Ресторан со италијанска душа во строгиот центар на Прилеп, угостителски бренд и репрезент на градот под Марковите Кули кој раскажува една поинаква вкусна гастрономска приказна.

Погодувате веднаш, станува збор за LA PIAZZA, пица-ресторанот кој е вкусна навика не само на прилепчани, туку и на секој гостин во нашиот град.

Со цел да излезе во пресрет на сите нивни ценети гости, тимот на ресторанот подготви неодоливо посно мени, кое ќе им се допадне на сите оние кои деновиве до Божик ги поминуваат во пост.

Одлична понуда на риба, тестенини, грилован зеленчук, рижото,  посни додатоци и секакви свежи салати…

Ако сте за нешто специјално и несекојдневно за нашето поднебје, опло ви ги препорачуваме ракчињата во црвен и алфредо сос, или маестралните саганаки.

Кој рече дека вистински гурман и вљубеник во добра кујна, не може убаво да се нагости и со посна храна?

Уживајте во секој ден! Тимот на La Piazza ве очекува!

Новиот градоначалник на Општина Долнени, Блерим Ислами го именуваше Џемалудин Џафeроски за директор на Јавно Комунално Претпријатие „Долнени“.

Младиот градоначалник како кандидат на ВЛЕН ја презеде власта од ДУИ по вториот круг на локалните избори, а поставувањто на Џафероски за нов директор во ова претпријатие е една од неговите први поголеми одлуки.

По преземањето на функцијата, Џафероски јавно соопшти дека ќе работи по принципи на штедење и одговорност, при што истакна дека нема да користи службено возило, нема да користи средства за репрезентации, како и дека службениот телефон нема да го употребува за лични потреби.

На ден 29.11.2025 година, Ротари клубот Прилеп се збратими со Ротари клубот Лесковац од Србија, на денот на прославата на 90-годишниот јубилеј од формирањето на овој клуб. Истовремено, овој датум е значаен и од историски аспект, имајќи го предвид фактот дека многу години двата народи го прославуваа како Ден на републиката.

На свеченоста, од страна на претседателите на двата клуба (Орде Ѓорѓиоски и Атанасијевиќ) беше потпишан меморандум за соработка, а беа врачени и плакети и пригодни подароци. Од страна на членовите на Ротари клубот Лесковац, беше направена кратка презентација за историјата од формирањето на овој клуб, па сè до денешен ден, за што е издадена специјална публикација.

Чинот на збратимувањето е само почеток на едно долгогодишно пријателство помеѓу членовите на двата клуба, взаемна почит и инспирација за служење во заедницата и регионот во кој живееме и работиме. Претставниците на двата клуба дополнително одржаа и заеднички состанок на 30.11.2025 година, во рамките на кој изразија подготвеност за интензивна комуникација и отпочнување соработка на конкретни проекти во наредните неколку месеци. Фокусот беше ставен на разгледување на можноста за вклучување во проект за доделување глобал грант од Ротари фондацијата, а со цел да се реализира сериозен проект од значење за двата градови.

По одржувањето на Општинското екипно првенство на основните училишта во Прилеп, на 03.12. во Гимназијата “Мирче Ацев” се одигра и екипното првенство за средните училишта во ШАХ.

Учествуваа четири средни општински училишта со своите најквалитетни јуниори. Екипите беа составени од пет играчи, од кои една мораше да биде девојка.

Респект за сите, но сепак еден мораше да победи, а тоа беа домаќините од гимназијата “Мирче Ацев”, кои извојуваа победи во сите мечеви.

Второто место го освои СОУ “Ристе Ристески-Ричко”, додека трето место освоија учениците од СОУ “Ѓорче Петров”. Првенството помина во одлична атмосфера и дружење на средношколците од Прилеп, со желби за почести настани. Организатори беа Сојузот на училишен спорт и шаховскиот клуб Прилеп.

Министерот за земјоделство, шумарство и водостопанство, Цветан Трипуновски, денеска е во работна посета во прилепскиот регион, каде што врши увид во процесот на откупот на тутун.

„Сакам да ве информирам дека од пријавените 320 пунктови низ државата, отворени се 207 заклучно со вчерашниот ден”, изјави министерот Трипуновски.

Тој додаде дека од компаниите кои што се пријавени во Регистарот за откуп на тутун, само една компанија досега не отпочнала со откуп, но истата ќе започне на почетокот од наредната недела согласно планот и динамиката.

„Согласно податоците кои ги добиваме на дневна основа од Државниот инспекторат за земјоделство, до вчерашниот ден се откупени 1,7 милиони килограми тутун со просечна цена од 419,68 денари”, истакна министерот Трипуновски.

Тој посочи дека според податоците од Сојузот и Инспекторатот, досегашниот тек на откупот се одвива во добра атмосфера.

„До последниот ден од откупот ќе бидеме тука, додека не се собере последното ливче тутун. Очекуваме дека оваа сезона ќе заврши успешно”, заклучи министерот.

Победниците на натпреварот „Средношколец-милионер“, битолчаните кои ја освоија првата награда од 1 милион денари, денеска имаа прием во кабинетот на градоначалникот на Општина Битола, Тони Коњановски.

Средношколците Иван Секуловски ( СОУ „Јосип Броз Тито“), Јован Талевски ( СОУ „Ѓорѓи Наумов“) и Марио Рабаџиевски ( СОУ „Таки Даскало“ ) кои работеа под тимот „Стеј Би“ победија со нивната бизнис идеја „Систем 4“, што подразбира користење напредни алатки со вештачка интелигенција за сервис за луксузни ресторани и хотели кој автоматски ги анализира нивните проблеми, односно систем за контактирање на бизниси, потоа телефонски агент кој го заменува рецепционерот, асистенти за интернет страниците и самите веб страници. Сето ова според нивната идеја ја олеснува работата, не само во областа во туризмот, туку може да најде примена и во други дејности.

Градоначалникот Коњановски им честиташе за освоената награда и ја пофали нивната мотивираност да се борат со своите идеи пред предизвиците на модерното време, охрабрувајќи ги и нив и сите други млади да бидат успешни млади луѓе во креирањето на својата кариера и иднина, а дека Општина Битола ја давала поддршката и ќе продолжи да ја поддржува младината од градот, да работи на себе и за својот град.

Натпреварот беше во организација на Бреинстер Некст Колеџ (Brainster Next College) и НУ (NU) Академиите за талентирани средношколци.
Идејата на овој натпревар беше да се најдат најталентираните средношколци, оние кои ќе креираат милионски бизниси, решаваат проблеми и ќе го менуваат светот.

Видеолотарија Касинос Австрија останува доследна на својата силна опредеба за промоција и поддршка на уметноста. Во рамки на партнерството со Националната опера и балет, вечерва на големата сцена ќе биде изведена Шехерезада од Николај Римски-Корсаков.

На 5 декември 2025 со почеток во 20.00 часот на сцената на Националната опера и балет ќе се изведе балетот Шехерезада од Николај Римски-Корсаков. Балетот е базиран на мотивите од „Илјада и една ноќ“ и претставува еден од бисерите на светскиот балетски репертоар.

Диригент е Бисера Чадловска, кореографијата ја потпишува познатиот московски балет-мајстор Михаил Крапивин, а базирана е на оригиналната постановка на Михаил Фокин. Сценографијата е дело на Марија Ветероска, костимографијата на Маја Бурсаќ од Србија, а концерт-мајстор е Верица Ламбевска.

Во балетската претстава ќе настапат: Наташа Трендафилова-Гицев и Балаж Лочеи (Унгарија) заедно со првенците, истакнати солисти, балетскиот ансамбл и оркестарот на Националната опера и балет.

Поддршката на културните проекти претставува значаен дел од корпоративната стратегија на Видеолотарија Касинос Австрија. Веруваме дека културата е двигател на убавина, инспирација, духовност и заедништво – вредности што ја збогатуваат заедницата и го унапредуваат општествениот живот. Горди сме што стоиме зад настани кои ја подигнуваат културната сцена во земјата.

Општина Кривогаштани ја информира јавноста дека Подружница „Прилепско Поле“ – Прилеп интензивно спроведува активности за чистење и санација на одводниот канал „Блато“ во реонот на населеното место Боротино.

Денес градоначалникот Игор Каравилоски, заедно со директорот на Подружницата „Прилепско Поле“, г. Зоран Тодороски, и државниот инспектор од Дирекцијата за заштита и спасување, г. Јован Аврамоски, извршија теренски увид на работите на лице место.

Со оваа активност се обезбедува подобрен проток на водата, превенција од поплави и зголемена безбедност на земјоделските површини и локалната инфраструктура.

Работните активности ќе продолжат и во наредните денови, сè до целосно расчистување на каналската мрежа во Боротино.

Општина Кривогаштани изразува благодарност за посветената соработка и навремената поддршка од сите вклучени институции.

Од 24 до 31. декември платото пред Градскиот Саат во Прилеп ќе биде претворено во прекрасен новогодишен базар. Седум дена музички настапи, креативни активности и незаборавна забава за сите генерации.

Покровител на настанот е компанијата “ВИТАМИНКА”, која во годината која ја очекуваме одбележува 70 години постоење, а сега ќе внесе волшебство и празнична магија за сите.

Од општина Прилеп упатуваат покана до сите граѓани заедно да го започнеме најубавиот период од годината и заедно да ја испешеме најубавата Прилепска празнична приказна!

Во текот на наредните денови најавена е и прес конференција на која ќе бидат соопштени сите детали.

Тимот странски и домашни експерти презентираа дел од решенијата од процесот на изработка на физибилити студија за изградба на гондола на „Пелистер“.

Експертите од Словенија и Франција, како и домашните ги претстави претседателот на Советот Бојан Бојкоски, пред присутните советници, администрацијата на општината, планинари, туристички работници, здруженија и медиумите.

Екипата која ќе ја подготвува физибилити студијата за гондолата, за како што беше кажано еден потенцијален комплетен туртистички бисер за сите четири сезони, констатирала голем потенцијал на „Баба Планина“ со врвот „Пелистер“.

„Бевме на терен два-три пати, во сите услови и преку зима и преку лето за да ги видиме сите услови и потенцијали кои што ги нуди природата. Потенцијалот е огромен, заради тоа сме и овде, бидејќи мислиме дека луѓето се повеќе ја сакаат природата, но сепак треба некаква инфраструктура како би дошле до таа природа“ вели Франц Фурлан, експерт од Словенија, од компанината „Furlani“.

Тој кажа дека има повеќе опции од каде би тргнувала гондолата и дека денеска ќе се дискутираат и тие теми.

„Мислиме дека ваквиот проект е важен и затоа ги дискутираме можностите, како и тоа што е позитивно, а што би било негативно. Вие подобро знаете од нас, но ние можеме да дојдеме со некои идеи и опции и од технички и од финансиски аспект“ рече тој, кој заедно со неговиот колега Вансент Тасар од компанијата „Stem international“ од Франција имаат бројни искуства низ светот, а задачата им е да понудат инфраструктурни, финансиски, технички решенија.

Тој вели дека трендовите се да се користат еколошки решенија, а гондолите се такви, затоа што не се влегува со возила во националниот парк, а истовремено тие гондоли им овозможуваат на посетителите да уживаат во природата.

Физибилити студијата треба да ја покаже оправданоста, економските потенцијали и сето она што го очекуваме од гондолата која би се изведувала на „Пелистер“, рече градоначалникот на Битола, Тони Коњановски кој кажа дека издвоени се средства за изработка на таа студија.
„Во опција се повеќе патеки до горе. Почетна станица би била некаде во реонот на Дихово, тоа е едната опција, потоа постои локација и кај Ротино и Цапари, неколку патеки, но не подолги од 9 километри и целта би била со една попатна станица, која ние би сакале да е, бидејќи веќе има инфраструктура да биде кај „Копанки“ или „Молика“ и би одела до антена“ рече Коњановски.

Според него, целта е да се направи гондола која од една страна ќе ја збогати туристичката понуда, но од друга да се зачува природата.
„Основна цел е и да се зачува екологијата, биодиверзитетот на „Пелистер“, да не се уништува, едноставно со најеколошкото средство на електрична енергија да се искачиме и да уживаме во убавините на „Пелистер“ рече Коњановски.

Примерите како што кажа Коњановски, зборуваат дека изградбата на ваква гондола во други земји ја зголемиле посетеноста, односно туризмот десеткратно, од тоа што веќе го имале.

Сепак додаде дека ова е прв чекор и долг процес додека се реализира.