Како нов начин на меѓуинституционална соработка, поддржана од Министерството за култура и туризам, во рамките на повикот за креативни индустрии, публиката во Битола, утревечер во рамките на БИТ ФЕСТ, ќе има можност да го проследи концертот насловен „Кларинетска одисеја“. Овој настан е резултат на многу труд и соработка помеѓу Општина Битола, КИЦ, Народен театар и Центар за култура, а во својот концепт ќе понуди незаборавна вечер со најуникатната музичка четворка со светско реноме, четворицата мајстори на кларинетот: Исмаил Лумановски, Благојче Трајковски, Горан Бојчевски и Благој Ламњов.

„Ова е плод на едногодишно договарање, преговарање, со оглед на тоа дека сите четворица еминентни кларинетисти, имаат свои турнеи, свои аранжмани. Ова е концерт во кој ќе бидат презентирани значењето, можноста и иднината на вакви заеднички концерти во Општина Битола и се надеваме дека БИТ ФЕСТ догодина ќе го претвориме и во фестивал на амбасадори на културата на Македонија и Битола“, рече Благојче Божиновски, директор на ЈОУ КИЦ Битола, на денешната прес конференција.

Градоначалникот Коњановски, ја повика публиката на заедничко уживање во Хераклеја, утревечер од 21.00 часот, нагласувајќи дека, Битола е град кој има публика за вакви манифестации.

„Ова е најава на еден спектакуларен концерт на наши виртуози, наше, а светско, именувано како „Кларинетска одисеја“, настан кој во склоп на Битолското културно лето е продолжение на она што оваа летна сезона го видовме досега. Сеуште сме под импресии на огромниот интерес на концертот на еден друг тип на музика, електронска музика со Армин Ван Бурен на Стадионот „Петар Милошевски“, кој се одржа на огромно задоволство на публиката. Она што утревечер ќе го имаме, значи многу за Битола и битолчани, имајќи предвид дека со нас се битолчани и велешанец кои ќе ни презентираат дел од нашето национално богатство и заедно со онаа креативност која ја носат, навистина е гордост да се биде утревечер на Хераклеја“, рече Тони Коњановски, градоначалник на општина Битола.

Главен координатор на содржинскиот концепт на настанот е Оливер Јосифовски, кој истакна:

„Нивните животи и достигнувања се многу интересни, како и нивните растежи во музиката. И тоа е навистина интересно кога човек ќе биде заедно со бендот. Присуството утревечер на Хераклеја и самите музички теми кои што ги обработувавме овие месеци и последниве седмици посебно, нас ни вродија една нова музичка материја, врзана со времето во кое живееме, но исто овие луѓе носат и една богата музичка традиција и се културни амбасадори, во земјите во кои што се наоѓаат, онаму каде што патуваат, но и кај нас. Заедно со хорот на Марина Коруновска, кој што ќе биде дел од настанот ќе имаме едно спектакуларно доживување за утрешниот концерт“, рече Јосифовски.

„Во Битола навистина имаме една културна револуција во моментот и сите сме вклучени на некаков начин, со што имаме и инспирација да работиме и да соработуваме со вакви уметници кои што ги покажуваат своите квалитети надвор од Македонија и ја претставуваат Македонија во најдобро и најубаво светло преку музиката и она што тие го етаблираат во светот за Македонија, имаме можност сега и ние како хор „Коруновска Арс Нова“ да бидеме дел од овој проект“, рече Марина Коруновска, која најави дека концертот ќе биде спој на вокалната и инструменталната музика, преку симбиоза на македонска прекрасна музика.

„Многу сум среќен, што во Битола и во Македонија, постојат луѓе кои што ја препознаваат моќта на уметноста. Ние уметниците сме како едно цвеќе, ние зависиме од народот, а народот зависи од нас. Сами не можеме да придонесуваме во општеството, колку што човек може да го направи тоа со заедништво. Македонија има публика која препознава кое цвеќе треба да се вади. Уметноста не е забава, таа е многу повеќе од тоа“, рече Благој Ламњов.

„Годинава доаѓаме тука со веселба, со среќа. Со овие мои колеги, после 20 години, повторно се вратив во детството. Со Исмаил и Благојче растевме заедно и вежбавме некаде во визбите на Музичкото училиште, но ентузијазмот и љубовта кон музиката беа толку големи што би рекол Бог, повторно не здружи заедно“, рече Горан Бојчевски.

„Ова нема да биде само обичен концерт. Ова ќе биде настан кој изобилува со многу емоција, затоа што сите ние кои ќе бидеме како солисти на сцената, имаме многу спомени низ годините наназад, иако доста време не сме се виделе. Сепак растејќи во Битола и преку нашето образование, ние имаме многу спомени, многу приказни за она што сме го доживувале заедно. Затоа овој концерт има една посебна емотивна нишка која што ќе не води низ целиот настан. Пробите поминуваа со солзи, а сигурно и утре ќе има по некоја солза, во чест на сите оние среќни моменти кои сме ги доживеале некогаш и ќе ги доживуваме утре“, рече Благојче Трајковски, нагласувајќи дека БИТ ФЕСТ е најголемото културно летно случување во нашата држава и тоа треба да се потенцира и да се означи како еден пример како треба да функционираат општините и сите градски центри во државата.

„Мислев дека немавме толкав капацитет сите овие врвни уметници од светот да дојдат и да се соберат во еден ден. Но, ова е голем и волшебен момент. Кларинетот има сила која што ги поврзува луѓето. Кога ги спојуваме силите, цел свет може да не препознае, затоа што ние имаме традиција за овој инструмент. Ќе биде навистина голем спектакл“, рече Исмаил Лумановски.

Репертоарот на концертот „Кларинетска одисеја“ ќе понуди разновиден музички мозаик составен од традиционални, класични и модерни теми, меѓу кои: „Ако одам во Битола“, „Lily – Waltz for Chicago“, темпераментното „Flamenco“, виртуозното „Стамболско“, емотивната „Schindler’s List“, спојот на „Калеш Анѓа“ и „Калајџиско“, потоа „Кољо“, динамичното „Касапско оро“, „Sheva“, делото на Вивалди, како и композициите „Зејтинлиско“, „Пелистерско“, „Етно Via Bairot“, „EZ Pass“, како и други композиции кои произлегуваат од македонскиот фолклор..

Покрај четворицата виртуози кои ја водат оваа музичка одисеја со своите кларинети и хорот „Коруновска Арс Нова”, на сцената ќе настапат и врвни музичари кои ќе ја збогатат звучната слика на концертот: Давор Јордановски на пијано и клавијатури, Оливер Јосифовски на бас, Алек Секуловски на тапани, Зоки конги, Ади Имери на акустични и електрични гитари, Ристо Крстевски на хармоника, Илија Мицев на труба и Александар Петров на тапан.

Особено емоционален момент ќе внесе и делот збогатен со поезија насловен „Елегии за кларинетот“, чиј автор е Зоран Пејковски, а ќе бидат изведени од актерката Јулијана Мирчевска.

Во КПУ Затворот Струмица денес се реализираше значаен и хуман настан – законска регистрација на осудено лице кое моментално издржува казна затвор.

Овој чин беше спроведен под покровителство на директорот на установата, Зоран Ристов, и заменик-директорката, Наташа Лазарова Донева, во насока на почитување на основните човекови права и обезбедување правна сигурност на сите лица, без исклучок.

-Со регистрацијата, лицето се стекна со правен идентитет, што претставува предуслов за користење здравствени, образовни и социјални права, и значаен чекор кон неговата ресоцијализација.

Овој настан е резултат на успешна координација помеѓу Затвор Струмица , стручните служби и релевантните институции, а претставува и јасен показател дека и во пенитенцијарниот систем постои ангажман за унапредување на хуманоста, инклузивноста и правичноста, информира Управата за извршување на санкции

Денеска (06.08.2025), ОВР Кавадарци до Основното јавно обвинителство Кавадарци, поднесе кривична пријава против С.И.(43) од Кавадарци поради постоење основи на сомнение дека сторил кривичнo делo „убиство“ по член 123 од Кривичниот законик. Тој се сомничи дека на 27.07.2025 во семејниот дом во Кавадарци со метален предмет нанел повреди на неговиот брат И.И.(42) од Кавадарци, од кои тој починал, по што телото го закопал во помошен објект во дворот од заедничката куќа.

Имено, вчера (05.08.2025), нивната сестра В.О.(44) во 11:00 часот во ОВР Кавадарци го пријавила за исчезнат нејзиниот брат И.И.. Додека, во 13:00 часот пријавила дека во помошниот објект во дворот од куќата на нејзините браќа, каде што отишла со сопругот, забележале дека има ископ покриен со ровка земја, по што се посомневале дека е можно нејзиниот исчезнат брат да е закопан внатре.

Веднаш по пријавата, на местото излегле јавен обвинител, полициски службеници и претставници од Институт за судска медицина Скопје, а од погребално претпријатие откопана е дупката и било пронајдено телото на И.И. По наредба на јавен обвинител, телото на починатиот било дадено на обдукција и вештачење. Истиот ден во 14:40 часот, по извршени оперативни проверки и добиени сознанија и во координација со јавен обвинител, полициски службеници го лишиле од слобода С.И., по што го спровеле во јавното обвинителство, каде во службен разговор го признал делото.

Ако барате место каде модата за најмладите се среќава со стил, квалитет и пристапни цени – тогаш Republic Kids е вистинскиот избор за вас!

Во срцето на Прилеп, во шармантната чаршија, се наоѓа бутикот каде децата можат да се облечат од глава до пети – за секоја пригода: родендени, свечености, прошетки или само за секојдневна удобност и стил.

Огромен избор на гардероба за бебиња, деца и тинејџери

Попусти од -20% до -70% на избрани парчиња

Квалитетни материјали, модерни кроеви и брендирана облека

Облека која ги следи потребите и стилот на секое дете – со љубов избрана!

Во продолжение погледнете дел од колекцијата на Republic Kids и побрзајте, посетете ги уште денеска и откријте ја модната бајка што ја заслужуваат вашите најмили, затоа што секое дете заслужува да блеска!

Локација: Прилеп, спроти споменикот на Пеце Атанасовски

Работно време: Понеделник–Сабота,

Навивачите на Шкендија синоќа во повеќе наврати за време на натпреварот со Карабах на Националната арена скандираа „Илирида“ и „Голема Албанија“, како што објави МИА. Тие и покрај сите апели за фер и спортско навивање, имаа националистичките извикувања.

Натпреварот на трибините на Арената „Тодор Проевески“ го следеа влaдини фунционери, вице премиерот Изет Меџити, претседателот на Собранието Африм Гаши, министерот за Економија Дурмиши, но и опозиционерите Ахмети и Таравари.

Телма побара став од претседателот на Собранието Африм Гаши кој ги осуди навивачите на Куманово и повика на единство на кошаркарскиот натпревар со Романија. Како сега ги коментира скадирањата на навивачите на Шкендија „Илирида“, тој кажа дека додека бил на натпреварот не слушнал такво нешто, но ако се случило го осудува.

Од друга страна пак тој на својот фејсбук статус пишува дека им честита на навивачите кои според него биле достоинствен пример за националните вредности.

-Им честитам на навивачите кои беа подеднакво достоинствени примери за нашите национални вредности, внатре и надвор од стадионот. Со доверба и оптимизам го очекуваме резултатот од реваншот, убедени дека Спарк ќе се бори до крај, пишува во својот статус Гаши.

Основното јавно обвинителство Битола донесе Наредба за спроведување истражна постапка против едно лице за продолжено кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 во врска со член 45 од Кривичниот законик.

Осомничениот од октомври 2024 се до почетокот на овој месец, неовластено продавал наркотична дрога на повеќе лица-сведоци. На 4 август полицијата извршила претрес во неговиот дом и други простории. Во мопедот паркиран пред домот и во објект во непосредна близина кој не се користи полициските службеници пронашле вкупно 16,21 грама марихуана и 10,44 грама амфетамин. Дрогата била спакувана во повеќе помали пакувања наменети за натамошна продажба и скриена во различни предмети.

Јавниот обвинител, оценувајќи дека се исполнети законските основи, до судијата на претходна постапка достави предлог за определување мерка притвор за осомничениот.

Во пресрет на 8.август кога се празнува големиот христијански празник посветен на Светата преподобна маченичка Параскева, се потсетуваме како Прилеп после 100 години доби нов велелепен црковен храм кој денеска е гордост на сите – на верниците, свештеништвото, на сите прилепчани.

Денот кога се слави празникот за Прилеп е истовремено и радосен и тажен, радосен затоа што храмот кој го носи името на светителката во населбата “Точила” е исполнет со верници преку целиот ден, а тажен затоа што на истиот ден во 2001 год. Прилеп загуби 10 синови на Карпалак.

Токму затоа храмот Св. Петка има посеба симболика за прилепчани, тука освен за свое здравје, прилепчани се потсетуваат и се молат за загинатите бранители на Карпалак и нивните семејства.

Оваа година се навршуваат 10 години од осветувањето на храмот. Токму во 2015 година, благодарение на заедничкиот труд и молитви, Прилеп се здоби со уште еден светилник пред Господа, кој служи за собирање пред него, обединување во Господа, победување на сите маки и неволји, и растење во славата Господова.

Иницијативата за изградба на храмот почнала во мај 2005 година, во канцеларијата на штотуку избраниот градоначалник Марјан Ристески, воден од желбата градот да добие нов храм после еден век, но и светилиште каде вечно ќе се нагува споменот на паднатите бранители. Неговата желба и идеја наиде на огромна поддршка од бизнис секторот, прилепскиот еснаф, семејства кои со генерации создавале во градот…

Мотивот бил датумот на загинувањето на десетмината прилепски бранители на Карпалак на 8 август, датум кој се поклопува со верскиот празник, посветен на Св. преп. мчца. Параскева (Петка) Римјанка. На состанокот биле присутни градоначалникот, Неговото Високопреосвештенство Митрополитот Преспанско-пелагониски и администрато Австралиско-новозеландски г. Петар, архиерејскиот намесник протоерејот Благоја Станкоски, електроинжинерот Винко Тодороски и архитектот Бранко Нешкоски.

На состанокот била утврдена потребата од изградба на храм во чест на „Св. Петка“. Во согласност со важечката урбанистичка документација, била избрана моменталната локација за изградба на храмот и било разгледано предидејното решение за црквата изработено од архитектот Бранко Нешкоски и биле дадени насоки за големината и стилот на градбата на храмот, во согласнот со претпоставените потреби имајќи ја предвид големината на населбата Точила во Прилеп.

Првиот состанок и формирањето на Иницијативниот одбор за градба на храмот се одржал на 13.07.2008 год. во хотелот „Кристал Палас“. На овој состанок биле присутни: градоначалникот Марјан Ристески, архиерејскиот намесник прот. Благоја Станкоски, Бранко Нешкоски – директор на ЈП за ПУП, Миле Ристески – сопственик на х. „Кристал Палас“, Дино Москов – АД пиварница Скопско, д-р Наде Караџоска – ЈОУ Градска библиотека „Борка Талески“. На овој состанок била донесена и Одлука за избор на Иницијативен одброр за изградба на храм „Св. Петка“.

Се утврдува изборот на Иницијативен одбро за градба на храм „Св. Петка“ во состав:

1. Митрополит Преспанско-пелагониски и администратор Австралиско-новозеландски г. Петар,
2. Протоереј-ставрофор Никола Грамбозов – Архиерејски заменик,
3. Протоереј Благоја Станкоски – Архиерејски намесник,
4. г. Миле Јанакиески,
5. г. Симон Наумоски,
6. г. Кирил Самарџиоски,
7. г. Горан Попоски,
8. г. Трајче Спасески,
9. г. Цветан Спиркоски,
10. г. Гордан Бошкоски,
11. г. Миле Ристески,
12. г. Дино Москов.

Во наредниот периодовој состав бил проширен со нова со нова О Д Л У К А

За нови членови на Иницијативниот одбор за изградба на храмот „Св. Преп. мч-ца Параскева“, нас. Точила, во Прилеп, се кооптираат следните лица:

1. г. Марјан Ристески,
2. г. Сашо Наумоски,
3. г. Сашо Самарџиоски,
4. г. Бранко Нешкоски,
5. г-ѓа Наде Караџоска,
6. г. Винко Тодороски,
7. г. Владимир Сапунџиоски.

Стари велат: “Црква се гради тешко, камен по камен, денар по денар, а сето тоа за да трае, да биде тука и после 100, 200, 300… години”. Осум години беа потребни за градот да добие совршена градба, која денеска грее со својата убавина и раскош, со прекрасно уредено плато, полно со цвеќе…

Осветувањето во 2015 го изврши Митрополитот Преспанско-Пелагониски г. Петар, во сослужение со Митрополитите Тетовско-Гостиварскиот г. Јосиф, и Кумановско-Осоговскиот г. Јосиф. На Литургијата пееја двата градски прилепски хора, едниот од црквата „Свето Благовештение“ и другиот при новоосветената црква „Света Петка“, под диригентската палка на протопсалт Георгиј Секулоски. Беше тоа една прекрасна глетка која донесе голема радост кај верниците.

Со тоа Прилеп после еден век доби нов – четврт црковен храм во градот, во населбата каде живеат речиси една третина од прилепчани. Низ годините храмот се разубавуваше, се доградуваше, се одржуваа донаторски ручеци, помош пристигнуваше од сите страни. Така е и денеска, кога се работи на целосно фрескоживописување, храмот е речиси целосно ограден, а посветеноста на свештенството придонесе да се организираат голем број хуманитарни концерти и настани, се со цел храмот целосно да биде доизграден.

Нека е за многу години престојниот празник и нека е за век и векови црковниот храм Св. Петка во Прилеп!

-На 04.08.2025 во 14:00 часот, полициски службеници од ОВР Прилеп го лишиле од слобода А.И.(47) од с.Житоше, општина Долнени, постапувајќи по претходна пријава дека на 03.08.2025 сторил кривично дело “предизвикување на општа опасност”, односно неовластено пукал од огнено оружје. Од него биле одземени пиштол “Застава” калибар 7.62 x 25 мм, дозвола за поседување на оружје и една празна рамка за куршуми. По целосно документирање на случајот, против него ќе биде поднесена соодветна пријава – информираат од СВР Битола.

-На 04.08.2025 во ОВР Прилеп, 26-годишна жена од Прилеп пријавила дека во периодот од 24.03.2025 до 24.07.2025, била измамена од едно лице за сума од 30.500 денари.

Според пријавеното, лицето кое се претставило дека е од Тетово ја довело во заблуда дека ќе и’ посредува за работна виза, а откако таа во повеќе наврати му ги уплатила парите, по што тој ја блокирал и прекинал комуникација со неа.

Се работи на расчистување на настанот – информираат од СВР Битола.

На 6 август се празнува Светата маченичка Христина.

Родум од градот Тир, ќерка на царскиот намесник Урбан, идолопоклоничка. Не се знае од кои причини родителите и го имаа дадено името Христина, но тоа ја криеше во себе тајната на нејзиното идно одење по Христа.

До својата единаесетта година не знаеше за Христа ништо. А кога наполни единаесет години, нејзиниот татко, со цел до полната возраст да ја скрие од светот заради нејзината вонредна убавина, и го одреди највисокиот кат од една висока кула и ја всели да живее таму. И ги устрои сите удобности за живот, и даде робинки да ја служат, постави во нејзините одаи сребрени и златни идоли за секојдневно да им принесува жртви. Но на таа млада душа и беше тегобно во онаа идолопоклоничка средина.

Гледајќи ги низ прозорецот дење сонцето и сите убавини на светот, а ноќе чудесното блескање на ѕвездите, таа по својот природен разум дојде до цврстата вера во едниот жив Бог. Милостивиот Бог, Којшто го виде нејзиниот копнеж по вистината, и испрати ангел кој ја прекрсти со крсниот знак, ја нарече невеста Христова и наполно ја поучи во богопознанието.

Тогаш Христина ги искрши сите идоли по нејзините одаи и така предизвика ѕверска јарост кај татко и . Тој ја изведе на суд, ја предаде на маки, а потоа ја фрли во затвор, со намера утредента да ја убие со меч. Но таа ноќ Урбан здрав како дрен ја испушти душата и отиде во гроб пред ќерка му.

Потоа двајцата намесници Дион и Јулијан го продолжија истизавањето на Светата девица. Храброста во трпењето и чудата што ги изврши Христина со силата Божја обратија мнозина тирски незнабожци во христијанство.

За време на нејзиното мачење Дион одеднаш падна мртов сред народот. Неговиот наследник Јулијан и ги отсече градите и јазикот. Маченичката го зеде својот јазик и му го фрли на Јулијан во очи, од што тој одеднаш ослепе. Најпосле нејзините маки за Христа завршија со смрт под остар меч, а нејзиниот живот се продолжи во бесмртното ангелско царство. Света Христина пострада чесно во 3 век.