Од спортскиот менаџер Александар Ѓорѓиески добивме информација, што ќе ги израдува сите што го сакаат прилепскиот и македонскиот спорт
Обединетите нации официјално го потврдија членството на ИДЕАЛ СПОРТ Прилеп во глобалната иницијатива Football for the Goals (FFTG), со што ИДЕАЛ СПОРТ станува првата спортска организација од Македонија која се приклучува на оваа светска мрежа.
Со членството во FFTG, ИДЕАЛ СПОРТ станува дел од глобална фудбалска заедница која обединува клубови, федерации и спортски организации од целиот свет, меѓу кои се и UEFA, The FA – Англиската фудбалска асоцијација, Real Federación Española de Fútbol – Шпанската фудбалска федерација, како и бројни други реномирани фудбалски институции.
„Football for the Goals“ е иницијатива предводена и управувана од Обединетите нации, која ја користи моќта на фудбалот не само за подигнување на свеста за Целите за одржлив развој, туку и за поттикнување промени во однесувањето и воведување одржливи практики во фудбалската индустрија.
Ова членство претставува значајно меѓународно признание за работата на ИДЕАЛ СПОРТ и за вредностите кои ги промовираме преку спортот. Нашата цел е да создадеме позитивна спортска средина во која младите ќе растат со почит, фер-плеј, дисциплина и вистински спортски дух.
Веруваме дека фудбалот има огромна сила да ги поврзува луѓето, да инспирира позитивни промени и да придонесе кон создавање поздраво и подобро општество.
Од денес, ИДЕАЛ СПОРТ ќе делува локално и глобално, како дел од светската мрежа која преку фудбалот создава позитивно влијание во заедницата.