долнени, каде како и по обичај има голем број кандидати за градоначалник и советнички листи.

ДИК прифати 7 кандидатури за градоначалник, меѓу која и на Суад Адиловиќ како независен кандидат – докажан полициски службеник професионалец и човек хуманист.

Важи за личност која ги обединува сите, особено во оваа мултиетничка општина, човек кој помогнал секогаш и секаде и кој отворено може да каже дека за него сите националности се пријатели.

Токму затоа и цели на сите гласови, и на Бошњаци, и на Македонци, Албанци, Турци…. од Сенокос, Новоселани, Ропотово, до неговото родно Десово, па и Житоше, Дебреште и Црнилиште.

Адиловиќ е семеен човек, татко на едно дете и сопруг на Ленче, која по националност е Македонка, па уште во семејниот дом докажал дека може да се живее во хармонија.

Адиловиќ верува дека само независен кандидат, ослободен од партиските стеги, може да направи од оваа општина убаво место за живеење, да направи дом за меѓусебно почитување и соработка.

Неговиот фокус ќе биде враќање на достоинството на обичниот човек, работникот и рамномерен развој на сите населени места. Ветува дека ќе подаде рака на сите, од сите националности, а со цел општина Долнени да стане симбол на заедништво каде младите нема да ги напуштаат родните места, каде работничкиот труд ќе биде достоинствено платен, каде нема да има села без асфалт, канализација и водовод во 21 век.

Коментарите на социјалните мрежи за неговата кандидатура се само позитивни. Погледнете што велат граѓаните, Македонци, Албанци, Бошњаци, Турци….

Нам ни останува да му посакаме среќа и успех во кампањата!

Пиварa Скопје го претстави првото пченично пиво создадено во Македонија – Скопско Weiss. Со оваа новина, Пиварa Скопје, како лидер на пазарот во производство на пиво и безалкохолни пијалаци, ја потврдува својата посветеност кон иновациите и квалитетот, збогатувајќи ја домашната понуда со уште едно пиво со врвен квалитет и специфичен вкус, кое ќе биде препознатливо по својот автентичен македонски потпис. Скопско Weiss е создадено со внимателно избрана комбинација од врвен пченичен и јачменов слад, збогатена со хмељ од благородни сорти и суптилни овошни ноти, карактеристични за оваа категорија пива. Се одликува со светла златна боја и богата, кремаста пена, а неговиот вкус е префинето балансиран – со лесна сладост, нежна киселост и едвај забележлива горчина. Благодарение на квалитетните состојки и иновативниот процес на производство, секоја голтка носи чувство на леснотија и освежување, правејќи го идеален избор за секоја пригода.

„Со Скопско Weiss отвораме ново поглавје во развојот на пивската култура во Македонија. Ова не е само нов производ – тоа е израз на нашата визија да ги следиме светските трендови, но и да останеме верни на локалниот дух. Сакаме да им понудиме на потрошувачите пиво кое носи свежина, автентичност и современост, создадено со мајсторство и страст. Веруваме дека Скопско Weiss ќе стане симбол на нови вкусови, нови моменти и нови начини на уживање во пивото – и токму затоа сме горди што токму од Пивара Скопје доаѓа нешто што ги обединува традицијата и иновацијата“, изјави Огњен Лазиќ, генерален директор на Пивара Скопје.

Процесот на создавање на ова прво индустриско пченично пиво во земјава е резултат на посветеност и експертиза, нагласи Александар Бојаџиски, директор на производство на пиво во Пивара Скопје.

„За нас во Пивара Скопје ова пиво е и симбол на нашата посветеност кон квалитетот, на нашата желба за иновација и на нашата цел да им нудиме на потрошувачите, не само она што веќе го сакаат, туку и нешто ново во кое ќе се вљубат. Покрај традиционалните лагер пива, сакавме да креираме пиво што може да стои рамо до рамо со големите пченични пива во светот, а истовремено да ја носи препознатливата автентичност и квалитет на Скопско. Создавањето на Skopsko Weiss беше патување полно со учење и страст. Пивските мајстори вложија многу труд за да ја најдат вистинската рамнотежа, за да бидеме сигурни дека секоја голтка носи квалитет достоен за Скопско, но и отвора врата кон нов свет на вкусови. Лично многу сум горд на она што го постигнавме заедно“, рече Бојаџиски.

„Скопско Weiss е создадено како одговор на сè поголемата желба на потрошувачите за автентични вкусови и локален карактер. Во момент кога пивската сцена во земјата бележи раст, почувствувавме вистинска потреба да понудиме пиво кое ги спојува традицијата и мајсторството, со свежата енергија на новите генерации. Ова пиво е наменето за искусните пивопијци – оние кои го доживуваат пивото како ритуал и уживаат во богатството на категоријата, но и за младите возрасни потрошувачи кои бараат новитети, нешто што им отвора нова перспектива и им овозможува да бидат дел од трендовите. Со ова пиво, не само што го збогатуваме пазарот со нов избор, туку и активно придонесуваме за развојот на пивската култура во земјава, мотивирајќи ги луѓето да истражуваат, дегустираат и уживаат во пивото на еден нов начин“, изјави Марта Завкова, менаџерка за маркетинг на пиво во Пивара Скопје.

Скопско Weiss ќе биде достапно во пакување од 0,5л. во стаклена амбалажа и лименка, како и точено во низа ресторани и кафулиња низ целата земја.

На 24.09.2025 на патот Охрид-Ресен, кај место викано „Рибник”, полициски службеници од ОВР Ресен го лишија од слобода Д.В.(20) од Битола. При контрола со радар во сообраќајот, полициските службеници констатирале дека тој управувал возило „фолксваген“со битолски регистарски ознаки со брзина од 148 километри на час на место што брзината со сообраќаен знак е ограничена на 70 километри на час.

Тој е задржан во полициска станица и по целосно документирање на случајот против него ќе следува пријава по член 297-а од Кривичниот законик – ,,безобѕирно управување со моторно возило“.

Движењето “ЗНАМ за наша Македонија” со сопствена советничка листа ќе настапи на престојните локални избори во Прилеп. Листата е составена од луѓе со интегритет, луѓе професионалци од различни општествени профили, луѓе кои секој ќе ги препознае и кои можат да гарантираат заложба за развој на градот во годините кои следат.

Носителка на листата е Мирјана Стеваноска, искусна адвокатка со над дваесет години професионално искуство, позната по својот придонес во урбанизмот. Таа и целиот тим се решени да донесат позитивни промени, да создадат поубав и посреќен Прилеп и да постават нови стандарди во локалната власт.

Советничката листа е официјално презентирана од претседателот на Движење Знам За Наша Македонија – Прилеп, Емил Јанески, кој го истакнува значењето на тимот и нивната посветеност кон граѓаните на Прилеп, а ние ја споделуваме целосната презентација со јавноста.

Кандидатите од листата се искрени, одговорни и посветени на интересите на граѓаните. Тие се подготвени да носат одлуки и да ги движат процесите напред, со цел да обезбедат реални решенија за Прилеп.

Од Движењето “ЗНАМ за наша Македонија” повикуваат граѓаните да го поддржат тимот кој ќе гарантира подобар Прилеп.

По повод Светскиот ден на туризмот, кој традиционално се одбележува на 27 септември, Министерството за култура и туризам в сабота организира настан во Крушево, на тема: „Одржлива трансформација во туризмот“.

Настанот има цел да поттикне дијалог и размена на искуства меѓу професионалците од туристичкиот сектор, локалните заедници и институциите, со фокус на добра практика и иновативни решенија кои придонесуваат за одржлив развој во туризмот.

Во рамките на програмата ќе се одржи панел-дискусија со учество на претставници од туризмот и носители на иницијативи за одржлив туризам. Ќе бидат презентирани конкретни примери на успешни приказни, како и идеи за подобрување на туристичката понуда на национално и на локално ниво.

Покрај дискусиите, посетителите ќе имаат можност да уживаат и во богата програма, која вклучува: презентација на традиционални занаети, дегустација на крушевски специјалитети, активности на отворено – јавање коњи, велосипедизам и кајакарење по езерото.

Министерството за култура и туризам ги поканува медиумите, туристичките професионалци, локалните чинители и сите заинтересирани граѓани да присуствуваат и да бидат дел од овој настан, насочен кон унапредување на поодржлив, поконкурентен и инклузивен туристички сектор во Македонија.

Изградбата на брзата пруга во Македонија ќе биде најзначаен инфраструктурен проект за цела Југоисточна Европа, ќе донесе огромен економски бенефит и регионот и значително ќе го намали времето на патување од Скопје до Солун и до Атина, истакна заменик претседателот на Владата и министер за транспорт, Александар Николоски.

“Ние после долг временски период разговараме со Грција за поврзување, за економија, за бизнис, за она што го прави животот. Брзата пруга колку што е бенефит за Македонија, многу повеќе е од бенефит за Грција, особено што целосно ќе ги отвори пред се солунското и атинското пристаниште кон Централна Европа. Изградба на брза пруга на која што карго возовите ќе возат со 120км/ч, во само првата година откако ќе се изгради од сегашни 12 милиони евра колку што имаат приход двете железнички македонски претпријатија, ќе оди на 120 милиони. Истото ќе важи и за грчките пристаништа, што целосно ќе ја промени економијата во целиот овој регион”, рече Николоски.

Вицепремиерот информираше дека грчките власите се согласни, следната година почнат да градат двоколосечна пруга по примерот на Македонија од Солун до Гевгелија, а директорите на железничките претпријатија на двете земји веќе ги усогласуваат техничките детали.

“Тоа ќе значи дека од Скопје до Солун ќе се патува за 1 час и 20 минути, а до Атина за не повеќе од 4 часа и мислам дека тоа целосно ќе го смени начинот на живот на овој дел од Европа. Така што брзата пруга ќе стане најзначаен економски-инфраструктурен проект за цела Југоисточна Европа”, истакна заменик претседателот на Владата, Александар Николоски.

Републичкиот совет за безбедност на сообраќајот на патиштата известува дека од 26 септември 2025 година започнува примената на измените и дополнувањата на Законот за безбедност на сообраќајот на патиштата, кои се усвоени со цел да се унапреди безбедноста на најранливите категории на учесници во сообраќајот и да се намали бројот на случени сообраќајни незгоди како последица на невнимателно однесување во сообраќајот.

Новите законски решенија се воведуваат во насока на елиминирање на одредени навики кај пешаците и возачите од определени категории возила, меѓу кои ги издвојуваме:

•„Пешакот е должен кога се движи по коловоз под услови утврдени со овој закон или кога преминува преку коловозот и велосипедската патека или велосипедската лента, да се движи и преминува внимателно, без притоа да користи електронски уреди, како што се слушалки во двете уши, мобилен телефон, таблет, смарт часовник или друг вид електронски уред со кој би му се намалило вниманието додека го преминува коловозот и велосипедската патека или велосипедската лента“.

•„Возачот на велосипед, велосипед со помошен мотор, мопед, мотоцикл, трицикл, лесен четирицикл и четирицикл, за време на управувањето со возилото не смее да користи електронски уреди, како што се слушалки во двете уши, мобилен телефон, таблет, смарт часовник или друг вид електронски уред, со кој би му се намалила можноста за реагирање и сигурно управување со возилото, освен специјализираните уреди за комуникација кои се вградени во заштитните шлемови“.

•„Возачот на електричен тротинет за време на управувањето со возилото не смее да користи електронски уреди, како што се слушалки во двете уши, мобилен телефон, таблет, смарт часовник или друг вид на електронски уред со кој би му се намалила стабилноста и можноста за реагирање и сигурно управување со возилото, освен специјализираните уреди за комуникација кои се вградени во заштитните шлемови“.

Ова подразбира поставување нови стандарди за одговорно однесување во сообраќајот, при што, пешаците, велосипедистети, возачите на електрични тротинети и останатите учесници во сообраќајот предвидени со законското решение, се обврзуваат да учествуваат во сообраќајот без да користат електронски уреди кои им го одвлекуваат вниманието.

Републичкиот совет за безбедност на сообраќајот на патиштата нагласува дека целта на ваквите законски измени е созадвање на услови за поголема безбедност, намалување на ризиците и заштита на човечките животи.

Во таа насока, Советот упатува апел до сите учесници во сообраќајот да ги почитуваат сообраќајните правила и прописи бидејќи Безбедноста на патиштата е заедничка одговорност, на сите нас.

Во прилепското село Чумово во тек е изградба на манастир кој ќе го носи името на Св. Василиј Острошки. Управата прави надчовечки напори и успева да ја турка оваа убава идеја, а се со цел на прилепчани да им подари уште едно свето место во убава природа.

На 27.09. (сабота), ден кога православните христијани го слават празникот Воздвижение на Чесниот и Животворен Крст Господов – Крстовден., управата на овој манастир во изградба ги поканува верниците, да присуствуваат на света служба, што ќе се одржи во 10:30часот.

По литургијата ќе следи водокрст и прережување на светиот леб.

Сите добронамерни христијани се добредојдени да земат учество во овој свет празник. Посетете го и помогнете ја изградбата на овој нов свет храм.