Просечната оценка на државната матура 3,47

Резултатите од екстерните испити на Државната матура за учебната 2018/2019 година што се спроведе во период од 1 до 13 јуни денеска ќе бидат достапни на огласните табли на училиштата, како и на интернет страницата matura.gov.mk.

За ова денеска информира министерот за образование и наука Арбер Адеми на прес-конференција во Владата.

– Резултатите се добри и покажуваат напредок во однос на изминатите учебни години, односно учениците кои го полагаат тестот на зрелост покажуваат подобри резултати од минатите генерации, соопшти Адеми.

Тој информира дека просечната оценка на постигањата на матурантите за оваа година е 3,47 за разлика од минатата година кога росечната оценка била 3,42. Поединечно и кај повеќето предмети има подобрување во постигањето на учениците во однос на изминатите години, а кај помал дел има намалување или стагнација.

Просечната оценка по предметот македонски јазик и литература оваа година е 3,69, за разлика од минатата кога била 3,66. По албански јазик просечната оценка е 3,85 во однос на минатата година кога изнесувала 3,81. Резултати со благо намалување на просекот покажале учениците кои полагале турски јазик и литература, односно просечната оценка оваа година е 3,73, а минатата 4,18.

За математика постигнувањата се најдобри во последните три години. Годинава просечната оценка е 3,65 во однос на минатата кога изнесувала 3,37.

– И оваа година има раст на кандидатите кои го полагале англиски јазик и тоа за 310 ученици повеќе од минатата година, вкупно 14.103 ученици. Од нив 7,35 проценти не го положија испитот, а 6,22 проценти имаат одлична оценка. Просечната оцинка годинава е 3,07, додека минатата година беше 2,91. Кај предметите бизнис, историја и биологија има значително опаѓање, односно средната оценка по бизнис е 3,22 додека лани изнесуваше 3,29. По историја просечната оценка оваа година е 3,51 а лани изнесуваше 3,56. По биологија просечната е 3,67 додека минатата година изнесуваше 3,79, информира Адеми.

Кандидатите кои се пријавиле за полагање во јунскиот испитен рок, но не положиле, дел или сите испити од државната матура ќе можат повторно да се пријават за полагање во августовскиот испитен рок.

Оваа година Државна матура полагаа 15.553 ученици од кои 7.692 од гимназиско и 7.604 од стручно образование, како и 257 ученици од средно уметничко образование.

Директорката на Државниот испитен центар, Лидиjа Ѓошевска информира дека августовскиот испитен рок е на 12 август за странски јазици, 13 август за сите мајчини јазици, 14-ти за изборните предмети и 15 август за математика. Сите незадоволни ученици можат да поднесат приговор и тоа на 5 јули, односно утре, на 8 и на 9 јули.

Одговарајќи на новинарско прашање, таа посочи дека годинава имало промена на испитната програма по англиски јазик во однос на бодирањето на тестот и прашањата.


Markukule.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.