Веќе петти ден пожарот во прилепско Мариово пустоши. Над 200 пожарникари, волонтери, припадници на армијата и полицијата, деноноќно ги чуваат светилиштата и населените места од огнот. Синоќа ситуацијата беше најдраматична кај селата Дуње и Бонче, како и кај манастирите Св. Димитрија кај Селце и Св. Никола кај Прилепец.

Помеѓу луѓето кои се борат со огнената стихија се и пожарникарите од доброволното противпожарно друштво “Архангел” oд Битола. Тие синоќа го чувале селото Бонче и објавија видео што ќе ви изнуди силни емоции.

Пожарникарите со молитва побараа од Бог да им помогне во борбата со огнените јазици…

Од полноќ се намалува цената на Еуросупер БС-95 за два денара, а цените на Еуросупер БС-98, дизелот, Екстра лесното масло за домаќинство и мазутот остануваат исти.

Согласно новата одлука на Регулаторната комисија за енергетика, Еуросупер БС – 95 ќе се продава по цена од 74,50 денари за литар, а Еуросупер БС-98 по цена од 78,50, дизелот 69,50 денари за литар, а Екстра лесно масло за домаќинство 68,50 денари за литар. Цената на Мазутот останува 44,780 денари за килограм.

Македонскиот амбасадор во Шведска, Џенк Сејфула како и советникот во македонската амбасада Стојанче Китаноски, беа домаќини на македонската
делегација која деновиве е во работна посета на Шведска, во чиј состав се и градоначалниците на Прилеп и Битола, Борче Јовчески и Тони Коњановски.

На средбата во македонската амбасада во Стокхолм, тие разговараа за придобивките од проектот „Одржливо управување со отпадот на локално
ниво” и конкретните активности, кои ќе бидат преземени кај нас, како резултат од реализацијата на проектот. Заеднички договорија соработка и на идни проекти, за кои што амбасадата им ја понуди целосната поддршка на градоначалниците учесници во делегацијата.

Општина Битола е една од шесте општини од Југозападниот и Пелагонискиот регион, кои работат на одржливо управување со отпадот, преку проектот „Одржливо управување со отпадот на локално ниво”, финансиран од СИДА (Шведската агенција за меѓународна развојна соработка), а имплементиран од Шведската асоцијација на локални власти и региони (САЛАР) и нејзината подружница САЛАР Интернационал.

Во средата вечерта во храмот Св. Петка, се одржа прекрасен концерт на „Прилепски млади виртуози“, на кој младите музички таленти од нашиот град блеснаа во своето најдобро издание. Храмот беше исполнет до последното место, а публиката, исполнета со радост и воодушевување, не штедеше на аплаузите.

Изведбите на младите виртуози беа вистинско уживање за сите присутни. Со својата техничка вештина и емоционална интерпретација, тие создадоа вечер полна со музичка магија, која остана во срцата на сите нас. Особено пријатно не изненадија со нивната зрелост и посветеност, што ги прави гордост на нашиот град и на нашата земја. Исполнувајќи ги нашите срца со радост тие направија музиката да биде мост кон возвишеното. Па така, класичната музика вчеравечер беше нашата молитва и пофалба кон Бога, а истовремено и израз на нашата грижа за иднината на нашите деца.

КL PRODUKCIJA ги сними сите настапи на нашите музички таленти, кои можете да ги проследите и да уживате во продолжение:

Јавен обвинител од Основното јавно обвинителство Скопје до судијата за деца во Основниот кривичен суд Скопје поднесе барање за поведување подготвителна постапка спрема дете во судир со законот кое презело дејствија кои со закон се предвидени како кривично дело – Предизвикување општа опасност по член 288 став 1 од Кривичниот законик.

-На 3 септември во попладневните часови, детето на возраст од 14 години, заедно со уште две деца во ризик кои не наполниле 14 години и од тие причини не се кривично одговорни, палеле петарди и жижици на земјена патека во месноста Расадник, Кисела Вода. Како последица на тоа, бил инициран пожар кој брзо се проширил на околната сува трева поради ветерот и зафатил површина од околу 3 хектари – дрвја, сандаци со пчели и неколку бандери за пренос на електрична енергија, информираат од Обвинителството.

Со пожарот била предизвикана значителна опасност за животот и телото на луѓето и за имотот од големи размери.

СВР Скопје до ОЈО Скопје денеска поднесе кривична пријава против 14-годишен малолетник за сторено кривично дело „предизвикување општа опасност”, предвидено и казниво по член 288 од КЗ.

Школската година започна и во сите училишта во населените места во Прилеп, а наставата веќе се одвива непречено. Во ООУ “Страшо Пинџур” во прилепско Мало Коњари, во вторникот како и во градските училишта, се одржа свечен прием на новите првачиња, а успех на дечињата им посакаа директорот на училиштето и заменик градоначалникот на општина Прилеп.

Убав гест направи нашинецот Саше Ачкоски, кој живее и работи во Германија, кој со неговото семејство обезбеди ваучери во вредност од по 1.000 денари за училишен прибор, за секое прваче.

Училиштето за овој хуман гест на Ачкоски им се заблагодари со доделување Благодарница. Нека ова биде поттик за сите други наши гастрбајтери и стопанственици.

Театарот „Војдан Чернодрински“ со претствата „Хамлет“ од Шекспир, во режија на Бранко Брезовец гостува во Загреб. На 10 септември 2024 во театарот Гавела ќе изведе две претстави. Гостувањето е во рамките на манифестацијата Еуријал 2024, која се одржува во два дела. Во есенскиот дел, отворањето на Еуријал 2024 е со претставата на нашиот театар, која отвора радикално, ново читање на Шекспировото ремек дело.

„Хамлет“ е работена според трагедијата на Вилијам Шекспир, со користење на драмите „Во малиот дворец“ на Станислав Игнациј Виткиевич и „Чест“ на Васил Иљоски. Режисер е Бранко Брезовец, за костимите е задолжена Сузана Брезовец. Во претставата играат Зоран Иваноски, Димитар Ѓорѓиевски, Андон Јованоски, Даниела Иваноска, Марија Спиркоска Илијеска, Игор Трпчески, Илија Волчески, Александар Тодески, Михајло Миленкоски, Виолета Чакарова, Наташа Ачански и Ана Митоска.

Публиката ќе има можност во ова читање на Хамлет, да го проследи нагласениот конфликтот во и меѓу ликовите, стремежот за моќ и желбата за одмазда. И овој Хамлет е заплеткан во измами, манипулации и лудило. Меѓутоа, мотивите од Чест од В. Иљоски и Во малиот дворец од С. Виткиевич внесуваат уште позасилена атмосфера на сновидение и сосема неочекуван развој на комплексни односи и настани – се вели во образложението на претставата.

Театарот „Војдан Чернодрински неколку пати досега има гостувано во Загреб ( со претставите „Антица “ и „Глембаеви, уште една легенда“) во рамките на фестивалот „Еуроказ“.

-На 05.09.2024 во 16.30 часот во Полициската станица Прилеп било пријавено дека на крстосницата од ул.„11-ти Октомври“, ул.„Генерал Васко Карангелески“ и ул.„Крушевска“ во Прилеп се случила сообраќајна несреќа помеѓу патничко возило „фиат“ со прилепски регистарски ознаки, управувано од З.Р.(43) и мопед без регистарски ознаки, управуван од М.Ѓ.(38), двајцата од Прилеп.

Во несреќата со тешки телесни повреди се здобила М.Ѓ. ,констатирани во Градската општа болница Прилеп.

Извршен бил увид од увидна екипа од ОВР Прилеп – информираат од МВР.

Драматична и тешка беше борбата со огнените јазици во текот на целиот ден вчера во прилепскиот дел на Мариово. Огнот се закануваше да го проголта селото Крушевица, се водеше макотрпна борба и над манастирот Св. Никола кај село Прилепец, а доцна синоќа огнените јазици се проширија и во близина на манастирот Св. Димитрија кај село Селце.

Ништо поразлично не беше ниту кај село Бонче.

-Ситуацијата во одредени моменти беше навистина алармантна, што не натера да објавиме апел до сите граѓани кои се чувствуваат подготвени да помогнат во активното локализирање на пожарот на најкритичните точки. Упатуваме огромна благодарност до сите екипи и доброволци кои со своите напори го спречија огнот да се доближи до објектите во населените места. Посебна благодарност и до екипата на Црвениот крст, која ја посети областа, доставувајќи храна и вода до жителите, особено во населените места кои беа без електрична енергија поради огнената стихија – стои во последното известување од општина Прилеп и општинскиот кризен штаб.

Фотографиите од терен покажуваат со колку голема огнена стихија се справуваат пожарникарите, доброволците, припадниците на војската и полицијата. Изморени и речиси без здив, но борбата ја продолжуваат. Едно големо браво!

Претставници на Занаетчиската комора на Република Македонија, вчера одржаа состанок со Заменик градоначалникот на општина Прилеп, Диме Бозоски, а главна тема на разговор било субвенционирањето на старите занаети.

-Разговаравме за можностите за поддршка на занаетчиите и за важноста на зачувување на традиционалните вештини кои се дел од нашето културно наследство. Со субвенциите, веруваме дека ќе успееме да ги зајакнеме локалните занаетчии, да им овозможиме поголема економска стабилност, и да го поттикнеме нивниот придонес кон одржливиот развој на заедницата. Оваа иницијатива ќе игра клучна улога во зачувување на занаетчиството како важен дел од економијата и културата на нашиот град. Голема благодарност до заменикот градоначалник за поддршката и визијата за развој на старите занаети! Заеднички, се стремиме кон подобра иднина за сите – се вели во објавата од Занаетчиската комора.