Црвениот плоштад во Москва оваа година првпат ќе биде затворен за јавноста поради стравувањата од можни напади врз рускиот главен град.

Полицијата оваа година ќе ги блокира сите приоди, предупреди шефот на одделот за безбедност на градот Алексеј Мајоров, додавајќи дека во градот има многу други места каде што сите што сакаат можат прекрасно да се забавуваат.

Руските власти како причина за овие мерки го наведоа снимањето на годинашниов новогодишен концерт од Црвениот плоштад, кој директно ќе се пренесува на првиот канал на државната телевизија. На него ќе може да присуствува само публиката што претходно ја одбрале градските власти.

Неочекуваната одлука е донесена откако властите во Москва ги засилија безбедносните мерки по нападот врз рускиот авион во Египет кон крајот на октомври, при што загинаа 224 патници и членови на екипажот, а потоа и по нападот во Париз на 13 ноември, во кој загинаа 130 лица.

„Не е никаква тајна дека Москва е на нишан на терористите“, потсети градоначалникот на Москва, Сергеј Собјанин. На влезовите во трговските центри ќе бидат поставени метални детектори, а чуварите на паркинзите ќе бидат овластени да ги прегледуваат автомобилите и багажниците на возилата што ќе им се видат сомнителни.

Од другите мерки, руската главна телевизиска кула Останкино месецов беше оградена со боцкава жица, на пешачките површини во Москва се поставени дополнителни безбедносни камери, а полицијата сега низ метро-станиците патролира со кучиња-трагачи.

Со новиот закон за извршување, кој е во собраниска процедура, извршителите нема веќе да им ги блокираат сметките на граѓаните без предупредување. Со овој акт се предлага извршителот, задолжително, пред да блокира сметка, писмено да го извести должникот и да побара од него во рок од три дена да го плати долгот.

Истовремено, должникот треба да го извести извршителот дали е вработен или не, каква е неговата имотна состојба, висината на приходите од плата и други надоместоци. Ако должникот не одговори на предупредувањето, тогаш сметката ќе му биде блокирана.

Со новиот закон, исто така, се воведува и вонсудска наплата на долгови за струја, вода, парно, за телефон, кабелски оператори или куќен совет. Тоа значи дека со новата постапка ќе се избегнат трошоците што за комуналните сметки сега ги прават адвокатите, нотарите или, пак, судовите.

Законот е во собраниска процедура и се очекува да биде изгласан на почетокот на 2016 година.

Бензините од ноќеска на полноќ ќе поевтинат за еден, а дизелот за три денари, одлучи денеска Регулаторната комисија за енергетика.

Литар ЕУРОСУПЕР БС-95 ќе се продава за 61,50, а ЕУРОСУПЕР БС-98 за 63,50 денари.

Новата цена на ЕУРОДИЗЕЛ (Д-Е V) ќе изнесува 43,50 денари. Екстра лесното масло за домаќинство поевтинува за 3,5 денари и ќе чини 32 денара за литар.

Цената на мазутот М-1 НС се намалува за 1,774 денари за килограм и ќе изнесува 15.969 денари.

Регулаторната комисија за енергетика ја утврди новата цена на горивата врз основа на движењата на цената на суровата нафта на светскиот пазар и курсот на денарот  во однос на доларот во изминатите 14 дена.

Заменик министерот за образование и наука Спиро Ристовски, заедно со градоначалникот Марјан Ристески и претседателот на Совет Никола Димески, денеска ги посетија ОУ „Кире Гавриловски – Јане“, каде е поставен нов систем за греење и новоизграденото подрачно основно училиште „Круме Волнароски“ во село Галичани.

Монтажното училиште е според сите стандарди за образование. Со изградбата на училишната зграда децата добија современи услови за настава. Имаат училница, санитарни јазли, простор за наставниците и можат да користат компјутери како и нивните врсници.

Понатаму се планира да се уреди и дворот, како и да се изгради спортско игралиште.
Освен во Галичани монтажни училишта има и во населените места: Чепигово и во н.м Беровци.

Во присуство на министрите Владо Мисајловски, Спиро Ристевски, градоначалникот Марјан Ристески и претседателот на Совет Никола Димески, денеска свечено во употреба беа пуштени два локални патишта. Патот од Прилеп до Маркова Чешма со должина од 1.400 метри, инвестиција од 10.000.000 денари, средстава обезбедени од Влада на РМ, преку кредит на Светска банка и патот до манастирот Св.Петка во с. Лениште, во должина од 1.200 метри, или 6.500.000 денари, средства обезбедени од Влада на РМ преку кредит на Светска банка.

Со овие инфраструктурни зафати значително ќе се подобрат условите и ќе се олесни одвивањето на сообраќајот. Со цел подобрување на локалната патна инфраструктура во текот на градежната сезона напоредно се работи на неколку локации во градот, кои истовремено ќе допринесат за олеснување на условите за одвивање на сообраќајот.

Секое куче има свој карактер, но кучето Буч со својата насмевка на неговиот сопственик дефинитивно му носи среќа.

Затоа Буч кај газдата Пит има посебно место. Двајцата се неразделни пријатели. Пит направи една голема галерија од неговите среќни „фаци“ и дефинитивно кучето Буч го освои светот.

Јавниот Градски Превоз при ЈП за ПУП на сите граѓани  им јачестита Новата 2016 год. и Божиќните празници со желби за добро здраве и бериќет

Воедно ги информираме граѓаните дека:
Автобусите на Јавниот Градски Превоз ќе имаат редуциран возен ред на сите линии за време на Новогодишните и Божиќните Празници .

И  тоа по  следниов редослед :

31.12  –  Од 6.30 h до 15.30 hсите три линии

01.01  –  Неработен ден

02.01  –  Неделна (вонредна) линија на еден саат од 6.30h(х.Салида) до 14.30 h од (Н.Гробишта)

03.01  –  Неделна (вонредна) линија на еден саат од 6.30h(х.Салида) до 14.30 h од (Н.Гробишта)

04.01  –  Полно работно време од 6.30 h до 20.30 h

05.01  – Од 6.30 h до 17.30 hсите три линии

06.01  – Неделна (вонредна) линија на еден саат од 6.30h(х.Салида) до 15.30 h од (Н.Гробишта)

07.01 –  Неделна (вонредна) линија на еден саат од 6.30h(х.Салида) до 15.30 h од (Н.Гробишта) со зголемен бројавтобуси

Со почит

Јавен Градски Превоз

Учениците од Гимназијата „Мирче Ацев“ заедно со свои професори и директорот, денес беа во посета на учениците од посебните паралелки во ОУ “Климент Охридски”. Со песни ги расвеселија учениците, а за крај им поделија и новогодишни пакетчиња

Театарот ,,Војдан Чернодрински” , пред новогодишните празници ги кани дечињата на волшебна бајка, на претставата ,, Волшебникот од Оз”.

Дечиња појдете во театар, во среда од 17.00 часот , дружете се и уживајте.

Влезници на билетарницата од театарот од 10 до 13 и од 15 до 17 часот.

Резервации на телефон – 428 644 или 076 442 378

Интензивно се одвиваат градежните активности на новата спортска сала во дворот на основното училиште Манчу Матак во Кривогаштани каде денес се започна со поставување на основниот слој на подлогата врз кој ќе следува изолационен дел и горниот финален дел од подлогата. Спортската сала е инвестиција на Министерството за образование и наука со вкупна вредност од 24.000.000 денари со која инвестиција најголемиот бенефит ќе го имаат најмладите, учениците па и повозрасните кои рекреативно ќе можат да ја користат веќе од наредната зима кога и се очекува објектот да е веќе во функција. Жителите на општината со нетрпение ја очекуваат оваа спортска сала за непречено одвивање на спортските активности во периодите од годината кога временските услови не дозволуваат користење на спортските терени на отворено. Пополека но сигурно општина Кривогаштани значително ја подобрува спортската инфраструктура во општината каде што исто така најавена е изградба на уште една спортска сала во дворот на основното училиште Јонче Смугрески во населеното место Обршани.