Вечерва Гостилница Мерак ќе биде местото каде што се спојуваат традицијата, емоцијата и вистинската македонска музика.

Просторот е резервиран за една од најголемите естрадни ѕвезди во Македонија – Миле Кузмановски.

Вечер исполнета со безвременски хитови како: „Не кани ме“, „Крал без круна“, „Се што побарав од тебе Господе“ и многу други песни кои се пеат од срце.

Во прекрасен староградски амбиент, со врвна традиционална македонска кујна и услуга на највисоко ниво, Гостилница Мерак потврдува зошто полека станува место за уживање со семејството, пријателите и најблиските.

View this post on Instagram

Резервирајте навреме на телефонскиот број: 078 987 253, Гостилница Мерак се наоѓа на ул.”Кеј 1ви Мај” бр.16, позади новата катна гаража, кај кафанчињата.

Влезниците се по цена од 350ден.

Традиционално, вкусно и со мерак! Музика што буди емоции! Атмосфера за вистински моменти!

View this post on Instagram

👉 Сабота, 17 јануари 2026

Вечер што не се пропушта! Вечер што се памети!

Времето ја демантираше опозицијата, мигрантите не се тема на разговор со Велика Британија и тоа нема да се случи, а СДСМ и Венко Филипче удирајќи по нашите државни партнери ги рушат темелите на Македонија, истакна во вечерашното гостување во “Тема на денот”, заменик претседателот на Владата и министер за транспорт, Александар Николоски.

-Првата средба помеѓу премиерот Мицоски и британскиот премиер Стармер се случи во мај минатата година, сега сме јануари 2026, “М” од мигранти нема, но, има една многу сериозна работа тука. Без разлика кој колку сака да си ја задржи фотелјата во политичката партија и колку одредена политичка партија е слаба во одреден момент, не смее да се удира во темелите на државноста. Ние во моментов имаме три сериозни партнери, тоа се: САД, Велика Британија и Европската Унија. Удирањето по било кој од овие партнери, ги удира темелите на Македонија, а имавме скоро удар по првиот и по вторниот партнер. Интелектуалци блиски на СДСМ, сериозно удираа по претседателот Трамп и САД, а лично претседателот на СДСМ, Венко Филипче, удри по Велика Британија, посочи Николоски.

Тој упати директно прашање до СДСМ и Филипче да кажат која е нивната алтернатива, ако за партнери на државата не ги сметаат Велика Британија, САД и ЕУ.

-Дали за него алтернативата е Северна Кореја, или Русија, Кина, или нешто друго? Треба да знаеме каде е тој, ако проблем се Велика Британија и САД, затоа што овој начин на однесување ги руши позициите на Македонија, затоа што на крајот на денот тие нас не гледаат како една држава, а не како претставници на СДСМ и ВМРО-ДПМНЕ, рече потпретседателот на Владата, Александар Николоски.

По Божик, православните христијани на 14 јануари, го одбележуваат денот на свети Василиј Велики во народот познат и како Василица односно Стара нова година. Според обичаите на тој ден се прави домашна погача во која домаќинките ставаат паричка, пеењето на василичарските песни во кој треба да биде опфатен тропарот на свети Василиј Велики, а некаде се практикува и палењето на огнот кои треба да ја симболизира светлината Божја во новата година.

Свети Василиј Велики е христијански светец, теолог и епископ од Кападокија, Мала Азија Во црквата се смета како голем поборник за православната вера, пристаниште на моралната чистота и столб на Црквата. Се смета за основач на монашката традиција во источното православие. Како светец бил прогласен по неговата смрт. Православната црква го слави на 1 јануари, односно на 13 јануари, а католичката црква на 2 јануари.

Свети Василиј Велики е еден од најголемите светци на христијанството. Роден е во 330 година во Неокесарија, во Понт, од родители Василиј и мајка Света Емелија, кои двајцата потекнувале од познати и богати фамилии, но уште позначајни по својата христијанска вера и живот.

Василиевата баба по татко, Света Макрина била ученичка на Свети Григориј Чудотворец, епископ во Неокесарија, која едвај го преживеала максимилијановотото прогонување на христијаните.

Младоста му поминала во времето на царувањето на царот Константин I Велики (306-337 година). Свети Василиј најпрвин се школувал кај својот татко, кој бил реторичар во Неокесарија. По смртта на неговиот татко во околу 345 година, тој го продолжил понатамошното школување во Неокесарија Кападокиска, каде школски другари му биле Григориј Назијанин и Јулијан Апостата.

Од Кесарија Свети Василиј заминал за Цариград, каде кратко време учел кај елинскиот ритор Ливаниј, а потоа во 352 година заминал во Атина. Таму ја проучувал филозофијата, дијалектиката, реториката, астрономијата и медицината.

За Василиевото образование најдобро сведочи неговата голема ерудиција, која се сретнува во неговите дела, каде големиот познавач на класиката, Фотиј го става во ранг со Платон и Демостен.

Од Атина повторно заминал во Ерусалим каде на триесетгодишна возраст бил покрстен од страна на епископот Максим во реката Јордан и потоа ракоположен за отец во црквата. Според христијанското верување, Свети Василиј го раздадал својот имот на сиромашните и тргнал во 357 година кон Александрија, Египет, Палестина и Месопотамија, учејќи го монаштвото.

Во областа на монаштвото оставил и многу поуки. Зборувал и пишувал прекрасно за покајанието, пороците и добродетелите, смртта и воскресението на душата, спасението. Во Египет останал кај архимандитит Порфитиј каде се задржал околу една година. Потоа го посетил и Ерусалим. Во 360 година бил поставен како ѓакон, а подоцна и како свештеник.

Во 370 година Свети Василиј станал епископ по смртта на Евсевиј. Погледите на заштитниците на Никејската вера се свртиле кон Василија. Против неговиот избор за Архиепископ на Кесраија Кападокијска биле аријанските еретици, бидејќи се плашеле од неговите храбри проповеди и разобличувања.

На оваа должност, според христијанството, Свети Василиј често пати испраќал кон верниците канонски поуки и совети, кои подоцна станале канони за целата црква, изградил многубројни болници, старечки домови.

Мирот во црквата, Свети Василиј не го доживеал и покрај тоа што нему му се препишуваат најголемите усилија за Вториот вселенски собор во Цариград 381 година, каде се донело одлука против сите ереси и раздори против кој Василиј се борел.

Починал на 31 декември 378 година, и свечено бил погребасн на 1 јануари 379 година, ден кога се слави и неговиот помен. Дел од останките на Свети Василиј се наоѓаат и во црквата Свети Кирил и Методиј во Струмица.

Во црковните богослужби најчесто е нарекуван “пчела на Црквата Христова”, која им дава мед на верните и осило на еретиците“. Сочувани се многубројни дела на овој отец на Црквата: апологетски, богословски, подвижнички и канонски; и литургија наречена според неговото име. Василиевата литургија се служи десет пати во годината, и тоа: на 1 јануари, наспроти Божик, на Велики Четврток и на Велика Сабота.

Денес именден празнуваат: Васил, Василка, Васка, Весела, Веселинка, Веска, Нове, Новка…

СДС планира целосно да се изoлира, а нивното однесување се претвора во целосна деструкција кое се повеќе наликува на Лeвица, истакна во вечерашното интервју на телевизија Сител во Тема на денот, потпретседателот на ВМРО-ДПМНЕ, Александар Николоски, зборувајќи за лидерската средба која ја иницираше ВМРО-ДПМНЕ и за можностите за укинување на т.н. техничка влада.

-Прво учеството на лидерската средба е доброволен чин, ние не можеме никој да присилиме да присуствува или да не присуствува. Второ, ВМРО-ДПМНЕ и премиерот Мицкоски покажаа една големина, бидејќи ние имаме двотретинско мнозинство во Собранието, и без разлика на тоа решивме да организираме лидерска средба за најкрупните прашања кои се во интерес на државата. Во едно друго време, кога ВМРО-ДПМНЕ беше во опозиција и имаше повеќе пратеници од СДС, тие или не комуницираа, или одржуваа средби колку да се случат, вели Николоски.

Николоски додаде „ако СДС сака да се изолира, ние тука не можеме ништо да направиме“, посочувајќи го феноменот кој моментално се случува на македонската политичка сцена, а тоа е дека СДС се повеќе наликува на Левица, а Левица станува СДС, односно приматот на деструкција, сега го презема најголемата опозициска партија.

Изминатиот викенд се одржа свечениот гала концерт на WAF AWARDS, на кој беа соопштени победниците во сите натпреварувачки категории.

Годинашното издание на WAF Contest – WAF Awards 2026, кое се одржа во Скопје, собра вкупно 50 вокалисти, распоредени во пет возрасни категории, при што секој учесник беше оценуван според квалитетот и убедливоста на својата изведба.

Покрај признанијата доделени по категории, настанот беше одбележан и со врачување на најпрестижната награда – Гранд При. Годинашниот добитник на ова врвно признание е прилепчанецот Сергеј Попоски oд Прилеп, кој со својот настап се истакна како најуспешен учесник на фестивалот WAF AWARDS.

Во времето кога Божјиот угодник свети Василиј Велики станал Архиепископ Кесариски, епархот на Кападокија, кој бил многу алчен и груб човек, имал обичај редовно да доаѓа со својата вojcка и да го огpaбyвa градот.

Кога на свети Василиј му јавиле дека епархот повторно доаѓа, тој побарал од богатите луѓе во Кеасрија да го донесат сиот свој накит и златници.

Кога епархот пристигнал, свети Василиј го пречекал и му го понудил богатството. Епархот се изненадил и по некое чудо се засрамил, така што одбил било што да земе, ниту пак го огpaби градот.

Тој никогаш повеќе не се ни вратил, ниту пак им досадувал на верните од градот. Свети Василиј останал со сиот накит и златници токму на Новогодишната вечер не знаејќи што на кого му припаѓа. Тогаш просветлен од Господ, тој ги замоли готвачите да направат мали лебови за секој верник.

Во секој од лебовите тој ставил нешто накит и златници. На денот на Новата година кога сите луѓе дошле во црква, тој на секого му дал по едно лепче. Тоа што секој го имал најдено во лепчето било токму тоа што претходно го имал дадено.

За спомен на овој настан до ден денес се практикува на денот на свети Василиј Велики, односно на Новата година (по стар календар) да се меси лепче со паричка во него.

Лепчето се разделува така што првото парче е наменето за спомен на Годпод Исус Христос второто за Пресвете Богородица, а третото за свети Василиј Велики. Понатаму лепчето се разделува на присутните. Оној кој ќе ја најде паричката го добива благословот на свети Василиј Велики за претстојната година.

Управата за јавни приходи (УЈП) ги потсетува сите правни и физички лица кои заклучно со декември 2025 година оствариле вкупен промет повисок од 2.000.000 денари од вршење на оданочив промет на добра и услуги, дека имаат обврска да поднесат Пријава за регистрација за целите на данокот на додадена вредност (образец ДДВ-01).

Доколку како физичко лице изнајмувате деловен простор во земјата, давате менаџерски, правни, економски, инженерски, занаетчиски услуги, давате приватни часови на ученици и студенти, остварувате приходи од продажба на земјоделски производи или вршите друг оданочив промет и во 2025 година сте оствариле промет над 2.000.000 денари треба да се регистрирате за целите на ДДВ.

Вкупен промет за целите на ДДВ е прометот што го направил обврзникот во текот на годината по основ на продажба на добра и извршени услуги. Во вкупен промет не влегува прометот кој е ослободен од ДДВ без право на одбивка на претходен данок, како на пример: изнајмување на станбени објекти и станови за живеење, услуги на осигурување и реосигурување, здравствени услуги, услуги за изучување на странски јазици, услуги на компјутерски центри, меѓународен превоз на патници и др.

Исто така, во вкупен промет не влегува и прометот кој се врши кон странски даночни обврзници и кој не подлежи на оданочување со ДДВ, како на пример: вршење на консултантски, адвокатски, ИТ и други услуги кон странски даночни обврзници.

Ако даночниот обврзник ја вршел својата дејност само во еден дел од календарската година, вкупниот годишен промет за цели за ДДВ се пресметува на тој начин што се зема вкупниот остварен промет за месеците кога ја вршел дејноста, истиот се дели со бројот на месеците на работење и се множи со дванаесет, при што се добива вкупен годишен промет.

На пример: Ако сте склучиле договор за закуп на деловен простор со почеток од 01.07.2025 година, а месечната закупнина изнесува 200.000 денари, пресметката за вкупен годишен промет за цели на регистрација за ДДВ е следна:

Бруто приход за 6 месеци: 1.200.000 денари
Месечен бруто приход: 1.200.000 / 6 месеци= 200.000 денари
Вкупен годишен приход: 200.000 * 12 месеци= 2.400.000 денари

Во овој случај даночниот обврзник има обврска да се регистрира за целите на ДДВ.

Пријава за регистрација за целите на данокот на додадена вредност (образец ДДВ-01), може да се достави и од даночните обврзници кои сакаат доброволно да се регистрираат за ДДВ.

Пријавите за регистрација за ДДВ се доставуваат најдоцна до 15-ти јануари 2026 година, електронски на http://etax.ujp.gov.mk/eTaxServices, лично во организациска единица на УЈП или по пошта.

Истовремено укажуваме дека физичките лица – ДДВ обврзници, заради електронско потпишување и поднесување на ДДВ пријавите, треба да набават и дигитален сертификат на USB токен.

Во однос на оние кои се регистрирани за ДДВ, а кои не оствариле промет над 2.000.000 денари во претходната календарска година и кај кои е истечен најмалку тригодишен период од регистрацијата за целите на ДДВ, можат да поднесат Пријава за отповикување на регистрација за данокот на додадена вредност.

Исто така, и ДДВ обврзниците кои во секоја од двете претходни календарски години поднесувале даночни пријави со вкупен промет помал од 2.000.000 денари и кои во секоја од двете претходни календарски години не искажувале претходен данок за одбивање, можат да поднесат Пријава за отповикување на регистрација за данокот на додадена вредност (образец ДДВ-01Б).

Пријавата за отповикување на регистрација за ДДВ (образец ДДВ-01Б) се поднесува најдоцна до 15-ти јануари 2026 година по електронски пат на http://etax.ujp.gov.mk/eTaxServices , лично во најблиската организациска единица на УЈП или по пошта.

Воедно, потсетуваме и дека Управата за јавни приходи може службено да изврши прекинување на регистрацијата за ДДВ доколку утврди дека:

-во претходната календарска година, даночниот обврзник поднесувал даночни пријави без искажан данок за извршен промет и без искажан претходен данок за одбивање;
-во двете претходни календарски години, даночниот обврзник поднесувал даночни пријави без искажување на данок за извршен промет, со исклучок кога во истите периоди во даночните пријави искажува само промет ослободен од данок со право на одбивка или претходен данок кој произлегува од промет на инвестициони добра извршен кон даночниот обврзник или увезени од него;
-даночниот обврзник не може да се најде на пријавената адреса и на адресата за вршење на деловни активности;
-даночниот обврзник не поднесувал даночна пријава за најмалку два даночни периоди кај месечните или тримесечните даночни обврзници;
-кај даночниот обврзник претходно е идентификувано даночно затајување.

Поради влошената безбедносна состојба во Исламска Република Иран, Министерството за надворешни работи на Македонија апелира до македонските граѓани кои се наоѓаат на територијата на оваа држава, истата да ја напуштат во прва можна и безбедна прилика. Истовремено, се апелира да се одложат сите патувања кон Иран кои не се неопходни.

„Министерството за надворешни работи ги има ставено на располагање сите свои капацитети за асистенција на државјаните на Република Северна Македонија, преку 24-часовниот СОС дежурен телефон +389 75 268 736, електронската адреса [email protected], како и преку дежурниот телефонски број на Дипломатско-конзуларното претставништво на Република Северна Македонија во Анкара: +90 539 456 97 10.“ – се вели во соопштението.

Вештачката интелигенција одамна не е поим од научнофантастични филмови, туку економска реалност која го преобликува пазарот на труд побрзо од која било технолошка револуција досега.

Додека едни во неа гледаат можност за неверојатен раст и продуктивност, други со загриженост ги следат вестите за милиони работни места што би можеле да исчезнат. Вистината, како и обично, е некаде помеѓу, но едно е сигурно: промените се неизбежни. Експертите предупредуваат дека до крајот на деценијата многу од денешните преофесии ќе станат излишни, но истовремено ќе се создадат и сосема нови.

Анализите на водечките светски институции, како „Светскиот економски форум“ и „McKinsey“, јасно покажуваат кои професии се најизложени на ризик.

Станува збор за работни места што се темелат на повторливи, рутински и предвидливи задачи. Алгоритмите и роботите стануваат сè повешти во извршување задачи за кои не е потребно високо ниво на емоционална интелигенција, креативност или комплексно решавање проблеми.

На самиот врв на листата на загрозени се административните работни места. Внесување податоци, транскрипција, водење евиденции и закажување состаноци се задачи што вештачката интелигенција веќе денес ги извршува побрзо и попрецизно од луѓето.

Слична судбина ги очекува и вработените во корисничка поддршка и кол-центри. AI чат-ботовите и виртуелните асистенти стануваат сè пософистицирани и способни да решаваат поголем дел од корисничките прашања без човечка интервенција.

Според извештај на банката „Goldman Sachs“, вештачката интелигенција би можела да замени еквивалент на дури 300 милиони работни места со полно работно време на глобално ниво.

Бранот на автоматизација не застанува само на канцелариските работи:

Малопродажба

Самоуслужните каси веќе ја намалија потребата од касиери, а понатамошниот развој на технологијата би можел целосно да ги елиминира.

Логистика

Работниците во магацини, чија работа се сведува на сортирање и пакување, се загрозени бидејќи роботизацијата станува стандард во логистичките центри.

Финансии и право

Во сметководството и книговодството, софтверите ја автоматизираат обработката на фактури и плати. Во правниот сектор, AI алатките преземаат преглед на документи и правни истражувања.

Медиуми и јазици
Лекторите и редакторите чувствуваат притисок бидејќи јазичните модели стануваат сè подобри во исправување граматички грешки и стилско дотерување на текстови.

Трансформација, а не апокалипса

Иако прогнозите за 85 милиони згаснати работни места до 2026 година звучат застрашувачки, важно е да се погледне пошироката слика.

Истиот извештај на „Светскиот економски форум“ предвидува дека истовремено ќе се создадат 97 милиони нови работни места.

Вештачката интелигенција не ги уништува работните места, туку ги трансформира. Со автоматизирање на здодевните задачи, таа им овозможува на луѓето да се фокусираат на покреативни и постратешки аспекти од работата.

Работни места што остануваат сигурни

Занимањата што бараат човечки допир, емпатија, критичко размислување и лидерство тешко ќе бидат заменети.

Лекари, хирурзи, психолози, наставници и менаџери ќе останат незаменливи поради нивната способност да разбираат комплексни човечки емоции.

Исто така, побарувачката за стручњаци кои развиваат и управуваат со AI системи расте експоненцијално.

Клучот за преживување во оваа транзиција лежи во приспособувањето и доживотното учење. Развивањето „човечки“ вештини, како комуникација и решавање проблеми, ќе биде пресудно.

Иднината на работата не е борба меѓу човекот и машината, туку партнерство во кое секој го прави она во што е најдобар, пишува „Raport.ba“.

Пред неколку дена сите го видовме видеото од стадо елени во Националниот парк “Галичица” и бевме воодушевени од нивниот број и убавина.

Видеото кое го објавија од националниот парк стана вирално и го пренесоа речиси сите медиуми, но знаете ли кои се “виновниците” кои се грижат за овие благородни животни?

Се разбира тоа се луѓето од репродуктивниот центар за елени во Националениот парк “Галичица”.

Денеска тие објавија фотографии и ја запознаа јавноста како во изминатите години се грижат за животните, чиј број постојано расте од 2019 година.

-Нашиот посветен ренџер Лазе, заедно со неговите помошници Јане и Кире, секојдневно се на терен – обезбедуваат храна и вода, вршат редовни контроли и се грижат за безбедноста и благосостојбата на елените. Резултатите зборуваат сами за себе: во 2019 година бројката изнесуваше околу 30 единки, а денес популацијата е зголемена на над 200 елени. Покрај постојаното присуство на ренџерската служба, центарот е опремен и со видео-надзор камери, кои овозможуваат дополнителна, непосредна заштита и навремена реакција. Репродуктивниот центар беше отворен во 2019 година со јасна цел – активно управување со високопланинските пасишта, заштита и обновување на популацијата на елени и долгорочно зачувување на биолошката разновидност во паркот. Овој пристап придонесува за здрави екосистеми, рамнотежа во природата и одржлива иднина за Галичица – напишаа од Националниот парк “Галичица” на социјалните мрежи.