Александар Танески: “Освојувањето на двете титули за “Филип Вардар” е престиж”

Двата златни пехари од втората сезона од Вардар Јуниор лигата во генерацијата 2000/2001 година заминаа за Прилеп. Момчињата и девојките од Филип Вардар на Ф4 турнирот од Јуниор лигата успешно се изборија за шампионските титули. Среќата и радоста немаа крај кога за финалната фотографија застанаа заедно пред двата пехари, а со нив и нивните тренери кои изминатата сезона ги бодреа и учеа како да стигнат до првите места. Горд на успехот и на напредокот на младите ракометари и во женска и во машка категорија е и тренерот Александар Таневски, со кого поразговаравме за идните планови на Филип Вардар во Вардар јуниор лигата.

 

osvojuvanjeto-na-dvete-tituli-za-filip-vardar-e-prestizh-10638

Момчињата во финалето беа подобри од врсниците од Гостивар Вардар, а девојките ги победија Карпош Вардар.

Децата од Филип Вардар беа дел од вардаровата лига и во првата сезона, и тогаш се закитија со медали во повеќе старосни категории, а момчињата од генерацијата 2000/01 беа на второ место.

Првото место за момчињата и не беше големо изненадување, бидејќи оваа екипа беше најдобра меѓу врсниците и на зимскиот турнир „Еден живот, една љубов”, кој во јануари годинава се одржа во организација на Ракометната академија Вардар. Но, денеска освоивте шампионска круна и во женска категорија. Очекувавте ли ваков успех?

„Секако дека освојување на првото место во која и да е лига е успех, но да ги освоите двете први места во иста категорија и во различен пол, е повеќе од возбудливо. Среќни сме и ние, а и децата. За нас е престиж што во една година остваруваме две титули, и нѐ мотивира да работиме дополнително со децата, да се подготвуваме уште посилно за следната година. Сега ќе се посветиме на младите генерации со кои треба да се работи многу повеќе за следната сезона од лигата. За оваа генерација ова им е последна година во лигата, но ќе продолжиме да работиме и со нив. Ние сме задоволни од успехот, мотивирани сме за во иднина, и да заблагодарам на Вардар Јуниор лигата и воопшто на целиот проект што овозможија вакви услови за да се натпреваруваме.”

Може ли да ги сумирате впечатоците после првата победа во финалето, односно, онаа со момчињата?

„За разлика од минатата година, сезонава во оваа генерација се забележа дека е малку опаднат квалитетот на играта, но тоа веројатно беше и очекувано зашто со селекциите што ги направи Вардар на крајот од минатата сезона, најдобрите играчи заминаа во селекциите на Вардар. Имаме уште деца со кои може да се работи во иднина, но се осети дека е намален квалитетот на играта во однос на претходната сезона од лигата. Очекувам дека веќе следната сезона ќе следи и некој пресврт на генерации. Најстарата генерација која ќе учествува во лигата ќе бидат момчињата и девојките од 2002/2003 годиште. Не знам дали и со таа генерација ќе добиеме на квалитет, но генерациите што доаѓаат потоа ќе бидат поинтересни и очекувам, понапредни во играта, и со нив ќе имаме лига каква што имавме во претходната сезона.”

osvojuvanjeto-na-dvete-tituli-za-filip-vardar-e-prestizh-10639

Девојките беа силно возбудени по победата. Дадоа сѐ од себе на теренот и покажаа дека се подобри од противникот.

„Самата разлика од 10 гола од второпласираниот тим зборува за квалитетот помеѓу првата и останатите екипи. Навистина, денеска сме тоа ние, но и да не бевме треба да се честита на девојките за таквиот успех. Им требаше многу трчање, напор и знаење да се направи таква резултатска разлика.”

Какви се плановите на клубот во следната сезона?

„Со девојките, како и со момчињата родени 2000/2001 ќе продолжиме да се натпреваруваме во една од лигите на РФМ. “

Какви се плановите на вашиот клуб во однос на следната сезона од Вардар Јуниор лигата?

„Очекувам следната сезона да учествуваме со помала група на деца од нашата школа. За нас ударна ќе биде генерацијата на деца родени во 2004/2005 година. Мислам дека ним треба најмногу да им се обрати внимание. Не во однос на бројност на учесници, туку во однос на квалитет зашто меѓу нив има многу талентирани деца и можам да се надевам дека ќе излезат и поквалитетни играчи од оние кои досега поминаа во селекциите на Вардар.”

Годинава ве немаше на натпреварите во мини – ракомет, какви се плановите за догодина?

„Годинава не учествуваме, но следната година имаме намера да се вклучиме, иако тоа главно ќе зависи од условите кои ќе се понудат од Академијата и од интересот меѓу децата.”

Колкав е интересот во Прилеп за мини ракомет, односно која е најмалата возраст на децата кои се запишуваат во школата?

„Ние како клуб сега сме сконцентрирани на 2004/2005 генерација, иако имаме и повозрасни, но и помали деца. Во однос на уписите веќе сме насочени кон деца кои се помали од 2010 година и веќе имаме околу 20 тина деца кои се од генерацијата 2011. Мислам дека се на вистинска возраст за почеток во спортот, особено ако сакаме да ги пратиме европски или скандинавските трендови децата уште на мали години да се вклучуваат во ракометот. Зашто вклучувањето на постари години влијае и на резултатите кои детето може да ги постигне. На пример во екипата која сега победи, 2000/2001 генерација, за последниве 9 месеци се вклучија околу 8 до 9 деца кои претходно тренираа кошарка. Ние успеавме да ги насочиме во играта, се вклучија во тимот и победија, но не беа носители на играта зашто с уште имаат гестови кои се карактеристични за кошаркари. Сепак, тоа се момчиња на возраст од 16-17 години и треба многу работа да се промени тоа. Нормлано ќе продолчиме да работиме, и како што во изминативе 12 години со клубот учествуваме во лигите на РФМ, така и годинава и се надевам и следната година ќе се вклучиме со овие момчиња.”

Како ја оценувате организацијата на Вардар Јуниор лигата?

„Генерално за мене првата година беше најдобра, но мора да потенцирам дека и двете години се успешни. Како што беше поставено сценариото и како што беше планирано, така се реализираше целата сезона. Децата се задоволни, а и ние како тренери од покажаното и од успесите. Успешна сезона.”

Извор: zrkvardar.mk




Markukule.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.