Со глабока тага и жалење ја информираме јавноста дека денеска, 12.11.2025 г. почина поетесата Славица Свидерска (1984, Битола), соопштија утрово од Друштвото на писателите.

Доктор по филолошки науки. Лекторка по македонски јазик на Универзитетот „Св. Кирил и Методиј“ во Скопје, на Факултетот за странски јазици во Тирана.

Зад себе остави богато поетско, есеистичко и научно творештво од областа на теорија на книжевноста. Член е на Друштвото на писателите на Македонија. Преведувана е на десетина јазици и добитничка е на повеќе поетски награди во земјава и во странство.

Авторка е на поетските книги „Бесконечност“ (2001), „Писма“(2012), „Политики на љубовта“ (2015), „Тела“(2016) и „Политики на стравот“ (2021), Golgotha Feminarum (2023), Мистичен си свету (2025), научните монографии „Книжевноста и дискурсите на моќта“ (2013), „Книжевноста и политичкото насилство“ (2018), како и книжевно-филозофските есеи „За смислата и за апсурдот“ (2017).

Со длабока жалост ја примивме веста дека почина младата роднокрајна писателка Славица Свидерска. Нејзиното заминување претставува голема загуба за нашата книжевна заедница и за сите кои ја познаваа нејзината искрена љубов кон пишаниот македонски збор. Славица беше авторка која преку своите дела умешно ги пренесуваше чувствата, спомените и боите на македонската стварност. Таа беше наш роднокраен автор и соработник со нашата библиотека во многу активности. Нејзината младост беше исполнета со креативност, соништа и желба да создава и да инспирира. Нека нејзините зборови продолжат да живеат и сведочат за талентот, љубовта и духот што ги остави зад себе, сопшти НУ Универзитетска библиотека „Св.Климент Охридски“ – Битола.

Славица Гаџова Свидерска родена во 1984 во Битола — македонски поет, преведувач, есеист, теоретичар на книжевноста, доктор на филолошки науки.

Славица Гаџова Свидерска живее и работи во Битола. Докторирала на Филолошкиот факултет „Блаже Конеки“ при Универзитетот „Св. Кирил и Методиј“ во Скопје. Се занимава со проучување на односите меѓу книжевноста, дискурсите на моќта и политичкото насилство.

Нејзината поезија е преведувана на англиски, кинески, српски, хрватски, босански, чешки, словачки, турски и албански јазик.

Погребот ќе се одржи утре, 13.11. од 11 до 12 часот на Светонеделските гробишта во Битола.

Браќата од Битола, Ален Рустемовски и Адријан Рустемовски, достојно ја претставија Македонија на Европското првенство за млади сениори до 23 години во бокс, кое од 1-10 ноември се одржа во Ереван, Ерменија и дома се вратија со сребрен и бронзен медал.

Ален настапи во категорија до 57кг и иако загуби во финалето од рускиот боксер Аветијан, достоинствено ги бранеше боите на Македонија и оствари одличен резултат.

Неговиот брат Адријан, боите на Македонија ги бранеше во категорија до 60кг и исто така доживеа пораз од руски боксер.

МОМЦИ ГЛАВАТА ГОРЕ КОН НОВИ ПРЕДИЗВИЦИ И ЦЕЛИ, ПРЕД ВАС Е СВЕТСКОТО ПРВЕНСТВО, А ТАМУ ЧЕКОР НАПРЕД И НАЗАД СО ЗЛАТО!

Важно соопштение од црквата Св. Петка во населбата Точила по повод престојниот празник посветен на Светите бесребреници Козма и Дамјан:

-Браќа и сестри во Христа, наши прилепчани, ве известуваме дека ЛЕПЧИЊАТА ЗА СЛАВА ЌЕ СЕ ПЕАТ ИСКЛУЧИВО ВО ЦРКОВНИТЕ ХРАМОВИ.
За претстојната слава, на св. бесребреници и чудотворци Козма и Дамјан (Св. Врачи), во храмот св. Петка во нас. Точила лепчиња ќе се креваат во ЧЕТВРТОК во периодот од 9:00 – 11:00 часот и петокот по завршувањето на богослужбата, а во храмот Св. Кирил и Методиј (Параклис) лепчиња ќе се креваат во четврток од 7:30 – до 11:00 и попладне од 16:00 – 17:00 часот како и НА САМИОТ ПРАЗНИК (наредниот ден) во петок (14.11.2025) веднаш по завршувањето на Божествената Литургија. Честита слава на сите кои го чествуваат Св. Козма и Дамјан како закрилници на нивните домови т. е. домашна слава! Нека ни е за многу години и на помош!

СВР Битола во координација со Одделот за криминалистичка полиција поднесе кривична пријава против С.Г.(54) од Прилеп и С.И.(31) од Крушево поради постоење основи на сомнение за сторено кривично дело „измама“.

На 25.08.2025 во Битола, пријавените довеле во заблуда 88-годишна жена од Битола така што телефонски и со лажно претставување ја известиле дека нејзиниот син предизвикал сообраќајна несреќа во која прегазил осумгодишно дете, а нејзиниот син и неговата сопруга биле повредени, а доколку сака да го спаси синот од кривичен прогон, требала да им даде 72.500 денари.

Откако ги зеле парите, пријавените заминале, а оштетената подоцна сфатила дека е измамена.

Веднаш по добиената пријава, преземени се соодветни мерки и активности и измамниците се пронајдени и лишени од слобода, по што е поднесена кривична пријава.

Скопскиот аеродром се поднови со ново современо возило за противпожарна заштита и спасување, кое повеќе изгледа на вселенско летало, отколку на обичен камион за интервенција при пожар.

-Ова најсовремено возило комбинира моќ, прецизност и брзина, со напредна технологија за противпожарна заштита, капацитети и системи, како и способност за брз одговор – затоа што во итна ситуација, секоја секунда е важна. Секако, во центарот на оваа надополнување стои нашиот посветен тим за противпожарна заштита и спасување на аеродромот, секогаш подготвен да одговори со храброст и професионализам.
Заедно, градиме побезбеден, поотпорен аеродром за сите – напишаа од Скопскиот аеродром на социјалните мрежи.

На маргините на Генералното собрание на Светската туристичка организација на Обединетите Нации (UN Tourism), што се одржуваше во Ријад, Саудиска Арабија, директорот за иновации, едукација и инвестиции, Антонио Лопез де Авила му го додели сертификатот за квалитет за Факултетот за туризам на Универзитет Скопје, на ректорот Аце Миленковски.

Со овој TedQual сертификат, се потврдува квалитетот на наставата на Факултетот за туризам во прв и втор циклус од страна на UN Tourism.

До ова големо признание доаѓа откако во февруари годинава, претставник на UN Tourism, проф. д-р Антонио Карлес од Валенсија и меѓународен ревизор за квалитет во високото образование, неколку дена беше во Скопје за да изврши евалуација на квалитетот на Факултетот за туризам на Универзитет Скопје. По извршената евалуација, професор Карлес изјави дека Универзитет Скопје го има меѓу 100-те најдобри во светот Факултети за туризам.

Всушност, Факултетот за туризам на Универзитет Скопје и досега имаше TedQual сертификат, кој сега е обновен и за наредните три години.

Новиот состав на Советот на општина Прилеп денеска ја одржа втората седница, каде советниците со мнозинство гласови го усвоија предлог-решението за верификација на мандат на член на Советот на Општина Прилеп, Катерина Пузеска.

Потоа, беа усвоени и предлог-решенијата за формирање на комисиите потребни за функционирањето на Советот на Општина Прилеп.

Советниците со мнозинство гласови ги усвоија предлог-решенијата за формирање на следниве комисии:

– Комисија за одбележување значајни настани, личности и празници
– Комисија за финансирање, буџет и локален економски развој
– Комисија за урбанизам, комунални дејности и заштита на животната средина
– Комисија за општествени дејности и правата на децата
– Комисија за статут и прописи
– Комисија за елементарни непогоди
– Комисија за месна самоуправа
– Комисија за родова еднаквост
– Комисија за изработка на Програма за работа на Советот на Општина Прилеп за мандатниот период 2025–2029 година

Исто така, Советот ја задолжи Комисијата за статут и прописи да изготви пречистен текст на Статутот на Општина Прилеп и именува членови на
Советот кои ќе учествуваат при склучување на бракови во УВМК-ПК Прилеп.

Граѓаните кои редовно скенирале фискални сметки во месеците јули, август и септември, овој месец може да ја очекуваат исплатата на повратот на ДДВ.
Законскиот рок за исплата е 60 дена по завршување на кварталот.

Сите кои ги исполниле условите и имаат точно внесена и активна трансакциска сметка во апликацијата „МојДДВ“, ќе ги добијат средствата автоматски по обработката на податоците.

Од Управата за јавни приходи (УЈП) потсетуваат дека најчеста причина за доцнење на исплатите во минатите квартали биле погрешно внесени или неажурирани трансакциски сметки во системот.

За навремена исплата, УЈП препорачува граѓаните да:

• проверат дали сите скенирани сметки се евидентирани во апликацијата „МојДДВ“;

• осигураат дека трансакциската сметка е правилно внесена и активна;

• ги следат официјалните известувања од УЈП и апликацијата за актуелни информации.

Со редовно ажурирани податоци, исплатата на повратот ќе биде навремена и без застои.

Граѓаните можат да остварат поврат до 2.100 денари по тромесечие, односно до 8.400 денари годишно.

На Српските воени гробишта во Битола, градот со длабоки историски корени и неизбришливи спомени од минатото, на достоинствен и свечен начин беше одбележан Денот на примирјето во Првата светска војна.

По повод 107 години од пробивањето на Солунскиот фронт, беше оддадена почит на паднатите борци со положување на свежо цвеќе. На церемонијата присуствуваа градоначалникот на Битола, Тони Коњановски, високи политички претставници од Србија, претставници на амбасадата на Србија во нашата држава, пратеници од Собранието на Република Македонија, високи воени претставници од двете држави, како и претставници на Заедницата на Срби во Македонија.

Во своето обраќање, градоначалникот Коњановски истакна:

„Битола како град страдалник, денес стои гордо во знак на почит кон сите што го дале својот живот за слободата. Го негуваме споменот на тие бурни времиња, но и ја градиме иднината врз темелите на мирот, пријателството и меѓусебното разбирање“, посочи Коњановски.

Овој ден, кој се слави во земјите победнички во Првата светска војна, го симболизира крајот на едно од најразорните воени поглавја во историјата на човештвото. Примирјето беше потпишано во железнички вагон во близина на Компијењ, Франција и стапи на сила на 11 ноември 1918 година, точно во 11 часот, настан што засекогаш остана врежан како симбол на мир и надеж.

На 14 ноември 2025г/петок/од 19.00 ч. во Ликовната галерија од ЦК „Марко Цепенков“ ќе биде отворена ретроспективна изложба на слики “ 55 години ликовно творештво на Боро Арсовски – Бабата“. Изложбата е поддржана од Министерството за култура и туризам.

За изложбата и творештвото на уметникот:

При обидот за евалуација на авторскиот придонес кон македонската наива, како едно специфично движење на неакадемските ликовни уметници коешто ги зафати овие простори во текот на доцните 60-ти и раните 70-ти години, неизоставно е името на авторот Боро Арсовски – Бабата. Во таа смисла и одбележувањето на овој значаен јубилеј на Арсовски е настан којшто е значаен за македонската ликовна сцена од повеќе аспекти – авторски, историски, национални и идентитетски. Неговата инвентивност, повеќегодишниот авторски континуитет во земјата и пошироко (Србија, Хрватска и Словенија) како и специфичниот заокружен и јасно дефиниран сликарски израз којшто изобилува со богат визуелен вокабулар, го става во редот на најзначајните претставници на македонската наива.

Впрочем, неговата авторска големина ја потврдува и Ретроспективната изложба на слики „55 години ликовно творештво на Боро Арсовски – Бабата“ кадешто посетителите ќе можат да ја видат ликовно-продукциската траекторија на овој врвен автор во периодот од 1970-тата до денес. Притоа забележителни се неговите напори за доследно почитување на една сликарска парадигма која во себе содржи прецизен цртеж, фигуративно-колористички баланс, автентична македонска орнаментика, костимографија и архитектура, мирен рурален секојдневен амбиент осветлен од македонското сонце.

Композициската поставеност се движи во две насоки: едната преферира панорамска визура со многу фигуративни елементи рамномерно поставени на сликарското платно, додека вториот пристап е со ставање на една фигура во прв план – обично портрет со запазени морфолошки карактеристики или некоја архетипска фигура (овчар, кавалџија, домаќинка) – и околу нив најразлични фигуративни елементи коишто треба да му дадат насока на гледачот. Тука се гледа способноста на Арсовски за визуелна нарација, давање филмска динамика на содржината на сликата, а понекогаш присутно е и навлегување во сферата на надреалното.

Неговите слики говорат за едно време коешто не постои денес, поточно, зборуваат за периодот кога луѓето беа многу поблиску до природата и нејзината убавина. Единствената слика којашто се занимава со современи теми е сликата „Бегство“ изработена во 2025 година и претставува извонредно авторско остварување во коешто се сублимирани сите творечки квалитети на овој автор. Токму оваа слика говори за постоечките капацитети на Арсовски којшто е во повозрасни години но сè уште може да направи ликовна проекција во негов стил, од која суптилно зрачи пораката: време е за бегство од бетонската џунгла!

Како автор на многу слики коишто се дел од музејски и колекционерски збирки, но и на многу акварели и скулптури изработени на иста тематика – македонски автентичен амбиент со елементи на етнологија од овие простори препознаена во светот како македонски етнографски идентитет – за уметникот Боро Арсовски – Бабата можеме да кажеме дека, покрај тоа што е извонреден ликовен автор, можеме да го сметаме и за хроничар на едно изминато време коешто подразбираше симбиоза на човекот и природата.

Честитки за 55-годишниот јубилеј и благодарност за огромниот придонес во промовирање на македонското ликовно творештво во светски и регионални рамки! – Роберт Цветковски, историчар на уметноста

За уметникот:

Боро Арсовски – Бабата е роден 1952 година во с. Страцин, Република Македонија. Основно и средно образование завршил во Куманово. Со сликарство се занимава од 1969 година како сликар наивец и воедно изработува скулптури во камен и керамика – теракота. Првпат излага во 1971 година со ДЛУК од кога е и член на друштвото со кое настапува на многубројни годишни изложби ширум Југославија. Член е на УСУ-Галерија “Југославија” Белград. Од 1986 година членува во УСУ “Трета димензија” Белград. Учествувал на преку 30 меѓународни ликовни колонии на наивна уметност во : Риека, Загреб, Петриња, Врбовец, Нови Винодолски – Р. Хрватска, Сански Мост, Лукавац – Р. Босна и Херцеговина, Врање, Светозарево – Р. Србија, Требње – Р. Словенија. Има учествувано на преку 200 групни изложби и 5 самостојни. Неговите дела се лицитирани на неколку аукции во Белград и Скопје, за кои имало најголем интерес, најдолго се лицитирани и најскапо продадени. Неговите слики се наоѓаат во многу галерии, музеи и приватни колекции ширум светот. За творештвото на Арсовски се снимени 2 документарни филма. Едниот во продукција на Македонска Радио Телевизија, а вториот филм е снимен за меѓународениот филмски фестивал “Златни сунцокрет” во Р. Србија кој е награден со златна плакета.

Боро Арсовски – Бабата живее и работи во Куманово, како самостоен сликар – наивец и сопственик е на уметничка Галерија “Art Gallery Arsovski”.