-На 29.09.2025 во 15:18 часот на ул.„Карпалак“ во Прилеп, полициски службеници од ОВР Прилеп го лишија од слобода З.Т.(42) од Прилеп. При сообраќајна контрола со радар, полициските службеници констатирале дека управувал товарно возило „фолксваген” со скопски регистарски ознаки со брзина од 121 километар на час на место каде брзината на движење е ограничена со сообраќаен знак на 50 километри на час.

По целосно документирање на случајот, против него ќе биде поднесена соодветна пријава по член 297-а од Кривичниот законик – „безобѕирно управување со моторно возило” – стои во соопштението од МВР.

Првата скајранинг лига во Македонија, составена од 5 трки во 3 дисциплини донесе одлични трки, борба и неизвесност.
Во секоја трка секоја позиција беше бодувана согласно системот на бодување на Светската скајранинг федерација, а прилепчаните Златко Карчески со 280 бодови кај мажите и Елена Каранфилоска со 300 бодови кај жените, се првите национални шампиони на лигата.

За тие кои не знаат, Skyrunning е форма на планинско трчање што се одвива на ниски, средни и високи, планински терени. Се карактеризира со стрмни падини и предизвикувачки патеки кои често бараат од тркачите да ги користат рацете за да се тркаат преку камења и други пречки. Skyrunners мора да бидат физички подготвени и ментално тешки, бидејќи спортот бара високо ниво на издржливост и способност за движење на тежок терен.

За да учествуваат во skyrunning, тркачите мора да бидат во добра физичка кондиција и да имаат искуство со трчање на планински терен. Исто така, препорачливо е да тренирате специјално за skyrunning, со вклучување на тренинзи на рид, тренинзи за сила и трчање по патека во тренингот за да се изгради сила и издржливост.

Скајранинг комисијата се погрижи за најдобрите пет пласирани во машка и женска конкуренција преку @fpsmakedonija и @sportlabmk да обезбеди соодветни награди.

Шампиони по дисциплини за 2025год се:

Класик скајранинг
1.Дејан Ангелoски
1.Елена Каранфилоска

Ултра скајранинг
1.Александар Стојкоски
1.Вера Урдаревска

Вертикален Километар
1.Златко Карчески
1.Елена Каранфилоска

Првата сезона ја одбележаа вкупно 510 натпреварувачи во машка и женска конкуренција на 5 трки.

Честитки за нашите прилепчани и желби за успех на домашно и меѓународно ниво и во иднина!

На 25-ти септември во македонскиот Културно информативен центар во Тирана со одржа отворањето на изложбата на големиот македонски сликар oд Прилеп Кирил Гегоски.

Оваа изложба се реализира во соработка со Националната галерија на Република Северна Македонија, под кураторство на Горанчо Ѓоргиевски и е поддржана од Министерство за култура и туризам на Република Северна Македонија.

На свеченото отварање зборуваа ВД Амбасадорот на Република Северна Македонија во Албанија г-динот Љуфтим Спахиу и директорката на КИЦ Тирана Ема Попивода. На изложбата присуствуваа и директорот на Националната галерија г-динот Али Синани, програмскиот координатор Маја Крстевска, како и други вработени во галеријата.

Ѕидовите на КИЦ на Македонија во Тирана ги краси дел од 50 – годишното творештвото на Кирил Гегоски, кое како што кажа и самиот автор, со својата убавина имаат за цел да ја пренесат радоста со која ги создавал своите дела – до посетителите.

Културните настани значајно придонесуваат за афирмација на нашата култура и уметност, поттикнуваат меѓународна размена и соработка и го зајакнуваат нашиот идентитет. Бројната посетеност на настанот сведочи за успешното претставување на нашиот културен центар, но и за значајното културно – уметничко богатство на нашата земја, кое е препознаено и надвор од нашите граници.

Изложбата ќе биде отворена до 10-ти октомври, 2025 година.

-Вчера во 21:05 часот во СВР Битола е пријавено дека на ул.„Филип Втори Македонски“ во Битола, патничко возило „бмв“ со битолски регистарски ознаки, управувано од П.Л.(26) од Битола, удрило во 21-годишната П.Т.М. од Гевгелија, со престој во Битола.

Во несреќата со тешки телесни повреди се здобила П.Т.М., констатирани во Клиничката болница Битола.

Денеска се празнуваат Св. маченички Вера, Надеж и Љубов и мајка им Софија.

Во својот богослужбен циклус, Црквата на овој ден се сеќава на животот и мачеништвото на четири римјанки Вера, Надеж, Љубов и нивната мајка Софија. Овие четири христоподобни дури беа приведени од римските власти за време на прогоните на императорот Хадријан, во првата половина на вториот век по Христа. Заради исповедањето на Христа и одбивањето да принесат жртви пред празниот идол на Артемида, Вера, Надеж и Љубов беа ставени на маки пред очите на нивната мајка и најпосле им беа отсечени главите. Софија ги зеде и ги закопа телата на своите три ќерки и откако помина три дена и ноќи во молитва над нивниот гроб, го предаде својот дух на Бога.

Празникот е посветен на жените и нивните деца, првенствено ќерки.

Се верува дека девојчињата треба да ги израдувате со некој подарок, колку и да е тој скромен. Ќе биде доволно да им посветите внимание и да им покажете колку ги сакате.

На првиот ден од изборната кампања за локалните избори, свое обраќање имаа од огранокот на Движењето “ЗНАМ за наша Македонија” од Прилеп, партија која за прв пат учествува на локални избори со свои советнички листи.

Во своето обраќање Емил Јанески, претседател на партискиот огранок во Прилеп, порача дека советничката листа на Движењето “ЗНАМ за наша Македонија” е составена од компетентни, искусни и реализирани во своите професии луѓе.

“Советничката листа на Движењето “ЗНАМ за наша Македонија” за Прилеп, е најкапацитетната листа, составена од луѓе искусни, реализирани во своите професии, кои што можат да дадат голем придонес во функционирањето на локалната самоуправа и Советот на општина Прилеп. Ви предлагам, со внимание да ја следите кампањата на Движењето ЗНАМ, да се запознаете со нашата програма и тогаш да одлучите на кого ќе му го дадете својот глас. Прилеп знае за кого ќе гласа”, порача Јанески.

Носител на советничката листа на Движењето “ЗНАМ” во Прилеп е Мирјана Стеваноска, искусен правник и адвокат со над дваесет години професионално искуство, позната по својот придонес во урбанизмот. Таа вети создавање на отворена и транспарентна општина Прилеп, каде секој ќе биде добредојден и каде ќе се решаваат проблемите на сите жители.

“Со голема чест и огромна одговорност, ја отворам оваа кампања како носител на советничката листа на Движењето “ЗНАМ за наша Македонија”. Мојот тим, заедно со мене, имаме само една и единствена цел, локалната самоуправа да ја направиме транспарентна, отчетна, отворена за сите вас. Ве повикувам да не’ придружите на овој пат и да го приклоните вашиот ГЛАС за Прилеп, за нас, ние знаеме на Прилеп што му треба, ние знаеме дека Прилеп е наш, ќе остане наш, и ние тука ќе продолжиме да живееме со нашите деца, нашите поколенија. Нема да дозволиме народот да ни бега, младите да ни бегаат, но ќе овозможиме да живееме во чисти и осветлени улици, безбедност за нашите деца и достоинствен живот за постарите генерации”, рече Стеваноска.

Жарко Бошкоски е роден и израснат во Прилеп, град кој го носи во своето срце и визија. Со долгогодишно менаџерско искуство во осигурителната индустрија, тој знае како да создава стабилност и развој. Во младоста го претставувал Прилеп во шах на највисоко ниво, а како член на Ротари активно работи на иницијативи за подобар град. Со љубов кон технологијата и бизнисот, Жарко е подготвен да донесе чесно, модерно и транспарентно управување со Прилеп – стои во описот на кандидатот за градоначалник за општина Прилеп кој на престојните локални избори е поддржан од коалицијата „Искуство за успех“ формирана од политичките партии ЛДП, ГРОМ, Интегра и ПЦЕР.

И сето тоа е точно, кој го познава Жарко знае дека ова е и премалку кога се зборува за него. Станува збор за човек со изграден интегритет и почит во градот под Марковите Кули.

Анализирајќи ги кандидатите за престојните локални избори во Прилеп, наидовме на неговата веб страна zharkozaprilep.mk/, што е вистинска реткост досега кандидат да има своја персонализирана веб страна, каде се презентирани програмските приоритети за развој на општината.

Интересно е тоа што Бошкоски во свои приоритети има предвидено “АИ Советник за транспарентен Прилеп” – или револуционерен проект кој ја користи вештачката интелигенција за обезбедување на потполна транспарентност во општинската управа.

Според описот, ваква алатка ќе значи обезбедување иднина во работењето со локалната самоуправа, односно секој граѓанин ќе има пристап до сите општински информации во реално време, што ќе обезбеди невидена транспарентност и одговорност.

АИ агентот е предвидено да се развива во три фази, секоја дизајнирана да ги елиминира различни видови корупција.

Прва фаза: АИ агент за општински процедури

-АИ агентот ќе биде обучен на сите процедури, прашања и податоци поврзани со процедурите за добивање на било каква одлука, уверение и сл. издадени од Општината Прилеп.
-Обучен на јавната документација
-Одговори на прашања за кои сега треба да се закажува средба

Пример: Какви објекти можам да градам на оваа парцела – АИ агентот ќе одговори врз основа на урбанистичкото планирање

Втора фаза: АИ агент за јавни набавки

Агентот ќе биде обучен на правилата и документацијата за јавни набавки и може целосно да подготви тендерска документација.

-Обучен на правилата за јавни набавки
-Подготовка на целосна тендерска документација
-Водење на секоја јавна набавка или вработување
-Извештај од АИ агентот за избор на директор на секоја институција за да се осигурам дека одлуката е донесена без корупција и во согласност со законот

Трета фаза: АИ агент за активни процедури

АИ агентот ќе може да одговори на граѓаните за документацијата за сите активни процедури – со ограничувања на приватноста на податоците.

-Одговори само на граѓанинот вклучен во процедурата
-Специјален токен за идентификација
-Пристап до информации за активни процедури
-Почитување на приватноста на податоците

Навистина е убаво да се види нешто вакво, нешто револуционерно, нешто што во светот веќе го има, а кај нас се’ уште разговараме само за асфалтирање на улици, поставување водоводи и канализациони мрежи. Не, не викаме дека тоа не треба да биде приоритет, особено ако го нема во 21 век, но светот оди напред преку технологијата, а токму тука ние заостануваме во чекорот.

Погледнете ја веб страната https://www.zharkozaprilep.mk/ и прочитајте за останатите планови и проекти на Жарко Бошкоски – кандидат за градоначалник на општина Прилеп од коалицијата „Искуство за успех“ формирана од политичките партии ЛДП, ГРОМ, Интегра и ПЦЕР.

Со голема чест и благодарност денес Ви се обраќам на почетокот на едно ново поглавје, почеток на изборната кампања за довербата која што повторно ја барам од вас. Изминативе години ми ја доверивте честа и одговорноста да ја водам нашата Битола, рече на денешната прес-конференција кандидатот за градоначалник на Општина Битола, Тони Коњановски.

Зад себе оставам мандат со четири години посветена работа, период, во кој сите заедно бевме сведоци дека Битола живееше во ритам на градење. Се градеше насекаде, од централното градско подрачје, до најоддалечените рурални места. Се работеше на јавните објекти, топлификацијата, инфраструктурата, културата, спортските објекти, се изградија патишта од над 50 километри. И се уште се гради, не само поради проектите кои што ги започнавме, туку затоа што веруваме дека нашиот град заслужува да има иднина, заслужува да биде поквалитетно место за живеење и заслужува да се движи напред. Поставивме цврсти темели врз кои ќе може да се надоградува една модерна, урбана, чиста и динамична Битола. Темели на инфраструктура, на енергетска ефикасност, на нови образовни стандарди, на култура и спорт, на заштита на животната средина. Сега, драги мои сограѓани, доаѓа ново време. Доаѓа период во кој трудот што го вложивме, ќе почне да носи видливи резултати. Следните четири години ќе донесат реализација на нови проекти и години на живеење со резултатите од сето тоа што го работевме. По изградбата на булеварскиот влез од страната на Прилеп, соодветен булеварски влез ќе има и од страната на Охрид. Јавниот превоз ќе биде едно од најзначајните задачи во овој мандат. Симболот на Битола – реката Драгор, ќе биде уредено по светски стандарди. Ќе продолжиме со комплетна модернизација на градската инфраструктура, со нови улици, велосипедски патеки и современи јавни простори. Ќе продолжиме да инвестираме во зелената иднина преку паметни решенија, со што Битола ќе чекори стабилно кон одржливиот урбан развој. Грижата за образовните и спортските капацитети останува наш приоритет, бидејќи во младите е нашата иднина. Создадовме помодерен, дигитализиран и ефикасен локален сервис, кој веќе е поблиску до граѓаните. Ваквиот пристап ќе го надградуваме и прилагодуваме на нивните потреби. Културата и спортот ги издигнавме на ниво на светски случувања. Битола е препознатлива на светската мапа на спортски настани во ракометот, фудбалот, кошарката, кои се одигруваат во современи услови. Ќе продолжиме уште повеќе да ја издигнуваме Битола во спортски рамки, преку одржување на голем број меѓународни спортски настани и надградба на спортските капацитети. Создадовме културни брендови, препознатливи не само во регионот, туку и надвор од државата. Тука е Зимската приказна, Битфест, гостување на врвни музички, театарски и уметнички имиња. Ќе го јакнеме веќе создадениот квалитет, надградувајќи го со уште поволеми културни вредности. Битола е град на историјата и традицијата, но и град на млади луѓе кои имаат право да сонуваат за сопствена иднина дома, во својот град. Затоа, заедно со мојот тим, ќе продолжиме да работиме на создавање на нови работни места, да привлекуваме инвестиции и да ги задржиме младите, нудејќи им квалитетен живот. Да ја јакнеме локалната економија со социјален напредок. Ќе го поддржиме локалниот економски развој и новите работни места, преку партнерство и соработка со бизнис секторот. Јас верувам во Битола. Верувам во нејзината иднина. Верувам во решителноста да создадеме уште поубав живот овде, дома. Нашата визија за Битола не е само ветување, визијата веќе се остварува. Секој проект, секоја улица, секоја нова можност е доказ дека заедно можеме многу, истакна Коњановски.

Ве поканувам повторно да тргнеме по истиот пат на развој, современост и достоинствен живот. Со вашата доверба, со нашето заедничко залагање, Битола ќе продолжи да расте и да биде град со кој сите ќе се гордееме. Заедно, со Вашата поддршка, да ја напишеме следната, најубава страница од приказната наречена Битола, додаде тој.

Видеолотарија Касинос Австрија како лидер во секторот игри на среќа, со особена гордост ја презема улогата-партнер на културните збиднувања во Националната опера и балет. Во петок 03.10.2025, со почеток од 20 часот, започнува новата сезона. На отварањето ќе биде изведено едно од најмоќните и најемотивни ремек-дела во историјата на класичната музика – „Реквием“ на Моцарт. Под диригентската палка на истакнатиот италијански диригент, Џанлука Мартиненги, македонската публика ќе има можност да присуствува на извонредна изведба на дело што ја отсликува генијалноста, длабочината и духовната сила на Моцарт.

Во солистичката постава ќе настапат: Биљана Јосифов (сопран), Николина Јаневска (мецосопран), Јане Дунимаглоски (тенор) и Владимир Саздовски (бас). Заедно со оркестарот и хорот на Националната опера и балет, тие ќе создадат незаборавно музичко доживување кое ќе го означи почетокот на новата сезона.

Поддршката на културните настани е клучен сегмент од корпоративната стратегија на Видеолотарија Касинос Австрија, насочена кон поттикнување на уметноста и збогатување на културниот живот во земјава. Со ова партнерство ја потврдуваме нашата заложба за поддршка на вредностите што културата ги носи во едно општество – убавината, инспирацијата, духовноста и заедништвото. Годи сме што ќе бидеме дел од настаните кои ја промовираат и унапредуваат културата.