Игор Стефановски – Иџе, најтрофејниот македонски автомобилист, овој викенд во Хрватска ќе одбележи голем јубилеј – 200-та трка во својата кариера.

На патеката во Бузет ќе се вози последната трка од ФИА Европскиот шампионат на ридски патеки (EHC) за 2025 година, каде Иџе ќе настапи со својот Ферари 488 B8, автомобил специјално подготвен за овие патеки. На оваа трка се пријавени дури 241 возач, а Стефановски ќе настапи со бројот 32.

Годинава, во генералниот пласман од првата група на шампионатот, Иџе се наоѓа на втората позиција, а само за потсетување, тој веќе е носител на европската титула во ова натпреварување, во група 1.

„Со силна возбуда, сакам да најавам дека очекувам добра трка. Посакувам да постигнеме одличен резултат и во овој шампионат. Благодарност до мојот неверојатен тим, тимот на Ферари, до моите спонзори и до сите Вас кои ни давате безрезервна поддршка. Оваа трка е посебна, затоа што со неа одбележувам 200 настапи во кариерата – предизвик кој ме мотивира уште повеќе,“ изјави Стефановски.

Иџе ја започна својата кариера во 2001 година на патеките во Скопје, а повеќе од две децении подоцна зад себе има богато искуство, титули и победи што го вбројуваат меѓу најдобрите европски возачи на ридски патеки. Во изминатите 199 трки има 83 победи и 122 подиуми.

Видеолотарија Касинос Австрија останува посветена во поддршката кон автомобислкиот шампион. Ние ќе продолжиме заедно да навиваме за Иџе и Македонија.

Изминатиот викенд на спортскиот аеродром кај прилепско Мало Коњари, се одржа првиот Air Flow фестивал – настан кој на овој простор донесе голем број, пред се’ млади момци и девојки на едно место и кој имаше хумана мисија.

Целта на овој музички настан, каде патем настапија прилепските рок бендови LOCKDOWN и THE HOUNDS, како и неколку познати диџеј имиња, беше да се обезбедат средства за повредените од несреќата во Кочани и за потребите на Центарот за култура “Марко Цепенков”.

Oваа хумана мисија наиде на масовност, па од влезници и од спонзори настанот собра над 870.000 денари.

Редно било во ваква хумана мисија со свој прилог, ако не со средства, со труд и работа да помогнат и јавните претпријатија од Прилеп, но НЕ.

Иако од ЈКП Комуналец ветиле дека ќе го исчистат просторот и ќе обезбедат канти за отпадоци, никој на лице место не се појавил….

Како после некој да им организира нешто и да се труди од Прилеп да направи поубаво место за живеење, да се труди да направи настан и концерт кој ќе стане препознатлив белег во културната понуда на градот….?!

Организаторите оваа информација ја споделија на социјалните мрежи, а зошто раководството на ова јавно претпријатие треба да се срами? Погледнете го видеото во продолжение и ќе ви стане јасно колку добар настан не поддржале…

Пишува: Никола Трајкоски

Додека низ улиците веќе се лепат постери, а партиските штабови се претвораат во изборни командни центри, повторно ни се сервира истиот театар наречен локални избори. За власта – ова е шанса да го одбрани „напредокот“. За т.н. умерена опозиција – можност да добие дел од пазарот на политички капитал. А за нас, кои одбиваме да учествуваме во овој корумпиран систем – уште еден ден кога заробената демократија ќе се легитимира преку гласачките кутии.

ИЛУЗИЈА НА ИЗБОР

Секоја четврта година ни се нуди „избор“, но во суштина тоа е само привид. На хартија има повеќе кандидати, но реално сите се дел од истата политичка класа која со децении ја паразитира државата. Левица, десница, центар – реториката им се разликува, но интересите се идентични: моќ, пари и контрола. Што и да избереш – ти избираш менаџер на туѓа агенда, а не автентичен претставник на народот.

ЛОКАЛНАТА ВЛАСТ КАКО ПРОДОЛЖЕНА РАКА НА ЦЕНТРАЛНАТА МАФИЈА!

Многумина мислат дека локалните избори се „помалку политички“ и дека локалната власт е поблиску до граѓаните. Во реалноста, токму општините се базите на клиентелизам, корупција и партиска злоупотреба. Градоначалници кои градат тротоари по цени на автопати. Совети што ги одобруваат урбанистичките злосторства на олигарсите. Комунални претпријатија претворени во партиски штабови. Ова ли е демократија?

АПСТИНЕНЦИЈАТА Е ПОЛИТИЧКИ СТАВ

Ќе ве убедуваат дека апстиненцијата е рамнодушност. Дека мора да се гласа за „помалото зло“. Но зошто да гласаме за било какво зло? Зошто да му даваме легитимитет на систем кој нè гази, краде и понижува? Радикалната опозиција не се мери по бројот на гласови, туку по јасниот став: оваа политичка реалност е неприфатлива.

ВИСТИНСКАТА ПРОМЕНА ДОАЃА ОД НАС!

Локалната власт може да се смени само ако граѓаните станат свесни за својата колективна моќ. Ако блокираат, окупираат, се самоорганизираат. Ако престанат да бараат спас од лидерите и почнат да создаваат алтернативи – хоризонтални, транспарентни и директно демократски.

ПОЗДРАВ ЗА СИТЕ МОИ СОГРАЃАНИ ОД КОКОЛЕ!

„ТРАНСМУТИРАНИ ДУШИ“ е изложбата од академскиот уметник м-р Филип Јовески што ќе биде отворена на 19.09.2025/петок/ од 19.00 ч.во Ликовната галерија во ЦК”Марко Цепенков”.( 19 до 26 9.2025)

-Портретот е еден од најстарите жанрови во историјата на уметноста и датира од древниот Египет, од пред околу 5.000 години. Тоа е уметничко дело што ја раскажува приказната на една личност. Преку позата, говорот на телото и изразот на лицето, уметникот дава индиции за расположението и карактерот на неговиот субјект.

Целта на проектот е набљудувачите да се запрашаат: Зошто субјектот е прикажан во оваа позиција, токму на оваа локација, за разлика од која било друга? Зошто фигурацијата е апстрахирана или со десатурирани бои? Зошто насловот на портретот е таков и која е пораката што ја пренесува? Портретите ќе бидат изработени од различни материјали и во разни медиуми. Преку употреба на различните алатки, техники, бои и атмосфери, ќе ги претставам личноста, приказната и важноста на пораката на субјектите во портретот. Портретите ќе ни кажат за културата на личноста, нивната психологија, па дури и за поширокиот културен и општествен контекст” – вели уметникот.

*****************************************************

Филип Јовески е наградуван мултимедијален трансдисциплинарен визуелен уметник и магистер по фини уметности, кој инспирацијата за своето творештво ја наоѓа во спојот на секојдневното и фантастичното, традиционалното и модерното, уметноста и технологијата, креативната перцепција и научното истражување.

Неговите дела претставуваат код, симбол и дестилација на концепти и идеи, засновани на личното искуство во областа на визуелните уметности, архитектурата, културното наследство, скулптурата, филмот, анимацијата и дигиталната уметност.

Неговиот визуелен јазик се движи помеѓу експресивна апстракција и имагинативна фигурација, помеѓу силни бои и потези и потиснати пастелни колорити. Ги истражува човековата психа, душа и тело низ призмата на личните и тековните локални и светски настани, и преку обсервација, интроспекција и саморефлексија создава дела кои инспирираат и потикнуваат промени како за личен, така и за одржлив развој.

Остварил уметнички студиски престои во Германија, Русија, Чешка и Англија. Реализирал самостојни изложби во Германија, Србија, Грција и С. Македонија, и учествувал на повеќе интернационални групни изложби, проекти, уметнички колонии и биеналиња. Член е на ДЛУМ, ДЛУБ и ДЛУП, а неговите дела се наоѓаат во јавни институции и приватни колекции во Северна Македонија, Германија и Англија.

Изложбата е поддржана од Министерството за култура и туризам и е дел од годишната програма на НУЦК „Марко Цепенков“.

Гимназија „Мирче Ацев“ – Прилеп ја започна новата учебна година со значајно збогатени можности за наставата по физика, благодарение на набавката на современа техничка опрема и SMART табла.

Со над 40 нови нагледни помагала и инструменти, учениците веќе имаат можност практично да ја истражуваат и подобро да ја разбираат физиката – наука која е основа за многу други дисциплини и модерни технологии. Ваквиот пристап ќе придонесе кон тоа часовите да бидат поквалитетни, поинтерактивни и поблиски до секој ученик.

За професорите, оваа опрема претставува алатка што овозможува поефикасно објаснување на комплексни поими и појави преку практична демонстрација, визуелизација и современи методи на предавање. SMART таблата ќе им помогне да користат дигитални содржини, симулации и експерименти во реално време, со што наставата ќе стане поинтересна и поразбирлива.

За учениците, пак, овие промени значат нов начин на учење – активно вклучување во часовите, експериментирање и самостојно откривање на физичките закони. На овој начин, физиката не е само теоретски предмет, туку предизвикувачко и инспиративно искуство кое ја поттикнува љубопитноста и критичкото размислување.

Иницијативата е реализирана од Центарот за развој и едукација – Прилеп, со финансиска поддршка на Германската амбасада, и претставува инвестиција во иднината на младите генерации. Таа е насочена кон подобрување на условите за учење, промовирање на еднакви можности во образованието и создавање на општество што се темели на модерно, квалитетно и инклузивно образование.

Испитниот центар за возачки испити во Битола и околните општини наскоро повторно ќе проработи, изјави министерот за внатрешни работи Панче Тошковски. Тој најави дека се бара законско решение за подобрување на квалитетот на услугите, а како можност ја спомена и опцијата за јавно-приватно партнерство.

Испитниот центар Авто мото испитен центар „Супер возач“ ДООЕЛ Битола престана да врши полагања за возачки дозволи на 12 август со период до 13 септември да ги реши неправилностите во работењето. Денеска е 16 септември и телефонот на правното лице се уште е исклучен, на што битолчани реагираат дека е крајно дрзок начин на однос на правното лице со граѓаните. Според медиумските наводи, зад „Супер возач“ стои функционер на ВМРО-ДПМНЕ и советник во Советот на Општина Кичево, Филип Митрески, преку фирмата „Стрит рајд“ којашто е сопственик.

Кога ќе проработи испитаниот центар во Битола не кажа точно дата ни министерот Тошковски, освен потврда на новинарското прашање.

„Ќе проработи -да“, рече Тошковски во интервју за порталот „360 степени“, и го образложи проблемот.

„МВР му донесе забрана за работа во траење од 30 дена на правното лице (Авто мото испитен центар „Супер возач“ ДООЕЛ Битола), бидејќи неколку месеци од како ја добил лиценцата не ги испочитувал условите за работа кои требало да ги испочитува за да функционира овој испитен центар. Кадрите кои претходно работеле во испитниот центар, правното лице ги заменило со нови. Дел од стручните лица немале лекарски уверенија. Испитниот центар не водел соодветна евиденција на луѓето кои што полагале за возачка“, објасни министерот.

Најдобриот ресторан во градот под Марковите Кули – Ресторан “ПOРТА”, ве кани на одличен почеток на викендот заедно со местралниот состав од Кавадарци – “ТРИО МАЊИФИКО”

Тие се веќе одомаќинети во Прилеп и се вистински магнет за одличен помин. Староградската музика која е нивни белег ќе ви ја направи вечерта поубава.

Секако тука е врвната услуга и храна на ресторанот “Порта”, што како и секогаш се на едно врвно ниво.

Дојдете и уживајте и овој викенд во срцето на Старата прилепска чаршија, во ресторанот кој создава една поинаква гастрономска приказна во која секој има своја улога и остава свој белег.

Петок, 19. септември, почеток 20:00часот

Резервирајте навреме на телефонскиот број: 078 368 111

Снежана Спиркоска е именувана за нов директор на Гимназијата “Мирче Ацев” во Прилеп. Таа доаѓа на местото на досегашната директорка Весна Михаиловска.

Спиркоска е професор по биологија и пред неа е предизвик да раководи со најуспешното средно училиште во Прилеп.

На досегашната директорка Весна Михаиловска и’ се заблагодаруваме за досегашната успешна соработка, и се надеваме дека истата ќе продолжи и со новиот раководител на училиштето.

Еден од напрепознатиливите крушевски и македонски брендови, слаткото задоволство кое ги има прошетано сите континенти во светот, кому му се сладеле и познати личности, дипломати, безброј туристи во Крушево, отсега во уште едно продажно место во Прилеп.

Локумот и целуфките на “Тагас Балкан” од денеска ќе ги најдете на полиците во Liquor Store, продавницата за алкохолни и безалкохолни пијалоци во домот “Спиро Забрчанец” на ул. “Егејска”.

Купете си уште денеска, уживајте и засладувајте се со еден од најубавите македонски производи кој зад себе има еден цел век историја.

На 13 септември на Спортскиот аеродром во Прилеп се одржa првиот AirFlow Music Festival – спектакл кој донесе голема публика, а кој го пропушти има за што да жали.

Фестивалот започна со настап на прилепскиот рок бенд Lockdown, па следуваа настапи на: The Hounds, Maci Stojanovic b2b Vishko, Andrew Meller и Room313.

Фестивалот имаше хумана мисија, сите средства собрани од продажбата на карти и од спонзорите ќе бидат донирани за потребите на повредените од пожарот во Кочани, преку @supportkocani и Центарот за култура „Марко Цепенков“ – Прилеп, а собрани се вкупно 807.500 денари – информираа од организацијата на настанот.

-Овие средства ќе бидат донирани за поддршка на повредените од пожарот во Кочани и за потребите на Центарот за култура „Марко Цепенков“. За целосна транспарентност, ќе објавиме доказ за донацијата. Огромна благодарност до сите вас што бевте дел од фестивалот и придонесовте за оваа хумана цел! Исто така, голема благодарност до Аероклуб Прилеп за бесплатно обезбедениот простор и уникатната сцена со авиони, како и до @partyhub.event.mk за нивната одлична логистика и организација. Се гледаме следната година во уште подобро издание – напишаа организаторите на социјалните мрежи.

Секоја чест за дечките, секоја чест за сите купија карти и за сите кои го поддржаа овој одличен музички настан. Да се надеваме дека идната година овој фестивал ќе продолжи како традиција и ќе се вгради во културната понуда на Прилеп.