Тие се нем сведок за времињата низ годините: Прилепските убавици од кои дел молат да им се врати стариот сјај (Фото галерија)

Прилеп е град со најмалку 1.000-годишна историја, барем така зборуваат најстарите пишани извори за историјата на градот под Марковите Кули.

Низ вековите тука се менувале власти, се менувале уредувања, градот минувал низ различни окупации, но и времиња на победа и издигнување.

Една прошетка низ Прилеп е доволна да се забележи дека тука низ годините имало различни култури. Дел од тие стилови на градба се резултат на надворешни влијанија, но постојат куќи и градби кои имаат сопствен македонски и прилепски белег.

Голем број од куќите кои се градени во минатиот век постојат и денеска, а дел од нив за жал се руинирани и оставени на забот на заборав на времето.

Сите овие куќи имаат посебна убавина, посебен раскош, сведочат за едно време и се посебни споменици на културата.

Во продолжение низ фотографии ќе ви претставиме неколку од така наречените прилепски убавици, од кои дел молат за реконструкција и враќање на нивниот поранешен сјај.

Куќата на Бектешовци

Куќата на Бектешовци, која е изградена во 1923 година и има културно и историско значење, беше целосно реставрирана во рамките на проектот на Министерството за култура за обнова и конзервација на повеќе фасади во значајни градски јадра во 2013 година.

Фасадата на грандиозниот објект сега е украсена како што била некогаш. На главниот влез се декорирани античките столбови и мермерните широки скали, а дворот е ограден со железна кована ограда, обработена од уметничките раце на прилепските ковачи. За реализацијата на проектот за обнова на фасадата, Министерството за култура издвои 3 милиони денари.

Куќата на Жеревци

Староградската куќа на прилепското семејство Жеревци, која е заштитена со закон и стара 120 години, комплетно беше реновирана во 2015 година. За обнова на куќата на Жеревци се издвоени 3,8 милиони денари. Куќата на Жеревци, според сегашниот сопственик Александар Жеревски е градена од неговиот дедо Даме во 1900 година.

Куќата од Башевци

Куќата на Башевци е една од многуте автентични градби која заслужува да биде реставрирана.

Куќата од Тоде и Марика, покрај Градската река

Катастарот во Прилеп

Куќата каде што во 1942 година, при посетата на Прилеп, отседнал Бугарскиот цар Борис III

Стара куќа во централното градско подрачје


Markukule.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.