Македонија се подготвува за промена на метеоролошката состојба поради спуштање на ладна воздушна маса. Според прогнозите, во следните денови нè очекува променливо облачно време со врнежи од дожд, кои ќе бидат пообилни во западните делови од земјата.

Со падот на дневните температури, на повисоките места се очекуваат врнежи од дожд и снег, додека на планините врнежите ќе бидат исклучиво од снег.

Во Скопје времето ќе биде значително посвежо со повремени врнежи од дожд. До среда ќе дува ветер од јужен правец, додека во четврток и петок се очекува умерен до засилен северен ветер.

На 15.03.2026 година во Скопје се одржаа Државните првенства во џудо за категории деца и кадети, во организација на Џудо Федерација на Македонија. Џудо клубот Сеишин Прилеп повторно прикажа одлични резултати, освојувајќи вкупно 21 медал:

🥇 7 златни
🥈 6 сребрени
🥉 8 бронзени

Поединечни резултати:

🥇 Тамара Илиоска – 1 место
🥇 Теодора Илиоска – 1 место
🥈 Дила Пупаловиќ – 2 место
🥈 Марко Ацески – 2 место
🥈 Марко Марковски – 2 место
🥉 Немања Џагадуроски – 3 место
🥉 Дино Кулевски – 3 место
🥇 Иван Јошески – 1 место
🥇 Марко Андрејевски – 1 место
🥇 Стефани Ристеска – 1 место
🥇 Бисера Цветкоска – 1 место
🥇 Фросина Димоска – 1 место
🥈 Софија Ѓорѓиоска – 2 место
🥈 Анамарија Конеска – 2 место
🥈 Петар Ангелески – 2 место
🥉 Матеј Јованоски – 3 место
🥉 Дамјан Митрески – 3 место
🥉 Лејла Јеина – 3 место
🥉 Андреа Митреска – 3 место
🥉 Анастасија Мицкоска – 3 место
🥉 Ангел Шукуроски – 3 место

Одлични борби прикажаа и останатите членови на клубот кои беа дел од екипата, но овој пат не успеаја да изборат место на пиедесталот.

Стручниот тим на ЏК Сеишин Прилеп е задоволен од настапот и прикажаната борбеност на своите натпреварувачи, кои уште еднаш го потврдија квалитетот на клубот.

Ѓубре на сите страни во и околу комплексот “Маркови Kули”, еве каква слика ги пречека утрово прилепчани после викенд панаѓурот.

Moжеше да се купи најразлична роба по ниски цени, а резултатот е овој:

Дуќанџиите и чаршијата ги сметаат ваквите настани за нелојална конкуренција, а има и зошто, плаќаат високи кирии, плаќаат даноци, се борат секој ден, вложуваат во маркетинг, промоција…. на крајот доаѓаат продавачи со 3 пати пониски цени и печалат на нивни грб.

Дали вие ги оправдувате ваквите панаѓури и дали треба да се одржуваат и во иднина?

Регулаторната комисија за енергетика денеска ќе одлучува за цената на нафтените деривати.

Воениот конфликт меѓу Иран и САД и Израел придонесе за скок на цената на нафтата на светските берзи. Поради тоа, минатата недела имаше значителен раст на цените на нафтените деривати во земјава.

Цената на бензините се зголеми за 5 денари, а на дизелот на 14,50 денари. Цената на Екстра лесното масло за домаќинство се зголеми за 12,50 ден/лит, додека на мазутот за 7,044 ден/кг.

Ова се актуелните цени на горивата:

Моторен бензин ЕУРОСУПЕР БС – 95 – 79,50 (денари/литар)
Моторен бензин ЕУРОСУПЕР БС – 98 – 81,50 (денари/литар)
Дизел гориво ЕУРОДИЗЕЛ БС (Д-Е V) – 85,50 (денари/литар)
Масло за горење Мазут М-1 НС – 82,50 (денари/литар)
Екстра лесно 1 (ЕЛ-1) – 42,586 (денари/килограм)

По одржаните состаноци минатата недела, од Владата информираа дека снабдувањето со гориво во Македонија е стабилно, а нафтените компании располагаат со залихи.

Сигурно сте го сретнале додека скролате видеа на социјални мрежи, и сигурно ви било преинтересно гледајќи со забрзано темпо како се средуваат паркови, пешачки патеки, зеленила… Епа не е баш така брзо, сака макотрпна работа, а во случајов и повеќе луѓе за да се уредни нешто што долго време било запоставено.

Популарниот ГРАДИНАР беше во Прилеп, поточно во детската градинка “Наша иднина” -“Гоце Делчев”, каде заедно со волонтери од градинката и родители го исчистија дворот, пешачките патеки, каналот…. простор кој долго време не личеше на тоа како треба да изгледа двор каде ги носиме нашите најмали.

Секоја чест за идејата, но и апел до одговорните во градинките, како и до комуналните служби, повеќе да не дозволиме, ниту еден двор на образовна институција да изгледа вака.

Инаку Андреј Рајатоски познат како Градинарот.мк, во јавноста веќе привлече големо внимание со својот ентузијазам за чување и негување на она што е заедничко за сите – уредена и чиста околина.

Младиот Скопјанец самоиницијативно и бесплатно чисти запуштени јавни површини и ги уредува паркчињата, а идејата се родила од комбинација на инспирација и незадоволство од состојбата во која се наоѓа Скопје.

Локациите кои ги избира за своите акции се претежно места каде што секојдневно поминува, но и фреквентни делови од градот каде што, според него, „навистина има потреба од акција за општо добро“.

СЛЕДЕТЕ го на социјалните мрежи и дадете поддршка за неговата работа!

Mладата екипа на прилепски Мега Баскет забележа голема победа на гостувањето во Охрид со 58-69. Дечките кои играат одлично, тренираат и се трудат за постигнат голем успех, се надежта на прилепската кошарка и момци кои треба наскоро да го предводат прилепскиот тим кон Супер лига.

За жал многу малку се зборува за нив, дома играат во училишна сала како и сениорскиот тим, спонзорствата се често недоволни, а за нивниот развој во идни репрезентативци треба далеку поголеми вложувања, како од бизнис секторот, така и од општината.

Ајде да направиме сите заедно повеќе за овие деца, публиката нека ја полне трибината во ООУ “Добре Јованоски” редовно, општината нека оддели повеќе за младите спортисти и нека се заангажира Прилеп конечно да си ги врати и да ги стави во функција големите спортски објекти, а бизнис секторот нека “брцне” во џебот. Затоа што овие деца заслужуваат многу повеќе, а Прилеп заслужува кошаркарски суперлигаш.

-На 13.03.2026 во 21.12 часот во СВР Битола било пријавено дека на крстосница составена од патот А3 се случила сообраќајна несреќа помеѓу патничко возило „шкода” со прилепски регистарски ознаки управувано од Ј.П.(33) од Битола и патничко возило „хјундаи” со битолски регистарски ознаки управувано од Д.П.(22) од с. Кукуречани општина Битола. Во несреќата возачот Д.П. се здобила со тешки телесни повреди констатирани од лекар од Клиничка болница Битола, додека возачот Ј.П. се здобил со телесни повреди. Увидот го извршила увидната екипа на СВР Битола – информираат од СВР Битола.

Еве, помина една година од таа трагична ноќ во која настрадаа бројни млади македонски чеда. Времето продолжи да тече, деновите станаа бестрајни месеци, а месеците исполнија веќе и цела година. Солзите што протекоа, течат без престан и станаа секојдневие за сите мајки и татковци, за многу роднини и пријатели, станаа бол за овој крај и за сиот наш народ. А солзите дури и да престанат, тагата не исчезнува, таа останува длабоко во срцата на најблиските, рече Неговото Блаженство, архиепископот Охридски и Македонски г. г. Стефан, откако денеска заврши светата архиерејска литургија и општиот парастос за упокоените во црквата „Св. великомаченик Георгиј“ во Кочани.

-И светата Црква сочувствува и ја разбира таквата тага. И овој пат се уверивме колку смртта е трагична, особено кога од овој свет ненадејнои трагично заминуваат млади луѓе. Па и пресвета Богородица како мајка ја исполнувале такви чувства и таква тага кога ги гледала настаните на Голгота, потсети во своето обраќање архиепископот Охридски и Македонски г. г. Стефан.

-Нашите мили во Господа, нашите прерано заминати деца, браќа, сестри, внуци , роднини, пријатели засекогаш ќе ни недостасуваат и тоа чувство е природно, но покрај нашата тага треба да се надеваме дека оние што починале во Христа ќе бидат вечно со него. А, додека дојде тој ден, Црквата заедно со најблиските на покојните молитвено ќе се сеќава на своите упокоени чеда, и во секоја молитвена прилика ќе си спомнува за нив. И затоа, денеска исполнети со неизмерна тага, стоејќи со силна вера, да се помолиме Господ да им дарува покој во место светло, во место мирно, во место за одмор, каде што нема ни болка, ни тага ни воздишка, туку живот бесконечен. Нека им е вечен споменот, порача Неговото Блаженство, архиепископот Охридски и Македонски г. г. Стефан, пред присутните членови на семејствата на починатите и повредените во трагичниот пожар од март лани и пред сите што ја следеа светата архиерејска литургија и општиот парастос за упокоените во црквата „Св. великомаченик Георгиј“ во Кочани, со што започна одбележувањето на годишнината од трагичниот пожар што го потресе Кочани.

Професионалната боксерска сцена во Србија ја започнува новата сезона со спектаклот „Balkan Boxing 7“, настан кој ќе се одржи на 28 март 2026 година во салата на Спортски центар Бор, со директен телевизиски пренос на Arena Fight.

Настанот е во организација на Balkan Boxing, главен партнер на Боксерски сојуз на Србија за професионален бокс, а интересот за овој настан е огромен бидејќи ќе го следи публика од целиот Балкан.

По тој повод неодамна во Белград се одржа заедничка прес-конференција на која се обратија директорот на Arena Channels Group, Небојша Жугиќ, претседателот на Боксерскиот сојуз на Србија, Ненад Боровчанин, како и боксерите кои ќе настапат на настанот – српскиот репрезентативец Јован Николиќ и младиот македонски боксер, прилепчанецот Матеј Чатлески.

Особено внимание привлекува настапот на Матеј Чатлески, кој ќе биде единствениот претставник од Македонија на овој голем боксерски спектакл. За овој млад спортист од Прилеп, настапот во Бор претставува огромна можност достојно да го претстави својот град и државата на меѓународна сцена.

Во пресрет на настанот, Матеј има потреба од поддршка од бизнис секторот, со цел што подобро да се подготви за овој значаен меч. Компаниите кои ќе одлучат да помогнат ќе имаат можност да го промовираат својот бренд преку лого на спортската опрема, шорцевите, дресот, како и на промотивните маички.

Со оглед на тоа што настанот ќе има директен телевизиски пренос и ќе биде следен од милионска публика низ Балканот и пошироко, ова претставува одлична можност за компаниите да ја промовираат својата работа и бренд, истовремено поддржувајќи млад и перспективен спортист.

Сите компании и поединци кои сакаат да бидат дел од оваа спортска приказна и да помогнат во промоцијата на еден млад прилепски боксер, можат директно да го контактираат Матеј Чатлески преку неговиот Instagram профил.

View this post on Instagram

Владечката партија ја започна селекцијата за избор на нови претседатели на општинските комитети низ целата држава, луѓе кои ќе треба да ја водат партијата на општинско ниво пред новите предизвици, и кои ќе треба во своите редови да ги вратат разочараните и пасивните членови, кои се чини ги има во поголем број, ако се земат бројките од минатогодишните локални избори и парламентарните избори пред речиси две години.

Маркукуле дознава дека постои голем интерес за прв човек на ОК ВМРО-ДПМНЕ Прилеп, а на денешниот прв круг интервјуа во Централниот комитет се појавиле над 20 луѓе од различни бранши.

Дел од имињата се следните:

1. Марио Драгоманоски
2. Рубин Крстески
3. Горан Стојаноски
4. Јованчо Шишкоски
5. Филип Петкоски
6. Кети Спиркоска
7. Живко Велкоски
8. Сотир Митрикески
9. Никола Кузески
10. Љупчо Манески
11. Даниел Василески
12. Ирена Стерјоска Локвенец
13. Робертино Илиоски

Интересно е тоа што помеѓу кандидатите се спомнува и името на актуелниот градоначалник Дејан Проданоски, но оваа информација засега не е потврдена.

Се чини дека владечката партија ќе биде пред голем предизвик да го избере вистинското лице за прв човек во градот под Марковите Кули, особено ако се земе во предвид дека на локалните избори партијата освои 16.500 гласови за градоначалник, а за Совет 14.800 гласови, додека во 2024 година за парламентарните избори таа бројка беше безмалку 22.000 гласови.