Игор Николоски, професор во нижото музичко училиште “Ордан Михајлоски-Оцка” и советник во Советот на општина Прилеп, е нов заменик градоначалник на општината, дознава Maркукуле.

Николоски е единствен советник од претходниот состав на ВМРО-ДПМНЕ, кој одново се најде на советничката листа на локалните избори во октомври годинава.

Заменик градоначалникот на општината се избира од редот на советниците, а одлуката за тоа ја носи градоначалникот. Неговата задача е да го заменува првиот човек на општината во случај на неможност да ја извршува функцијата.

Во изминатите четири години двајца советници ја имаа таа улога, прво Ирена Стерјовска Локвенец, а откако ја презеде функцијата Претседател на Совет, заменик градоначалник беше и Диме Бозоски.

Илјадници новогодишни светилки го осветлија централниот плоштад “Слобода” и централното градско подрачје вчера во Штип. Македонскиот центар на Истокот, блесна во прекрасно новогодишно руво, а глетката е магична.

Градот држи лекција за цела Македонија, како треба да изгледа едно урбано место во пресрет на празничните денови.

Уживајте во фотографиите во продолжение:

Во пресрет на големото и светло празнување на Божиќ – моментот кога Божествениот Младенец ја осветлува земјата, раѓајќи се во скромна пештера за да ни ја донесе неизмерната радост на спасението, нашите домови се повикани да блеснат со традиционален празничен украс.

Нека во секое семејно катче и оваа година засветли Витлеемската пештера, како силно сведоштво за настанот што се случи пред повеќе од два милениума во таа тивка и свештена Божиќна ноќ.

​Следејќи го барањето на нашиот верен народ, а со благослов на епископот Антаниски г. Партениј, и оваа година сестринството на Рајчичката обител се потруди да изработи традиционални Божиќни украси во вид на некогашната Витлеемска пештера. Овие украси се збогатени со иконата на Рождеството Христово и со кандило, давајќи им можност на сите заинтересирани да го надополнат Божиќниот амбиент во својот дом, во духот на нашата православна традиција.

Сестрите од Рајчица со голема љубов кон Бога, трпение и молитви за мир и благосостојба, изминатите години имаат изработено стотици пештери во различна големина, кои красат многу домови, цркви, но и простории на компании, фирми, институции.

И овој пат, рачно изработените Божиќни пештери ќе можете да ги нарачате на следниов број: 077 551 287 кај сестра Филотеја

​Нека Божиќната радост се всели во секој православен дом!

Министерството за внатрешни работи ги прими новите специјализирани возила за мобилно мерење на брзината – најсовремени „Форд“ модели опремени со интегриран радарски систем, камери со висока резолуција и софтвер за моментално лоцирање и документирање на прекршоци.

Возилата ќе патролираат низ целата држава и ќе детектираат пречекорување на дозволената брзина во градски средини, на регионални патишта и на автопат. Од МВР засега не откриваат кога системот ќе биде ставен во редовна употреба, но неофицијално се очекува да стане дел од нови мерки за зголемена сообраќајна безбедност.

Уставната судијка Јадранка Дабовиќ Анастасовска поднесе оставка. Таа во образложението кое го доставила до Собранието вели дека оставката е поради лични причини, односно поради промени кои настанале во втората половина од годинава, а кои се од семејна природа.

-Вршењето на функцијата судија на Уставен судија во изминатиов период за мене беше голема чест и одговорност и се трудев функцијата во овој период да ја извршувам одговорно, со голема посветеност и максимално професионално. Но, како одговорен човек по настанатите непредвидени околности сметам дека нема да можам да работам на предмети со целиот свој капацитет, кои најчесто не се од мојата потесна професионална определба на која сум се усовршувала цели 40 години, пишува судијката Дабовиќ.

Таа го известува Собранието дека од први јануари се враќа на професорската позиција на правниот факултет при УКИМ.

Од Уставниот суд потврдија дека се информирани за поднесената оставка на судијката Дабовиќ Анастасовска.

На денешната седница на Извршниот одбор на СДСМ, на предлог на претседателот Венко Филипче, заменик претседателката, потпретседателите, генералниот секретар, организациските секретари, како и сите членови на Извршниот одбор поднесоа оставки, соопштија од партијата.

Од СДСМ информираат дека оставките се поднесени до Централниот одбор на партијата и до претседателот Филипче, кој го води процесот на внатрешни реформи во СДСМ.

-Со овој одговорен и морален чекор раководството на СДСМ отвори простор за ново поглавје. Следува период на кадровско освежување и зајакнување, вклучување и на нови лица, организациска поставеност, внатрешна мобилизација, за нова сила и нова енергија на СДСМ, се наведува во соопштението.

На една од наредните седници на Централниот одбор, претседателот Филипче ќе предложи избор за членови за органите на партијата а за функциите ќе се бираат најкомпетентни личности.

Останува да видиме дали ова ќе биде можност за единствениот пратеник на партијата од Прилеп, Миле Талевски, да се најде во високото раководството…

На 19. декември градот под “Марковите Кули” уште еднаш ќе го прослави својот заштитник, Свети Николај Чудотворец, архиепископ Мирликиски.

Од 2006 година со акт на локалната самоуправа Св. Никола е прогласен за заштитник на Прилеп, а во центарот на градот беше подигнат и параклис во негова чест. Ова ќе биде 18. пат прилепчани заедно да ја чествуваат градската слава и заштитникот на градот, а оваа година домаќини се општествено одговорните компании “МАТАДОР” и “БИМФУД”.

Прилепчани и сите гости во центарот на градот ќе ги дочека богата трпеза, која не може да се замисли без малите посни сармички, вкусното светиниколско гравче и секако риба.

Токму посните сармички го внесоа Прилеп за прв пат во Гинисовата книга на рекорди. Во 2008 година во очи на празникот вредните прилепчанки завиткаа 80.000 посни сарми, доволно за Прилеп да биде запишан и запознаен од светот.

Повелете на Св. Никола во Прилеп!

Во пресрет на 3 Декември – Меѓународниот ден на лицата со попреченост, денеска во ООУ „Добре Јованоски“ се одржа прекрасен спортски настан организиран во духот на еднаквоста, заедништвото и инклузијата – „Спорт, тим, инклузија“, во организација на Здружението Центар за развој и едукација Прилеп.

Настан исполнет со радост, тимска игра и позитивна енергија, кој уште еднаш ни покажа дека различностите нè прават посилни, а инклузијата е вредност што секојдневно треба да ја негуваме.

На настанот присуствуваше претседателката на Советот на Општина Прилеп, заедно со членови на Советот, наставници, директори на училиштата и директорот на Меѓуопштинскиот центар за социјални работи Прилеп, кои дадоа силна поддршка на сите учесници.

Со оваа активност, уште еднаш упатуваме порака дека секое дете, секој млад човек и секој наш сограѓанин има право на рамноправно учество, спорт и развој и дека инклузијата е наша заедничка обврска.

Вашата поддршка е најголем мотив за сите деца и млади да продолжат да растат, да се развиваат и да веруваат во себеси.

Се чисти секој дел од Крушево, и тоа секојдневно. Новоизбраниот градоначалник Нико Чонески има цел градот да биде уреден, чист и среден, а во таа мисија ги повикува да помогнат сите граѓани.

-Нашиот град има единствена убавина. За да ја зачуваме таа убавина, започнуваме со секојдневна акција – секој ден, секоја улица, секој дел од Крушево и населените места да биде чисто и уредено. Но оваа мисија успева само ако сме заедно. Ги повикуваме сите граѓани: Мапирајте и пријавете ја секоја дива депонија до ЈП „Комуна“. Вашата пријава значи побрза реакција и почисто маало, улица, град. Да покажеме дека Крушево не е само највисоко, туку и најодговорно гратче на Балканот. Нашиот град заслужува – напиша Чонески на социјалните мрежи.