Вчера се одигра пелагониското дерби во женската ракометна Супер лига, помеѓу екипите на ЖРК Прилеп и ЖРК Пелистер во Битола. Натпреварот кој се играше гол за гол, со постојано преземање на водството на двете страни, им припадна на девојките од ЖРК Прилеп со резултат 21:22 (11:9 на полувремето). Покрај воочливата помош од судиската двојка од Гостивар за домашната екипа, нашите девојки храбро одиграа и издвојуваа значајна победа. Со ова девојките од ЖРК Прилеп докажаа дека се за класа подобри и можат да се носат и против два противници истовремено. Им честитаме за победата.

Веќе во среда со почеток од 19:00 часот, во спортската сала во СОУ “Ристе Ристески – Ричко” нашите девојки ќе ги одмерат силите со Вардар, а викендов следува важно гостување во Гевгелија, каде победата е императив.

Бензините и дизелот поевтинуваат за 3 денари по литар, одлучи денеска Регулаторната комисија за енергетика

Малопродажните цени на ЕУРОСУПЕР БС-95, на ЕУРОСУПЕР БС-98, на ЕУРОДИЗЕЛ (Д-Е V) и на Екстра лесното масло за домаќинство (ЕЛ-1), се намалуваат за 3,00 ден/лит во однос на цените утврдени со Одлуката од 31.10.2016 година и со тоа малопродажната цена на ЕУРОСУПЕР БС-95 изнесува 60,00 ден/лит, малопродажната цена на ЕУРОСУПЕР БС-98 изнесува 62,00 ден/лит, малопродажната цена на ЕУРОДИЗЕЛ (Д-Е V) изнесува 47,00 ден/лит, додека малопродажната цена на Екстра лесното масло за домаќинство (ЕЛ-1) изнесува 35,50 ден/лит.

Уште едно застрашувачко видео од Нов Зеланд. Силниот потрес од 7,8 степени по Рихтер кршеше се, рушеше и ги креваше колите од земја. Погледнете што се случуваше.

“Ако се фајчаш, фати се за…” и  “Бубамарите” се двете претстави кои премиерно ќе ги прикаже Младинското драмско студио ,,Тетар Чин 4 сцена 5″ по повод 10 години од постоењето.

,,Ако се фаќаш, фати се за…” МДС премиерно ќе ја прикаже на 15 ноември. Се работи за водвиљ претстава –комедија, која е своевидна локализирана адаптација на комедијата “Оскар” од францускиот комедиограф Клод Мание.

-Дејството на оваа, адаптирана комедија, за што адаптацијата ја направи Коле Ангеловски, се случува тука во нашиот град. Незгодите што му се случуваат на главниот лик, г. Трајко, кој е сопственик на пиварница, се фокусот околу кој ќе се одвиваат настаните на сцената. Се започнува со едноставно недоразбирање, за потоа да се случи општиот хаос во домот на Трајко – велат од МДС:

Во претставата играат Кире Најдоски, Бобан Смилкоски, Евгенија Јакимоска, Надица Дојкоска,  Сара Спиркоска, Анастасија Конеска, Давор Петровиќ, Елена Соколоска, Виктор Мирчески и стефан Спироски.

“Бубамарите” е комедија работена по текстот од англискиот автор Тони Лејтон. Текстот првпат се поставува во Македонија и добитник е на многу награди.

-Уникатен е, со специфичен начин на хумор, а обработува интересни теми како што се стереотипите и предрасудите кон повозрасната популација. Селската театарска трупа на Горно Сливово ги изгуби сите мажи. Трупата е пред распаѓање, кога една млада режисерка, Франческа Дел Марко и нуди помош. Ги убедува членовите на трупата да се пријават на фестивал со претстава која самата ја напишала. Но, драмата на Франческа е контроверзна и ,,моралните,, власти се обидуваат да ја спречат претставата. На сцената ќе се види дали ќе успеат во тоа? – потенцираат од МДС.

Во оваа претстава играaт Елена Соколоска, Марија Димеска, Валерија Чавлеска, Ева Тумановска, Ева Димоска, Викторија Цветаноска, Михаела Насеска, Евгенија Јакимоска и Сара Спиркоска.

Премиерата е закажана за 23 ноември.

И кога се спомнуваат 10 години од постоењето на МДС, кое работи под патронат на Центарот за култура, тогаш треба да се каже дека зад студиото се бројни претстави, а пак моментално работи и училиштето за театар во кое тајните на театарската ументост ги совладуваат ученици на возраст од 6 до 25 години.

По повод големиот христијански празник Св. Козма и Дамјан во повеќе храмови во Прилеп се одржа Божествена литургија. Градоначалникот, Марјан Ристески, кој денеска посети повеќе цркви и манастири во околината на Прилеп кои го прославуваат овој ден, на сите верници им го честиташе празникот.

„На сите православни верници од Прилеп и Македонија им го честитам денешниот празник Св. Козма и Дамјан, и им посакувам многу здравје, бериќет и среќа. Исто така да им се честити именденот и славата на оние кои го одбележуваат денешниот ден. Сакам да потенцирам дека во еден од најубавите манастири во Македонија, Св. Архангел Михаил, кој се наоѓа во близина на прилепската населба Варош се чуваaт и дел од моштите на Св. Козма и Дамјан и оние кои ги немаат видено ги поканувам да дојдат во овој манастир“, истакна Марјан Ристески, градоначалник на Прилеп.

Инаку според преданието на православната црква Св. Козман и Дамјан по професија биле лекари, а помеѓу народот се нарекувани и бесребреници затоа што сите ги лечеле бесплатно.

Во Кавадарци во петокот се одржа Државното првенство во пинг понг за средни училишта,во организација на ФУСМ.

На првенството учествуваа и тројца играчи од Гимназија Мирче Ацев и тоа: Александар Рикалоски, Бојан Илиески и Христијан Иваноски, под раководство на професор Тони Атанасоски. Одличен резултат постигна Александар Рикалоски кој стигна во финале, но тука беше запрен од Филип Костадиновски од Крива Паланка. Другите двајца играчи, Илиески и Иваноски се пласираа во четвртфинале.

Со освојување на второто место Рикалоски заедно со шампионот Костадиновски се стекнаа со право на учество на спортски камп кој секоја година за најдобрите го овозможува Агенција за млади и спорт.

Ноќва околу 3.00 часот во Прилеп, на ул.„Сотка Ѓорѓиоски“ настанал пожар во автомобил „фолксваген голф 5“ со прилепски регистарски ознаки, паркирано од сопственикот С.Б.(34) околу 17 часот во дворот на куќата.

Пожарот бил забележан од страна на такси-возач, кој веднаш пријавил во Територијалната противпожарна единица Прилеп и го разбудил оштетениот.

Од страна на ТППЕ-Прилеп пожарот бил локализиран и било спречено негово проширување на целото возило и на куќата. Од пожарот настанало оштетување т.е. скршени се стаклата од прозорец и стопени се ролетните.

Увид на местото на настанот извршила увидна екипа на СВР Битола. Се преземаат мерки за утврдување на причините за настанување на пожарот и за целосно расчистување на случајот.

Ако често знаете да шетате со погледот нагоре секогаш кога небото е јасно и полно со ѕвезди, ова е феномен кој не смеете да го пропуштите.

Денес ќе бидеме сведоци на ретка супермесечина, односно оваа година првпат по цели 70 години, Месечината ќе изгледа за 14% поголема и дури 30% посјајна од вообичаената полна Месечина.

Причината за појавата на овој феномен е нејзината близина до Земјата. Последен пат Месечината била толку блиску до Земјата во 1948 година, додека следната ваква Месечина може да ја очекуваме на 25 ноември 2034 година.

Ваквата Супермесечина е толку ретка заради фактот што Месечината има елипсовидна орбита, а едната страна е за 48.280 километри поблиску до Земјата.

Кога Месечината ќе се најде најблиску до нас и ќе дојде до израмнување Земја-Месечина-Сонце, таа изгледа многу поголема и посјајна.

Супермесечината на што денес ќе се појави е посебна бидејќи во моментот на израмнувањето таа ќе биде најблиску до Земјата и ќе биде полна, што прави ние да ја перципираме како многу поголема и посјајна.

Овие господови лекари наречени и Свети бесребреници имаат два празника, на 1 јули (Свети врачи – летни) и на 1 ноември (според стариот календар).
Именден празнуваат: Кузман, Кузе, Дамјан, Даме…

Меѓу поголемите есенски празници што се празнуваат со домашни служби спаѓа и празникот на Светите врачи Кузман и Дамјан. Овој празник меѓу народот е познат како Свети врачи или едноставно како Световрача. Зборот врач (враж) и денес во некои словенски јазици (на пр. во рускиот јазик) значи лекар. Овие господови лекари наречени и Свети бесребреници имаат два празника на 1 јули (Свети врачи – летни) и на 1 ноември (според стариот календар). Наречени се бесребреници или безмитни затоа што бесплатно ги лекувале сиромашните болни, а среброто е поим за алчност. Среброљубец се вели за човек алчен за пари.
За двајцата браќа исцелители Кузман и Дамјан има малку податоци како за нивното раѓање така и за нивната смрт. Според една верзија родени се во провинцијата Асија во Мала Азија. Татко им бил паганин, а мајка им христијанка. Набргу татко им умрел, а мајка им Теодотија ги воспитувала во вистински христијански дух. Останувајќи верни на ветувањето што ѝ го дале на мајка си, а за да бидат што повеќе корисни, двајцата браќа го изучувале лекарскиот занает, ги научиле исцелителните својства на сите билки и се афирмирале како добри лекари. Господ ги благословил и тие секогаш лечеле повикувајќи се на божјата сила. Се откажале од овоземните богатства, лекувале бесплатно според Господовата заповед: „Болни лекувајте, лепрозни очистувајте, мртви воскреснувајте, бесови изгонувајте! Бесплатно добивте, бесплатно давајте“. (Матеј, 10, 8) Поради тоа и двајцата се наречени бесребреници.

Житието раскажува дека еднаш некоја жена по име Паладија, што долго време била болна од некоја неизлечлива болест и што за лекување потрошила големо богатство, ги повикала и овие двајца лекари. Тие со Божја помош ја излекувале и таа сакала да ги награди. Но бидејќи двајцата браќа биле заколнати да не примаат никакви дарови тоа го одбиле. Сепак, помладиот Дамјан, по многу молби и откако го заколнала во Света Тројца, зел три јајца како симбол на светото тројство. Кога за тоа разбрал постариот Кузман многу се налутил и пред селаните побарал кога ќе умрат да не ги погребуваат во ист гроб, туку Дамјан бидејќи погрешил и ја подгазил дадената заклетва да биде погребан во друг гроб. Кузман умрел порано, а кога умрел и помладиот Дајман селаните решиле дека, сепак, казната што ја одредил Кузман е престрога и дека Дамјан трите јајца не ги зел како надоместок за лекувањето туку како симбол на Светата Троица. Поради тоа, но и затоа што заедно лекувале, ги погребале во ист гроб. Подоцна над гробот била изградена црква, а од моштите на светите Врачи се случувале многу чуда и многу болни оздравеле.

Според друга верзија родени се во Рим. И во однос на нивната смрт, исто така, податоците се непрецизни, односно различни. Според едно предание умреле од своја смрт во Мала Азија во местото Ферман. Според друго предание, пак, откако биле наклеветени пред царот дека се занимаваат со маѓии, и откако го излекувале и царот по што тој станал христијанин, нивниот учител завидувајќи им на славата ги однесол во планината да берат лековити билки и ги каменувал. Ако се земе предвид дека во историјата нема податок дека некој цар го примил христијанството од овие причини, ова предание останува малку веројатно. Според трето предание загинале во Рим во 284 година при едно големо прогонување на христијаните.
Овие свети браќа, Господови исцелители освен за време на животот се прославиле и после смртта. Имено кога на некој човек при спиењето му влегла змија низ устата и кога му се заканувала сигурна смрт се спасил со тоа што во претсмртната агонија ги повикал св. Кузман и Дамјан. И така Господ и по смртта ги прославил тие што го славеле во текот на целиот свој живот.
Според некои истражувачи нивниот спомен се празнува два пати во годината, веројатно затоа што едниот од браќата умрел на 1 јули, а другиот на 1 ноември. Меѓутоа има некои истражувачи што сметаат дека се работи за две или три личности исцелители со исти имиња Кузман и Дамјан, поради што доаѓа и до мешање на нивните празници.

На иконите светите врачи Кузман и Дамјан се претставени заедно со крстови во рацете или, со кутивче со лекови и со лажиче со кое на болните бесплатно им давале од лековите.
Во народниот живот овој празник повеќе го празнуваат оние што се занимаваат со народна медицина: лекување, баење, лекување со билки итн. Тие на овој празник не работат зашто во спротивно нема да им фати лекот. Култот кон овие светци бил изразен во повеќе места на Македонија. На пр. има села што носат името на светите врачи, (Светораче, Кичевско) во селото Едуарци, во минатото се одржувал голем собир, а градот Сандански во пиринскиот дел на Македонија порано го носел името Свети Врачи.

Мала црква посветена на светите врачи Кузман и Дамјан има во скопското село Говрлево. Во црквата има и света вода, а според преданието оваа црква е изградена откако на некој човек му се сонило дека на местото каде што извира водата треба да се изгради црква. Според други преданија Јустинијан Први во 6 век на тоа место бил излекуван. До црквата има уште една чешма за која се верува дека подмладува поради што, овде луѓето доживуваат длабока старост.

Денешниот ден по народното верување е добар за молитва за оздравување. Постои и верување дека денес е добро да се работат тешки физички работи и дека без потреба не треба да се излегува од дома.

– Грешките се составен дел, нема безгрешни судии

Најактивен фудбалски судија од градов во последно време е Ирена Велевачкоска. Покрај на терените од домашната сцена, амблемот од ФИФА и овозможува да дели правда и на натпреварите низ Европа. Последен меѓународен настап беше квалификацискиот турнир во Република Ирска, за женски репрезентации до 17 години. Главен судија беше на дуелите Р. Ирска – Ф. Острови (6-0) и Ф. Острови – Белорусија (2-1), а четврти на Р. Ирска – Белорусија (2-0).

Како беше на стадионот во Корк?

– Одлично поминав, со колешки од Турција, Швајцарија и Ирска. Како порано, бев два меча главна, еден четврти судија. Веќе првата оценка што ја добив е одлична, а се надевам дека и втората ќе биде иста, затоа што судењето беше без грешка.

Како гледаш на судиските грешки?

– Составен дел од играта. Нема безгрешни судии. Само грешките да не се со намера.

Како помина на Ф. Острови – Белорусија (2-1), изненадување?

– Токму изненадување. Многу тежок натпревар, бидејќи имаа исти бодови и се бореа за трето место. Имаше многу прекршоци и желба за победа од двете страни.

Често делегирана си и на домашната сцена?

– Сум на листата од Првата и Втората лига за мажи за четврти судија. Судам во младинските лиги, Женската, се до Општинската лига.

Споредбата овде и во странство?

– Почнувајќи од инфраструктурата до организацијата, културата, квалитетот на фудбалот, има голема разлика. Правилата се исти, но нужно е прилагодувањето.

Судењето на машки екипи?

– Во почетокот беа скептични да видат женско да им дели правда, но со времето тоа стана најнормално. Можеби играчите чувствуваат некоја умереност, за разлика од колегите. Полека и ова исчезнува, оти сите бараат квалитетно судење. Никој не е поштеден од критики. Се трудам да бидам на висина на задачата.

Твоите планови и амбиции?

– После доброто судење во Ирска се надевам дека напролет ќе ја добијам најквалитетната елитна група да се доближам кон амбициите – Европско првенство. Полека, со многу мечеви, тренинзи и добри оценки достижно е Европското.

Извор: Неделник Зенит