Девојките од прилепскиот боречки клуб 7-ми Мај: Анастасија Карапејоска, Тамара Цветкоска, Викторија Стојаноска и Ангела Трајкоска, деновиве се на подготовки во Качаник, Косово, каде интензивно работат на сила, техника и издржливост со цел да ја задржат врвната форма.

Со дисциплина, посветеност и шампионски дух, тие се подготвуваат за продолжението од сезоната и нови предизвици што следуваат.

Шампионките не запираат – тие секој ден стануваат уште посилни!

Навивачката група „Мајмуни“ излезе со јавно соопштение на социјалните мрежи, во кое истакнува дека вложиле сериозни напори за да помогнат во спасувањето на ФК Победа, но обидот, како што велат, не вродил со плод.

Клубот од Прилеп неодамна се откажа од натпреварување во Втората лига поради наталожени долгови и финансиски проблеми, со што уште еднаш се отвори прашањето за одговорноста и иднината на еден од најпрепознатливите спортски брендови во градот.

Во својата Фејсбук-објава, „Мајмуни“ посочуваат дека застанале зад секоја организација која била подготвена да помогне, но под услов ниту еден член од претходната управа да не биде дел од процесот до крајот на сезоната. Според нив, тоа било прифатено, но сепак не довело до посакуваниот исход.

Навивачите тврдат дека бил обезбеден тим кој, како што наведуваат, можел да се бори најмалку за бараж, но дека одредени структури го спречиле тоа. Во објавата упатуваат директен повик за јавна одговорност, барајќи транспарентно да се соопшти „кој, колку и каде наштетил“ на клубот.

Дополнително, од групата обвинуваат дека со години се давале ветувања за спас на Победа, но без конкретни резултати, при што вината се префрлала од една на друга страна.

Во постскриптумот од објавата, тие наведуваат и неофицијална информација дека Општина Прилеп ги побарала назад клучевите од градскиот стадион, што дополнително ја продлабочува неизвесноста околу иднината на клубот.

Состојбата со Победа повторно ја разбранува спортската јавност во Прилеп, а навивачите најавуваат дека нема да се откажат од барањето одговорност и расчистување со, како што велат, сите кои придонеле клубот да се доведе во ваква состојба.

Слика која не ѝ доликува на урбана средина. Контејнери преполни со отпад, ѓубре расфрлано на сите страни, непријатна миризба и потенцијална опасност по здравјето на граѓаните – и тоа во непосредна близина на училиште, станбени објекти и продавници за храна.

Ова не е изолиран случај, туку слика што сè почесто се гледа низ улиците на Прилеп. Прашањето е – до кога?

Граѓаните апелираат до надлежните од ЈКП Комуналец Прилеп итно да ја подобрат динамиката на собирање на отпадот и да преземат конкретни мерки за одржување на хигиената во градот. Чистата животна средина не е луксуз, туку основна потреба.

Прилеп заслужува чисти улици!
Граѓаните заслужуваат почит!
Децата заслужуваат здрава околина!

Време е за побрза реакција и поодговорен однос.

Кои се последиците од возење без положен возачки испит или возење без важечка возачка дозвола?

За лицето кое вози казна затвор од три месеци до три години и парична казна

За сопственикот на возилото одземање на возилото ако знаел или бил должен да знае дека лицето кое вози нема право да го управува возилото

Сопственикот на возилото НЕ смее да го даде на управување своето возило:

-на лице кое нема положено возачки испит,
-нема важечка возачка дозвола,
-лице кое е уморно или болно или се наоѓа во таква психичка состојба што е неспособно за сигурно управување со возило и
-е под дејство на алхохол или дрога

Горенаведеното важи за сите сообраќајни површини како што се патишта, паркинзи, вклучувајќи ги и полигоните за почетно оспособување на кандидати за возачи каде е ДОЗВОЛЕНО кандидатот за возач да управува возило од авто школа само под надзор на возач инструктор.

По повод одржувањето на меѓународниот карневал „Прочка 2026“, работното време на угостителските објекти во градот се продолжува за 2 часа, согласно чл.23 од Законот за угостителска дејност: „Советот на општината, односно Советот на градот Скопје, за одредени туристички, културни и друг вид манифестации, содржани во годишните програми, можат да го продолжат работното време најмногу за два часа, за угостителските објекти од ставот 1 на овој член, но во времетраење најмногу до три дена.

Продолженото работно време се однесува само за деновите на одржување на карневалот, односно од петок 20 февруари до недела 22 март 2026 година.

Одлуката за продолжувањето на работното време на угостителските објекти за меѓународниот карневал „Прочка“ е донесена од Советот на општина Прилеп, на седницата одржана на 29.02.2016 година и таа се’ уште е со важност.

Речиси 500 маскирани учесници ќе дефилираат во Прилеп на годинешниов карневал „Прочка 2026“. Карневалките свечености почуваат в петок со традиционалната изложба на маските, в сабота е детското карневалско дефиле, а в недела од 13 часот во центарот на Прилеп е дефилето на маските со учесници од Прилеп, од земјата и од странство.

– Карневалот „Прочка“ годинава е во знакот на јубилеите. Се одбележуваат 25 години од организираното одржување на карневалската поворка на Прочка“, а „Мечкарите“ се заштитната маска на карневалот, кои и го почнуваат дефилето и се одбележуваат и 100 години од првите „мечкари“ во Прилеп. Годинава се обнови традицијата карневалските дефилеа да бидат два дена, в сабота е детското карневалско дефиле, а в недела е централното и со учесници од странство – рече прилепскиот градоначалник Дејан Проданоски.

Здружението „Прилепски мечкари“ како организатор на карневалот со гордост истакнува дека ќе бидат пречекани гостите, а и челниците на Меѓународната асоцијација на карневалските градови.

– По повеќегодишна пауза, на карневалот ќе пречекаме гости – карневалски групи од Србија, од четири града, од Албанија, од Бугарија, а се најавени и од Грција и од Црна Гора. Оваа година е и голем јубилеј. Се потрудивме од прилепкиот архив и од постарите граѓани да најдеме и да потврдиме преку фотографии дека уште во 1920-1921 година имало веќе организирани поворки на „мечкарите“, што потврдува дека постоиме повеќе од 100 години. А поворката – карневалот во Прилеп слави јубилеј од 25 години. Ние постоиме и ќе постоиме зашто Прилеп на некој начин е љубител на тие „преправања“ – истакна Ванчо Ѓеорѓиев, претседател на здружението „Прилепски мечкари“.

Маската „Прилепски мечкари“ со целосниот обреден ритуал како посебност е заштитено нематеријално културно богатство од Министерството за култура уште од 2019 година.

– Се прават последните подготовки на карневалот. Отворено е пријавувањето на маските и за детскиот карневал в сабота и за централното карневалско дефиле в недела. Сето тоа е со цел карневалот да го има заслуженото место како културна манифестација што ги промовира традицијата и посебностите од ова поднебје. На најуспешните маски од изожбата в петок ќе им бидат доделени награди, како и на детскиот и на главното карневалско дефиле кога стручното жири ќе ги прогласи најдобрите маски. Радува фактот што се враќаат учесниците од другите градови и од соседните земји – рече Снежана Ристеска, советник за култура при локалната самоуправа во Прилеп.

Карневалската програма викендов ќе биде збогатена со настапи на жонглери, акробати, кловнови, пантомимичари. Рестораните и кафулињата ќе работат со продолжено работно време и секој ќе има организирано карневалска забава за гостите и посетителите.

Според традициите, в понеделник, во организација на здружението „Прилепски мечкари“, ќе се одржи посен ручек во манастирот „Свети Ѓорѓија“ во близина на Прилеп, со што ќе бидат одбележани чистиот понеделник и почетокот на велигденските пости.

Нова пратка корпи за отпадоци за Општина Прилеп од проектот за Регионално управување со отпад.

Граѓаните кои не се вклучени во процесот на селекција ќе бидат навреме информирани кога ќе можат да склучуваат Договор со јавното претпријатие за доделување на две бесплати канти во зелена и жолта боја по принципот на селекција на сува и влажна постапка. Од вкупно 8.318 канти од 120 литри, досега за општинава се испорачани 6.175 – информираат од ЈКП “Комуналец” Прилеп.

Целосното соопштение во целост го пренесуваме во продолжение:

Остануваат за испорака уште 2.143 канти, за да се докомплетира бројката. Потоа, Советот на Општина Прилеп, ќе донесе Одлука со која истите ќе се отстапат на јавното претпријатие за да може да располага со истите.

Ова го информираме затоа што многу наши сограѓани се јавуваат да се информираат кога јавното претпријатие ќе започне да ги распределува кантите за селектиран отпад и мешан комунален отпад, каде во случајов потребно е да се запази и процедура.

Јавното претпријатие на почеток ќе направи повик до граѓаните кои не се вклучени во процесот на селекција на отпад да склучат договор со јавното претпријатие. Според планот и динамиката на распределба по населби, и евиденцијата за распределба по населби, најмал одзив имало во населбата Тризла и др. помали населби. Јавното претпријатие со лична посета на граѓаните од населбата ќе овозможи и жителите од населбата Тризла да се вклучат во процесот на правилно третирање и управување со отпадот, по принципот на селекција во две канти, со цел и насебата Тризла да добие ист третман како и останатите населби. Но сепак, останува желбата на граѓаните да се вклучат во проектот за селекција на отпад и менување на навиките во правилното третирање и управување со отпадот во оваа значајна населба за општинава, каде треба да се постават и испочитуваат принципите на правилно одлагање на отпад.

Она што го има како информација јавното претпријатие по започнување на Регионалното управување со отпад, цената на услугата ќе биде различна за оние домаќинства кои селектираат отпад, и домаќинствата кои не селектираат отпад, а ќе ја утврдува Регулаторната комисија за отпад.

Ова е долгорочен проект за правилно третирање и управување со отпадот, каде неминовно е испочитување на сите правила од сите чинители во општинава, со цел и понатаму Прилеп да го има приматот за најдобра општина со распределена и поставена комунална инфраструктура во интерес на општото добро на сите жители.

Предуслов за селекција на отпад е комунална инфраструктура и едукација на граѓаните, Прилеп ги има и ќе ги има дополнително двата предуслови, затоа сите заедно да се потрудиме и да правиме здрава и среќна средина.

Меѓународниот Аеродром Скопје, управуван од ТАВ Македонија, подружница на ТАВ Аеродроми и членка на Групацијата АДП ја проширува својата мрежа на дестинации со воведување на уште две нови авиолинии до најголемите острови во Италија – Сицилија (Палермо) и Сардинија (Алгеро), на Виз ер најголемата авиокомпанија во Северна Македонија.

Од 15 јули стартува линијата од Скопје до Палермо, со која Виз ер ќе сообраќа три пати неделно, секој понеделник, среда и петок, со достапни цени од 29,99 €, а од 18 јули започнува рутата Скопје – Алгеро, која ќе лета два пати неделно, секој вторник и сабота со достапни цени од 39,99 €.

Со започнувањето на овие две нови рути, Виз ер ја потврдува својата долгорочна посветеност на пазарот и дополнително го проширува своето присуство во земјата.

Летовите до двете нови дестинации се планирани како сезонски линии, односно ќе се реализираат до 11 и 12 септември.

„ Пресреќни сме што ви го претставуваме возбудливото проширување на скопскиот аеродром. Ова проширување не само што ја збогатува нашата понуда, туку им овозможува на нашите ценети патници фантастичен избор на патувања и флексибилност полесно да ги планираат своите патувања. Со воведувањето на низа нови линии, гордо ја потврдуваме нашата посветеност на растот и иновациите, отворајќи врати за нови партнерства, културни размени и полесен пристап до динамичните европски пазари. И ако мислевте дека сме застанале – не, ние штотуку започнуваме! Овие дестинации се вистински рај на земјата и ве очекуваат да ги откриете! Овој развој е доказ за нашата еволуција во значаен транспортен центар, каде што авантурата ве чека на секој чекор! Затоа, спакувајте ги куферите и подгответе се за нови прекрасни патувања – скопскиот аеродром е тука за да го издигне вашето патничко искуство на повисоко ниво“, изјави Неџат Курт, Генерален директор на ТАВ Македонија.

„Овие нови рути од Северна Македонија ја одразуваат нашата посветеност да им понудиме на патниците повеќе опции за патување низ Европа. Воодушевени сме што ја прошируваме нашата Македонска мрежа со воведување нови директни врски со Италија. Овој развој создава поголеми можности за патување за патниците, а воедно обезбедува и повеќе можности за одмор и градски одмор. Поврзувањето на патниците со живи дестинации отсекогаш било наша цел и сме благодарни за растечкиот број македонски патници кои го избрале Виз Ер, рече Вера Јардан, менаџер за корпоративни комуникации во Виз Ер.

Во моментов, Виз ер нуди 45 линии до 41 дестинација во 17 земји од Северна Македонија. Во 2025 година, авиокомпанијата реализираше повеќе од 10.000 летови од и кон земјата, превезувајќи речиси 2 милиони патници. Степенот на реализирани летови од 99,48% е еден од највисоките во индустријата.

Новите рути од Скопје до Палермо и до Алгеро претставуваат директна поврзаност со две атрактивни медитерански дестинации, познати по својата туристичка понуда, културно наследство и економско значење. Со ова проширување, ТАВ Македонија продолжува со својата стратегија за зајакнување на европската поврзаност и отворање нови можности за патување, туризам и бизнис соработка.

Палермо и Алгеро се места што ја одразуваат душата на Италија. Во Палермо на Сицилија посетителите ги очекува богата историја, импресивни палати, катедрали и живописни пазари, нудејќи незаборавно патување низ културата и вкусовите на Сицилија.

Во Алгеро на Сардинија пак, туристите ќе можат да уживаат во мирот на средновековните улици и прекрасните морски пејсажи.

Уште една потврда за константниот раст на ТАВ Македонија е последната статистика за јануари, која покажува раст на двата македонски аеродроми. Меѓународниот Аеродром Скопје и Аеродромот Св. Апостол Павле Охрид во првиот месец од годината, заедно опслужија 289.584 патници на 2.009 летови. Изразено во проценти, тоа се 31% повеќе патнички сообраќај и 10% повеќе летови споредено со истиот месец, 2025 година.

Со актуелниот зимски ред на летање, на Меѓународниот аеродром Скопје вкупно 15 авиокомпании оперираат летови до 50 дестинации, додека на Аеродромот Св. Апостол Павле во Охрид, 3 авиокомпании реализираат летови до 8 дестинации.

Со почетокот на летниот ред на летање, кон крајот на март, скопскиот аеродром ќе ја прошири својата мрежа на линии со уште две нови релации – кон Будимпешта и Неапол, додека охридскиот аеродром ќе добие нова линија до Милано. Во мај, Аустријан ерлајнс ќе започне со летови од Охрид до Виена, а во јуни, Виз ер ќе воведе уште две нови линии од Охрид до Катовице и Вроцлав.

Заменик претседателот на Владата и министер за транспорт Александар Николоски на својот фејсбук профил објави дека од месец јули од аеродромот од Скопје се воведуваат уште две нови авиолинии кон Алгеро Сардинија и кон Палермо.

Уште два дена трае пријавувањето за прв човек на владеачката партија во Приле и останатите општини низ Македонија.

Местото е атрактивно, бидејќи отвара можност за напредок во кариерата и нови предизвици во македонското Собрание или во Влада.

Според високи партиски функционери, огромен бил интересот за оваа позиција, посебно по изјавата на новиот Генерален секретар Ковачки, дека конечно ќе се слушне гласот на партиската база при изборот на новите лица во партијата, и ќе се цени досега сработеното или несработеното.

По трагичниот исход од потрагата по 40-годишниот прилепчанец, од МВР излегоа со подетални информации. Од таму велат дека денеска (16 февруари) во 16:00 часот во СВР Битола било пријавено дека во кругот на Градска општа болница Прилеп е пронајден В.И. (40) од Прилеп без знаци на живот.

Од Итната медицинска помош била констатирана смрт, а за настанот бил известен јавен обвинител, по чија наредба телото е предадено на обдукција. Од МВР соопштуваат дека се преземаат мерки за целосно расчистување на случајот.

Илиоски се водеше како исчезнат од саботата, 14 февруари 2026 година. Информацијата за неговото исчезнување на социјалните мрежи ја сподели неговата мајка, по што два дена прилепчани трагаа по него.

За жал, потрагата заврши со трагичен исход.

Виктор зад себе остави едно малолетно дете.