„Дождови во мај“ на Даница И. Лепојевиќ е длабоко-интимно четиво, четиво без задршка… На раб на лирика и еротика… Директно и отворено, целосно ранливо и сосема храбро женско писмо… Интерактивно четиво кое инстантно му се обраќа на читателот… Нешто меѓу книга поезија и таен дневник, зачинети со Инстаграм-содржина… Односно сè заедно.
„Дождови во мај“ е дело составено од поезија и дневнички записи во печатен формат и аудиовидео материјал поставен на Инстаграм-страница до која се стигнува со QR-кодови распоредени низ страниците на самата книга. Ова е прво дело со ваква структура и содржина во нашата земја, како и со ваква презентација пред читателот. Со необичниот и холистички пристап кон внатрешниот свет и творечкиот процес на авторката, таа ги поканува читателите директно и длабоко во нејзиниот интимен „дом“, нудејќи ги сите медиуми на негово искусување – зборот и чувството, цртежот, фотографијата и видеото, звукот и наративот.
Даница И. Лепојевиќ е македонска поетеса со четири издадени книги – освен „Дождови во мај – сублимирани емоции со две лажички мед“ зад неа се и поетските збирки „Сјај и страв и песни“ во 2016 г. и „Пребивалишта“ во 2019 г., како и една збирка микро и кратки раскази „Една ноќ друга – исечоци катадневна магија“ издадена во 2024 г. Даница има многу страни. По вокација е Трансформационен ментор за личен и духовен развој и Холистички ментор за раѓање и мајчинство. По едукација е психолог, наставник по јога, дула и советничка за доење. За себе смета дека по душа е поетеса на магијата во секојдневното, по дух – еклектичен номад во постојана потрага по знаење и по ум – археолог на човековото постоење.
Но по срце… по срце таа вели дека е лакримариум на бескрајната, безусловната и бескомпромисната Љубов што Универзумот ја има за секој од нас… или барем дека постојано се стреми тоа да стане.
Освен авторката, од книгата ќе читаат поетесата Габриела Стојаноска-Станоеска и актерот и поет Игор Трпчески. Промотор на делото е Звонко Димоски.
Промоцијата ќе се одржи во сабота (25.10.), во 18 часот, во кафе-барот “Тротоар”.
Кога љубовта кон земјата, трудот и семејната традиција се спојат – резултатот е сигурен успех кој не може, а да остане незабележан. Така започнува приказната на браќата Илиевски од Куманово, млади луѓе кои со посветеност, знаење и визија ја продолжуваат повеќе од дваесетгодишната семејна традиција во сточарството и производството на свинско месо. Под брендот „Илиевски Компани“, тие денес произведуваат висококвалитетно свежо месо, печени и димени производи, меѓу кои вистинска специјалност е ролованото печено прасе – обескостен, совршено зачинет и крцкав деликатес што стана препознатлив симбол на нивниот квалитет. Она што ги издвојува е фактот што зад целиот процес – од фармата до готовиот производ – стои едно семејство, кое со труд и љубов создава бренд што ужива доверба кај потрошувачите низ цела држава. А најдобрата вест? Производите на „Илиевски Компани“ се достапни за сите, со достава до секој град во Македонија, вклучувајќи го секако и Прилеп.
Во продолжение разговараме со еден од браќата, Марио, кој детално ни опишува како почнало нивното семејно производство, какви им се плановите и што се’ има во нивниот асортиман на производи
Како започна вашата семејна приказна со сточарството и што ве мотивираше вие, како млади луѓе, да ја продолжите традицијата?
-Се започна пред повеќе од 20 години, татко ми Небојша почнал со помала фарма и со тек на време напредувал. Мене ме мотивира што со приватен бизнис како што го имаме ние од производство до готов производ, може да се живее добро и да се фунционира.
Марио, веќе менаџирате со фармата – колку е тешко да се води ваков бизнис во Македонија денес?
-Да, ние сме тројца браќа (Марио, Даниел, Ален) и сите сме вклучени во работава, не е тешко да се води ваков бизнис, затоа што го работиме со љубов и ги имаме сите услови што ни ја олеснува работата.
Колку прасиња моментално брои вашата фарма?
-Нашата фарма брои моментално околу 150 маторици, во план сме да го зголемиме капацитетот.
Што произведува “ИЛИЕВСКИ КОМПАНИ” освен свежо свинско месо?
Покрај фармата, имате и сопствена фурна за печени прасиња, а кој пробал вели дека специјалност на вашата компанија е роловано печено прасе, што се крие зад вака приготвениот деликатес?
-Имаме сопствена фурна на дрва, која ја работи мојата мајка Смиља, која е со капацитет од 24 прасиња во една смена. Работиме константно во 3 смени, и да точно е тоа дека специјалност е ролованото печено прасе. Тоа е обескостено прасе, зачинето и завиткано како ролат. Од внатре е сочно, а од надвор крцкаво.
Вршите ли дистрибуција низ останатите градови и колку време е потребно нарачката да стигне еве да речиме во Прилеп?
-Да имаме достава низ цела Македонија, нарачка во Прилеп стига за од прилика 2-3 дена, имаме точни денови кои одиме, така полесно функционира, купувачите си прецизираат, се трудиме купувачите да бидат задоволни.
Кои се најголемите предизвици со кои се соочувате во производството и пласманот на свинското месо?
-Па ние немаме предизвици за производство и пласманот, затоа што фармите се по ХАСАП, имаме одлични услови за исполнување на стандардите за благосостојба на животните. Немаме ни предизвици за пласманот, затоа што имаме соработка со повеќе ресторани низ цела Македонија, а и приватно имаме голем број на купувачи.
Колку е важно тоа што зад брендот стои семејство кое самостојно го произведува месото, без прекупци?
-Тоа е најважно, затоа што ние со години имаме ист квалитет, константно се трудиме се да биде исто, или евентуално ако може да се подобри, ако за нешто има простор.
Какви се вашите планови за иднината – дали размислувате за проширување или за нови производи под брендот „Илиовски Компани“?
-Па да, за иднина имаме план капацитетот на фармите да го зголемиме, исто така имаме во план да вклучиме нови производи за да купувачите имаат поголем избор.
Која би била вашата порака до младите во Македонија кои размислуваат да започнат сопствен бизнис во земјоделството или сточарството?
-Порака до младите е да се трудат да инвестираат во Македонија, оваа држава е прекрасна за тие што имаат јасна визија и воља за работа, овој бизнис бара напор но и дава резултати.
Како можат да ве добијат сите оние кои сакаат да ги пробаат вашите производи и да вкусат од најдоброто свинско месо во Македонија?
-Можат да не добијат на телефонски број 077/518-505 или на нашата фб страница: ИЛИЕВСКИ КОМПАНИ. Не чекајте, побрзајте со вашата нарачка, вкусете од нашите прекрасни производи.
Прилепското обвинителство побара притвор за шест лица и мерки на претпазливост за уште 15, осомничени во истрагата за злоупотреби во Општата болница „Борка Талески“ во Прилеп.
Како што потврди претседателката на Основниот суд во Прилеп, Јасмина Шишковска, меѓу осомничените има и правни лица од Прилеп, Битола и Скопје, за кои обвинителството предлага забрана за учество во постапки за јавни набавки.
Во текот на денот се очекува приведените да бидат изведени пред судија на претходна постапка. Приведувањата следат по акција на Управата за финансиска полиција, спроведена по налог на Обвинителството, поради сомневања за злоупотреби во финансиското работење на болницата.
Според Обвинителството, од април годинава се води предистражна постапка за кривичното дело „злоупотреба на службена положба и овластување“. При досегашната истрага бил извршен претрес на осум локации во Прилеп.
Сегашниот директор на болницата, Кире Јоноски, кој ја презеде функцијата во 2024 година, уште тогаш јавно укажа на неправилности во работењето и на долг од околу 193 милиони денари што ја оптоварува установата.
Тепачка меѓу две колешки го потресе Центарот за социјални работи во Прилеп. Настанот се случил вчера, 21 октомври 2025 година, околу 14:45 часот, кога 45-годишна вработена била нападната од своја колешка додека била на работното место.
Според информациите на Министерството за внатрешни работи, нападнатата жена случајот веднаш го пријавила во Одделението за внатрешни работи Прилеп, по што била спроведена првична истрага. Засега не се познати мотивите за инцидентот, ниту дали оштетената побарала лекарска помош по нападот.
Од МВР потврдија дека се преземаат сите неопходни мерки за целосно расчистување на настанот и утврдување на околностите кои довеле до физичката пресметка меѓу двете жени. По завршувањето на истрагата, ќе бидат поднесени соодветни пријави против напаѓачката.
Во ерата каде што доживувањето е поважно од било што, „Cocktail Nomad“ носи револуција во македонската угостителска сцена. Не станува збор само за пијалок, туку за целосно, професионално, светско искуство доставено директно до вашиот настан.
Зад оваа иновативна идеја стои Игор Илиоски, бармен со импресивна биографија: повеќе од петнаесет години меѓународно искуство и учество на најпрестижните глобални натпревари. Тој одлучи бар-културата да ја „ослободи“ од класичните ѕидови и да ја донесе директно кај гостите во Прилеп, Битола и цела Македонија.
Разговаравме со Игор за тоа како се прави совршен „номадски“ коктел, како се претвора секој настан во совршено сценарио и зошто неговата Margarita е подобра од онаа што сте ја пробале во некој хотел на Карибите.
Слика 1: Игор Илиоски на полу-финале во Мајами 2018 година
1. Од „Celebrity Cruises“ до „Cocktail Nomad“ – Како се префрлате од светската коктел сцена во Македонија?
-„Cocktail Nomad“ се роди од чиста страст и желба да ја донесам врвната бар-култура дома. По 12 години работење на луксузни крузери, каде што бев и дел од глобалното финале на Diageo World Class во Берлин во 2018 (еден од најпрестижните барменски натпревари), видов дека луѓето копнеат по професионално, прилагодено искуство. Глобалното финале на Diageo World Class 2018 во Берлин претставува светски натпревар што ги собира најдобрите бармени од преку 60 земји, каде се избира најдобриот бармен на планетата според креативност, техника и гастрономска иновација. Идејата беше едноставна: наместо луѓето да доаѓаат во бар, јас ќе го донесам најдобриот бар кај нив.
Слика 2: Игор Илиоски на глобалното финале на Diaego World Class 2018
2. Што го прави „Cocktail Nomad“ поинаков и зошто вашата услуга е светска класа?
-Ние не нудиме само шанк. Нудиме професионално театарско искуство.
Разликата е во деталите и искуството:
1. Професионализам: Моето искуство е темел – гарантирам конзистентен квалитет и знаење од светско ниво.
2. Целосно искуство: Ова вклучува уникатен, пренослив бар-дизајн, прилагодено мени, професионална опрема (мраз, чаши, алатки) и комплетна организација.
3. Прилагодување: Секое мени е креирано специјално за настанот, одговарајќи на темата, сезоната, па дури и на вашата омилена боја. Ние ја носиме атмосферата, гостите само уживаат.
3. Дали користите македонски состојки во вашите премиум коктели? Како локалниот вкус го претставувате модерно?
-Апсолутно! Јас сум огромен поддржувач на локалниот вкус. Често користиме одлични македонски вина за освежителна Sangria, домашна ракија, како и свежи, сезонски овошја, сирупи и зачини од локални добавувачи. Дури и пиво од ѓумбир и свежо цеден сок од лимон го подготвувам сам, за да го контролирам квалитетот. Верувам дека македонските вкусови можат да блеснат на светско ниво кога се презентирани со модерни техники.
4. Кои се најголемите хитови на настаните? Дали гостите се држат до класиката или сакаат нешто уникатно?
Класиците се секогаш барани: Margarita, Moscow Mule, Paloma и Old Fashioned се основата. Но, најмногу уживаме кога можеме да направиме „twist“ – да креираме коктел инспириран од темата на свадбата или сезоната. Исто така, нагласувам: секој настан има специјално креирано мени со освежителни, софистицирани безалкохолни коктели. Никој не смее да остане жеден или да се чувствува изоставен.
5. Кои типови на прослави најчесто ги покривате и дали има некоја локација која е особено динамична?
-Најчесто работиме на свадби, приватни прослави, родендени и корпоративни настани.
Летото е многу динамично, особено во Пелагонискиот регион – Битола и околината. Имаме многу настани организирани од нашата дијаспора, кои навистина го ценат врвниот, професионален сервис што го нудиме. Тоа е чест кога луѓе кои виделе многу светот ќе ја изберат вашата услуга.
6. Кој е најнезаборавниот момент во вашата „номадска“ кариера досега?
-Секоја искрена реакција на изненадување! Најголемата награда е кога некој ќе проба коктел направен од навидум едноставни состојки и ќе рече: „Леле, ова е најдоброто нешто што сум го пробал!“. Тие моменти на изненадување и уживање ме мотивираат најмногу. Ние сме тука да го подигнеме нивото на очекување.
7. Прилеп, работилници и иднината: Кои се плановите за „Cocktail Nomad“?
-Во план е отворање на постојан коктел бар токму во Прилеп, како наша база од каде ќе продолжиме да патуваме. Исто така, сакаме да организираме едукативни коктел работилници за сите кои сакаат да научат повеќе за оваа уметност. Целта е да ја изградиме локалната коктел култура.
8. Последна порака за читателите на markukule.com?
-Ако не сте пробале коктел од „Cocktail Nomad“, ви порачувам: на следниот настан каде што сме ангажирани, дозволете си да пробате нешто ново. Коктел не е само пијалок, тоа е момент што се памети. А за ракија и џин-тоник, има време и на друго место.
Контакт и резервации:
Секој настан го договараме индивидуално и креираме понуда по мерка.
Православната црква денеска, 22 октомври, го слави споменот на Светиот апостол Јаков, син Алфеев и еден од дванаесетте големи апостоли, роден брат на евангелистот Матеј.
Јаков беше сведок на зборовите и чудата на Исус Христос, на Неговото страдање, Воскресение и Вознесение. По слегувањето на Светиот Дух на Педесетница, тој ја ширеше Христовата благовест во Елефтеропол и околните места, а подоцна и во Египет, каде што и пострада за својот Спасител. Неговиот труд и ревност беа крунисани со голем успех, многу незнабошци поверуваа во Христос, основаа цркви и поставија свештеници и епископи. Познат како Јаков Праведниот, тој се смета за заштитник на оние кои се стремат кон верската ревност и духовната правда.
На денот на Свети Јаков народните верувања посочуваат на важноста на прошка и духовна чистота.
Немажените девојки се советуваат да се измијат со ладна вода околу полноќ за да го заштитат телото од зли духови и да обезбедат здраво потомство. Според традицијата, тоа е момент за смирување на душата и отворање на патот кон благословено потомство.
Истовремено, Свети Јаков испраќа јасна порака до богатите и моќните. Тој потсетува дека материјалното богатство е минливо и предупредува дека оние кои угнетуваат други ќе се соочат со последици.
Во рамките на престојот во Лондон, премиерот Христијан Мицкоски остварил средба со неговото кралско височество, Кралот Чарлс III.
Премиерот Мицкоски информира дека средбата со Кралот Чарлс III била искрена и содржајна.
-Разговаравме за пријателството помеѓу Македонија и Обединетото Кралство, за стабилноста, развојот и заштитата на природата, области на кои Кралот со години им посветува големо внимание. Оваа средба е признание и почит, но и поттик да продолжиме по патот на заедничките вредности, довербата и партнерството, напиша Мицкоски во објавата денеска на неговиот Фејсбук профил.
Во рамки на Самитот за Западен Балкан – Берлински процес кој се одржува во Лондон, премиерот Мицкоски ќе оствари повеќе средби насочени кон економска и инфраструктурна стратешка соработка со Обединетото Кралство.
Повеќе од 10 лица синоќа и утрово се приведени во прилепската полиција за случајот со Општата болница во Прилеп во која финансиската полиција вршеше контрола за работењето во оваа институција. Во текот на денов приведените треба да бидат спроведени во Судот во Прилеп.
Управата за финансиска полиција вчера постапи по наредби и насоки на Основното јавно обвинителство од Прилеп. Во текот на вчерашниот ден се презедоа дејствија во врска со постапка за наводи против повеќе лица за злоупотреби во работата на прилепската болница.
Според Основното јавно обвинителство, од април годинава, се постапуваше во предистражна постапка поради сомненија за кривично дело „злоупотреба на службена положба и овластување“, а поврзано со финансиското работење на болницата. Дејства преземаше Управата за финансиска полиција и тогаш беше извршен претрес на осум локации во Прилеп.
Набрзо по стапувањето на функцијата, лани 2024 година, сегашниот директор на прилепската Општа болница „Борка Талески“, Кире Јоноски, во повеќе наврати на прес-конференција изјави дека биле забележани неправилности во финансиското работење на Болницата и дека болницата ја наследил со долг од речиси 193 милиони денари.
Во текот на денот се очекуваат информации за случајот од Основното јавно обвинителство во Прилеп.
На 24 октомври 2025 /петок/ од 19.00 ч. во Ликовната галерија на НУЦК „Марко Цепенков“ ќе биде отворена изложба на дела од Синиша Новески. Изложбата е дел од годишната програма на ЦК „Марко Цепенков“ за 2025, поддржана од Министерството за култура и туризам.
За изложбата:
Изложбата на скулпторот и професор Синиша Новески содржи околу 20 скулптури во различни материјали,мотиви и тематики.Тие се работени во последните 20 години, али најмногу има од последниот негов циклус на скулптури наречен” Жар скулптури” кои се направени во дрво и се доста симболични и асоцијативни и на еден метафизички начин го прикажуват денешниот свет со елементи на македонската традиција и митологија. Тие како жар во дрвото зрачат со својата топлина и ја греат душата на посетителот и гледачот. Во неговите скулптури секогаш има некоја лиричност и порака, но и богата ликовност и естетика.Скулптурите се во мал галериски формат, но зрачат со нивната монументалност.
Синиша Новески во неговото творештво има околу 30 самостојни изложби во земјава и странство и е добитник на многу награди и признанија .Член е на уметничкиот совет на ДЛУМ и работи како професор на Факултетот за архитектура при МИТ универзитетот во Скопје.
БИОГРАФИЈА
Синиша Новески (роден на 6. септември 1978 г.) е академски скулптор и искусен педагог со повеќе од 20 скулптури изложени во јавни простори во Македонија, Србија, Бугарија и САД. Има изложено на 27 самостојни и повеќе од 45 групни изложби и има учествувано во повеќе од десет ликовни колонии и симпозиуми. Добитник е на 17 награди за сопствено уметничко творештво и за менторско-педагошко работење со студенти.
По дипломирањето на Факултетот за ликовни уметности во Скопје во 2002 г. како најдобар студент во класата по вајарство на професорот Васил Василев, Новески две години работел како асистент на еминентни скулптори Томе Серафимовски, Драган Попоски-Дада, и Никола Смилков. Титулата професор по уметност се здоби во 2004 г., а од 2007 до 2011 г. предаваше ликовно образование во СОУ „Свети Наум Охридски“ во Македонски Брод. Магистерски студии на Катедрата за вајарство на Факултетот за ликовни уметности во Скопје ги завршил во 2011 г. кај професор Жарко Башески.
Од 2011 до 2022 г., Новески ја прошири својата кариера во Белград, Србија, каде што, покрај развој како самостоен уметник, придонесе во областа на образованието и културната дипломатија во следните улоги: професор по ликовна уметност на Меѓународното училиште „Бејза“ (2013-2014), надворешен соработник за култура за Амбасадата на Македонија (2014-2018), претседател на управниот одбор на Македонски национален совет за култура (2015-2019), уметнички директор на манифестацијата „Денови на македонската култура во Белград“ (2013-наваму), член на Управниот одбор на Друштвото на ликовни уметници на Македонија во Србија (2014-наваму) и културен соработник на фондацијата „Нушиќ“ (2014-наваму).
Во 2022 г. се врати во Македонија и од 2023 г. е член е на Уметничкиот совет на Друштвото на ликовни уметници на Македонија. Денес работи како доцент на МИТ Универзитет во Скопје, Факултет за архитектура.
