Градоначалникот на општина Крушево, Нико Чонески, ги повикува граѓаните на приемен ден, секој четврток од 10 до 14 часот.

Граѓаните средба со првиот човек на општината, каде ќе си ги кажат проблемите кои ги мачат, можат да закажат секој работен ден од 09-15 часот.

-Овие средби ќе овозможат подобра комуникација, размена на идеи и заедничко разгледување на сите прашања што се важни за заедницата и решавање на сите предизвици со кои се соочуваат жителите – велат од општина Крушево.

Општина Прилеп ќе биде еден од градовите (повеќе од 50 на број) што ќе го одбележи Денот на Медитеранот со организација на бесплатен концерт за граѓаните на Прилеп.

Денот на Медитеранот ќе се одбележи на 28 ноември (петок), во кино салата “Мис Стон” при НУЦК „Марко Цепенков“, со бесплатен музички концерт на групата “Луфтанза”, каде што граѓаните на Прилеп ќе имаат можност да се дружат и да разменуваат искуства. Настанот ќе биде покриен со live stream за сите оние што нема да можат да бидат во Прилеп на тој ден преку Youtube каналот на GoGreen.

Овој настан, поддржан од Anna Lindh Foundation и Здружението “Љубезност”, ќе ги обедини звуците од корените, претставувајќи ги вистинските приказни, ритмови и врски што ги спојуваат заедниците од медитеранот. За се да биде како што треба логистички и организациски ќе се погрижат Општина Прилеп и “Форумот за авангардна креативност”.

Градоначалникот на општина Битола Тони Коњановски и секретарот на општината Борче Димитровски, беа дел од Самитот на градоначалници против антисемитизмот, кој се одржа во Париз.

Самитот, со кој претседаваше градоначалничката на Париз Ан Идалго, ги обедини градските лидери, креаторите на политики и претставниците на заедниците, во нивната заедничка мисија за активно спречување и сузбивање на антисемитизмот во сите негови форми. Настанот претставува значајна платформа за акција, дијалог и размена на искуства, нагласувајќи ја клучната улога на градовите во заштитата на граѓаните и унапредувањето на квалитетот на заедничкиот живот.

Во рамките на програмата, учесниците активно учестваа во панел-дискусиите и работните сесии фокусирани на практични стратегии, успешни локални иницијативи и специфичните предизвици со кои се соочуваат општините при справувањето со омразата и дискриминацијата. Градоначалниците и општинските лидери ги споделија своите практични искуства, политички пристапи и дискутираа за можностите за прекугранична соработка која може да ја зајакне едукацијата, безбедноста и довербата во заедницата.

Самитот имаше за цел да го поттикне развојот на заеднички решенија, да ја засили солидарноста меѓу градовите и да ја нагласи важноста на локалното делување во борбата против антисемитизмот.

Во рамките на посетата на Париз, градоначалникот Коњановски и секретарот Димитровски остварија средба со амбасадорот на Македонија во Франција, Игор Николов, во македонската амбасада.

Изминатиот викенд во Пехчево се одржаа три државни натпреварувања, на кои одлични успеси постигнаа играчите на ППК Младост 96.

Во петокот се одржа Државното првенство за основни и средни училишта во организација на Федерација на училишен спорт, на кое државен првак за средни училишта стана Софија Хасану, додека за основни училишта во машка конкуренција пораз во финале и освоено второ место имаше Мартин Ристески. Давид Јоноски се пласира меѓу најдобрите 8.

Во саботата се одржа Државното првенство до 21 година во организација на ППФМ. Софија Хасану го освои второто место, каде во неизвесно финале загуби од Сара Стојановска од ППК 1060 АС Ѓорче Петров. Во игра на двојки со Фани Јованоска загубија во финале од Сара Стојаноска од Крива Паланка и играчот со исто име и презиме од 1060 АС Ѓорче Петров.

Во мешани двојки со Мартин Ристески го освоија третото место.

Во неделата повторно најдобра Софија Хасану во ТОП 8, во игра секој со секого на првите 8 најдобри пингпонгари од Државното Првенство. Со седум победи без пораз го освои првото место и со вкупни бодови од двете првенства го зазеде првото место на ранг листата за играчи до 21 година.

На топ 8 во машка конкуренција играше и Мартин Ристески, кој имаше 3 победи и 4 порази, што е одличен успех за младиот пингпонгар.

Наредниот викенд продложуваат лига натпреватрите, ППК Младост96 ќе има свои натпревари и во Супер лигата машка и женска конкуренција и втората екипа во Втора лига.

По потекло Мисирец и војник по занимање Свети Мина, како вистински христијанин, не можеше да го гледа одвратното жртвопринесување на идолите, па ја напушти војската и градот и луѓето и с ? и отиде во пуста планина.

Бидејќи на Св. Мина му беше полесно да живее со дивите ѕверови одошто со незнабожните луѓе. Еден ден светителот го проѕре од далечина незнабожечкото празнување во градот Катуанија, па се спушти во градот и пред сите ја објави својата вера во живиот Бог Христос, а ги изобличи идолопоклонството и незнабоштвото како лага и мрак.

Кнезот на тој град, некој Пирос, го запраша Свети Мина кој е тој и што е. Светителот му одговори: „Татковина ми е Мисир, името ми е Мина, бев офицер, но кога го видов идолопоклонството се одреков од вашите почести. Сега дојдов пред сите да Го објавам мојот Христос како вистинит Бог, за и Он мене да ме објави како Свој слуга во Царството Небесно“.

Кога го слушна ова Пирос го подложи Свети Мина на големи маки. Го биеја, го стружеа со железни четки, го гореа со свеќи и го мачеа со разни други маки, па најпосле го убија со меч. Телото му го фрлија во оган за да не го земат христијаните, но тие сепак спасија од огнот некои делови. Овие остатоци ги погребаа чесно, а подоцна беа пренесени во Александрија и таму ги погребаа и над нив изградија црква. Св. Мина пострада околу 304 година и се пресели во Христовото Царство.

Тој беше и остана голем чудотворец во двата животи, и на земјата и на небото. На секого којшто го слави Св. Мина и во неволја со вера го повикува на помош, тој и му помогнал. Повеќепати се јавуваше како војник на коњ, за да им помогне на верните или за да ги казни неверните.

Во знак на солидарност и поддршка, компанијата Кожувчанка испорача 50.000 литри природна Изворска вода за жителите на најпогодените подрачја во Општина Ресен.

-Со оваа донација, сакаме да им помогнеме на семејствата кои се соочуваат со последиците од поплавите и да им ја обезбедиме најосновната, но и најважна потреба – чиста и безбедна вода за пиење. Нашите мисли се со сите засегнати. А ние сме секогаш тука да помогнеме кога е најпотребно – велат од “Кожувчанка”.

На 19.11.2025 година се одржа општинското натпреварување помеѓу средните училишта во Прилеп во конкуренција ракомет – машки.

Претставниците на турнирот достојно ги бранеа боите на своите училишта, а честа да застанат на највисоката позиција на пиедесталот и оваа година им припадна на ракометарите на гимназијата „Мирче Ацев“. Освојувањето на првата позиција на општинските средношколски ракометни натпревари за гимназијалците е традиција која трае подолг период.

Со висок степен на дисциплина, самодоверба и самоконтрола, гимназиските ракометари наликуваа на екипа од највисок ранг и со право го оправдаа приматот на најдобри средношколци во градот. Да не заборавиме дека гимназиските ракометари беа минатогодишни вицешампиони на државното првенство а традиционално важат за едни од најдобрите во државава.

Под менторство на проф, Даниел Василески, гимназијалците повторно докажаа дека со посветеноста кон спортот и ракометот се пример за сите средношколци.

Честитки и продолжете со успесите кон државната шампионска титула!

Ресторан „Порта“ од Прилеп подготвува ново музичко доживување. Во среда, на 26 ноември, на огромно задоволство на сите, во Прилеп ги носат популарните „Тумбао Салса Бенд“, предводени од познатиот македонски музичар Петар Ренџов.

Овој состав веќе две децении ја гради својата уникатна музичка приказна, во која се спојуваат ритмите на традиционалната кубанска музика со македонскиот мелос. Токму ова преплетување создава специфичен звук по кој бендот е препознатлив и кој успешно ја доближува латино енергијата до македонската публика.

Во своето повеќегодишно постоење, „Тумбао Салса Бенд“ остави силен впечаток со автентичните аранжмани на песни како „Среќата со пари не се купува“, „Фато мори душманке“, „Рандеву“ и „Македонско девојче“. Овие изведби, преплетени со карипски ритми и латино динамика, претставуваат ново музичко искуство кое го збогатува локалниот сценски простор.

Особено внимание привлекува и настапот на вокалистката Јасмин Лопез, Кубанка која живее и работи во Македонија. Нејзиниот топол и впечатлив вокал доаѓа до израз и во изведбите на македонски народни песни и во латино композициите што се дел од репертоарот на бендот. На голем број концерти, Лопез наизменично пее на македонски и на шпански јазик, при што создава дополнителна атмосфера и емотивна длабочина.

Настапите на бендот често се опишуваат како музички мост меѓу две култури — кубанската и македонската — кои и покрај различните традиции, споделуваат слична енергија, радост и интимност во изразот. Спојот на овие елементи е причината што секој концерт на „Тумбао Салса Бенд“ претставува своеобразно патување низ ритам, емоции и сценска магија.

Настанот во Ресторан „Порта“ е одлична можност за сите љубители на латино музиката, за оние што сакаат нови музички доживувања, како и за посетителите што уживаат во интерпретации што го освежуваат традиционалниот македонски звук.

Настапот во ‘Порта’ е закажан за 26 ноември (среда), со почеток од 20:30часот. Публиката ќе има ретка можност да ужива во музички состав што 20 години успешно ја спојува кубанската традиција со македонската музичка автентичност.

Резервирајте навреме на тел.бр. 078 368 111

Настанот е поддржан од винарија BOVIN

Шок завршница во Куманово на гостувањето во кое РК Прилеп стигна до петтата победа сезонава во Супер лигата. Владан Кастратовиќ му донесе триумф на Прилеп со гол во последните секунди од средбата, за конечни 28:29.

Се играше изедначен натпревар во кој прилепчани три пати имаа водство, два пати во првото полувреме и само еднаш во второто. Пресудна за целиот плен од гостувањето во Куманово беше тактиката на тренерот Таневски, кој во текот на целиот натпревар ги постави играчите во зона 5:1 и 4:2, а во клучните моменти во напад Прилеп играше 7 на 6.

Маестрален во завршните моменти беше голманот Илчо Ивчески кој забележа две клучни одбрани, а Владан Кастратовиќ го постигна победничкиот гол на само 3 секунди до крајот на натпреварот.

Сега Прилеп има 10 бода и се на 8 место, го скокна Пролет на табелата, додека Куманово останува на делба на претпоследното место заедно со Струга.

Во наредното коло Прилеп го пречекува Бутел.

Претседателката Гордана Сиљановска-Давкова го одликува кардиологот и алпинист Сашко Кедев со Орден „8 Септември“, за особените заслуги во медицината, не само дома, туку и во европски и светски рамки, како и за историскиот подвиг во алпинизмот како прв Македонец којшто ги искачил 14-те светски планински врвови над 8 000 метри надморска височина.

Сиљановска-Давкова, на доделувањето на орденот вечерва во Македонската филхармонија, порача дека академик Сашко Кедев е човек, чијшто персонален и општествен интегритет ги надминуваат границите на потесната стручна област и се интегрирааат во колективната меморија на државата и општеството.

-Сите го знаеме како врвен медицински авторитет, еден од пионерите и лидерите во развојот на интервентната кардиологија. Неговата личност ја красат благородноста, моралниот интегритет и хуманоста… Биографијата на академик Кедев е поучен пример за секој од нас, но и добар прирачник за идните генерации. Таа е доказ дека успесите не се ниту привилегија, ниту случајност, туку логична последица и заслужена награда за енормните, натчовечки напори на човек со голема буква, рече Сиљановска-Давкова.

За сето она што го направи за медицината, науката, спортот, за меѓународниот углед на нашата земја, но и за македонската демократија, најмалку што можеме да сториме, рече Сиљановска-Давкова, е да му оддадеме признание. Не може да говориме за него, а да не го занемариме неговиот активен и видлив придонес за македонската демократија од првите денови на самостојноста и независноста до денес.

-Каде и да оди и што и да работи по светот, тој ја персонифицира на најдобар начин Македонија. Доказ за тоа е и неговиот статус на почесен конзул на Индонезија, плод на неговите неимарски способности во градењето мостови на доверба и партнерство меѓу народите и државите, нагласи Сиљановска-Давкова.

Доктор Кедев, нагласи, има биографија што не ја опишуваат епитети, туку ја потврдуваат суперлативи.

– Фактите говорат дека тој е меѓу водачите, првенците – интервентни кардиолози на Универзитетската клиника за кардиологија, но и во другите центри во земјата, како и во бројни престижни меѓународни медицински институции, од Канада до Јужна Африка, што од него прави своевиден колумбовски или магелановски докторски профил, порача претседателката.Неговиот научен опус е вонсериски во домашeн контекст, рече Сиљановска-Давкова, нагласувајќи дека академик Кедев вовел револуционерни техники во нашата кардиологија, со што поставил повисоки стандарди, отворил нови и пошироки хоризонти, давајќи им нова шанса на илјадници пациенти.

-Ако во медицината, д-р Кедев ги достигна највисоките професионални и хумани височини, тогаш во алпинизмот, буквално, ги освои највисоките врвови на светот. И тоа, не во младешките денови на бунтовник без причина, туку во зрелата доба, како бунтовник со цел: умен, искусен, но се уште детски љубопитен; храбар, но внимателен; желен за нови подвизи, но наоружан со богато искуство, дисциплина и истрајност и … разбран и придружуван, дополни Сиљановска-Давкова.

Таа истакна дека во период подолг од две децении, Сашко Кедев ги искачи сите 14 највисоки врвови над осумилјади метри.

-Неговите подвизи не само што предизвикуваат дилеми, чудење и восхит, туку ги поместуваат границите на човечката издржливост и верба… Цврсто верувам и ве уверувам дека успесите на академик Кедев не се случајност, туку резултат на енормно знаење и сизифовски напори, потпрени на цврст морален темел и чиста и длабока духовност. Храброста и неуморноста што ги учел и вежбал во салите за операции, го поттикнуваат и водат на највисоките планински врвови, а вербата во правдата и моралот, го инспирираат и придружуваат во општествената битка за подобро, поправедно, демократско општество, изјави Сиљановска-Давкова.

Како што потецираше, секогаш кога е потребно гласно, чесно и одговорно да се проговори, тој е тука, дома, во Македонија.

На доделувањето на Орденот, вечерва во Македонската филхармонија, присуствуваа премиерот Христијан Мицкоски и министри од Владата, градоначалници, академици и голем број личности од општествениот живот.

Орденот на Кедев му се доделува и за храбриот придонес во конституирањето на самостојна и независна Република Македонија и за активното учество во развојот на македонската демократија, за особените заслуги во медицината, не само дома, туку и во европски и светски рамки, крунисани со членство во престижни научни меѓународни асоцијации. Понатаму, за уживањето посебен углед како врвен интервентен кардиолог којшто вовел иновативни техники и методи, извршил неколку илјади коронарни интервенции и над 1 600 транс-радијални каротидни стентирања, за исклучителните образовни и научни успеси, потврдени со 230 публикации со импакт-фактор на платформата „Wеb of Science“, H-индекс 36 и 13 650 цитати, за продлабочувањето на меѓународната соработка како почесен конзул на Индонезија.