ЕВН Хоме како Универзален снабдувач на електрична енергија, на тендерот за набавка на електрична енергија за задоволување на потребите на корисниците за периодот јануари-декември 2026 доби само една понуда и тоа од АД ЕСМ со купопродажна цена на електрична енергија од 65 евра за мегаватчас, за покривање на 100% од вкупно планираните количини.

Оваа цена е повисока за 4,84 % од претходната која беше добиена на последниот тендер на Универзалниот снабдувач (јуни-декември 2025), кога АД ЕСМ понуди купопродажна цена од 62 евра за мегаватчас.

Под комплетен надзор на Регулаторната комисија за енергетика и согласно законските обврски и претходно утврдената методологија, во наредниот период ЕВН Хоме ќе ја пресмета цената на електрична енергија по однапред утврдени влезни параметри.

Како и секогаш, во крајната цена влегуваат: цената по која АД ЕСМ ја продава електричната енергија на ЕВН Хоме, цената на Преносниот систем оператор МЕПСО, цената на Операторот на пазар на електрична енергија МЕМО, како и цената на Дистрибутивниот систем оператор Електродистрибуција.

Легендарната емисија „Јади Бурек“ заминува во историјата. Нејзиниот автор и водител, Јанко Илковски информацијата ја објави на социјалните мрежи каде објави и дека ја продава сценографијата.

Објасни дека нема интерес од ниту една телевизија да ја емитува оваа емисија а тој сам нема сили да продолжи да работи онлајн. Дополнително, рече дека има и „здравствени искушенија“ и дека во моментов таму му е фокусот.

Емисијата „Јади Бурек“ смени неколку телевизии но секаде го задржа истиот формат. Интервју или комуникација со публиката во живо, што му донесе многу популарност на Јанко.

Бараат пари за поголеми плати и буџети, а не работат, не можат сами да се реформираат и не испорачуваат резултати, истакна заменик претседателот на Владата и министер за транспорт, Александар Николоски, во гостувањето во “Само интервју” на ТВ Канал 5, зборувајќи за состојбите во македонското судство и обвинителство.

Коментирајќи ги забелешките за работата на судските органи, тој вели дека видни се притисоците од меѓународниот фактор, иако судството не покажува никакви резултати.

“Излезете надвор од Скопје и најубавите куќи се на цариник, судија и обвинител и ако не го знаете вистинскиот адвокат и немате да платите, не дај Боже и прав да сте, крив излегувате. Законите се добри, проблем е што или не работат или ги ставаат работите под тепих, или нешто ако сработат, најчесто им е да удрат некој бизнисмен. За жал на тоа се сведе судството и Обвинителството во Македонија”, рече Николоски.

Во однос на барањето за повисоки плати во правосудниот систем, Николоски посочи дека платите на судиите и обвинителите и сега се високи и дека проблем не се примањата, туку тоа што судиите и обвинителите не испорачуваат.

“Еве теоретски ќе ги зголемиме и платите, ќе се сменат работите? Исто ќе е! Мали им се сега платите? Повисоки плати имаат и од министри и од премиер, и од претседател на држава. Се сеќавате дека Уставниот суд ја укина одлуката за замрзнување на платите, кога наеднаш скокнаа платите за 78%, и ние донесовме принципиелен став дека од ова нивно повеќе платите нема да растат и ги намаливме коефициентите, но еве тоа за судиите и обвинителите не требало да важи. Проблемот во државава не се платите на судиите и обвинителите, проблемот е дека не испорачуваат”, истакна вицепремиерот Николоски.

Николоски потенцираше дека целта на Владата е судството и Обвинителството да бидат независни, но се додека довербата во правосудниот систем е олку ниско ниво и се додека тоа е проблем кој го посочува секој еден граѓанин, Владата нема да остане нема на состојбите.

Во однос на условите за работа во судовите и обвинителствата, Николоски направи компарација за тоа како постапуваа судиите и обвинителите кон ВМРО-ДПМНЕ, а како денеска постапуваат или не постапуваат кон претходната владеачка гарнитура.

“Дали имаа основни услови за работа за да му го замрзнат имотот на ВМРО-ДПМНЕ? Очигледно имаа, затоа што ние сме единствената владеачка партија во Европа, која што има замрзнат имот. Дали можат со истите услови, кои што ги имале да му го замрзнат имотот на ВМРО-ДПМНЕ, барем да го испитаат имотот на СДСМ и ДУИ? И да им се даде се’ што бараат, ќе излеземе идната година пак, за истиот проблем ќе зборуваме. Тие бараат само плус пари за плати, а сите останати трошоци да останат на сметка на државата. Суд нов да се изгради во државата, треба Владата да го плати,”– додеде вицепремиерот Николоски во интервјуто.

За православните христијански верници кои се водат според јулијанскиот календар денеска почна шестнеделниот божиќен пост. Постот ќе трае 40 дена, односно до Божиќ, 7 јануари, денот на раѓањето на Исус Христос. Бидејќи датумот на Божиќ не се менува, постот секоја година почнува на 28 ноември, а завршува на Бадник, 6 јануари.

Христијанскиот пост е воведен по примерот на Исус Христос, кој 40 дена поминал во пустина во пост и молитва. Постот претставува духовна и телесна подготовка на човекот за влез во тајната на претстојниот празник. Божиќниот пост е втор по должина на траење, веднаш по велигденскиот.

Во однос на „строгоста“ за употреба на храна, божиќниот пост е „поблаг“, бидејќи дозволува користење вино, масло за јадење и риба.

Според типикот на црквата, божиќните пости се постат на следниот начин: понеделник, вторник и четврток на масло, среда и петок строг пост, сабота, недела и празници е допуштено риба. За монаштвото е благословено и понеделник да е строг пост, а за мирјаните кои имаат именден или куќна слава е благословено употреба на риба.

Целта на постот е да се „исчистат“ духот и телото, што се постигнува не само со воздржување од мрсна храна, туку и од лоши мисли, зборови и дела. За време на божиќниот пост, посни се и сите славски трпези.

Со Канонот на Православната црква се предвидени еднодневни и повеќедневни пости. Еднодневните пости се во среда и петок, Водокрст на 18 јануари, Отсекувањето на главата на св. Јован Крстител на 11 септември и Крстовден на 27 септември. Повеќедневни пости се велигденските, петровденските, богородичните и божиќните пости.

Божиќниот пост, како и останатите повеќедневни постови, датира од првите векови на христијанството и се споменува во делата на светите отци од 4 и 5 век. Првобитно постот траел седум дена, а одлуката христијаните пред празникот – Раѓањето Христово да постат 40 дена е донесена на Соборот во Цариград во 1166 година.

На 28 ноември /петок/ 2025 претпремиера, на 29 ноември 2025 /сабота/ премиера на претставата „Црнила“, во режија на Дејан Пројковски, во театарот „Војдан Чернодрински“. Претставата ќе се изведе на сцена 105 од 20.00 часот. Ова е втора премиера на театарот со поддршка на Министерството за култура и туризам за 2025 година.

Изјава на Марија Попова Јованоска, директорка на НУЦК „Марко Цепенков“ – Прилеп

„Претставата носи силна  симболика за нашиот тим, затоа што создадовме сосема нова сцена, во нови услови, работевме со посветеност, со многу ентузијазам  и со верба дека театарот наоѓа начин да живее. Нашиот театар вложи многу енергија, труд и срце за „Црнила“ да го добие обликот што го заслужува“.

Изјава на раководителот на театарот Михајло Миленкоски:

„Црнила“ од Коле Чашуле е дело што не старее, Чашуле е писател кој со интелектуална храброст и длабочина го создаде современиот македонски драмски јазик. Сакам да му се заблагодарам на Пројковски за тоа што ќе ни остави убава претстава во која ќе ужива публиката. Под негова режија, „Црнила“ станува мост што спојува. Пројковски успеа да ги отвори сенките, дилемите и моралните битки на нашите ликови и да ги донесе пред публиката како жив разговор со денешницата.Со радост го отвораме и ново-стариот сценски простор — Сцената 105, простор што ќе ни овозможи поинтимни, поекспериментални и посовремени театрални јазици. Место каде младите автори ќе добијат дом, а традицијата ќе продолжи да дише нов воздух. Како уметничко раководство, со гордост го спојуваме наследството на Чашуле, духот на Горче Петров, визијата на Пројковски и воскреснувањето на Сцената 105.

Изјава на режисерот Дејан Пројковски:

– Ова ми е прва претстава во театарот „Војдан Чернодрински“ и тоа претстава, како што се вели, која е еден од лајт-мотивите, или, голем рефрен во македонската драматургија, која што зборува за лекциите кои тешко ги учи Македонецот низ историјата. Работејќи ја претставата, постојано имав една мисла: „Македонец уби Македонец за Македонија“…. „Црнила“ на Чашуле е еден од текстовите кој го имаме како бреме и секоја театарска генерација, заедно со публиката секогаш се преиспитуваме на истите теми: Што сме направиле и што треба да направиме, или, што сме научиле за некои работи да не се повторуваат, односно да не се случуваат…. Нашите ликови во „Црнила“ малку се заглавени во калта од сопствените пороци и предавство, а од друга страна, се со константен сремеж и поглед кон небото.  Всушност, тоа растргнување меѓу желбите и можностите ги прави сите да се растегнуваат како жиците на гитарата. Работев во период кој што мислам дека беше многу важен за театарот и сите планини кои треба да се искачат. Секогаш треба да се работи и да сме тука кога е тешко и кога е важно. Брехт вели дека театарот не зградата туку луѓето и сега беше важно да се радуваме на сите прекрасни луѓет кои го прават прилепскиот театар. Се надеваме дека ќе ги видиме во нивниот вистински дом…..Претставата е актерска и режисерка исповед и ја работевме без заземање став. И мило ми е што отвора дијалог за тоа дека мора во одредени моменти да имаме заеднички ставови, а црнилата се секогаш во македонската историја како резултат на поделбите.“

Сценограф е  Валентин Светозарев, костимограф  Марија Пупучевска,  автор на музиката е Горан Трајкоски, драматург Лидија Митоска-Ѓорѓиевска, а дизајнот на плактот е на Сергеј Светозарев.

Во претставата играат Сара Спиркоска, Бобан Алексоски, Катерина Чакмакоска – Клинческа,  Катерија Чакмакоска-Клинческа, Александар Степанулески,  Александар Тодески,  Димитар Ѓорѓиевск,  Михајло Миленкоск,  Илија Волчески и децвата  Иво Ачански, Ангелина Тодеска, Давид Кочоски, Ива Малинческа.

Регулаторната комисија за енергетика, водни услуги и услуги за управување со комунален отпад на Република Македонија (РКЕ) донесе Одлука со која се врши намалување на малопродажните цени на нафтените деривати во просек за 1,26% во однос на одлуката од 24.11.2025 година.

Референтните цени на нафтените деривати на светскиот пазар во споредба со претходната пресметка бележат намалување во просек: кај бензините за 2,370%, кај дизелот за 6,738%, кај екстра лесното масло за 6,741% и кај мазутот намалувањето за 3,944%.

Курсот на денарот во однос на доларот во изминатиот период по кој беа формирани цените со претходната пресметка е повисок за 0,4085%.

Од 28.11.2025 година од 00:01 часот максималните цени на нафтените деривати ќе изнесуваат:

Моторен бензин ЕУРОСУПЕР БС – 95 75,00 (денари/литар)
Моторен бензин ЕУРОСУПЕР БС – 98 77,00 (денари/литар)
Дизел гориво ЕУРОДИЗЕЛ БС (Д-Е V) 70,50 (денари/литар)
Масло за горење Екстра лесно 1 (ЕЛ-1) 67,50 (денари/литар)
Мазут М-1 НС 34,865 (денари/килограм)

Малопродажната цена на ЕУРОДИЗЕЛ (Д-Е V) се намалува за 2,50 ден/лит.
Малопродажната цена на Екстра лесното масло за домаќинство на (ЕЛ-1) се намалува за 2,00 ден/лит.
Малопродажните цени на бензините ЕУРОСУПЕР БС-95 и ЕУРОСУПЕР БС-98 и на Мазутот М-1 НС не се менуваат.

Напоменуваме дека ова се максималните цени на нафтените деривати од 00:01 часот на 28.11.2025 година.
Трговците на големо и трговците на мало со нафтени деривати и горива за транспорт можат да ги формираат
цените на одделни нафтени деривати и горива за транспорт и пониско од највисоките утврдени цени.

Потпретседателот на Владата и Министер за транспорт, Александар Николоски, вечерва со почеток од 18:30часот, гостува во “Само интервју” кај Гоце Михајлоски на Канал 5 телевизија.

Кога ќе го видиме градскиот воз, а кога брзата пруга?
Од инженерски ќорсокак до развоен проект, во Македонија или во Бугарија, каде возот ќе вози со поголема брзина?
Агелер ги охрабри судиите да проговорат ” кој од политиката меша прсти”,а политичарите да ги спроведат уставните измени, со која брзина одиме кон Брисел?
Се развива ли Македонија со темпо како што очекуваат граѓаните? – се дел од прашањата на кои новинарот од Прилеп и уредник на КАНАЛ 5 ќе бара одговор од вториот човек на Владата и владеачката партија.

Следете КАНАЛ 5 по централните вести!

Mинистерството за одбрана распишува Ј А В Е Н О Г Л А С за прием на 7 (седум) подофицери на служба во Армијата на Република Северна Македонија.

1. Се распишува јавен оглас за прием на 7 (седум) подофицери од воздухопловно техничка служба во чин водник на служба во Армијата на Република Северна Македонија (во натамошниот текст: Армијата), на неопределено време за потребите на Воздухопловниот ВИНГ во Командата за операции, касарна „Страшо Пинџур“, Петровец, гарнизон Петровец.

2. На јавниот оглас може да се пријават кандидати кои ги исполнуваат условите утврдени во огласот и тоа:

Општи услови:

-да се државјани на Република Северна Македонија,
-да се полнолетни,
-да имаат посебна здравствена и физичка способност,
-со правосилна судска пресуда да не им е изречена казна забрана на вршење професија, дејност или должност
да не се осудувани за кривични дела за кои е предвидена казна затвор од најмалку шест месеци, односно за кривично дело во врска со службената должност, или за друго кривично дело што го прави недостоен за претставување на Републиката;

Посебни услови:

-да имаат завршено средно образование (машинска или електротехничка струка),
-да имаат завршено доброволно служење на воениот рок, и
-да не се постари од 25 години.

Kандидати кои ќе бидат избрани, а немаат завршено доброволно служење на воен рок, ќе бидат упатени на основна војничка обука во траење од 3 (три) месеци, по што ќе се упатат на стручно оспособување и усовршување за подофицери.

Работни денови:

– од понеделник до петок;
– работни часови неделно: 40

Работно време:

– времетраење на работниот ден е осум часа со почеток на работно време во 08.00 часот и завршеток во 16:00 часот.

Паричен нето износ на плата:

– Платата изнесува над 30.700 денари, со дополнителни над 13.000,00 денари трошоци за станбено обезбедување и други надоместоци уредени со Законот за служба во Армијата на Република Северна Македонија и Колективниот договор во Министерството за одбрана.

3. Рокот за пријавување на огласот е 15 дена од денот на неговото објавување.

4. Заинтересираните кандидати доставуваат пријави до Министерството за одбрана, непосредно во деловодството на министерството или по пошта со препорачана пратка.

5. Кон пријавата кандидатите приложуваат:

-уверение за државјанство,
-доказ за завршено образование,
-извод од матична книга на родени,
-уверение со кое се докажува општата здравствената способност, издадено од Институт за медицина на труд,
-уверение за неизречена казна забрана на вршење професија, дејност или должност,
-уверение за неосудуваност за кривични дела за кои е предвидена казна затвор од најмалку шест месеци, односно за кривично дело во врска со службената должност, или за друго кривично дело што го прави недостоен за претставување на Републиката
мотивациско писмо.

6. Документите задолжително да бидат доставени во оригинал или заверена фотокопија.

7. При вработувањето ќе се води сметка за соодветна и правична застапеност на граѓаните кои припаѓаат на сите заедници со почитување на критериумите на стручност и компетентност.

8. Министерството за одбрана ги повикува и охрабрува девојките и жените кои ги исполнуваат условите да се пријават на јавниот оглас за прием на подофицери во Армијата.

9. Некомплетните и ненавремените пријави нема да бидат разгледувани.

10. Постапката за избор на кандидати ја спроведува Комисија формирана од министерот за одбрана, согласно важечката законска и подзаконска регулатива.

11. Кандидатите кои ќе бидат најдобро рангирани согласно условите во огласот, а за кои врши избор министерот за одбрана ќе бидат упатени на стручно оспособување и усовршување за подофицери во Командата за обука и доктрини при Генералштабот на Армијата, каде ќе се реализира и основната војничка обука за кандидатите кои немаат доброволно служено воен рок.

12. Со кандидатите од точка 11 за времетраењето на стручното оспособување и усовршување за подофицери ќе се склучи договор за работа на определено време, а во кој период влегува и основната војничка обука за кандидатите кои немаат доброволно служено воен рок.

13. Со кандидатите кои со успех ќе го завршат стручното оспособување и усовршување за подофицери, министерот за одбрана или од него овластено лице склучува договор за работа.

14. На кандидатите кои нема да бидат избрани по јавниот оглас и нема да засноваат работен однос во Министерството за одбрана како подофицери на служба во Армијата на Република Северна Македонија, поднесените документи ќе им бидат вратени со писмено известување.

15. Јавниот оглас се објавува во најмалку два дневни весника од кои најмалку во по еден од весниците што се издаваат на македонски јазик и по еден во весниците што се издаваат на јазикот што го зборуваат најмалку 20% од граѓаните кои зборуваат службен јазик различен од македонскиот јазик.

-ОВР Прилеп поднесе кривична пријава против Д.М.(41) од село Обршани, општина Кривогаштани поради постоење основи на сомнение за сторено кривично дело „неовластено изработување, држење, посредување и тргување со оружје или распрскувачки материи“. На 23.05.2025 полициски службеници извршиле претрес во домот кој го користи пријавениот, при што пронајдени и одземени се ловна пушка и патрони, за кои пријавениот не поседувал дозвола издадена од надлежен орган – информираат од МВР.

Во хотелот „Александар Палас“ во Скопје, Кинеската амбасада во Република Македонија организираше свечен прием на покана на амбасадорката на Народна Република Кина, Џијанг Сјаојен. Настанот, одржан на 25 ноември 2025 година, беше во чест на неодамнешната официјална посета на Пекинг, Ши Јн и Шангај, од македонски туристи како и со цел продлабочувањето на пријателските односи меѓу двете земји.

На свечениот прием свое обраќање имаше самата амбасадорка – Џијанг Сјаојен, која го истакна своето задоволство по повод остварената посета на првите туристи по воведување на безвизниот режим помеѓу Македонија и Народна Република Кина, а со цел оваа соработка понатаму да се продолжи и продлабочува.

На настанот беа остварени средби на кинески претставници со претставници на Република Македонија, за зајакнување и интензивирање на туризмот.

Доц.д-р Марија Дулевска од Прилеп, беше помеѓу присутните и оставри средба и разговор за образованието, како и за можностите за подобрување и модернизирање на образовниот процес.

-Се напомена и тековното факултативно изучување на кинескиот јазик меѓу учениците во основното образование. Амбасадорката посочи на важноста за идна соработка во делот на образованието преку Институот “Конфучие” во Скопје и создавање на идни можности за соработка – вели Дулевска.

Исто така, на настанот се оствари средба со претставници од бизнис секторот од Кина во Република Македонија, на која беа разгледани можности за идни соработки во трговијата, производството на текстил и зајакнување на економијата.

-Во сите три домени на туризам, образование, трговиија беа разменети контакти и оставрени кратки суштински разговори. Во иден план е и официјално да се покани амбасадорката на Н.Р. Кина во општина Прилеп, како наш ценет гостин, а со цел разгледување на можности за идни соработки во сите домени, кадешто има можности и потенцијал за уште поголем напредок на Прилеп. Во обраќањето на амбасадорката се потенцираа постулатите дека Народна Република Кина останува отворена за соработка и идно продлабочување на меѓусебната почит, разбирање и стратешките соработки, вели Дулевска.

Доц. д-р Марија Дулевска и нејзиното училиште “Англиски кај Марија” од Прилеп беа почесни гости на приемот.