-На 22.11.2025 во 02:50 часот на ул. „Прилепски бранители“ во Прилеп, полициски службеници од ОВР Прилеп го лишиле од слобода Д.С. од Прилеп. При контрола во сообраќајот, полициските службеници сопреле патничко возило „опел” со прилепски регитарски ознаки, при што било констатирано дека Д.С. го управувал возилото под дејство на алкохол, односно измерени му биле 2,79 промили алкохол во крвта. Д.С.бил отстранет од сообраќај и по документирање на настанот против него ќе биде поднесена пријава за „безобѕирно управување со моторно возило” казниво по чл.297А од КЗ, информираат од СВР Битола.

Градоначалничката на Општина Кисела Вода, Бети Стаменкоска-Трајкоска, заедно со министерот за спорт Борко Ристовски извршија увид во градежните активности за комплетната реконструкција на спортската сала „Расадник“, која почна кон крајот на 2024 година.

„Гледаме како се менува приказната – од објект кој со години пропаѓаше и претставуваше срамен пример за негрижа, ‘Расадник’ повторно ќе стане место кадешто ќе се собираат граѓаните, ќе се слави спортот и ќе се раѓаат нови спортски имиња, како што беше случај и во минатото. Оваа сала некогаш беше дом на спортскиот клуб Вардар и искрено се надевам дека повторно ќе го добие тој статус, затоа што ‘Расадник’ не е само објект, туку и емоција, традиција и симбол за многу генерации од Кисела Вода“, изјави градоначалничката Стаменкоска-Трајкоска.

Реконструкцијата на култната спортска сала чини 120 милиони денари и треба да заврши до крајот на годинава, а партерното уредување ќе биде завршено во текот на следната година.

Во рамки на 14. коло во хрватската ХНЛ лига, екипата на Славен Белупо каде втора сезона по ред настапува нашиот Илија Несторовски, славеше со 4:1 против Вуковар, а токму Несторо беше стрелец на два погодоци.

Прилепчанецот погоди за 2-0 во 25. минута откако одлично проследи акција во која гостите згрешија. Потоа во вториот дел Нестор пак покажа дека има чувство за гол и погоди на „празна мрежа“ за конечните 4-1.

Несторовски сезонава има 3 погодоци во дресот на Славен, екипа која сега се наоѓа на третото место на табелата и покажува дека сериозно ќе се бори за излез во Европа. Нашиот поранешен репрезентативец има 35 години и игра во одлична форма, сепак тоа не беше доволно за селекторот Милевски одново да го повика во репрезентативниот дрес.

-На 21.11.2025 во 19:55 часот во СВР Битола е пријавено дека на патот Битола- Граничен премин Меџитлија се случила сообраќајна несреќа помеѓу патничко возило „опел корса“ со битолски регистарски ознаки, управувано од А.С.(23) од Битола и патничко возило „фолксваген поло“ со грчки регистарски ознаки, управувано од А.Х.(30) од Република Грција. Со тешки телесни повреди се здобила 23-годишната А.С., констатирани во Клиничка болница Битола. По наредба на јавен обвинител, извршен е увид од увидна екипа на СВР Битола – информираат од МВР.

Аца Лукас синоќа е приведен за време на настап во Кавадарци. Иако во јавноста се појавија голем број шпекулации за причините за апсењето на српскиот пејач, од Министерството за внатрешни работи официјално известија за настанот и што точно се случувало.

Лукас бил приведен 10 минути по полноќ, при вршење на контрола на повеќе институции во угостителскиот објект каде тој имал настап.

На терен излегле полициски службеници од ОВР Кавадарци, Одделение за криминалистички работи при СВР Велес, инспектор за странци од Регионален центар за гранични работи Југ, заедно со Државен пазарен инспекторат, Државен инспекторат за труд и Управа за јавни приходи.

-Констатирано било дека во угостителски објект во Кавадарци А.В. настапувал без потребната дозвола. Против А.В е поднесена прекршочна пријава по член 217 став 1 точка 2 од Законот за странци, а од страна на Основен суд Кавадарци му била изречена парична казна. При контролата во истиот угостителски објект констатирани се прекршоци од страна на УЈП за неиздавање на фискална сметка, прекршок согласно Закон за пушење, a од страна на ДПИ е констатирано дека во објектот се присутни поголем број на гости од дозволениот број, за што ќе бидат поднесени соодветни поднесоци, информираат од Министерството за внатрешни работи.

МВР во соработка со другите надлежни институции, ќе продолжи и во наредниот период со зајакнати акциски контроли на територијата на целата држава, со цел санкционирање на било какво кршење на законите.

Обилните врнежи од дожд кои деновиве го зафатија Пелагонискиот регион предизвикаа поплавувања во атарот на повеќе населени места, а најмногу се чини во атарот на село Канатларци.

Од ВИДЕОТО кое го објави Славчо Попоски, се гледаат големи земјоделски површини под вода, а отежнато се одвивал и сообраќајот на патниот правец кон ова прилепско населено место.

Според најавите од УХМР врнежите од дожд ќе продолжат и во текот на ноќта и во текот на утрешниот ден, а од недела следува и пад на температурите.

Просечната месечна исплатена нето-плата по вработен во септември годинава изнесува 45.466 денари и е за 9,3 отсто повисока во споредба со истиот месец лани.

Според податоците на Државниот завод за статистика, ваквото зголемување се должи, пред сѐ, на зголемувањето на просечната месечна исплатена нето-плата по вработен во секторите: Образование за 14,9 отсто, Дејности на здравствена и социјална заштита за 12,6 и Транспорт и складирање за 11,5 отсто.

Зголемување на просечната месечна исплатена нето-плата по вработен, во однос на претходниот месец, е забележано во секторите: Преработувачка индустрија за 3,5 отсто, Јавна управа и одбрана; задолжително социјално осигурување за 1,8 и Рударство и вадење на камен за 1,1 отсто.

Просечната, пак, месечна исплатена бруто-плата по вработен во септември годинава изнесува 68.392 денари и исто така е за 9,3 отсто повисока во споредба со истиот месец од минатата година.

Ваквото зголемување се должи, пред сѐ, на зголемувањето на просечната месечна исплатена бруто-плата по вработен во секторите: Образование за 15,1 отсто, Дејности на здравствена и социјална заштита за 12,8 и Транспорт и складирање за 10,6 отсто.

Зголемување на просечната месечна исплатена бруто-плата по вработен, во однос на претходниот месец, е забележано во секторите: Преработувачка индустрија за 3,6 отсто, Јавна управа и одбрана; задолжително социјално осигурување за 1,9 и Рударство и вадење на камен за 1 отсто.

Во населбата “Точила” позади маркетот “Тобако”, веќе некое време вистинските гурмани во Прилеп ги пречекува едно ново гастрономско катче – место каде вкусот и традицијата се спојуваат во едно, ресторан кој за кратко време почна да го бие добар глас за одлична храна и услуга.

Ако не сте биле, редно е да ги посетите, ресторан “КАЛАБАЛАК” нуди вистинско гастрономско уживање со традиционална прилепска скара и традиционални прилепски специјалитети.

Во пресрет на Новогодишните празници, ресторанот нуди богато мени по пристапни цени за секого, за одлично уживање и расположение заедно со пријателите, семејството, колегите од работа….

Резервирајте на време, првата убава прилика за добар помин е на 28.11. (петок) заедно со прекрасниот глас на младата талентирана пејачка од Прилеп, Благица Калева.

Телефон за контакт: 078 282 559

-ОВР Прилеп поднесе известување против К.С.(19), А.Р.(24) и двајца 17-годишници, сите од Прилеп, поради постоење основи на сомнение за сторено кривично дело „тешка телесна повреда. На 25.09.2025 на плоштадот „Методија Андонов Ченто“ во Прилеп, пријавените физички нападнале едно лице и му нанеле тешка телесна повреда – информираат од МВР.