Со длабока жалост и сочувство до семејството, денес ја споделуваме веста за заминувањето на еден од најмаркантните личности на Битола, професорот Александар Стерјовски – објавија на социјалните мрежи од Општина Битола.

-Стерјовски остави длабока трага како истражувач, педагог и хроничар на градот. Со своите книги и студии, меѓу кои се издвојуваат делата од серијалот „Битолско десеткнижие“, тој го документираште развојот на архитектурата, културата, спортот, музичката традиција и други области за Битола. Неговите дела претставуваат вистински архив на градската меморија.

За битолчани, тој е симбол на љубовта кон градот, инспирација за идните генерации и жив сведок на неговиот дух. Неговото дело претставува траен споменик на Битола и нејзините најзначајни личности – стои во соопштението.

-На 17.10.2025 во 19:20 часот, полициски службеници од ОВР Прилеп ги лишија од слобода А.А.(29) и двајца малолетници, сите од Прилеп, поради основано сомнение дека извршиле тешки кражби во две колонијални продавници и една златарница на подрачје на Прилеп. Украдените предмети се пронајдени и вратени на сопствениците, а по документирање на случајот, ќе биде поднесена кривична пријава по член 236 од КЗ „тешка кражба“ – информираат од МВР.

Со амбиции за пласман помеѓу осумте најдобри, прилепската екипа Мега Баскет, во понеделник (20.10.) ќе ја започне новата сезона во Првата кошаркарска лига.

Стартот на првиот натпревар е со почеток од 20:15 часот во спортската сала во ООУ “Добре Јованоски”, а Мега Баскет во новата сезона ќе биде поддржан од верните спонзори – компаниите: “Прилепска Пивара”, “Матадор”, “Бимфуд”, а од оваа сезона и од новиот спонзор “Гурмано”.

Дојдете во понеделник, гледајте добра кошарка и бодрете ја прилепската екипа, затоа што дечките заслужуваат, а сите им сме потребни во остварување на нивната цел.

Непречено почна гласањето на болните и изнемоштените во Прилепскиот регион.

Од општинската изборна комисија во Прилеп потврдуваат дека нема никакви проблеми во текот на гласањето.

-Нема проблеми и непречено и навремено почна гласањето на болните и изнемоштените, на штитениците во домот за стари лица „Киро Крстески Платник“ и на осудениците во прилепскиот затвор, вели Валентин Божиноски, претседател на општинската изборна комисија во Прилеп.

Во Прилеп, денеска своето право на глас го остваруваат 298 болни и изнемоштени лица, 60 штитеници во домот за стари лица „Киро Крстески – Платник“ и 119 осуденици во прилепскиот затвор.

Денеска гласаат и 222 болни и изнемоштени лица во општина Крушево, 61 во Кривогаштани и 105 болни и изнемоштени во општина Долнени.

На ден пред изборите, гласаат 2162 затворениците, лицата во домашен притвор, 8851 болни и немоќни лица и 442 лица во старските домови. Според информациите од Државната изборна комисија, од утрово гласањето тече мирно и непречено.

Според Избирачкиот список, во казнено – поправните домови, денеска треба да гласаат 2162 затвореници од кои во КПД Идризово 938, во затворот во Шуто Оризари 391, во штипскиот затвор 237, во прилепскиот 119…

Во своите домови ќе гласаат и лица кои се пријавиле за гласање, а се во куќен притвор.

Членови на избирачките одбори денеска во нивните домови треба да посетат 8851 болни и немоќни лица кои побарале и им било прифатено да гласаат.

До Државната изборна комисија пристигнале 9217 пријави за гласање на болни и немоќни лица, од кои 8851 биле прифатени.

Во старските домови ќе гласаат 442 возрасни лица, наместо 450 лица. Бројката се намали за осум лица откако Министерството за социјална политика, демографија и млади, како што соопшти ДИК на седница пред неколку дена, извести дека старскиот дом Арија е затворен.

По 18-ти пат во чест на Тоше, 12 маратонци истрчаа 900км од Нова Градишка до Крушево и беа пречекани традиционално со рози по улиците.

Оваа година маратонците беа поддржани од Универзитет Скопје, од каде велат дека ова е настан кој ја спојува спортската енергија со хуманата мисија и споменот на Тоше Проески.

Претставници на Универзитетот го пречекаа маратонскиот тим со искрени емоции, гордост и благодарност кон ликот и делото на Тоше.
Секоја година, овој ден и овој настан ја обединуваат Македонија во име на љубовта, музиката и човечноста.

,,Голема благодарност до Универзитет Скопје и Ректорот проф.д-р Аце Миленковски, кој несебично подаде рака во последните денови на организацијата на овој настан. Бидејќи, оваа година не наидовме на заеднички јазик со менаџментот на Спомен куќа ,,Тодор Проески”, ние моравме да бараме решенија за да го одржиме и оваа година овој маратон, бидејќи знаете ние тоа му го имаме ветено на Тоше и не смееме да го изневериме.”– изјавија организаторите на Маратонот за Тоше.

ВИДЕО: Фан Продукција – Зоран Пилоски (www.funzoran.mk)

Анкетите покажуваат дека Крушево е подготвено за промена. Овие бројки не се само проценти, тие се гласот на луѓето кои сакаат подобра иднина за Општина Крушево. Голема ќе биде победата! Нико Чонески за Еснафско Крушево – велат од тимот на кандидатот за градоначалник на ВМРО-ДПМНЕ.

На социјалните мрежи кружи и резултат од анкета, според која Чонески во пресрет на изборите во недела има поддршка од 57% од испитаниците, а актуелниот градоначалник, Томе Христоски, 40%.

Според кампањата, Чонески водеше позитивна кампања, им претстави на крушевчани и жителите на населените места еден нов концепт за еснафски развој и напредок на општината, вети решавање на проблемот со недостиг за вода за пиење, решавање на проблемот со крушевската депонија и покажа визија за развој на туризмот.

Останува да ги сочекаме резултатите во недела и да видиме кој ќе биде исходот и одлуката на крушевчани.

Претприемништвото е двигател на секоја економија, а младите умови се полни со иновативни идеи кои можат да го трансформираат нашиот град. Меѓутоа, патот од идеја до успешен бизнис е тежок, полн со предизвици и бара поддршка. За да го поттикнеме претприемачкиот дух и да го спречиме одливот на мозоци, ќе го основаме „Стартап Хаб Прилеп” – вели кандидатот за градоначалник на општина Прилеп од Коалицијата “Искуство за успех”, предводена од Либерално Демократската Партија, Жарко Бошкоски.

Станува збор за проект кој планира вклучување на младите во развојот на градот, каде:

-Младите ќе можат да развиваат идеи, да добиваат менторство, финансиска поддршка и ресурси,

-Ќе се добива бесплатна финансиска едукација — со цел да им се овозможи на младите да разберат како да управуваат со пари, како да инвестираат, како да започнат сопствен бизнис,

“Стартап Хаб Прилеп” би значел и поддршка за култура, спорт и јавни простори кои ги интересираат младите — модерни игралишта, настани, креативни простори, фестивали, култура на отворено, театар, уметност.

-Хабот ќе биде лоциран во центарот на градот и ќе нуди комплетна поддршка за младите претприемачи, особено оние во ИТ секторот и креативните индустрии. Ова вклучува менторство од искусни бизнисмени и експерти од различни области, организирани обуки за бизнис планирање, дигитален маркетинг и финансиски менаџмент, како и правни совети за основање фирма. Најважно од сè, хабот ќе обезбеди модерен канцелариски простор по субвенционирани цени, овозможувајќи им на младите компании да ги намалат почетните трошоци и да се фокусираат на развојот на својот производ или услуга, вели Бошкоски за својот проект од изборната програма.

Бошкоски го опшува проектот како место за вмрежување и соработка, екосистем кој ќе ги негува новите бизнис идеи.

-Редовно ќе организираме „Pitch Nights” и „Demo Day” настани, каде што младите претприемачи ќе можат да ги претстават своите идеи пред потенцијални инвеститори. Нашата цел е да им помогнеме на овие идеи да прераснат во успешни компании кои ќе отвораат нови, добро платени работни места токму тука, во Прилеп, додава Бошкоски.

“Системот треба да функционира, транспарентно да се однесуваат политичките авторитети и младите ќе ги зачуваме. Јас сум убеден во ова што го зборувам, бидејќи Македонија почна да станува стара нација, младите ни заминаа”, истакна во гостување во “РАДИО ПЕЛА”, првиот човек на Движењето ЗНАМ за наша Македонија од Прилеп, Емил Јанески.

На прашање што е тоа што го нуди ЗНАМ за младите во општина Прилеп и за што ќе се залагаат нивните советници во идниот состав на Советот, носителката на советничката листа, Мирјана Стеваноска, порача дека младите треба да бидат дел од случувањата и да се слуша нивниот глас.

-Младите треба да имаат свое место во општината. Преку поголем ангажман на млади во општински програми и иницијативи, младите ќе бидат вклучени во креирањето на политиките, а не само посматрачи. За подобрување на вештините и можностите за вработување преку локални програми за обуки, поддршка на младинско претприемништво и поврзување со компании, да создадеме услови младите да останат тука и да градат иднина”, истакна Стеваноска.

На 8 октомври 2025 година, во денот на претставувањето на преподобниот Сергиј Радонежски, чудотворецот, во Успенскиот Собор на Свето-Троицката Сергиева Лавра беше отслужена торжествена Божествена Литургија, со која началствуваше Неговата Светост, Патријархот Московски и на цела Русија г. г. Кирил.

Со Неговата Светост сослужуваа и архиереите на Руската Православна Црква, а меѓу нив и делегацијата на Македонската Православна Црква – Охридска Архиепископија, предводена од Митрополитот Преспанско-Пелагониски г. Петар, член на Светиот Синод на МПЦ–ОА, Епископот Велички г. Николај, викарен епископ на Преспанско-Пелагониската епархија и архимандритот Атанасиј (Арсоски).

На Светата богослужба присуствуваа бројни архиереи, свештенослужители, монаси и многуброен верен народ, кои молитвено го прославија споменот на великиот руски подвижник и игумен на Радонеж, преподобниот Сергиј, чии мошти почиваат во оваа света лавра – духовното срце на Руската Православна Црква.

Исто така, на 12.10.2025 г., во осумнаесеттата Неделата по Педесетница, во Исакиевскиот собор во Санкт Петербург, беше отслужена Света Божествена Литургија, со која началствуваше Митрополитот Санкт-Петербуршки и Ладошки г. Варсонофиј.

На светата богослужба сослужуваа и претставниците на делегацијата на Македонската Православна Црква – Охридска Архиепископија: Митрополитот Преспанско-пелагониски г. Петар, Епископот Велички г. Никола и архимандритот Атанасиј (Арсоски), како и Епископот Кронштатски г. Венијамин, Епископот Петергофски г. Силуан, прот. Сергеј Куксевич, прот. Алексеј Скљаров, прот. Роман Ковалски со соборниот клир и други свештенослужители.

Пееше соборниот хор под диригентство на Лев Дуњаев, како и младинскиот хор под раководство на Лариса Христич.

На богослужбата присуствуваше и директорот на државниот музеј „Исакиевски собор“ г. Јуриј Мудров.

По завршувањето на Божествената Литургија, митрополитот Варсонофиј им се обрати на верниците со топли зборови, изразувајќи ја својата искрена радост поради заедничката молитва и духовното единство со архиереите на Македонската Православна Црква. Во знак на благодарност и братска љубов, а како спомен на заедничкото богослужение, Митрополитот Варсонофиј им подари на архиереите на Македонската Црква крст со панагија.