Иако во Прилеп – а сè почесто и пошироко – ретко кој не слушнал за семејната винарија Сарика, сепак вреди уште еднаш да ја раскажеме нивната убава приказна.

Лозјето на Сарика се наоѓа токму на теренот по кој винаријата го носи своето име – Сарика, на 730 метри надморска височина. Уникатната клима, прилепското сонце и огромната посветеност на Гоце се тајната формула за нивните препознатливи вина.

Ова е винарија со историја – повеќе од 80 години традиција, три генерации Станоески кои со љубов и упорност ја градат денешната вредност на секое шише.

За квалитетот не мора многу да зборуваме – зборуваат наградите, а кога наградите се во прашање, “САРИКА” го освои саемот во Белград – Wine Vision by Open Balkan, каде прилепските вински брендови се закитија со седум медали, и тоа:

– ЗЛАТО за Вранец 2023
– Сребро за Вранец 2022 и Прокупец 2024
– Бронза за Прокупец 2023, Пловдина 2024, Сарика бело 2023 и Жупјанка 2024

Нам ни останува да им честитаме и да им посакаме уште поголеми успеси во иднина!

Само што започна работната недела, но тимот на најдобриот локал кога ноќниот живот во Прилеп е во прашање – Pub Club Terasa, веќе го креира темпото за следниот викенд.

Единствен локал каде живата свирка е императив, а оваа работна недела во Теrasa ќе уживаме најпрво на аfter work забава во четврток (27.11.), каде Боби и Никола ќе ја кренaт атмосферата уште пред да почне вечерта.

И секако тоа е само почеток…следуваат две викенд свирки што ветуваат врвна енергија и незаборавни моменти.

Во петок, 28.11. во Тераса ќе ве пречека одличниот состав од Битола – ARTIUM BAND, дечките кои со своите настапи веќе изградија име во Прилеп и е вистинско уживање да се помине вечерта со нивната музика.

View this post on Instagram

Саботата е резервирана за нашите прилепчани oд МЕТROPOLIS BAND, дуото кое создава громогласна атмосфера насекаде низ Македонија.

Не чекај последен момент — јави се на 070 304 967 и си обезбедуваш супер место со твоето друштво навреме.

Pub Club Terasa ве очекува со препознатливиот топол амбиент и огромен избор на пијалоци, мезлаци и закуски како и секогаш.

Нова радосна вест од Клиника за детски болести, уште еден мал пациент успешно го заврши лекувањето и го чукна среќното ѕвонче.

-Победничкото ѕвонче повторно силно звонеше за да слушнат сите дека нашиот јунак Медиан храбро ја помина и ја освои тешката битка. На Медиан му посакуваме многу здравје и среќно и безгрижно детство – напишаа од Клиниката на социјалните мрежи.

Инаку, Медиан е второ момче во изминатата недела кое на огромна радост на сите си замина излекуван дома со родителите. Пред 4 дена тоа беше малиот Дамјан.

Денеска во спортската сала при СОУ ”Ѓорче Петров” во Прилеп завршија општинските натпревари во ОДБОЈКА ЗА ЖЕНСКИ ОД ОСНОВНИТЕ
училишта.

Учествуваа:

ООУ ГОЦЕ ДЕЛЧЕВ ПРИЛЕП
ООУ КИРЕ ГАВРИЛОСКИ ПРИЛЕП
ООУ КЛИМЕНТ ОХРИДСКИ ПРИЛЕП
ООУ БЛАЖЕ КОНЕСКИ ПРИЛЕП
ООУ КОЧО РАЦИН ПРИЛЕП
ООУ СТРАШО ПИНЏУР М.КОЊАРИ
ООУ ЃОРЧЕ ПЕТРОВ РОПОТОВО
ООУ РАМПО ЛЕВКАТА ПРИЛЕП

Во силната конкуреција победник и воедно претставник на зонски натпревари е екипата на ООУ КОЧО РАЦИН ПРИЛЕП. Честитки за девојките и успех во понатамошните натпревари.

-СВР Битола поднесе кривична пријава против М.С.(53) од Битола поради постоење основи на сомнение за сторенo кривичнo делo „несовесно работење во службата“. Пријавената, во својство на директор на Национална установа „Завод и музеј“ Битола, спротивно на одредбите од Законот за вработени во јавен сектор и Законот за работни односи, несовесно постапила во вршењето на своите овластувања и должности на тој начин што извршила промена на Актот за систематизација на работните места, со што го укинала нејзиното работно место виш кустос и за себе отворила ново работно место кустос советник, кое што е едно ниво повисоко од претходното – информираат од МВР.

Карате клубот „Бонсаи“ од Прилеп забележа исклучителен меѓународен успех на големиот турнир „Bar Open 2025“, кој се одржа во Бар, Црна Гора, на 22 и 23 ноември. На настанот учествуваа стотици каратисти од повеќе држави, а прилепскиот клуб настапи со седум натпреварувачи во дисциплините кати и борби.

Нашите млади спортисти се враќаат дома со дури 18 медали и два пехари – резултат што уште еднаш ја потврдува посветената работа, квалитетната подготовка и континуираниот напредок на клубот.

Честитки до сите натпреварувачи за извонредните остварувања, како и до тренерскиот тим за нивната стручност, труд и поддршка. КК „Бонсаи“ уште еднаш го зацврсти своето место меѓу водечките карате клубови во Прилеп и Македонија.

Полицијата во Кичево му поднесе кривична пријава на поранешниот градоначалник на Општина Кичево, Фатмир Дехари поради „Несовесно работење во службата“, по член 353 од Кривичниот законик.

Според пријавата, Дехари во својство на градоначалник на Општина Кичево, несовесно постапувал при извршување на своите законски овластувања дадени со Законот за локалната самоуправа и спротивно на Законот за пожарникарство.

-Пријавениот, од 2016 година, секоја година, со одредени лица склучувал договори за вработување во Територијалната противпожарна единица Кичево и по истекот на една година од нивното вработување, не извршил должен надзор, пропуштил да им го прекине работниот договор и дозволил, истите да не се стекнат со соодветен сертификат за квалификација како пожарникари, издаден од надлежен Државен орган, информира портпаролот на СВР Охрид, Стефан Димоски.

На 28.11.2025/ петок/ од 19.00 ч. во Ликовната галерија од ЦК „Марко Цепенков“ ќе биде отворена изложбата „ Линиска Стратиграфија“ од уметникот Давид Атанасоски. Изложбата е поддржана од Министерството за култура и туризам.

За изложбата:

Во современата графичка пракса, линијата не се појавува како непосредна трага, туку како резултат на структурен пресек на волуменот. Скулптурниот објект се трансформира во генератор на отпечатокот, создавајќи визуелен запис што ја артикулира меморијата на материјалот и го претвора тридимензионалниот волумен во двомерна, но концептуално проширена, визуелна структура. Композициите се сведени на суштината: трага и празнина, маса и одсуство, површина и сенка. Присуството на материјалот се артикулира низ отпечатокот, кој ја пренесува динамиката и поетиката на формата, отворајќи простор за читање на интензитетот на материјалната интеракција. Линијата се јавува како гест, документ и концептуален субјект, поврзувајќи го феноменалното и менталното, физичкото и когнитивното искуство на гледачот.

Процесот на отпечатување ја трансформира скулптурата во инструмент на цртање. Рабовите, вдлабнатините и издигнувањата стануваат генератори на ритам и ред, создавајќи мрежи од монохромни, напрегнати линии. Листот ја впива нивната гестуалност и ја зачувува материјалната вибрација на објектот, како визуелна хроника на уникатно материјално случување. Монохромијата ја ослободува композицијата од описност, насочувајќи го вниманието кон чисто гестуално и концептуално читање. Во оваа редукција се открива суштината на формата: нејзината кревкост, строгост и тивка драматичност, кои го рефлектираат моментот на непосреден контакт помеѓу материјал и отпечаток.Отпечатокот станува момент на присуство, визуелен запис на трансформацијата на волуменот во двомерна, но концептуално експанзивна, визуелна форма – вели Давид Атанасоски.

Биографија за уметникот:

Давид Атанасоски

роден во Прилеп 1995 година.

Во 2018 година завршува Факултет за ликовни уметности во Скопје, отсек вајарство со конзервација и реставрација. Член е на меѓународната организација за уметност и култура Narrative Movements.

САМОСТОЈНИ ИЗЛОЖБИ:

2015 – Скопје, Проект за урбана скулптура во простор, спонзорирана од    Цементарница УСЈЕ.

2019 – Прилеп, Пејзажни знаци, Ликовен салон Марко Цепенков

2019 – Прилеп, Геолошки пресек , Нов културен бран

2020   -Скопје, Сеќавање за Сион, Галерија МКЦ

2022   – Прилеп, Геолошки пресек 2, Ликовен салон Марко Цепенков

2022  – Скопје, Геолошки пресек 2, Културно Ингормативен Центар

2022 –  Нови Сад, Пејзажни симболи, Културен центар – Мали ликовни салон

2023 – Прилеп, Рециклирани пејзажни објекти, Прилепско езеро

2025 – Истанбул,Рециклирани пејзажни симболи, Културно информативен центар

ГРУПНИ ИЗЛОЖБИ :   

2016   – Прилеп, Годишна изложба на ДЛУП, Галерија при домот на културата

2017    – Скопје, SIAB VIII Студентско интернационално арт биенале,              Галерија ФЛУ

– Прилеп, Art Without borders Macedonian encounter, Галерија Борко   Лазески

2018   – Скопје, Тема:НЕ, НУ Музеј на Македонија.

– Прилеп, Интернационален скулпторски симпозиум “Мермер„

– Прилеп, Годишна изложба на ДЛУП, Галерија при домот на културата

-Прилеп, Нови медиуми, Галерија Аче

2019    –New York, Personal ldentity Matter, Gallery MC

–Куманово, Биенална изложба, Скулптури на новото време, Дом на културата

– South Korea, Geumgang Nature Art Biennale, Cube 12x12x12+natur

– Скопје, Not your toy, Галерија КО – РА

2020   -Скопје, Остен биенале на цртеж, Национална Галерија на Македонија,      Чифте амам

2021   -Скопје, Уметноста на досадата, Резиденција на ЕУ во Македонија

-Струмица, „Метаморфоза“ Несовршен простор 4, Europe house

-South Korea, Geumgang Nature Art Biennale, Cube 12x12x12+natur

2022  – Jeonju, Green Renaissance Project – Special Exibition

2022 – Gongju-si Korea,  Natural cube exhibition, YATOO

Во месноста “Областа” во Битола, на улица „Нико Фундали“, изведени се три нови игралишта на вкупна површина од 629,27 м².

-Комплексот содржи детско игралиште, мало кошаркарско игралиште и мало фудбалско игралиште. На детското игралиште е поставена соодветна урбана опрема и реквизити, а подлогата е изработена од дробеник (шљунак). Кошаркарското и фудбалското игралиште се опремени со модуларни подлоги и соодветна урбана опрема. Вкупната вредност на договорот за реализација на проектот изнесува 2.666.219 денари – информираат од општина Битола.

Прилепскиот Основен суд го прифати предлогот на Основното јавно обвинителство и им го продолжи притворот до 30 дена на шесте лица во случајот со злоупотреби во прилепската болница – потврдува претседателката на основниот суд во Прилеп, Јасмина Шишковска.

-Притворот е продолжен на шестте лица.Тоа го одлучи кривичниот совет при Судот, но постои можност за жалба. Поднесени се жалби до Апелацискиот суд во Битола за продолжувањето на притворот – вели Шишковска.

Според информациите од Јавното обвинителство на Македонија, прилепското основно обвинителство ја продолжува истрагата против 32 физички и правни лица за сомнежи со јавни набавки во болницата со која институцијата е оштетена за околу 700.000 евра.

Обвинителството донесе наредба за спроведување истрага против вкупно 32 лица – 16 физички, седум правни, а девет други осомничени се гонат по скратена постапка.

Тие се осомничени за кривичните дела – Злоупотреба на постапката за јавен повик, доделување договор за јавна набавка или јавно-приватно партнерство како и проневера во службата. Со пријавата се опфатени и дејствија на несовесно работење, злоупотреба на службената положба и овластување, фалсификување или уништување деловни книги и други кривични дела за дел од осомничените, кои обвинителството исто така ги испитува – соопштува прилепското обвинителство.