Новогодишно обраќање од градоначалникот на Битола, Тони Коњановски:

Има ли поубава радост, поубава приказна од новогодишните празници. Секој празник е приказна за себе, но новогодишните празнувања ја имаат посебната магија. А, таа празнична магија веќе ги исполнува и нашите срца и нашите домови и не зближува со нашите најблиски, со пријателите, колегите, соработниците….

Се наоѓаме пред еден таков период кога нова светлина го исполнува градот во претпразничните денови, светлина која ни го осветлува патот во новата 2026 година. Заедно, силно и храбро да чекориме во годината пред нас.

Старата година ја испраќаме со сите добри и помалку добри работи, но работевме со искрена љубов , голема посветеност и пожртвуваност градејќи го заедно подоброто утре.

Годината која ќе биде зад нас, беше година на предизвици во која вложивме голем труд Битола да ја направиме поубаво место за живеење и веруваме дека заедно со Вашата поддршка успеавме во тоа.

Работевме во сите области на нашето секојдневие, вложувавме во инфаструктурата, во образованието, културата, спортот, а верувам и сигурен сум дека така ќе биде и во следната година, година на реализација на големи проекти.

Не се штедевме себеси и подготвивме убава празнична програма во нашата и Ваша Зимска приказна која ги обединува сите генерации, го раздвижи нашиот град, привлече туристи и внесе топлина во нашите срца, со магијата која е околу нас.

Нова светлина, нова енергија, нова радост за граѓаните на Битола и сите гости. Убавината на промените ја создаваме заедно, со меѓусебно почитување, разбирање и поддршка.

Драги сограѓани, пријатели, соработници

Празнувајте со радост во кругот на Вашите семејства.

Нека ни е честита и среќна Новата година. Нека се среќни и бериќетни Божиќните празници!!!

За многу години!

Премиерот Христијан Мицкоски во новогодишното обраќање истакна дека годината која ја испраќаме била година на сериозни предизвици, во која било неопходно да се направи стабилизација и консолидација, додека следната смета дека ќе биде година на раздвижување и на преобразба.

-Почитувани сограѓани, годината што ја испраќаме не беше лесна, таа беше година на сериозни предизвици! Година во која државата мораше прво да застане на нозе. После долг период на нестабилност, несигурност и на разнишани институции, беше неопходно да се направи стабилизација и консолидација. Тоа беше услов без кој не можеше да се оди понатаму, рече премиерот.

Тој нагласи дека реформите што ги отпочнале не се козметички, туку се длабински и суштински.

-Таквите реформи бараат време, но тие се предуслов за функционална држава и здраво општество. Свесни сме дека за граѓаните најважно е како тоа се чувствува во секојдневниот живот, рече Мицкоски.

За следната година тој очекува реализација на значајни инфраструктурни проекти, економско зајакнување, нови инвестиции, поддршка за стопанството и отварање можности за работа и развој.

– Со право можам да кажам дека 2026 година ќе биде година на раздвижување и година на преобразба, година на раст, со реализација на значајни инфраструктурни проекти, година на економско зајакнување, со нови инвестиции, поддршка за стопанството и отварање можности за работа и развој. Година на вкупна преобразба на Македонија. Година на надеж, но и на голема обврска. Обврска да се испорачаат резултати. Обврска да се оправда довербата од граѓаните. Обврска да се продолжи по патот на реформи, развој и стабилност. На сите ви посакувам здравје, мир и сила. Да влеземе во 2026 година со верба дека напорната работа ќе се исплати и дека Македонија ја движиме во вистинската насока. Среќна нова година, порача премиерот Мицкоски во своето новогодишно обраќање.

Извадоци од полицискиот билтен на МВР:

-На 30.12.2025 во 23:17 часот на ул.„Партизанска“ во Битола, полициски службеници од СВР Битола го лишија од слобода С.Ф.(33) од Битола. При контрола во патниот сообраќај, полициските службеници сопреле патничко возило „голф“ со битолски регистарски ознаки, кое го управувал и по преземени мерки било констатирано дека е под дејство на алкохол, односно дека има 1,61 промили алкохол во крвта, по што веднаш бил исклучен од сообраќај и задржан во полициска станица.

-На 31.12.2025 во 01:42 часот на ул.„Никола Тесла“ во Битола, полициски службеници од СВР Битола го лишија од слобода В.М.(54) од с.Брусник, битлско. При контрола во патниот сообраќај, полициските службеници сопреле патничко возило „шкода“ со битолски регистарски ознаки, кое го управувал и по преземени мерки било констатирано дека е под дејство на алкохол, односно дека има 2,05 промили алкохол во крвта, по што веднаш бил исклучен од сообраќај и задржан во полициска станица.

По целосно документирање на настаните, против нив ќе бидат поднесени пријави по член 297-а од Кривичниот законик – „безобѕирно управување со моторно возило“.

Онака како што ја завршуваат старата година – со музика, полни маси и искрена радост – така ја започнуваат и Новата 2026 година.

Во годината во која Порта прослави 22 години постоење и исто толку години градење традиција, вкус и доверба, ресторанот испиша неверојатни 365 дена исполнети со најдобра понуда, многу изненадувања и секако уживање во неповторливиот амбиент и најдобрата кујна во градот.

-22 години во кои создававме спомени, славевме моменти и градевме место што за многумина не е само ресторан, туку дел од нивните најубави приказни. Веднаш по Новогодишната ноќ, продолжуваме со уште повеќе музика, уште повеќе позитивна енергија и атмосфера по која Порта е препознатлива. Со врвна кујна, посветен тим и желба секоја вечер да биде доживување, а не само излегување – велат од менаџерскиот тим на ресторанот.

За сите што знаат да уживаат, за сите што ја сакаат добрата храна и живата музика, за сите што веруваат дека традицијата не старее – таа само станува подобра.

Веќе првата вечер (01.01. петок) од Новата година ви закажуваат незаборавен помин со група “Марифет”

View this post on Instagram

А во сабота (02.01.) се знае, време резервирано за денска забава со неповторливите Тиана и Дани – девојките кои не воодушевуваат со секој следен настап.

View this post on Instagram

2026 започнува во Порта, таму каде што добрата приказна продолжува.

Резервирајте навреме на тел.бр. 078 368 111

Ресторан “Порта” ви посакува Среќна Нова 2026 година, година исполнета само со убави моменти, многу радост и добро здравје!

Наздравје!

За околу 250.000 ученици во основните и средните училишта денеска почнува зимскиот распуст.

На настава ќе се вратат на 20 јануари 2026 за почетокот на второто полугодие.

Во вториот дел од учебната 2025/2026 година ќе продолжи процесот за оптимизација на училишната мрежа и воведување едносменска настава со која досега се опфатени 200 училишта.

На крајот на учебната година, во јуни, матурантите ќе полагаат државна матура по нов концепт, согласно видот на образованието.

Наставниците во март треба да добијат покачување на платите помеѓу 7,5 и 10 проценти.

Милиони луѓе во светот на плоштадите во своите градови, во туристичките центри, во кафеани, ресторани, пабови или во семејна атмосфера во домовите ќе ја испратат 2025 и ќе ја пречекаат Новата 2026 година.

Новата година први ќе ја пречекаат жителите на пацифичката островска држава Кирибати (во 11 часот по македонско време), а во 2026-та последни ќе влезат Американска Самоа и островите Бејкер и Хауленд (1 јануари во 13 часот по македонско време).

Тоа значи дека Новата година „патува“ цели 26 часа од првото до последното место на Земјата.

Забави за пречек на Новата година ќе бидат организирани во Скопје и во другите градови низ земјава. Музичката програма во главниот град вечер ќе биде со македонски изведувачи, а во Прилеп настапува Наум Петрески.

Во пресрет на Новогодишните и Божиќните празници, целосно изгоре куќата на семејството Матиќ од село Беранци, општина Могила.

Домот што го граделе со години, за миг се претвори во пепел.

Зад овие зборови стои едно повеќечлено семејство што остана без кров над глава, без основните услови за живот. Во овие тешки моменти, најважно е да покажеме дека не се сами.

Ајде да се погрижиме за ова семејство и да им помогнеме повторно да застанат на нозе. Заедно можеме многу.

Браќата Иван и Бобан Матик 078 534 951

Сметка за уплата на средства во Македонија:

Шпаркасе Банка Иван Матик
250500041915241

Сметка за уплата од странство:

IVAN MATIKJ
BERANCI UL.A BR.BB MOGILA
SHparkase Banka A.D. Skopje
Vasil lljoski br. 14 Skopje
MAKEDONIJA
IBAN Code
MK07250080008964944
Swift INSBMK22

Донирајте, споделете. Да го нахраниме човечкото во нас со добрина.

На денешната 6-та седница на Советот на Општина Прилеп, со мнозинство гласови беше поддржан и усвоен Буџетот на Општина Прилеп за 2026 година, кој изнесува 2.472.428.114 денари или во споредба со Буџетот за 2025 година е повисок за 411.061.175 денари.

На денешната седница беше усвоена и Предлог-одлуката за извршување на Буџетот на Општина Прилеп за 2026 година, Предлог-одлуката за определување на висината на благајничкиот максимум, како и буџетскиот календар на Општина Прилеп за 2026 година.

Со мнозинство гласови беше усвоена и Програмата за субвенционирање на јавните комунални претпријатија основани од ЕЛС Општина Прилеп за 2026 година.

Советниците гласаа и ги усвоија предложените програми за работа и развој со инвестициони вложувања и финансиските планови на ЈКП „Водовод и канализација“ – Прилеп, ЈП за ПУП Прилеп, ЈКП „Пазари“ – Прилеп и ЈКП „Комуналец“ – Прилеп, за 2026 година.

Беа разгледани и усвоени: Програмата за управување со отпад на територијата на Општина Прилеп, Програмата за одржување на јавна чистота, Програмата за одржување и користење на паркови, зеленило, парк-шуми и рекреативни површини, Програмата за подигање и одржување на зеленило, како и Програмата за работа и одржување на градските гробишта и капела, за 2026 година.

На оваа 6-та седница на Советот на Општина Прилеп беше усвоена и Програмата за зимско одржување и функционирање на зимската служба на подрачјето на Општина Прилеп за сезоната 2025/2026 година.

Она што е клучно, беше усвоена и Програмата за работа на Советот на Општина Прилеп за 2026 година, како и Програмата за социјална заштита, заштита на децата и здравствена заштита на Општина Прилеп за 2026 година.

Програмата за обезбедување оброк за учениците во прво, второ и трето одделение од основните училишта во Општина Прилеп за учебната 2025/2026 година, Програмата за доделување еднократна парична помош за новороденче за 2026 година, како и Програмата за спроведување општи мерки за заштита на населението од заразни болести во 2026 година, беа дел од едногласно усвоените проекти.

Програмата за спорт на Општина Прилеп за 2026 година, Програмата за образование во Општина Прилеп за 2026 година, Програмата за култура – фестивали и манифестации, Програмата за култура – одбележување значајни настани, личности и празници, Програмата за култура – капитални инвестиции за 2026 година, како и Програмата за доделување награди за најдобар наставник во одделенска и предметна настава во општинските основни училишта и најдобар наставник во средните општински училишта во Општина Прилеп, како и доделување награди за најдобар воспитувач и најдобар неговател вработени во ЈОУДГ „Наша иднина“ – Прилеп, беа дел од одлуките што советниците ги изгласаа за реализација во 2026 година.

Новина е тоа што од идната година ќе се доделува еднократна парична помош од 3000 денари, за секое запишано прваче во основните училишта на Општина Прилеп, за учебната 2026/2027 година.

Предлог-програмата за поддршка на локалниот економски развој за 2026 година, Предлог-програмата за активностите на Општина Прилеп за ревитализација по елиминирање на кризата во областа на заштита и спасување во 2026 година, како и Предлог-одлуката за давање на трајно користење на движни ствари на ЈКП „Комуналец“ – Прилеп, беа дел од одлуките за кои денеска гласаа советниците на 6-та седница на Советот на Општина Прилеп.

Унијата на жени при ОК ВМРО ДПМНЕ Прилеп и пратеничката Билјана Кузманоска, денеска ги израдуваа најмалите пациенти во детското одделение во прилепската болница “Борка Талески”.

-Во пресрет на празниците, на дечињата им подаривме новогодишни пакетчиња и ги изненадивме со посета од Дедо Мраз, кој донесе радост и празнична магија. Им посакавме брзо оздравување, добро здравје и среќно, безгрижно детство – напиша Кузманоска на ФБ.

Автобусите на Јавниот Градски Превоз ќе имаат редуциран возен ред на сите линии за време на Новогодишните и Божиќните Празници, и тоа по следниов редослед:

31.12 – Од 6.30 ч до 15.30 ч сите три линии
01.01 – Неработен ден
02.01 – Од 6.30 ч до 15.30 ч сите три линии
03.01 – Од 6.30 ч до 15.30 ч сите три линии
04.01 – Неделна (вонредна) линија на еден саат од 6.30 ч(х.Салида) до 12.30 ч од (Н.Гробишта
05.01 – Од 6.30 ч до 17.30 ч последно тргнување од почетни постојки сите три линии
06.01 – Неделна (вонредна) линија на еден саат од 6.30 ч(х.Салида) до 12.30 ч од (Н.Гробишта)
07.01 – Неделна (вонредна) линија од 6.30 ч(х.Салида) до 13.30 ч од (Н.Гробишта) со зголемен број автобуси
08.01 – Полно работно време од 6.30 ч до 19.30 ч.