Вашето омилено место за разладување во тропските летни денови – Brunch Box Прилеп повторно подготвува незаборавна саботна вечер!

Оваа сабота уживајте во опуштена атмосфера, разладувачки коктели, свежи цедени сокови, неодоливи закуски и – настап во живо на момчето со прекрасен глас од Прилеп, Филип Николоски.

Со својот препознатлив глас и харизма, Филип ќе ве понесе низ незаборавен музички репертоар под отворено небо во прекрасната летна бавча на Brunch Box.

Очекувајте врвна услуга, промотивни пијалаци и позитивна енергија до доцна во ноќта!

Новина им е менито со богати и вкусни печени сендвичи и бургери, по цени кои одговараат за сечиј џеб. Тука се и неодоливите коктели, со еден збор има богат избор на храна и пијалоци за сечиј вкус.

Резервирајте навреме на тел.бр.: 078 845 442 Почеток: 21 часот!

Не пропуштај – оваа сабота, Brunch Box е твојата дестинација!

Антонио Пандовски од Прилеп, во средата (02.07) од пред Соборниот храм во Скопје, тргна на своето неверојатно патување – 600 километри до манастирот Острог, Црна Гора. Целта е благородна и хумана, а за да ја оствари на Антонио ќе му треба поддршка од сите нас. Секој чекор што го прави е за децата во Универзитетската детска клиника – Скопје.

Младиот прилепчанец за овој подвиг се подготвуваше неколку месеци, а за остварување на подвигот му беше потребна финансиска поддршка.

Фондација “ИЦЕ БЕГОВ” oбјави дека со гордост ќе го поддржи овој подвиг, кој младиот прилепчанец сака да го реализира во чест на неговите родители.

Повеќе граѓани го испратија утрово Антонио и му посакаа успешно, здраво и безбедно да стигне до целта.

Да му посакаме среќа, истрајност и успешно завршување на овој подвиг!

Во меѓувреме можете да го поддржите неговиот подвиг, преку донации за набавка на неопходна медицинска опрема за најмалите херои на следниот ЛИНК: https://fondacijaicebegov.org.mk/za-nashite-mali-heroi/?fbclid=IwY2xjawLUnidleHRuA2FlbQIxMABicmlkETFOUXA4QWRVYVpGYjZ4TUlGAR4ajFkKXLDP3C3snHMEWoLDvfw9x16SG45KfJLq1XknNgdO_pM7yL2zbJy8rQ_aem_ZvilWH9-G8r8DhfbzQq64A

или со повик на донаторските броеви: 143-460 (А1) и 143-403 (Телеком)

На територијата на државата активни се вкупно 3 пожари, а 1 е ставен под контрола – информираат попладнево од Центарот за управување со кризи.

Активни пожари:

Општина Прилеп: с. Бешиште (приземен пожар во квалитетна мешана шума); обновен е и кракот кај с. Градешница (Опш. Новаци)

Општина Македонски Брод: с. Црешнево (пожар во деградирана дабова шума и грмушки)

Општина Илинден: Ајватовски рид (пожар на површини со лозје)

Под контрола:

Општина Кочани: населба Трајаново Трло (сува трева и ниска стеблеста деградирана шума)

Од ЦУК информираат и дека пожарот кој во текот на вчерашниот ден беше активен во областа Три Багреми во Прилеп, каде гореше ниска вегетација, е целосно изгаснат.

На вчерашната седница на Комисијата за финансирање и буџет во Собранието се дискутираше за ребалансот на буџетот, каде пратеничките од ВМРО-ДПМНЕ, Билјана Кузманоска и од СДСМ, Јованка Тренчевска, разменија неколку реплики.

Притоа Кузманоска ја потсети Тренчевска на владеењето од СДСМ и погрешните чекори во областа на социјалната политика.

-Со години гледавме огромни испишани ставки на хартија од СДСМ, без ефект на терен. Сега, средствата се насочуваат таму каде што се навистина потребни – а тоа е одговорен и вистински пристап кон социјалната политика и младите и кон сите сегменти кои што се суштински важни во општеството – порача меѓудругото Кузманоска.

„Секој граѓанин ќе добие одговор. Навреме, точно и без чекање. Ќе воведеме нова услуга каде администрацијата, за првпат, ќе биде таа што ќе го бара граѓанинот, а не спротивно. Ставаме крај на молкот, одложувањата и бирократската ароганција. Ќе обезбедиме гарантиран максимум на чекање во институциите. Ќе постојат јасни граници и секое прекршување ќе се казнува. Почит за времето на граѓанинот ќе биде основна вредност на новата јавна администрација. Ќе воведеме Јавна листа со времиња на чекање по сите здравствени установи. Транспарентноста ќе стане стандард, пациентите ќе знаат каде ќе добијат најбрза услуга“, кажа Мицкоски.

Мицкоски истакна дека во образованието ќе се воведе предмет за изучување на вештачката интелигенција.

„Воведување предмет за изучување на вештачка интелигенција во образованието. Нема повеќе да учиме само за минатото, ќе ги подготвиме генерациите за иднината, за новата економија, за дигиталната ера што веќе тропа на вратата. Ова е визијата што ја градиме“, посочи Мицкоски.

Мицкоски потенцираше дека ова се темелите кои ги поставуваме.

„Не ветуваме дека ќе биде лесно. Но ветуваме дека ќе биде чесно и нема да биде срамно. Ќе биде наше. Ќе биде вистинско. И најважно, ќе биде за тебе“, заклучи Мицкоски.

Србинка сподели едно пријатно искуство, кое таа и нејзиното семејство го дожвеале во Прилеп на враќање од одмор од Грција.

Надежда Чортановиќ и семејството преку граничниот премин Меџитлија се упатиле кон дома, но на пат решиле да застанат и да го посетат нашиот град и да, единствено за да си купат вкусен прилепски бурек за доручек.

Но биле изненадени кога на каса не можеле да платат со картичка, па луѓето се почувствувале непријатно, но потоа следувало ново пријатно изненадување.

Во буркџилницата чекале на ред едно младо момче и еден по возрасен прилепчанец. Тие извадиле пари и им го платиле доручекот. Притоа српските туристи инсистирале кога ќе обезбедат денари да им ги вратат, но нивниот предлог бил одбиен од овие наши добранемерни соѓраѓани, со желба да им биде на здравје доручекот и среќен патот.

Објавата на Надежда на социјалните мрежи наиде на илјадници лајкови и стотици коментари од целиот Балкан.

Секоја чест за непознатите херои кои во оваа ситуација ја спасиле честа на Прилеп и прилепчани и успеале всушност да не’ претстават онакви какви што сме, гостопримливи и луѓе со големи срца.

Високите температури и животот без клима е речиси незамислив. Меѓутоа, штом ќе го земете далечинскиот управувач, се поставува друго прашање, колку ќе биде сметката за струја.

Дали навистина штедите струја со исклучување на климата кога не сте дома или подобро е да ја оставите климата да работи на иста температура цел ден?

Експертите велат дека системот за ладење на просторот најдобро функционира кога работи со полна брзина, а не кога работи во пократки интервали со помала брзина.

Поточно, подобро е да ја оставите климата да работи со полна моќност, кратко време, а потоа да ја исклучите кога ќе ја излади просторијата, отколку да ја оставите да работи цел ден на иста температура.

Во овој, полн интензитет на работа, клима уредот не само што ќе ви заштеди пари, туку и ќе ја избрка влагата од просторијата.

Исто така, кога се зборува за заштеди и клима, не можеме да го заобиколиме термостатот. Ако го поставите термостатот на клима уредот на повисока температура, да речеме дека разликата помеѓу температурата во просторијата и надворешната не е повеќе од седум степени, ќе заштедите многу.

Според некои податоци, клима уредите трошат три до пет проценти помалку енергија со секој степен повисок на термостатот.

Општина Ѓорче Петров направи нов, значаен чекор во унапредувањето на социјалната заштита и инклузијата на локално ниво. Денес е потпишан договор за грант со Министерството за социјална политика, демографија и млади и Светска банка, како дел од Третиот јавен повик за развој на социјални услуги, се вели во соопштението од општина Ѓорче Петров.

Партнер во реализацијата на проектот е Здружението за поддршка и третман на лица со аутистичен спектар и атипичен развој „Во мојот свет“ – Скопје, давател на лиценцирана социјална услуга со долгогодишно искуство.

Во рамки на овој проект, ќе се воспостави Центар за дневен престој и индивидуален третман на лица со попреченост, кој ќе овозможи стручна, персонализирана и континуирана поддршка за две целни групи: деца од 1 до 14 години, кои ќе добиваат рана интервенција и стручна поддршка за говорен, моторен и когнитивен развој и млади лица од 14 до 26 години, за кои ќе се реализираат индивидуални и групни програми за развој на социјални и животни вештини, самозастапување, физичка активност, вклучување во заедницата и подготовка за пазарот на труд.

Центарот ќе биде сместен во простории во сопственост на општината, кои ќе се адаптираат и опремат со современа опрема – вклучително и пристапен лифт, специјализиран мебел и технолошки помагала за пристапност и комуникација. Услугата ќе ја реализира стручен мултидисциплинарен тим составен од дефектолози, логопеди, психолози и други професионалци, под раководство на здружението.

-Со овој центар не само што создаваме пристап до стручна поддршка, туку градиме општина по мерка на сите – општина на солидарност, човечност и инклузија,- изјави градоначалникот Александар Стојкоски.

Општината ќе обезбеди координација, инфраструктурна поддршка и видливост на активностите. Со воспоставувањето на овој центар, Општина Ѓорче Петров демонстрира силна определба за градба на инклузивно и хумано општество, кое ги препознава и поддржува потребите на сите свои жители, особено најранливите категории.

Општината уште еднаш покажува дека е општина која препознава, разбира и дејствува во интерес на сите граѓани. Иницијативноста, заложбата и вредната работа на локалната самоуправа се клучен двигател за создавање подостоинствен живот за лицата со попреченост и нивните семејства.

Во просториите на Видеолотарија Касинос Австрија денес беше потпишан нов спонзорски договор со Кошаркарската федерација.

Соработката со КФСМ е континуитет на нашата заложба за унапредување на спортот во Македонија. Веруваме дека со здружени сили – играчи, навивачи, институции и компании – можеме да стигнеме до победа“, истакнуваат од Видеолотарија Касинос Австрија.

Претседателот на Кошаркарската федерација на Македонија -Томе Главчев ја изрази својата благодарност нагласувајќи дека Видеолотарија Касинос Австрија е меѓу првите компании кои уште веднаш реагираа на нивното барање за поддршка на федерацијата.

И потпретседателот- Младен Ѓуроски, ја изрази својата благодарност за поддршката, нагласувајќи ја важноста од вакви партнерства за развојот на македонската кошарка и спортот воопшто. Тој пред медиумите го претстави и дресот со аплицираното лого на Видеолотарија.

Видеолотарија Касинос Австрија најави дека со гордост и задоволство ќе биде дел од спортските натпревари на федерацијата, навивајќи заедно со сите кои веруваат во црвено-жолтите. Натпревари за кошаркарите се шанса да се покаже тимскиот дух и борбеност, а за нас како општествено одговорна компанија и нова можност да ја докажеме нашата поддршка и верба во кошаркарските успеси.

Денес на стартот од подготовките за новата сезона, Градскиот фудбалски клуб „ТИКВЕШ 1930“ од Кавадарци го одржа првиот прес по правземањето на клубот од страна на германскиот инвеститор Осман Таш, кој заедно со Градоначалникот Митко Јанчев и Општина Кавадарци ќе го водат клубот во иднина.

Пред почетокот на подготовките за новата натпреварувачка сезона, новиот газда акцент става на модернизација на тренажниот процес, професионален пристап кон фудбалерите, со максимална посветеност и влог во младите категории, за остварување на што подобри резултати во иднина, гледајќи го клубот во европските натпреварувања.

Исто така најави отварање на голем фан-шоп во центарот на Кавадарци во соработка со навивачката група Лозари-Исток.

Претседателот на клубот Миле Масларков изрази големо задоволство што повеќемесечните преговори со новиот инвеститор завршија со договор за соработка и е оптимист дека клубот во новата сезона ќе биде стабилен прволигаш.

Новиот Директор на клубот – Емир Шабани најави нови фудбалски имиња и поголем ростер на играчи како и неколку меѓународни засилувања.

ГФК Тиквеш подготовките ги започнува денес 03.07.2025 година во 18:00 часот на Градскиот стадион во Кавадарци, а од 15 до 25 Јули заминуваат на подготовки во Турција.